Ani Efɔŋ Eye Kunim?

SUSUMƆ ni ayɔɔ akɛ jeŋ muu fɛɛ mpleshii ko kã hewalɛ kpakpa kɛ hewalɛ fɔŋ teŋ lɛ eha niŋmalɔi kɛ jeŋ nilelɔi eka amɛyiŋ amɛwie nibii babaoo yɛ yinɔsane be fɛɛ mli. Shi kɛlɛ, wolo ko yɛ ní anɔkwa saji ni kɔɔ ta ni kã Nyɔŋmɔ kɛ Abonsam teŋ he lɛ yɔɔ mli. Nakai wolo lɛ ji Biblia lɛ. Ehaa saji ni kɔɔ mpleshii nɛɛ he lɛ feɔ faŋŋ, ni ekɛ gbɛ ni wɔɔtsɔ nɔ ni wɔle mɔ diɛŋtsɛ ni eye kunim lɛ haa.

Beni abɔ klɛŋklɛŋ nuu kɛ yoo lɛ sɛɛ etsɛɛɛ lɛ, mumɔŋ bɔɔ nɔ ko ní anaaa lɛ, Satan Abonsam tswa Nyɔŋmɔ nɔyeli lɛ mpoa. Yɛ mɛɛ gbɛ nɔ? Kɛtsɔ ŋaa gbɛ nɔ ni etsɔ ewie akɛ, Nyɔŋmɔ etsĩ nibii kpakpai ni ebɔɔ nii lɛ baaná lɛ anaa, ni ákɛ adesai baanyɛ aná shihilɛ kpakpa mli ŋɔɔmɔ kɛ amɛbɛ ekwɛmɔ shishi.—1 Mose 3:1-5; Kpojiemɔ 12:9.

Sɛɛ mli yɛ blematsɛ Hiob gbii lɛ amli lɛ, Satan tée sane kroko shi. Akɛni Satan miitao afite emuuyeli mli ni Hiob hiɛ kɛha Nyɔŋmɔ lɛ hewɔ lɛ, ewie akɛ: “Akɛ hewolo haa yɛ hewolo najiaŋ, ni nɔ fɛɛ nɔ ní mɔ ko yɔɔ lɛ eŋɔhaa yɛ esusuma hewɔ!” (Hiob 2:4) Mɛɛ sane ni awieɔ kɛkɔɔ mɔ fɛɛ mɔ he enɛ ji nɛkɛ! Satan kɛ yiŋkɔshikɔshifeemɔ ba emuuyeli mli ni adesa fɛɛ adesa aaahiɛ lɛ he kɛtsɔ wiemɔ ni awieɔ kɛkɔɔ mɔ fɛɛ mɔ he ni ji “adesa ko” (NW) ni ekɛtsu nii, yɛ nɔ najiaŋ ni ekɛ Hiob gbɛi diɛŋtsɛ aaatsu nii lɛ nɔ. Yɛ gbɛ kroko nɔ lɛ, eetsɔɔ akɛ: ‘Gbɔmɔ baafee nɔ fɛɛ nɔ ni eeenyɛ koni ekɛbáa ewala yi. Ha mi hegbɛ lɛ, ni manyɛ matsi mɔ fɛɛ mɔ kɛjɛ Nyɔŋmɔ he.’

Abaanyɛ ale mɔ ni eye kunim yɛ ta ni kã Nyɔŋmɔ kɛ Abonsam teŋ lɛ kɛtsɔ hetoo ni aaaná aha sanebimɔi enyɔ ni ji akɛ: Ani gbɔmɔ enyɛ eye lɛ diɛŋtsɛ ehe nɔ yɛ omanyeyeli mli? Ani Abonsam enyɛ etsi mɔ fɛɛ mɔ kɛjɛ anɔkwa Nyɔŋmɔ lɛ he? lɛ nɔ.

Ani Adesai Baanyɛ Aye Amɛ Diɛŋtsɛ Amɛhe nɔ yɛ Omanyeyeli Mli?

