Mumɔŋ Sui Kpakpai—Mɛni Ji Nɔ ni Miihe Aba Nɔ?

“Mɛi 15 kɛ mɛi ni amɛkɛ amɛ baahi shi lɛ tee [Katolikbii] akpee ko gbɛkɛ kɛha ŋaawoo dani amɛbote gbalashihilɛ mli. Mɛi 30 ni tee kpee lɛ ateŋ mɛi 3 pɛ kɛɛ akɛ amɛyɛ hemɔkɛyeli.”—La Croix, French Katolik adafitswaa wolo.

SANE eba jamɔŋ sui kpakpai anɔ. Newsweek adafitswaa wolo lɛ mli majimaji ateŋ nɔ̃ ni je kpo yɛ July 12, 1999 lɛ hiɛgbɛ niŋmaa lɛ bi akɛ: “Ani Nyɔŋmɔ Egbo?” Yɛ Europa anaigbɛbii lɛ agbɛfaŋ lɛ, hetoo ni wolo tɛtrɛɛ lɛ kɛha lɛ tsɔɔ nɔ ko ni tamɔ nakai diɛŋtsɛ. Beni French adafitswaa wolo ni ji Le Monde bɔɔ Katolik Sɔlemɔ gwabɔɔ ni afee yɛ Rome yɛ nakai afi lɛ nɔŋŋ nɔ yɛ October mli lɛ he amaniɛ lɛ, ekɛɛ akɛ: “Ebafee nɔ ni wa waa fe bei fɛɛ ni eho kɛha Sɔlemɔ lɛ akɛ amɛkɛ amɛshɛɛ sane lɛ aaaha yɛ gbɔmɛi komɛi ni amɛhiŋmɛigbelemɔ nifeemɔ eha ‘amɛsumɔɔɔ’ lɛ ateŋ. . . . Yɛ Italy lɛ, Katolik jamɔ jeee nɔ ko ni feɔ mɛi ekome dɔŋŋ. . . . Yɛ Germany lɛ, hei ni akɛ ŋaawoo haa kɛtsɔɔ musufitemɔ hiɛ yɛ lɛ he sane naataamɔ miiha naagba ni ebakã paapa lɛ kɛ demokrase gbɛjianɔtoo ko ni sumɔŋ akɛ ekɛ mlai ni naa wa aaatsu nii dɔŋŋ lɛ teŋ lɛ mli miiwo wu. Mɛi komɛi ni kwɛɔ nɔ ni yaa nɔ lɛ etsɔ hiɛ momo amɛtsɔɔ akɛ [Netherlandsbii lɛ] kɛ ekãa tsuɔ jeŋbai kɛ gbe ni agbeɔ mɔ kɛfoɔ epiŋmɔ sɛɛ lɛ he nii akɛni maŋbii lɛ etsi amɛhe kwraa kɛjɛ Kristojamɔ he amrɔ nɔŋŋ lɛ hewɔ.”

Shihilɛ lɛ tamɔ nakai nɔŋŋ yɛ hei krokomɛi. Yɛ afi 1999 lɛ, George Carey, ni eji Canterbury Osɔfonukpa lɛ bɔ kɔkɔ akɛ, Church of England lɛ “baagu yɛ yinɔ kome mli.” Sane ko ni yitso ji “Europa Kristofoi lɛ Eba Naagbee” ni yɔɔ French adafitswaa wolo Le Figaro lɛ mli lɛ kɛɛ akɛ: “Abaanyɛ ana nakai shihilɛ lɛ nɔŋŋ yɛ he fɛɛ he. . . . Mɛi ayiŋ miifee amɛ enyɔnyɔɔnyɔ yɛ jeŋba kɛ jamɔŋ susumɔi ahe.”

Akɛ He Wooo Jamɔŋ Nifeemɔi Amli Tsɔ̃

Yɛ Europa lɛ, mɛi abɔ ni yaa sɔlemɔ lɛ eba shi kwraa. French Katolikbii ni shɛɛɛ 100 mlijaa 10 yaa Mass daa Hɔgbaa, yɛ be mli ni Paris Katolikbii lɛ ateŋ 100 mlijaa 3 kɛyashi 4 pɛ yaa sɔlemɔ daa. Mɛi ayibɔ ni tamɔ nakai nɔŋŋ loo  nɔ ni shɛɛɛ nakai po ji nɔ ni ayɔse yɛ United Kingdom, Germany, kɛ Scandinavia maji lɛ amli.

