Oblahii kɛ Oblayei—yehowa Hiɛ Kpaŋ Nyɛnitsumɔ lɛ nɔ!
Oblahii kɛ Oblayei—yehowa Hiɛ Kpaŋ Nyɛnitsumɔ lɛ nɔ!
“Nyɔŋmɔ jeee mɔ ni yeɔ sane ni ejaaa ni ehiɛ aaakpa nyɛnitsumɔ lɛ nɔ kɛ suɔmɔ deŋme ni nyɛgbo yɛ egbɛi lɛ ahewɔ, ni nyɛkɛsɔmɔ mɛi krɔŋkrɔŋi lɛ, ni nyɛsaa nyɛsɔmɔɔ amɛ lolo lɛ.”—HEBRIBII 6:10.
1. Biblia mli woji ni ji Hebribii kɛ Maleaki tsɔɔ akɛ Yehowa hiɛ sɔɔ osɔɔmɔ nitsumɔ lɛ yɛ mɛɛ gbɛ nɔ?
ANI ofee naanyo ko ejurɔ pɛŋ ni edaaa bo shi? Kɛ́ abu ejurɔfeemɔ ko akɛ nɔ ko bibioo lɛ, edɔɔ mɔ waa diɛŋtsɛ, loo nɔ ni ehiii fe fɛɛ lɛ, kɛ́ hiɛ kpa nɔ kwraa lɛ. Shi, kwɛ bɔ ni eyɔɔ srɔto ha kɛ́ wɔkɛ wɔtsui muu fɛɛ sɔɔmɔ ha Yehowa! Biblia lɛ kɛɔ akɛ: “Nyɔŋmɔ jeee mɔ ni yeɔ sane ni ejaaa ni ehiɛ aaakpa nyɛnitsumɔ lɛ nɔ kɛ suɔmɔ deŋme ni nyɛgbo yɛ egbɛi lɛ ahewɔ, ni nyɛkɛsɔmɔ mɛi krɔŋkrɔŋi lɛ, ni nyɛsaa nyɛsɔmɔɔ amɛ lolo lɛ.” (Hebribii 6:10) Susumɔ nɔ ni enɛ tsɔɔ lɛ he okwɛ. Kɛ́ Yehowa hiɛ aaakpa nɔ ni ofee kɛ nɔ ni oyaa nɔ ofeɔ lolo yɛ esɔɔmɔ nitsumɔ lɛ mli lɛ nɔ lɛ, no lɛ ebaabu enɛ akɛ nifeemɔ ni ejaaa—esha—yɛ egbɛfaŋ. Mɛɛ Nyɔŋmɔ ni hiɛ sɔɔ nii nɛ!—Maleaki 3:10.
2. Mɛni haa Yehowa sɔɔmɔ feɔ nɔ krɛdɛɛ lɛɛlɛŋ lɛ?
2 Oyɛ hegbɛ krɛdɛɛ ko akɛ ooojá nɛkɛ Nyɔŋmɔ ni hiɛ sɔɔ nii nɛɛ ni osɔmɔ lɛ. Akɛni onanemɛi heyelilɔi aaafee akpekpei ekpaa pɛ yɔɔ kɛ́ akɛto gbɔmɛi aaafee akpekpe toi akpei ekpaa ni yɔɔ jeŋ fɛɛ lɛ he lɛ hewɔ lɛ, afɔɔɔ hegbɛ ni oyɔɔ lɛ námɔ lɛɛlɛŋ. Kɛfata he lɛ, anɔkwale ni eji akɛ oobo sanekpakpa lɛ mli shɛɛ sane lɛ toi ni oohere nɔ lɛ ji odaseyeli ni tsɔɔ akɛ Yehowa susuɔ ohe akɛ aŋkro. Ejaakɛ Yesu kɛɛ akɛ: “Mɔ ko nyɛŋ aba miŋɔɔ, akɛ ja tsɛ lɛ ni tsu mi lɛ gbala lɛ dã.” (Yohane 6:44) Hɛɛ, Yehowa yeɔ ebuaa gbɔmɛi aŋkroaŋkroi koni amɛná sɛɛnamɔi ni yɔɔ Kristo afɔleshaa lɛ he lɛ he sɛɛ.