Adesai kɛ afii akpei abɔ eka nɔyelii srɔtoi abɔ amɛkwɛ. Aka nɔyelii srɔtoi babaoo, tamɔ maŋtsɛmɛi anɔyeli, nɔyelɔi akuu, demokrase, mɔ kome nɔyeli, Fasist nɔyeli, kɛ Komunist nɔyeli akwɛ yɛ bei ni eho lɛ amli. Ani anɔkwale ni eji akɛ atee nɔ aka nɔyelii srɔtoi akwɛ lɛ emaaa nɔ mi akɛ nɛkɛ gbɛ̀i srɔtoi ni atsɔɔ nɔ ayeɔ nɔ nɛɛ ejaaa kɛmɔ shi?

H. G. Wells ŋma yɛ A History of the World, ni akala yɛ afi 1922 lɛ mli akɛ: “Romabii lɛ na amɛhe akɛ gbɔmɛi ni kɛ amɛhe ewo maŋnɔkwɛmɔ gbɛjianɔtoo ni da he kaa-kɛ-kwɛmɔ mli ni amɛleee.” Etsa nɔ akɛ: “Maŋnɔkwɛmɔ gbɛjianɔtoo lɛ tsakeɔ be fɛɛ be, ejeee nɔ ni ma shi shiŋŋ. Yɛ shishinumɔ ko naa lɛ, kaa-kɛ-kwɛmɔ lɛ yeee omanye. Yɛ shishinumɔ kroko naa lɛ, kaa-kɛ-kwɛmɔ lɛ bako naagbee, ni ŋmɛnɛ lɛ Europa kɛ Amerika miibɔ mɔdɛŋ lolo akɛ amɛaaná tsabaa amɛha jeŋ muu fɛɛ naagba ni yɔɔ hwanyaŋŋ ní Romabii lɛ kɛkpe klɛŋklɛŋ kwraa ni kɔɔ maŋnɔkwɛmɔ he lɛ.”

Nɔyeli kaa-kɛ-kwɛmɔ lɛ tee nɔ lolo yɛ afii ohai 20 lɛ mli. Nakai afii oha lɛ ba naagbee kɛ demokrase nɔyeli, ni ená nɔkpɛlɛmɔ fe be fɛɛ ni eho. Awieɔ akɛ demokrase ji maŋnɔyeli ni ŋmɛɔ mɔ fɛɛ mɔ gbɛ koni ená gbɛfaŋnɔ yɛ nɔyeli lɛ mli. Shi ani demokrase etsɔɔ akɛ adesai baanyɛ aye amɛhe nɔ yɛ omanyeyeli mli ni Nyɔŋmɔ yelikɛbuamɔ bɛ mli? Jawaharlal Nehru, ni ji tsutsu India maŋsɔɔlɔ nukpa lɛ wie demokrase he akɛ ehi, shi ekɛfata he akɛ: “Mikɛɛ nakai ejaakɛ gbɛjianɔtoi krokomɛi lɛ ehiii kwraa.” Tsutsu French nɔyelɔ Valéry Giscard d’Estaing kɛɛ akɛ: “Wɔmiiye jaramɔ shihilɛ ni demokrase najiaŋdamɔlɔi kɛba lɛ he odase.”

Yɛ afii ohai enumɔ D.Ŋ.B. po lɛ, Hela jeŋ nilelɔ Plato yɔse fatɔɔ yɛ demokrase gbɛ ni atsɔɔ  nɔ ayeɔ nɔ lɛ he. Taakɛ wolo ni ji A History of Political Theory lɛ tsɔɔ mli lɛ, etutua “nilee kɛ hesaa ni maŋkwralɔi lɛ bɛ, ni ji naagba titri ni haoɔ demokrase nɔyelii lɛ.” Maŋkwralɔi ni yɔɔ ŋmɛnɛ lɛ ateŋ mɛi babaoo haoɔ yɛ bɔ ni ewa waa akɛ aaaná aŋkroaŋkroi ni yɔɔ nilee ni he esa koni amɛsɔmɔ yɛ nɔyeli mli lɛ he. The Wall Street Journal lɛ kɛɛ akɛ, gbɔmɛi lɛ “amli fuɔ hiɛnyiɛlɔi ni nyɛɛɛ nɔ ko afee yɛ naagbai wuji ni amɛkɛkpeɔ lɛ he lɛ.” Etsa nɔ akɛ: “Hiɛnyiɛlɔi lɛ ayiŋ ni amɛnyɛɛɛ amɛkpɛ kɛ amɛjeŋba ni ekpɔtɔ ni gbɔmɛi lɛ naa yɛ be mli ni amɛkwɛɔ amɛ gbɛ kɛha gbɛtsɔɔmɔ lɛ feɔ amɛ taŋ.”

