Sanebimɔi ni Jɛ Kanelɔi Adɛŋ

Ani gbɛjianɔ ko yɛ ni abaanyɛ ato kɛji Kristofonyo ni afɔ lɛ mu ni egbɔ ni egbɔjɔ lɛ nyɛɛɛ aba asafo lɛ Nuŋtsɔ lɛ Gbɛkɛnaashi Niyenii lɛ kaimɔ lɛ shishi?

Hɛɛ. Gbɛjianɔtoo ko yɛ, ni esa akɛ afee enɛ yɛ Kristofonyo ni afɔ lɛ mu ni egbɔ ni egbɔjɔ ni yɛ no hewɔ lɛ enyɛɛɛ ekɛ asafo lɛ aye Kristo gbele lɛ Kaimɔ lɛ yɛ ekolɛ saa mli ni eka hewɔ lɛ hesusumɔ mli. Kɛ́ eba lɛ nakai lɛ, onukpai akuu lɛ baanyɛ ato gbɛjianɔ koni asafoŋ onukpa ko loo Kristofonyo nuu ni eda yɛ mumɔŋ lɛ kɛ okadi aboloo kɛ wein lɛ eko ayaha nɛkɛ naanyo heyelilɔ nɛɛ yɛ gbi gbɛkɛ ni ayeɔ Kaimɔ lɛ nɔŋŋ nɔ dani hulu ate shi.

Yɛ bɔ ni shihilɛ lɛ yɔɔ ha lɛ naa lɛ, onukpa loo nyɛmi nuu kroko ni etee nyɛmi nɛɛ saramɔ lɛ baanyɛ awie saji fioo komɛi ni ekane ŋmalɛi ni sa. Ebaanyɛ enyiɛ nɔkwɛmɔnɔ ni Yesu fee efɔ shi beni E-to Nuŋtsɔ lɛ Gbɛkɛnaashi Niyenii lɛ shishi lɛ sɛɛ. Akɛ nɔkwɛmɔnɔ lɛ, ebaanyɛ ni ekane Mateo 26:26, ni esɔle, ni no sɛɛ lɛ ekɛ akpiti aboloo lɛ aha lɛ. No sɛɛ lɛ, nyɛmi nuu ni yaasara nyɛmi nɛɛ baanyɛ akane Mateo yitso 26, kukuji 27 kɛ 28, ni esɔle ekoŋŋ, ni no sɛɛ lɛ ekɛ wein lɛ aha lɛ. Ebaanyɛ ni ewie nɔ ni okadi nibii lɛ eko fɛɛ eko tsɔɔ lɛ he kuku, ni esa akɛ emu naa kɛ sɔlemɔ.

Yɛ anɔkwale mli lɛ, esa akɛ abɔ mɔdɛŋ fɛɛ ni aaanyɛ koni ahi jɛmɛ kɛha asafo lɛ Nuŋtsɔ lɛ Gbɛkɛnaashi Niyenii lɛ he gbi jurɔ lɛ yeli. Shi mɛni abaanyɛ afee yɛ shihilɛ ni mli wa ni kɔɔ Kristofonyo ko ni afɔ lɛ mu ni he miiye waa diɛŋtsɛ, atsĩ enaa yɛ helatsamɔhe, loo yɛ gbɛ kroko nɔ lɛ atsĩ enaa ní ekaye Kaimɔ lɛ yɛ Nisan 14, beni hulu enyɔ shi sɛɛ lɛ? Mɔ ni afɔ lɛ mu ni tamɔ nɛkɛ lɛ baanyɛ ni ekɛ nɔkwɛmɔnɔ ni afee afɔ̃ shi yɛ Mose Mla lɛ mli lɛ atsu nii koni eye kaimɔ lɛ yɛ teemɔŋ yɛ gbii 30 sɛɛ.—4 Mose 9:9-14.