Ha Ohiɛ Asɔ Hegbɛ Kpele ni Oyɔɔ Lɛ
3. Korabii lɛ tsɔɔ akɛ amɛhiɛ sɔɔ hegbɛ ni amɛna akɛ amɛaasɔmɔ Yehowa lɛ yɛ mɛɛ gbɛ nɔ?
3 Taakɛ asusu he yɛ nikasemɔ ni tsɔ hiɛ lɛ mli lɛ, oyɛ gbɛhe krɛdɛɛ ko ni okɛaaha Yehowa tsui anya kɛ miishɛɛ. (Abɛi 27:11) Enɛ ji nɔ ko ni esaaa akɛ okuɔ ohiɛ oshwieɔ nɔ kɔkɔɔkɔ. Yɛ Korabii lɛ alalai lɛ ekome mli lɛ, amɛtsɔɔ bɔ ni amɛhiɛ sɔɔ hegbɛ ni amɛyɔɔ akɛ amɛaasɔmɔ Yehowa lɛ mli. Wɔkaneɔ akɛ: “Gbi kome too ni aaaye yɛ okpoi lɛ anɔ lɛ ehi fe gbii akpe; miisumɔ ni makã mi-Nyɔŋmɔ we lɛ shinaa lɛ shi moŋ fe nɔ ni mahi shi efɔŋfeemɔ buui lɛ amli.”—Lala 84:11.
4. (a) Mɛni ekolɛ, ebaaha mɛi komɛi abu Yehowa jamɔ akɛ eyɛ kpɛŋŋ tsɔ lɛ? (b) Mɛɛ gbɛ nɔ Yehowa jieɔ ehe kpo akɛ eesumɔ ni eyoo etsuji lɛ ni ewo amɛ nyɔmɔ?
4 Ani nɛkɛ ji bɔ ni onuɔ he yɛ hegbɛ ni oyɔɔ ni okɛaasɔmɔ oŋwɛi Tsɛ lɛ he? Obaakpɛlɛ nɔ akɛ, bei komɛi lɛ, ebaafee tamɔ nɔ ni Yehowa jamɔ tsĩɔ oheyeli naa. Eji anɔkwale akɛ Biblia shishitoo mlai ní ahiɔ shi yɛ naa lɛ biɔ he-kɛ-afɔleshaa falɛ ko. Shi, nɔ ni fe fɛɛ lɛ, nɔ fɛɛ nɔ ni Yehowa biɔ yɛ odɛŋ lɛ yɛ kɛha osɛɛnamɔ. (Lala 1:1-3) Kɛfata he lɛ, Yehowa naa mɔdɛŋ ni obɔɔ lɛ, ni ejieɔ hiɛsɔɔ ni oyɔɔ yɛ onɔkwayeli lɛ mli lɛ kpo. Eji anɔkwale akɛ, Paulo ŋma akɛ Yehowa ‘ji mɛi ni taoɔ esɛɛgbɛ lɛ anyɔmɔwolɔ.’ (Hebribii 11:6) Yehowa miitao hegbɛi ni eeetsɔ nɔ efee enɛ. Blema Israel gbalɔ anɔkwafo ko kɛɛ akɛ: “Yehowa yɔɔ nɛɛ, ehiŋmɛii kpaa shikpɔŋ muu lɛ fɛɛ nɔ, ni ejieɔ ehewalɛ kpo ehaa mɛi ni amɛtsui ehi kɛwula shi yɛ egbɛfaŋ lɛ.”—2 Kronika 16:9.
5. (a) Mɛni ji gbɛ kome ni hi fe fɛɛ ni obaanyɛ otsɔ nɔ ni otsɔɔ akɛ otsui hi kɛwula shi yɛ Yehowa gbɛfaŋ? (b) Mɛni hewɔ mɛi krokomɛi ni ooogba amɛ ohemɔkɛyeli lɛ he sane lɛ baafee tamɔ nɔ ni wa lɛ?