Agbɛnɛ susumɔ Maŋtsɛ Salomo ni hi shi yɛ blema Israel lɛ nɔyeli lɛ he okwɛ. Yehowa Nyɔŋmɔ ha Salomo nilee ni ekaaa. (1 Maŋtsɛmɛi 4:29-34) Te Israel maŋ lɛ tee nɔ yɛ Salomo afii 40 nɔyeli lɛ shishi eha tɛŋŋ? Biblia lɛ haa hetoo akɛ: “Yuda kɛ Israel yi fa babaoo, tamɔ ŋshɔnaa shia kɛ falɛ, amɛyeyeɔ nii, amɛnunuɔ dãai, ni amɛmli filiɔ amɛ.” Sane lɛ hu kɛɔ akɛ: “Ni Salomo yinɔ lɛ fɛɛ lɛ Yuda kɛ Israel hi shi shweshweeshwe, mɔ fɛɛ mɔ yɛ eweintso shishi kɛ egbamitso shishi, kɛjɛ Dan kɛyashi Beersheba.” (1 Maŋtsɛmɛi 4:20; 5:5) Akɛni maŋtsɛ nilelɔ ko ni anaa lɛ lɛ miiye Israel maŋ lɛ nɔ akɛ Yehowa Nyɔŋmɔ ni ji Nɔyelɔ ni Nɔ Kwɔ Fe Fɛɛ ni anaaa lɛ lɛ najiaŋdamɔlɔ hewɔ lɛ, amɛná shweshweeshwe shihilɛ, shweremɔ kɛ mlifilimɔ ni eko kɛ lɛ yeee egbɔ mli ŋɔɔmɔ.

Kwɛ srɔtofeemɔ kpele ni yɔɔ adesai anɔyeli kɛ Nyɔŋmɔ nɔyeli teŋ! Ani mɔ ko baanyɛ ekɛ anɔkwayeli akɛɛ akɛ Satan eye kunim yɛ sane ni kɔɔ nɔyeli he lɛ mli? Dabi, ejaakɛ gbalɔ Yeremia wie yɛ gbɛ ni ja nɔ akɛ: “Yehowa, mile akɛ gbɔmɔ gbɛ bɛ lɛ diɛŋtsɛ edɛŋ, ni adesa ni nyiɛ nɛɛ, bɔ ni eeetsɔ ejaje enajifaamɔi eha lɛ, ebɛ edɛŋ.”—Yeremia 10:23.

Ani Satan Baanyɛ Etsi Mɔ Fɛɛ Mɔ Kɛjɛ Nyɔŋmɔ He?

Ani Satan eye omanye yɛ wiemɔ ni ewie akɛ ebaanyɛ etsi mɔ fɛɛ mɔ kɛjɛ Nyɔŋmɔ he lɛ mli? Bɔfo Paulo tsĩ hii kɛ yei anɔkwafoi babaoo ni hi shi kɛtsɔ Kristofoi abe lɛ hiɛ lɛ atã yɛ Hebribii a-Wolo lɛ yitso 11 lɛ mli. Kɛkɛ ni ejaje akɛ: “Mináŋ mihe dekã bɔ ni mikɛaagba Gideon kɛ Barak, Samson kɛ Yefta, David kɛ Samuel hu, kɛ gbalɔi lɛ ahe sane.” (Hebribii 11:32) Paulo tsɛ Nyɔŋmɔ tsuji anɔkwafoi nɛɛ yɛ gbɛ ni yɔɔ mlɛo nɔ akɛ “odasefoi babaoo ni tamɔ atatu.” (Hebribii 12:1) Hela wiemɔ ni akɛtsu nii yɛ biɛ akɛ “atatu” lɛ etsɔɔɔ atatu ko ni etse ehe ni husu yɔɔ elɛɛmɔ kɛ esu he, shi moŋ etsɔɔ atatui babaoo ni bɛ henɔ su ko. Enɛ sa jogbaŋŋ, ejaakɛ Nyɔŋmɔ tsuji anɔkwafoi ni hi shi yɛ blema lɛ ayi fa babaoo aahu akɛ amɛtamɔ atatui babaoo. Hɛɛ, yɛ afii ohai abɔ ní eho lɛ amli fɛɛ lɛ, gbɔmɛi babaoo ni aleee amɛyibɔ kɛ nihalamɔ mli heyeli ni amɛyɔɔ lɛ etsu nii ni amɛhala akɛ amɛbaafee toiboo amɛha Yehowa Nyɔŋmɔ.—Yoshua 24:15.

