“Nyɛtsia Nyɛbɛŋkɛa Nyɔŋmɔ, ni Eeetsi Eeebɛŋkɛ Nyɛ”

Be ni Tsɔ Hiɛ kɛ No Sɛɛ—Eshihilɛ Tsake Kwraa

KWƐ bɔ ni Matsepang shihilɛ efee nɔ ni miishɛɛ bɛ mli ni yiŋtoo ko bɛ he ha! Eji gbekɛ yoo fioo ko ni jɛ Lesotho, maŋ ko ni yɔɔ South Africa teŋgbɛ. Atsɔse Matsepang akɛ Katoliknyo. Shi kɛlɛ, yɛ nɔ najiaŋ ni mɔ kome shihilɔi aaaye abua lɛ koni etsi ebɛŋkɛ Nyɔŋmɔ lɛ, amɛfee lɛ niseniianii afii babaoo kɛtsɔ lakamɔ ni amɛkɛ shika lakaa lɛ koni ekɛ ehe awo jeŋba shara mli lɛ nɔ.

Nɔ ni jɛ mli ba ji akɛ, Matsepang nijiaŋ je wui yɛ jamɔ he, ni eheee eyeee akɛ Bɔlɔ ko yɛ ni yɔɔ suɔmɔ ni kwɛɔ adesai ni ji ebɔɔ nii lɛ anɔ yɛ anɔkwayeli mli. Yɛ kpoomɔ kɛ niseniianifeemɔ he piŋmɔ ni Matsepang tsɔ mli lɛ hewɔ lɛ, ená henumɔŋ pilamɔi ni dara kɛ henumɔ ni naa wa waa akɛ ehe bɛ sɛɛnamɔ ko kwraa. Eda akɛ mɔ ko ni yi wa waa ni yɔɔ basabasa. Enɛ ha ekɛ ehe wo awuiyeli nifeemɔi amli.

Naagbee lɛ, Matsepang kɛ ehe yabɔ kuu ko ni juɔ mɛi anibii yɛ oketekei amli lɛ ahe. Amɔ lɛ ni abu lɛ fɔ ni ayawo lɛ tsuŋ yɛ South Africa. Sɛɛ mli lɛ, ashwie lɛ kɛtee Lesotho ni ji maŋ ni ejɛ mli lɛ mli, ni eyatsa awuiyeli, dãatɔɔ, basabasafeemɔ, kɛ jeŋba shara shihilɛ lɛ nɔ yɛ jɛmɛ.

Beni Matsepang yaje eshihilɛ be ni ha ehao waa lɛ mli lɛ, ekɛ hiɛdɔɔ sɔle eha Nyɔŋmɔ kɛha yelikɛbuamɔ. Ewo shi akɛ: “Nyɔŋmɔ, kɛji obaa miyi lɛ, no lɛ mafee nɔ fɛɛ nɔ ni manyɛ koni mikɛsɔmɔ bo.”

Etsɛɛɛ ni maŋsɛɛ sanekpakpa shiɛlɔi ni ji Yehowa Odasefoi ba Matsepang ŋɔɔ. Amɛbi koni eha amɛkɛ lɛ akase Biblia lɛ. Ebayɔse kɛjɛ enikasemɔ lɛ mli akɛ, Nyɔŋmɔ jeee mɔ ko ni sane ko kɔɔɔ ehe eko ní susuuu mɔ he. Yɛ anɔkwale mli lɛ, ebayoo akɛ Satan, “malemɔtsɛ . . . lɛ,” tsɔɔ ŋaatsɔi kɛ lakamɔ gbɛ̀i anɔ ni ehaa mɛi komɛi náa henumɔ akɛ amɛhe bɛ sɛɛnamɔ ko kwraa ni ehaa amɛheɔ amɛyeɔ akɛ, Yehowa nyɛŋ ana su kpakpa ko kwraa yɛ amɛmli ni baaha etsi ebɛŋkɛ amɛ.—Yohane 8:44; Efesobii 6:11.

Nɔ ni tamɔɔɔ nakai lɛ, kwɛ bɔ ni Matsepang tsui nyɔ emli eha beni ekase akɛ wɔbaanyɛ wɔná bulɛ ni sa jogbaŋŋ wɔha wɔ diɛŋtsɛ wɔhe kɛji wɔtsake kɛjɛ wɔtsutsu esha shihilɛ lɛ mli, ní wɔbi Nyɔŋmɔ dɛŋ eshaifaa, ni wɔbɔ mɔdɛŋ akɛ wɔbaasa ehiɛ lɛ! Aye abua lɛ ni enu shishi akɛ, “Nyɔŋmɔ da fe wɔtsui” ni ebuɔ wɔ yɛ gbɛ ni esoro lɛ kwraa yɛ bɔ ni ekolɛ wɔbuɔ wɔ diɛŋtsɛ wɔhe wɔhaa lɛ nɔ.—1 Yohane 3:19, 20.