5 Gbɛ kome ni hi fe fɛɛ ni obaanyɛ otsɔɔ akɛ otsui hi kɛwula shi yɛ Yehowa gbɛfaŋ ji ni ogba mɛi krokomɛi ehe sane. Ani oná hegbɛ okɛwie ohemɔkɛyeli lɛ he otsɔɔ oskulbii lɛ ateŋ mɛi komɛi pɛŋ? Shishijee lɛ, enɛ feemɔ baafee tamɔ nɔ ni woɔ mɔ he gbeyei, ni enɛ he susumɔ baanyɛ aha oshe gbeyei fioo. Ekolɛ, obaabi akɛ: ‘Ni kɛ́ amɛŋmɔ mi hu? Ni kɛ́ amɛsusu akɛ mijamɔ lɛ yɛ srɔto hu?’ Yesu kpɛlɛ nɔ akɛ jeee mɔ fɛɛ mɔ baabo Maŋtsɛyeli shɛɛ sane lɛ toi. (Yohane 15:20) Shi kɛlɛ, enɛ etsɔɔɔ akɛ bɔ fɛɛ bɔ ni fee lɛ, obaahi shi ákɛ mɔ ni ayeɔ ehe fɛo ní akpooɔ lɛ. Nɔ ni tamɔɔɔ nakai lɛ, Odasefoi oblahii kɛ oblayei babaoo ena mɛi komɛi ni miisumɔ ni amɛbo amɛ toi, ni amɛna bulɛ ni mli kwɔ kɛjɛ amɛtipɛŋfoi aŋɔɔ kɛtsɔ amɛhemɔkɛyelii ni amɛkpɛtɛ he gbagbalii lɛ nɔ.
“Yehowa Baaye Abua Bo”
6, 7. (a) Gbekɛ yoo ko ni eye afii 17 lɛ nyɛ eye eklasbii lɛ odase yɛ mɛɛ gbɛ nɔ? (b) Mɛni okase kɛjɛ Jennifer niiashikpamɔ lɛ mli?
6 Shi te ooofee tɛŋŋ ona ekãa ni okɛwie ohemɔkɛyeli lɛ he? Mɛni hewɔ otswaaa ofai shi akɛ obaaye anɔkwa kɛji mɛi bi ohemɔkɛyeli lɛ he sane lɛ? Susumɔ Jennifer ni eye afii 17 lɛ niiashikpamɔ lɛ he okwɛ. Ekɛɛ akɛ: “No mli lɛ, miiye shwane niyenii yɛ skul. Gbekɛbii yei ni tara mikpɔlɔ lɛ he lɛ miiwie jamɔ he, ni gbekɛbii yei lɛ ateŋ mɔ ko bi mi jamɔ mli ni miyɔɔ.” Ani Jennifer she gbeyei akɛ eeeha hetoo? Ekpɛlɛ nɔ akɛ: “Hɛɛ, ejaakɛ mileee bɔ ni amɛbaafee amɛnii amɛha.” No hewɔ lɛ, mɛni Jennifer fee? Etsa nɔ akɛ: “Mikɛɛ gbekɛbii yei lɛ akɛ Yehowa Odasefoi ateŋ mɔ kome ji mi. Klɛŋklɛŋ lɛ, amɛnaa kpɛ amɛhe. Ekolɛ, amɛhiɛ susumɔ akɛ Yehowa Odasefoi ji gbɔmɛi komɛi ni yɔɔ srɔto. Enɛ ha amɛbibii mi saji, ni minyɛ mijie susumɔi gbohii ni amɛhiɛ lɛ kɛjɛ amɛjwɛŋmɔ mli. Yɛ nakai be lɛ sɛɛ po lɛ, gbekɛbii yei lɛ ekomɛi baa miŋɔɔ ni amɛbabiɔ mi sane yɛ be kɛ bei amli.”
7 Ani Jennifer shwa ehe akɛ eŋɔ hegbɛ lɛ ni ekɛwie ehemɔkɛyelii lɛ ahe? Dabi kwraa! Ekɛɛ akɛ: “Miná miishɛɛ waa yɛ enɛ he beni shwane niyeli be lɛ ba naagbee lɛ. Amrɔ nɛɛ, gbekɛbii yei lɛ hiɛ susumɔ kpakpa yɛ mɛi ni Yehowa Odasefoi lɛ ji diɛŋtsɛ lɛ he.” Jennifer ŋaawoo lɛ yɛ kuku: “Kɛ́ ona akɛ ewa akɛ oooye oklasbii loo otsɔɔlɔi lɛ odase lɛ, sɔlemɔ kuku. Yehowa baaye abua bo. Obaaná miishɛɛ akɛ okɛ hegbɛ ni ona ni okɛye odase lɛ tsu nii jogbaŋŋ.”—1 Petro 3:15.