Sane ni jamɔŋ hiɛnyiɛlɔi lɛ susuɔ he waa ji mɛi ni anáaa kɛha osɔfoyeli lɛ. Yɛ nɔ ni shɛɛɛ afii 100 mli lɛ, osɔfoi ayibɔ ni yɔɔ France lɛ eba shi waa, kɛjɛ osɔfoi 14 kɛha mɛi 10,000 kɛbashɛ nɔ ni shɛɛɛ mɔ 1 kɛha mɛi 10,000 amrɔ nɛɛ. Kɛ́ aja mli lɛ, afii abɔ ni osɔfoi ni yɔɔ Europa fɛɛ lɛ eye lɛ miiya hiɛ, ni anáaa mɛi babaoo ni baaye osɔfoi yɛ maji tamɔ Ireland kɛ Belgium po mli. Yɛ nakai beaŋ nɔŋŋ lɛ, gbekɛbii ni yaa Katolik skul kɛha jamɔŋ tsɔɔmɔi akasemɔ lɛ ayibɔ miiba shi, ni eha mɛi ayiŋ miifee amɛ kɔshikɔshi waa diɛŋtsɛ kɛji akɛ Katolik Sɔlemɔ lɛ yɛ nyɛmɔ ni ebaanyɛ ekɛná mɛi ekoŋŋ.

Kɛji aawie jamɔ he lɛ, etamɔ nɔ ni mɛi bɛ hekɛnɔfɔɔ dɔŋŋ yɛ mli. Frenchbii ateŋ mɛi 100 mlijaa 6 pɛ heɔ eyeɔ akɛ “abaanyɛ ana anɔkwale lɛ yɛ jamɔ kome pɛ mli,” kɛji akɛto mɛi 100 mlijaa 15 ní he ye yɛ afi 1981, kɛ mɛi 100 mlijaa 50 ní he ye yɛ afi 1952 lɛ he lɛ. Jamɔ mli shikpilikpiifeemɔ miigbɛ kɛmiishwa. Kɛ́ aja mli lɛ, mɛi abɔ ni kɛɔ akɛ amɛkɛ amɛhe ebɔɔɔ jamɔ ko he lɛ etee hiɛ kɛjɛ 100 mlijaa 26 yɛ afi 1980 kɛyashɛ 100 mlijaa 42 yɛ afi 2000.—Les valeurs des Français—Évolutions de 1980 à 2000 (Frenchbii Asui Kpakpai—Nibii ni Etee Nɔ Kɛjɛ Afi 1980 Kɛyashi Afi 2000).

Tsakemɔ Kpele yɛ Jeŋba He Sui Kpakpai Amli

Naagba ni baa yɛ sui kpakpai amli lɛ hu jeɔ kpo yɛ jeŋbai ahe saji ahe. Taakɛ atsĩ tã kɛtsɔ hiɛ lɛ, sɔlemɔyalɔi babaoo kpooɔ akɛ amɛaakpɛlɛ mlai ni amɛsɔlemɔi lɛ woɔ lɛ anɔ. Amɛkpɛlɛɛɛ susumɔ ni ahiɛ akɛ jamɔ mli hiɛnyiɛlɔi lɛ yɛ hegbɛ akɛ amɛaafolɔ jeŋba he tɛi amɛshwie shi lɛ nɔ. Gbɔmɛi kome too lɛ nɔŋŋ ni kpɛlɛ susumɔ ni paapa lɛ hiɛ yɛ hegbɛ ni adesai yɔɔ lɛ ahe lɛ nɔ lɛ kpoo akɛ amɛaafi esɛɛ beni ewie eshi amɛjeŋba lɛ. Ákɛ nɔkwɛmɔnɔ lɛ, akɛ susumɔ ni ehiɛ yɛ musunamɔ naatsii tsofa he lɛ tsuuu nii yɛ hei babaoo, ni Katolikbii agbalashihilɛ mli hefatalɔi pii po fata he.