 Mɛni wɔnaa yɛ wɔgbii nɛɛ amli? Yɛ yiwaa kɛ shitee-kɛ-woo ni mli wawai ni Yehowa Odasefoi kɛkpe yɛ afii ohai 20 lɛ mli lɛ fɛɛ sɛɛ lɛ, amɛyifalɛ lɛ etee hiɛ kɛyashɛ nɔ ni fe akpekpei ekpaa yɛ jeŋ fɛɛ. Mɛi aaafee akpekpei nɛɛhu hu kɛ amɛ bɔɔ, ni amɛteŋ mɛi babaoo kɛ faishitswaa miitsu nii koni amɛná amɛkɛ Nyɔŋmɔ teŋ wekukpaa ni yɔɔ gbagbalii.

Nyɔŋmɔ diɛŋtsɛ Bi, Yesu Kristo kɛ hetoo ni fe fɛɛ kɛha Satan wiemɔ akɛ ebaanyɛ etsi adesai kɛjɛ Yehowa he lɛ ha. Sɛŋmɔtso nɔ piŋmɔ ni naa wa waa po nyɛɛɛ afite emuuyeli mli ni ehiɛ lɛ. Beni Yesu muɔ enaagbee mumɔ lɛ, ebo akɛ: “Ataa, odɛŋ mituɔ mimumɔ miwoɔ nɛɛ.”—Luka 23:46.

Satan bɔɔ mɔdɛŋ koni eha adesai abaje ekudɔmɔ shishi kɛtsɔ nɔ fɛɛ nɔ ni yɔɔ enyɛmɔ mli ni ekɛtsuɔ nii lɛ nɔ—kɛjɛ kaai anɔ kɛyashi yiwaa ni ekɛbaa amɛnɔ tɛɛ lɛ nɔ. Beni ekɛ “heloo lɛ sɛɛdii nii lɛ kɛ hiŋmɛii lɛ asɛɛdii nii lɛ kɛ shihilɛ lɛ mli hewoo lɛ” tsuɔ nii koni ekɛka mɛi lɛ, ebɔɔ mɔdɛŋ akɛ eeetsĩ amɛnaa loo ni eeelaka amɛ kɛjɛ Yehowa he. (1 Yohane 2:16) Satan ‘eshwila mɛi ni heee yeee lɛ ajwɛŋmɔi hu koni Kristo anunyam sanekpakpa lɛ la ní tsoɔ lɛ akakpɛ miiha amɛ.’ (2 Korintobii 4:4) Ni bɔni afee ni Satan atsu oti ni ma ehiɛ lɛ he nii lɛ, eshashaooo shi akɛ ebaatsɔ hegbeyeiwoi anɔ ní ekɛ gbɔmɛi ahe gbeyeishemɔ atsu nii.—Bɔfoi lɛ Asaji 5:40.