8. (a) Sɔlemɔ ye ebua Nehemia beni ekɛ shihilɛ ko ni ekpaaa gbɛ lɛ kpe lɛ yɛ mɛɛ gbɛ nɔ? (b) Mɛni ji shihilɛi komɛi ni baanyɛ aba yɛ skul ni ekolɛ ehe baahia ni osɔle oha Yehowa kuku, yɛ dioofeemɔ mli?
8 Kadimɔ akɛ Jennifer miijie yi koni ‘osɔle kuku’ oha Yehowa beni hegbɛ naa egbele koni okɛye ohemɔkɛyeli lɛ he odase lɛ. Enɛ ji nɔ pɛpɛɛpɛ ni Nehemia ni ji Persia Maŋtsɛ Artashasta dãawolɔ lɛ fee beni ekɛ shihilɛ ko ni ekpaaa gbɛ kpe lɛ. Nehemia ehao waa diɛŋtsɛ ejaakɛ enu shihilɛ ni Yudafoi lɛ yɔɔ mli lɛ he ni enu akɛ Yerusalem gbogboi lɛ kɛ agbói lɛ efee koikoi. Maŋtsɛ lɛ yɔse akɛ etamɔ nɔ ni Nehemia efee yeyeeye, no hewɔ lɛ ebi Nehemia nɔ ni gbaa enaa. Dani Nehemia baaha hetoo lɛ, esɔle ebi gbɛtsɔɔmɔ. Kɛkɛ ni ekɛ ekãa bi gbɛ koni eku esɛɛ kɛya Yerusalem ni eyaye ebua ni aku sɛɛ ama maŋtiase ni egbee shi lɛ ekoŋŋ. Artashasta kpɛlɛ Nehemia nibimɔ lɛ nɔ. (Nehemia 2:1-8) Mɛni enɛ tsɔɔ bo? Kɛ́ otsui fa beni hegbɛ ko ete shi ni okɛaaye ohemɔkɛyeli lɛ he odase lɛ, kaaku ohiɛ ofɔ hegbɛ ni okɛaasɔle yɛ dioofeemɔ mli lɛ nɔ. Petro ŋma akɛ: “Nyɛŋɔa nyɛhaomɔ fɛɛ nyɛfɔa [Yehowa] enɔ, ejaakɛ lɛ ejwɛŋɔ nyɛnɔ.”—1 Petro 5:7; Lala 55:23.
‘Afee Klalo ni Akɛfã He’
9. Leah ni eye afii 13 lɛ nyɛ ekɛ Young People Ask wolo lɛ ekomekomei 23 ha yɛ mɛɛ gbɛ nɔ?
9 Susumɔ niiashikpamɔ kroko hu he okwɛ. Leah, ni eye afii 13 lɛ miikane wolo ni ji Questions Young People Ask—Answers That Work * lɛ yɛ shwane hejɔɔmɔ mli yɛ skul. Ekɛɛ akɛ: “No mli lɛ, mɛi krokomɛi miikwɛ mi, etsɛɛɛ ni mɛi babaoo ko badamɔ misɛɛ. Amɛje shishi amɛbi nɔ he ni wolo lɛ kɔɔ.” Beni gbi lɛ baa naagbee lɛ, no mli lɛ gbekɛbii yei ejwɛ ebi Leah koni eha amɛ Young People Ask wolo lɛ eko. Etsɛɛɛ ni gbekɛbii yei nɛɛ bɔi mɛi krokomɛi kɛ wolo lɛ hamɔ, kɛkɛ ni amɛ hu amɛsumɔ ni amɛná eko. Yɛ nɔ ni fe otsii fioo ko mli lɛ, Leah eha eklasbii kɛ amɛnanemɛi lɛ Young People Ask wolo lɛ ekomekomei 23. Ani efee mlɛo kɛha Leah akɛ eeewie beni mɛi krokomɛi je shishi amɛbi wolo ni ekaneɔ lɛ he sane lɛ? Eka shi faŋŋ akɛ dabi! Ekpɛlɛ nɔ akɛ: “Shishijee lɛ, mishe gbeyei. Shi, misɔle, ni mile akɛ Yehowa kɛ mi yɛ.”