Nɛkɛ su nɛɛ saa mɛi ni sumɔɔ jamɔ kɛ mɛi ni sumɔɔɔ jamɔ lɛ fɛɛ ahe, yɛ adesa shihilɛi srɔtoi fɛɛ mli. Akpɛlɛɔ nifeemɔi ni Ŋmalɛi Krɔŋkrɔŋi lɛ wieɔ eshiɔ yɛ faŋŋ mli lɛ anɔ. Afii 20 ni eho nɛ lɛ, Frenchbii lɛ ateŋ mɛi 100 mlijaa 45 wie eshi hii ni kɛ hii náa bɔlɛ lɛ. Ŋmɛnɛ, mɛi 100 mlijaa 80 kpɛlɛɔ nɔ akɛ tɔmɔ ko bɛ he. Eyɛ mli akɛ mɛi babaoo kpɛlɛɔ nɔ akɛ esa akɛ aye anɔkwa yɛ gbalashihilɛ mli moŋ, shi mɛi 100 mlijaa 36 pɛ ji mɛi ni wieɔ shiɔ bɔlɛnamɔ ni yaa nɔ yɛ gbalashihilɛ sɛɛ lɛ he akɛ nɔ ni ejaaa gbɛ kwraa.—Romabii 1:26, 27; 1 Korintobii 6:9, 10; Hebribii 13:4.

Jamɔŋ Nibii Srɔtoi ni Kɛ Amɛhe Kpãaa Gbee ni Afutu Lɛ

Yɛ Anaigbɛbii ateŋ lɛ, jamɔi ni aŋkroaŋkroi tseɔ ni mɔ fɛɛ mɔ nuɔ he akɛ eyɛ hegbɛ ni ekɛaahala ni ekɛtsɔɔ hemɔkɛyelii ni esumɔɔ lɛ miihe shi. Akpɛlɛɔ jamɔŋ tsɔɔmɔi komɛi anɔ, yɛ be mli ni akɛ ekrokomɛi tsuuu nii. Mɛi komɛi tsɛɔ amɛhe Kristofoi yɛ be mli ni amɛheɔ fɔmɔ ekoŋŋ kɛmiiya gbɔmɔtso kroko mli lɛ amɛyeɔ, ni mɛi krokomɛi hu shashaooo shi kwraa akɛ amɛaahe jamɔŋ hemɔkɛyelii srɔtoi amɛye yɛ be kome too lɛ nɔŋŋ mli. (Jajelɔ 9:5, 10; Ezekiel 18:4, 20; Mateo 7:21; Efesobii 4:5, 6) Wolo ni ji Les valeurs des Français tsɔɔ mli faŋŋ akɛ, heyelilɔi babaoo ni yɔɔ ŋmɛnɛ lɛ miigba afã kwraa kɛmiijɛ gbɛ̀i ni sɔlemɔ lɛ eje lɛ ahe.

Ni kɛlɛ, nɛkɛ jamɔŋ pɛsɛmkunya nifeemɔ nɛɛ yɛ oshara. Jean Delumeau, ni ji jamɔŋ yinɔsane he nilelɔ kɛ Institut de France lɛ mlinyo lɛ heɔ eyeɔ akɛ, adesa ko nyɛŋ atsi ehe kɛjɛ jamɔŋ gbɛjianɔtoo ko ni ato shishi lɛ he ni eto lɛ diɛŋtsɛ ejamɔ shishi. “Anyɛŋ aná hemɔkɛyeli kɛji akɛ enáaa eshishifa kɛjɛɛɛ jamɔŋ gbɛjianɔtoo ni hiɛ hemɔkɛyeli jajemɔ kome too lɛ nɔŋŋ mli lɛ mli.” Esa akɛ mumɔŋ sui kpakpai kɛ jamɔŋ nifeemɔ afee mɔ jamɔŋ nifeemɔi ni ekomefeemɔ yɔɔ mli lɛ ateŋ eko. Nɛgbɛ abaanyɛ ana nakai ekomefeemɔ lɛ yɛ gbɔmɛi ni tsakemɔ eha amɛfite lɛ ateŋ yɛ?

Biblia lɛ kaiɔ wɔ yɛ ewoji lɛ fɛɛ amli akɛ, Nyɔŋmɔ ji mɔ ni kɛ sui kɛ jeŋba he tɛi ni sa lɛ mamɔɔ shi, eyɛ mli moŋ akɛ eŋmɛɔ adesai agbɛ in amɛtsɔɔ kɛji akɛ amɛkɛbaatsu nii loo amɛfeŋ nakai. Mɛi akpekpei akpei abɔ ni yɔɔ je lɛŋ he fɛɛ he lɛ eyɔse akɛ, nɛkɛ blema wolo in abuɔ lɛ waa nɛɛ he yɛ sɛɛnamɔ ŋmɛnɛ, ni ákɛ, eji ‘kane kɛha amɛnane kɛ la hu yɛ amɛtempɔŋi lɛ anɔ.’ (Lala 119:105) Te ebalɛ tɛŋŋ ni amɛmu sane naa nɛkɛ lɛ? Abaasusu enɛ he yɛ sane ni nyiɛ sɛɛ lɛ mli.