Shi kɛlɛ, Abonsam nyɛɛɛ mɛi ni yɔɔ Nyɔŋmɔ gbɛfaŋ lɛ anɔ kunim eye. Amɛbale Yehowa Nyɔŋmɔ ni ‘amɛsumɔɔ lɛ kɛ amɛtsui muu fɛɛ kɛ amɛsusuma muu fɛɛ kɛ amɛjwɛŋmɔ muu lɛ fɛɛ.’ (Mateo 22:37) Hɛɛ, Yesu Kristo kɛ adesai ni fa babaoo lɛ anɔkwayeli ni gbugbãaa lɛ tsɔɔ Satan Abonsam nɔ kunim kpele ni aye.

Mɛni Baaba Wɔsɛɛ?

Ani nɔyelii ni adesai kaa amɛkwɛɔ lɛ baaya nɔ kɛyashi naanɔ? Gbalɔ Daniel gba akɛ: “Nɛkɛ maŋtsɛmɛi nɛɛ ayinɔ lɛ Nyɔŋmɔ ni yɔɔ ŋwɛi lɛ aaatee maŋtsɛyeli ko shi ama shi ni efiteŋ dɔŋŋ kɛaatee naanɔ, ni ashiŋ maŋtsɛyeli nɛɛ ahaŋ maŋ kroko; eeejwara maŋtsɛyelii nɛɛ fɛɛ wɔtsɔwɔtsɔ, ni eeekpata amɛhiɛ, shi lɛ diɛŋtsɛ lɛ eeedamɔ shi kɛaatee naanɔ.” (Daniel 2:44) Maŋtsɛyeli ni Nyɔŋmɔ ni yɔɔ ŋwɛi lɛ teeɔ lɛ shi ama shi lɛ ji ŋwɛi nɔyeli ni enɔyelɔ ji Yesu Kristo. No nɔŋŋ ji Maŋtsɛyeli ni Yesu tsɔɔ ekaselɔi lɛ ni amɛsɔle yɛ he lɛ. (Mateo 6:9, 10) Nakai Maŋtsɛyeli lɛ baakpata adesai anɔyelii lɛ fɛɛ ahiɛ yɛ “Nyɔŋmɔ Ofe lɛ gbi wulu lɛ nɔ ta [ni baa] lɛ” mli, ni ebaasa shikpɔŋ muu lɛ fɛɛ he.—Kpojiemɔ 16:14, 16.

Mɛni baaba Satan nɔ? Biblia lɛ tsɔɔ nɛkɛ nifeemɔ ni baaba yɛ wɔsɛɛ be mli nɛɛ mli akɛ: ‘Yehowa bɔfo ko mɔ drako lɛ, blema onufu lɛ ni ji diabolo, Abonsam kɛ Satan lɛ, ni efi lɛ afii akpe, ni eŋɔ lɛ ewo bu kwɔŋkwɔŋ lɛ mli, eŋa eyi ni esɔo naa koni ekashishiu jeŋmaji lɛ dɔŋŋ kɛyashi beyinɔ ni aaagbe afii akpe lɛ naa.’ (Kpojiemɔ 20:1-3) Beni akɛ Satan ewo bu kwɔŋkwɔŋ, ni ji shihilɛ mli ni enyɛŋ nɔ ko efee lɛ mli lɛ, no sɛɛ dani Yesu Kristo Afii Akpe Nɔyeli lɛ baaje shishi.

Mɛɛ shihilɛhe ni miishɛɛ yɔɔ mli shikpɔŋ nɛɛ baatsɔ nɛkɛ! Awuiyeli kɛ mɛi ni kɛbaa lɛ naagbee baaba. Biblia lɛ woɔ shi akɛ: “Efɔŋfeelɔi lɛ, aaafolɔ amɛ ashwie . . . Shi mɛi ni he jɔ lɛ, shikpɔŋ lɛ aaatsɔ̃ amɛnɔ̃, ni amɛmii aaashɛ amɛhe yɛ hejɔlɛ babaoo mli.” (Lala 37:9-11) Adesa loo kooloo—ni ji jɛɛhe ko kwraa woŋ amɛtoiŋjɔlɛ lɛ he gbeyei. (Yesaia 11:6-9) Abaatee gbɔmɛi akpekpei abɔ po ní yɛ le ni amɛleee kɛ hegbɛ ni amɛnáaa akɛ amɛaale Yehowa hewɔ ni amɛyafi Abonsam sɛɛ yɛ be ni eho lɛ amli lɛ ashi kɛba wala mli, ni abaatsɔse amɛ kɛ ŋwɛi nitsɔɔmɔ.—Bɔfoi lɛ Asaji 24:15.