10, 11. Israelnyo gbekɛ yoo fioo ko nyɛ eye ebua Sirianyo tatsɛnukpa ko ni ebale Yehowa he nii yɛ mɛɛ gbɛ nɔ, ni mɛɛ tsakemɔi efee yɛ sɛɛ mli?
10 Leah niiashikpamɔ lɛ baanyɛ akai bo shihilɛ ko ni tamɔ nakai nɔŋŋ ni Israelnyo gbekɛ yoo fioo ko ni aŋɔ lɛ nom kɛtee Siria lɛ kɛkpe lɛ. Naeman, ni ji Sirianyo tatsɛnukpa lɛ ji kpitiyelɔ. Ekolɛ, eŋa ji mɔ ni je sanegbaa ni tsirɛ gbekɛ yoo fioo nɛɛ lɛ shishi ni ewie ehemɔkɛyeli lɛ he lɛ. Ekɛɛ akɛ: “Miná ni minuŋtsɔ yaje gbalɔ ní yɔɔ Samaria lɛ ŋɔɔ kulɛ, eeetsá ekpiti nɛɛ eha lɛ kwa!”—2 Maŋtsɛmɛi 5:1-3.
11 Nɔ ni jɛ oblayoo nɛɛ ekãafeemɔ lɛ mli ba ji akɛ, Naeman bale akɛ “Nyɔŋmɔ ko Nyɔŋmɔ ko bɛ shikpɔŋ nɛɛ nɔ fɛɛ, akɛ ja Israel kɛkɛ.” Etswa efai shi po akɛ, “eshaŋ shaa afɔle loo afɔle kroko ehaŋ nyɔŋmɔ ko nyɔŋmɔ ko dɔŋŋ, akɛ ja Yehowa kɛkɛ!” (2 Maŋtsɛmɛi 5:15, 17) Eka shi faŋŋ akɛ Yehowa jɔɔ ekãa ni nakai gbekɛ yoo fioo lɛ jie lɛ kpo lɛ. Ebaanyɛ efee nakai nɔŋŋ eha gbekɛbii ni yɔɔ ŋmɛnɛ lɛ hu, ni ebaafee nakai. Leah na niiashikpamɔ ni tamɔ nakai nɔŋŋ. Yɛ be ni sa mli lɛ, skulbii lɛ ateŋ mɛi komɛi ba eŋɔɔ ni amɛbakɛɛ lɛ akɛ Young People Ask wolo lɛ miiye kɛmiibua amɛ yɛ jeŋba ni amɛyɔɔ lɛ he. Leah kɛɛ akɛ: “Miná miishɛɛ, ejaakɛ mile akɛ miiye miibua mɛi krokomɛi koni amɛkase babaoo yɛ Yehowa he, ni miiye miibua amɛ koni amɛtsake amɛshihilɛ.”
12. Te ooofee tɛŋŋ ona hewalɛ koni okɛfã ohemɔkɛyeli lɛ he lɛ?
12 Obaanyɛ oná niiashikpamɔi ni tamɔ Jennifer kɛ Leah nɔ lɛ nɔŋŋ. Nyiɛmɔ Petro ŋaawoo lɛ sɛɛ, mɔ ni ŋma akɛ ákɛ Kristofonyo lɛ, esa akɛ ofee ‘klalo ni oná hetoo oha mɔ fɛɛ mɔ ni biɔ bo hiɛnɔkamɔ ní yɔɔ omli lɛ shishi lɛ, kɛ mlijɔlɛ kɛ gbeyeishemɔ.’ (1 Petro 3:15) Te ooofee tɛŋŋ ofee nakai? Kasemɔ klɛŋklɛŋ afii 100 lɛ mli Kristofoi agbɛ lɛ, mɛi ni sɔle amɛha Yehowa ní eye ebua amɛ koni amɛkɛ “ekãa pii” ashiɛ Iɛ. (Bɔfoi lɛ Asaji 4:29) Kɛkɛ lɛ, feemɔ ekãa ni ogba mɛi krokomɛi ohemɔkɛyelii lɛ ahe sane. Onaa baakpɛ ohe yɛ nɔ ni baajɛ mli kɛba lɛ he. Kɛfata he lɛ, obaaha Yehowa tsui anya kɛ miishɛɛ.
