Sanebimɔi ni Jɛ Kanelɔi Adɛŋ

Mɛni hewɔ Yesaia 30:21 wieɔ Yehowa wiemɔ lɛ he akɛ ooonu yɛ “osɛɛ” lɛ, yɛ be mli ni kuku ni tsɔ hiɛ lɛ kɛ Yehowa woɔ hiɛgbɛ kɛtsɔ kɛɛmɔ ni ekɛɛ akɛ, ‘Ohiŋmɛii aaana Otsɔɔlɔ Kpeteŋkpele lɛ’ nɔ lɛ?

Yesaia 30:20, 21 kaneɔ akɛ: “Akɛ otsɔɔlɔi lɛ eteeŋ dɔŋŋ, shi ohiŋmɛii aaana otsɔɔlɔi lɛ; ni otoii hu aaanu wiemɔ ko yɛ osɛɛ akɛ: Gbɛ lɛ nɛ! nyɛnyiɛa nɔ! ninejurɔgbɛ nyɛtsɔ́ jio, abɛkugbɛ nyɛtsɔ́ jio.”

Kɛji asusu niŋmaa lɛ he diɛŋtsɛ lɛ, kanelɔ lɛ naa Yehowa, Tsɔɔlɔ Kpeteŋkpele lɛ yɛ ehiɛ, shi enuɔ E-gbee yɛ esɛɛ. Shi kɛlɛ, wiemɔi lɛ ji mfonirifeemɔŋ nɔ̃, ni esa akɛ anu shishi nakai.

Wiemɔ heŋɔɔmɔwoo ni kuku 20 lɛ haa wɔfeɔ he mfoniri lɛ ji tsulɔ ko ni efee klalo akɛ ebaasɔmɔ enuŋtsɔ, ni efee klalo akɛ ebaatsu enuŋtsɔ lɛ famɔi ahe nii. Taakɛ bɔ ni tsulɔ ko kɛ hehiamɔ kwɛɔ enuŋtsɔ nine bɔni afee ni eyɔse nɔ ni etaoɔ lɛ, nakai Yehowa webii gbalaa amɛjwɛŋmɔ amɛmaa gbɛtsɔɔmɔi ni yaa hiɛ daa ni damɔ Biblia lɛ nɔ ni Yehowa tsɔɔ eshikpɔŋ nɔ gbɛjianɔtoo lɛ nɔ ekɛhaa lɛ nɔ. (Lala 123:1, 2) Hɛɛ, amɛfeɔ amɛnii yɛ egbɛtsɔɔmɔi anaa, ni amɛhaa amɛjwɛŋmɔ hiɔ nɔ fɛɛ nɔ ni Yehowa feɔ kɛtsɔ “tsulɔ anɔkwafo kɛ nilelɔ” lɛ nɔ lɛ nɔ.—Mateo 24:45-47.

Belɛ, wiemɔ ni etsuji nuɔ yɛ amɛsɛɛ lɛ hu? Nilee yɛ mli akɛ aaamu sane naa akɛ gbee ni anuɔ yɛ sɛɛ lɛ ji Nyɔŋmɔ gbee ni awie kɛjɛ blema lɛ, ni aŋmala yɛ e-Wiemɔ lɛ mli ni ahaa efeɔ faŋŋ kɛtsɔ ‘etsulɔ nukpa anɔkwafo’ lɛ nɔ lɛ. (Luka 12:42) Ŋmɛnɛŋmɛnɛ beaŋ Nyɔŋmɔ tsuji lɛ nuɔ gbee kɛtsɔ mɔdɛŋ ni amɛbɔɔ ni amɛkase Biblia lɛ nɔ, ni amɛtsɔɔ woji ni “tsulɔ anɔkwafo kɛ nilelɔ,” ni ji “tsulɔ nukpa anɔkwafo” lɛ efee lɛ nɔ amɛkɛ eshishitoo mlai lɛ tsuɔ nii yɛ amɛshihilɛ mli. Kɛtsɔ etsuji lɛ ahiɛ ní amɛkɛfɔɔ gbɛtsɔɔmɔ ni yɔɔ ebe naa ni Tsɔɔlɔ Kpeteŋkpele lɛ kɛhaa lɛ nɔ ni amɛhiɛ hiɔ Nyɔŋmɔ Wiemɔ, ni aŋma afii ohai abɔ ko lɛ kasemɔ nɔ lɛ, no lɛ yɛ mfonirifeemɔŋ naa lɛ, amɛnaa lɛ yɛ amɛhiɛ ni amɛnuɔ egbee yɛ amɛsɛɛ.—Romabii 15:4.