Beni Afii Akpe Nɔyeli lɛ baaba naagbee lɛ, no mli lɛ shikpɔŋ lɛ etsɔ paradeiso shihilɛhe ko, ni no mli lɛ akɛ adesai ni yɔɔ nɔ lɛ eba emuuyeli mli. Kɛkɛ lɛ abaafɛne Satan “be fioo,” ni no sɛɛ lɛ abaakpata lɛ kɛ mɛi fɛɛ ni teɔ shi woɔ Nyɔŋmɔ nɔyeli lɛ ahiɛ kwraa kɛya naanɔ.—Kpojiemɔ 20:3, 7-10.

 Namɔ Sɛɛ Obaafi?

Afii ohai 20 lɛ mli ji be ni Satan kɛ basabasafeemɔ ba shikpɔŋ lɛ nɔ. Shi yɛ nɔ najiaŋ ni no aaatsɔɔ akɛ eye kunim lɛ, shihilɛi ni yaa nɔ yɛ shikpɔŋ lɛ nɔ lɛ feɔ okadi ni tsɔɔ akɛ wɔyɛ nibii agbɛjianɔtoo fɔŋ nɛɛ naagbee gbii lɛ amli. (Mateo 24:3-14; Kpojiemɔ 6:1-8) Nɔ ni haa ayɔseɔ mɔ ni eye kunim lɛ damɔɔɔ bɔ ni awuiyeli mli ewo wu eha yɛ shikpɔŋ lɛ nɔ, loo bɔ ni mɛi babaoo susuɔ lɛ nɔ. Nibii ni haa ayɔseɔ mɔ ni eye kunim lɛ damɔ mɔ ni gbɛ nɔ ni etsɔɔ eyeɔ nɔ lɛ hi fe fɛɛ, kɛ kɛji mɔ ko ejɛ esuɔmɔ mli esɔmɔ Nyɔŋmɔ lɛ nɔ. Yɛ shihilɛi enyɔ lɛ fɛɛ mli lɛ, Yehowa nɔ̃ ji kunimyeli lɛ.

Kɛji be ni Nyɔŋmɔ eŋmɛ gbɛ lɛ ejie lɛ kpo momo akɛ Satan sane ejaaa lɛ, mɛni hewɔ ni Nyɔŋmɔ eŋmɛ efɔŋfeemɔ gbɛ koni ekã he eya nɔ mɔ? Yehowa miito etsui shi “ejaakɛ esumɔɔɔ akɛ mɛi komɛi alaaje, shi moŋ akɛ mɛi fɛɛ atsake amɛtsui.” (2 Petro 3:9) Nyɔŋmɔ suɔmɔnaa nii ji “akɛ ehere gbɔmɛi fɛɛ yiwala, koni amɛshɛ anɔkwale lɛ lee mli.” (1 Timoteo 2:4) Eba akɛ okɛ be ni eshwɛ lɛ baatsu nii ni okɛkase Biblia lɛ koni ‘oná anɔkwa Nyɔŋmɔ kome lɛ, kɛ Yesu Kristo, mɔ ni etsu lɛ lɛ he anɔkwa nilee.’ (Yohane 17:3) Yehowa Odasefoi yɛ he miishɛɛ akɛ amɛaaye amɛbua bo koni oná nakai nilee lɛ bɔni afee ni bo hu obafata mɛi akpekpei abɔ ni damɔ shi shiŋŋ yɛ kunimyelɔ lɛ gbɛfaŋ lɛ ahe.

[Mfonirii ni yɔɔ baafa 5]

Yehowa Odasefoi ebafata Satan nɔ kunim ni aye lɛ he kɛtsɔ emuuyeli mli ni amɛhiɛɔ lɛ nɔ

[Mfoniri ni yɔɔ baafa 7]

Yehowa yɛ anɔkwafoi babaoo yɛ egbɛfaŋ