Vidioi kɛ Nitsumɔi Krɛdɛɛi
13. Mɛɛ hegbɛi komɛi oblahii kɛ oblayei eŋɔ ni amɛkɛye odase? (Kwɛmɔ akrabatsai ni yɔɔ baafai 20 kɛ 21 lɛ amli.)
13 Oblahii kɛ oblayei babaoo kɛ vidioi etsu nii ni amɛkɛgbala amɛhemɔkɛyeli lɛ mli amɛtsɔɔ amɛskulbii loo tsɔɔlɔi. Skul nifeemɔi hu eha amɛná hegbɛi yɛ bei komɛi amli koni amɛkɛjie Yehowa yi. Ákɛ nɔkwɛmɔnɔ lɛ, gbekɛbii hii enyɔ ni amɛye afii 15, ni amɛ fɛɛ amɛji Yehowa Odasefoi lɛ ná nifeemɔ yɛ amɛjeŋ yinɔsane mli nifeemɔ ni akɛha amɛ lɛ mli, koni amɛŋma je lɛŋ jamɔi lɛ ateŋ ekome he sane. Mɛi enyɔ nɛɛ fee ekome ni amɛŋma amɛsane lɛ yɛ Yehowa Odasefoi ahe, ni amɛkɛ wolo ni ji Jehovah’s Witnesses—Proclaimers of God’s Kingdom lɛ tsu nii akɛ nɔ ni amɛná amɛsane lɛ kɛjɛ mli. * Ehe bahia hu ni amɛkɛ minitii enumɔ awie amaniɛbɔɔ lɛ he. Yɛ no sɛɛ lɛ, tsɔɔlɔ lɛ kɛ skulbii lɛ bibii amɛ saji babaoo aahu akɛ gbekɛbii lɛ yadamɔ klas lɛ hiɛ minitii 20 amɛfata he. Yɛ otsii babaoo komɛi asɛɛ lɛ, amɛklasbii lɛ tee nɔ amɛbibii saji ni kɔɔ Yehowa Odasefoi lɛ ahe!
14, 15. (a) Mɛni hewɔ gbɔmɔ gbeyeishemɔ tsɔɔ mɔ tsɔne lɛ? (b) Mɛni hewɔ esa akɛ ona hekɛnɔfɔɔ yɛ ohemɔkɛyelii ni ogbaa mɛi krokomɛi lɛ ahe lɛ?
14 Taakɛ niiashikpamɔi ni tsɔ hiɛ lɛ tsɔɔ lɛ, jɔɔmɔi wuji baafee onɔ kɛtsɔ gba ni obaagba mɛi krokomɛi ohemɔkɛyelii ahe sane akɛ Yehowa Odasefoi lɛ ateŋ mɔ kome lɛ nɔ. Kaaha gbɔmɔ gbeyeishemɔ miitsĩ hegbɛ ni oooná kɛ miishɛɛ ni oooná akɛ oooye obua mɛi krokomɛi koni amɛbale Yehowa lɛ naa. Biblia lɛ kɛɔ akɛ: “Gbɔmɔ shemɔ tsɔɔ tsɔne; shi mɔ ni ŋɔɔ ehiɛ efɔ̃ɔ Yehowa nɔ lɛ, aaabu ehe.”—Abɛi 29:25.
15 Kaimɔ akɛ, ákɛ Kristofonyo oblanyo lɛ, oyɛ nɔ ko ni otipɛŋfoi lɛ miitao waa—shihilɛ gbɛ ni hi fe fɛɛ bianɛ, kɛ wɔsɛɛ naanɔ wala he shiwoo. (1 Timoteo 4:8) Miishɛɛ sane ji akɛ, yɛ United States—he ni ekolɛ, obaasusu akɛ gbɔmɛi ni yɔɔ jɛmɛ lɛ feɔ shikpilikpii loo amɛsumɔɔ heloonaa nitsumɔ babaoo lɛ—niiamlipɛimɔ ko ni afee lɛ jie lɛ kpo akɛ oblahii kɛ oblayei fã kpotoo kɛ hiɛdɔɔ susuɔ jamɔ he waa, ni amɛyibɔ nɛɛ mlijaa etɛ mli ekome kɛɛ akɛ jamɔŋ hemɔkɛyeli ji “nɔ ni náa” amɛshihilɛ nɔ “hewalɛ.” Eyɛ faŋŋ akɛ shihilɛ lɛ tamɔ nakai nɔŋŋ yɛ je lɛŋ hei babaoo. Belɛ, ekolɛ, otipɛŋfoi ni yɔɔ skul lɛ baaná he miishɛɛ akɛ amɛaabo nɔ ni oyɔɔ kɛɛmɔ yɛ Biblia lɛ he lɛ toi.