Matsepang mii shɛ ehe waa beni ekane lalatsɛ David wiemɔi nɛɛ akɛ: “Yehowa bɛŋkɛɔ mɛi ni tsuii ekumɔ lɛ, ni ehereɔ mɛi ni mumɔ tswiaa shi kɛ dɔlɛ lɛ.” (Lala 34:19) Akɛni eji mɛi ni “mumɔ tswiaa shi kɛ dɔlɛ” lɛ ateŋ mɔ kome hewɔ lɛ, ebayɔse akɛ, Yehowa kwaaa esɔɔlɔi, kɛji amɛteŋ mɛi komɛi anijiaŋ je wui aloo amɛnu he  akɛ amɛhe bɛ sɛɛnamɔ ko kwraa diɛŋtsɛ po lɛ. Emii shɛ ehe beni ekase akɛ Nyɔŋmɔ susuɔ etooi lɛ fɛɛ ahe ni eyeɔ ebuaa amɛ kɛtsɔɔ shihilɛ ni mli wawai amli lɛ. (Lala 55:23; 1 Petro 5:6, 7) Wiemɔi ni ji akɛ: “Nyɛtsia nyɛbɛŋkɛa Nyɔŋmɔ, ni eeetsi eeebɛŋkɛ nyɛ” lɛ ta etsui mli fe fɛɛ.—Yakobo 4:8.

Etsɛɛɛ ni hewalɛ ni Nyɔŋmɔ Wiemɔ lɛ, ni ji Biblia lɛ yɔɔ lɛ bɔi kpojee faŋŋ yɛ Matsepang shihilɛ mli. Ebɔi Kristofoi akpeeiyaa daa ni ekwa enifeemɔi ni Ŋmalɛ ekpɛlɛɛɛ nɔ lɛ. Mɛni jɛ mli ba? Enuuu he dɔŋŋ akɛ eji mɔ ko ni esaaa Nyɔŋmɔ suɔmɔ kɛ emɔbɔnalɛ lɛ. Kɛjɛ beni abaptisi lɛ akɛ Yehowa Odasefoi lɛ ateŋ mɔ kome kɛbaa nɛɛ, ekɛ ŋmɛlɛtswai akpekpei abɔ etsu nii yɛ Kristofoi asɔɔmɔ nitsumɔ lɛ mli akɛ Maŋtsɛyeli sanekpakpa jajelɔ. Yɛ henumɔŋ pilamɔi ni Matsepang ná yɛ be ko ni eho lɛ mli lɛ fɛɛ sɛɛ lɛ, amrɔ nɛɛ eehi shi yɛ gbɛ ni haa enáa miishɛɛ ni yiŋtoo kpakpa yɔɔ he lɛ nɔ. Mɛɛ nɔkwɛmɔnɔ ni tsɔɔ hewalɛ ni Biblia lɛ yɔɔ ni ekɛhaa shihilɛi yaa hiɛ enɛ ji nɛkɛ!—Hebribii 4:12.

[Wiemɔ ni akɔ ni akɛmiitsu nii ni yɔɔ baafa 9]

“Nyɔŋmɔ, kɛji obaa miyi lɛ, no lɛ mafee nɔ fɛɛ nɔ ni manyɛ koni mikɛsɔmɔ bo”

[Akrabatsa ni yɔɔ baafa 9]

Biblia Shishitoo Mlai Miitsu Nii

Nɔ ni fata Biblia shishitoo mlai ni eshɛje mɛi ni afeɔ amɛ niseniianii lɛ amii lɛ ahe lɛ ateŋ ekomɛi ji nɔ ni nyiɛ sɛɛ nɛɛ:

“Kɛ ŋkɔmɔyeli fa babaoo yɛ mimli lɛ, [Nyɔŋmɔ] omiishɛjemɔi lɛ haa misusuma mii shɛɔ ehe.” (Lala 94:19) Yehowa ‘miishɛjemɔi’ ni anaa yɛ e-Wiemɔ lɛ mli lɛ ji hejɔlɛ kpele jɛɛhe diɛŋtsɛ. Amɛhe susumɔ yɛ be mli ni ajwɛŋɔ nii anɔ ni asɔleɔ lɛ yeɔ ebuaa kɛjɔ́ɔ susumɔi ni haoɔ mɔ lɛ he ni etswaa hemɔkɛyeli ni ayɔɔ yɛ Nyɔŋmɔ mli akɛ Naanyo ni nuɔ mɔ shishi lɛ emaa shi.

“[yehowa] etsáa mɛi ni amɛtsuii ekumɔ lɛ, ni efimɔɔ amɛpilamɔi lɛ anɔ.” (Lala 147:3) Kɛji wɔhiɛ sɔ Yehowa mɔbɔnalɛ lɛ kɛ egbɛjianɔ ni eto koni ehà wɔhe eshai lɛ anɔ kɛtsɔ Yesu kpɔmɔ afɔleshaa lɛ nɔ lɛ, no lɛ wɔbaanyɛ wɔkɛ ekãa abɛŋkɛ Nyɔŋmɔ ni wɔnuuu fɔyeli ko kwraa he yɛ wɔtsui mli. Enɛ baanyɛ ekɛ miishɛjemɔ kɛ jwɛŋmɔŋ toiŋjɔlɛ ni eko kɛ lɛ yeee egbɔ aba.

“Mɔ ko nyɛŋ aba miŋɔɔ [Yesu Kristo], akɛ ja tsɛ lɛ ni tsu mi lɛ gbala lɛ dã, ni mi lɛ matee lɛ shi yɛ naagbee gbi lɛ nɔ.” (Yohane 6:44) Kɛtsɔ Yehowa mumɔ krɔŋkrɔŋ lɛ kɛ Maŋtsɛyeli shiɛmɔ nitsumɔ lɛ nɔ lɛ, lɛ diɛŋtsɛ egbalaa wɔ kɛbɛŋkɛɔ e-Bi lɛ ni ehaa wɔnáa naanɔ wala he hiɛnɔkamɔ.