Ákɛ Oblanyo loo Oblayoo lɛ, Tsi Obɛŋkɛ Yehowa
16. Kɛfata Yehowa he sane ni ooogba mɛi krokomɛi lɛ he lɛ, mɛni ji nɔ ni yɔɔ ehiɛ ni aaasa lɛ mli?
16 Eji anɔkwale akɛ Yehowa ni oooha etsui anya kɛ miishɛɛ lɛ tsɔɔ babaoo fe ehe sane ni ogbaa kɛkɛ. Ehe miihia hu ni oha osu kɛ eshishitoo mlai lɛ akpa gbee. Bɔfo Yohane ŋma akɛ: “Enɛ ji Nyɔŋmɔ suɔmɔ lɛ, akɛ wɔye ekitai lɛ anɔ; ni ekitai lɛ waaa.” (1 Yohane 5:3) Obaana akɛ enɛ ji anɔkwale kɛji otsi obɛŋkɛ Yehowa lɛ. Te ooofee tɛŋŋ ofee enɛ?
17. Te ooofee tɛŋŋ otsi obɛŋkɛ Yehowa?
17 Too be ni okane Biblia lɛ kɛ Biblia kasemɔ woji. Babaoo ni okaseɔ Yehowa he nii lɛ, babaoo ni ebafeɔ mlɛo kɛhaa bo akɛ ooobo lɛ toi ni ogba mɛi krokomɛi ehe sane. Yesu kɛɛ akɛ: “Gbɔmɔ kpakpa jieɔ nɔ̃ kpakpa kɛjɛɔ etsui mli jwetri kpakpa lɛŋ, ni gbɔmɔ fɔŋ hu jieɔ nɔ fɔŋ kɛjɛɔ etsui mli jwetri fɔŋ lɛ mli, ejaakɛ nɔ ni eyi tsui eteke nɔ lɛ, no enaabu wieɔ.” (Luka 6:45) No hewɔ lɛ, okɛ nibii kpakpai awo otsui mli obɔ. Mɛni hewɔ okɛ otii mamɔɔɔ ohiɛ yɛ enɛ gbɛfaŋ? Ekolɛ, obaanyɛ oya ohiɛ yɛ hesaamɔ kɛha otsi ni baa lɛ mli asafoŋ kpeei amli. Oti kroko ni okɛbaama ohiɛ lɛ baanyɛ afee ohe ni okɛaawo mli kɛtsɔ hetooi kukuji shi kɛlɛ, nɔ ni jɛ tsui mli lɛ nɔ. Eji anɔkwale akɛ, ehe miihia hu ni okɛ nibii ni okaseɔ lɛ atsu nii.—Filipibii 4:9.
18. Kɛ́ okɛ shitee-kɛ-woo po kpe lɛ, mɛni mli obaanyɛ oná hekɛnɔfɔɔ yɛ?
18 Jɔɔmɔi ni jɛɔ Yehowa sɔɔmɔ mli kɛbaa lɛ hiɔ shi daa—yɛ anɔkwale mli lɛ kɛmiiya naanɔ. Eji anɔkwale akɛ, yɛ bei komɛi amli lɛ okɛ shitee-kɛ-woo loo hefɛoyeli falɛ ko baakpe yɛ Yehowa Odasefoi lɛ ateŋ mɔ kome ni oji lɛ hewɔ. Shi susumɔ Mose he okwɛ. Biblia lɛ kɛɔ akɛ, “nyɔmɔwoo lɛ ekwɛɔ.” (Hebribii 11:24-26) Bo hu obaanyɛ oná hekɛnɔfɔɔ akɛ Yehowa baawo bo nyɔmɔ yɛ mɔdɛŋ ni obɔɔ koni okase ehe nii ni ogba ehe sane otsɔɔ lɛ mli. Eji anɔkwale akɛ, “ehiɛ kpaŋ nyɛnitsumɔ lɛ nɔ kɛ suɔmɔ deŋme ni nyɛgbo yɛ egbɛi lɛ ahewɔ” lɛ.—Hebribii 6:10.
[Shishigbɛ niŋmai]
^ kk. 9 Mɛi ni fee ji Yehowa Odasefoi.
^ kk. 13 Mɛi ni fee ji Yehowa Odasefoi.
Ani Okaiɔ?
• Mɛni hewɔ obaanyɛ ona nɔmimaa akɛ Yehowa buɔ osɔɔmɔ lɛ akɛ ejara wa lɛ?
• Mɛɛ gbɛ̀i ni atsɔɔ nɔ akɛyeɔ odase yɛ skul mɛi komɛi ena akɛ eyeɔ omanye?
• Te aaafee tɛŋŋ akanya bo koni oye oklasbii lɛ odase?
• Te ooofee tɛŋŋ otsi obɛŋkɛ Yehowa?
[Nikasemɔ lɛ he Sanebimɔi]
[Akrabatsa/Mfonirii ni yɔɔ baafa 20]
Gbekɛbii Bibii lɛ Po Jieɔ Yehowa Yi!
Gbekɛbii ni yeko afii 13 lɛ po enyɛ amɛye odase yɛ skul. Susumɔ niiashikpamɔi nɛɛ ahe okwɛ.
Amber, ni eye afii 10 lɛ klas ni ji enumɔ lɛ miikane wolo ko ni wieɔ Nazi niseniianii ni amɛfee Yudafoi yɛ Jeŋ Ta II lɛ mli lɛ he. Amber kpɛ eyiŋ akɛ ekɛ Purple Triangles vidio lɛ baaha etsɔɔlɔ lɛ. Tsɔɔlɔ lɛ naa kpɛ ehe akɛ eeele akɛ awa Yehowa Odasefoi hu ayi yɛ Nazi nɔyeli lɛ mli. Tsɔɔlɔ lɛ jie vidio lɛ etsɔɔ klas muu lɛ fɛɛ.
Beni Alexa ye afii kpaanyɔ lɛ, eŋma wolo kɛyaha eklas lɛ ni etsɔɔ nɔ hewɔ ni enyɛŋ ekɛ ehe awo amɛ Blonya gbijurɔyeli lɛ mli. Etsɔɔlɔ lɛ naa kpɛ ehe aahu akɛ eha Alexa kane wolo lɛ waa etsɔɔ lɛ diɛŋtsɛ eklasbii lɛ kɛ klas srɔtoi enyɔ krokomɛi hu! Ewie yɛ sane naamuu lɛ mli akɛ: “Atsɔɔ mi koni mikɛ bulɛ aha mɛi krokomɛi, mɛi ni amɛ hemɔkɛyelii yɔɔ srɔto yɛ minɔ lɛ he lɛ, ni miida nyɛ shi akɛ nyɛkɛ bulɛ ha yiŋkpɛɛ ni mifee akɛ miyeŋ Blonya gbi jurɔ lɛ.”
Beni Eric je klas kome lɛ shishi nɔŋŋ lɛ, ekɛ Mi-Wolo ni Gbaa Biblia Mli Saji tee skul lɛ, ni ebi gbɛ koni ekɛtsɔɔ eklasbii lɛ. Etsɔɔlɔ lɛ kɛɛ akɛ: “Mihiɛ susumɔ kpakpa ko. Mɛni hewɔ okaneee sane ko otsɔɔɔ klas lɛ?” Eric fee nakai. Sɛɛ mli lɛ, ebi koni mɛi fɛɛ ni miisumɔ wolo lɛ eko lɛ ahole amɛnine nɔ. Mɛi 18—ní tsɔɔlɔ lɛ fata he lɛ—fee nakai! Eric nuɔ he amrɔ nɛɛ akɛ eyɛ lɛ diɛŋtsɛ edaseyeli shikpɔŋkuku krɛdɛɛ.
Whitney ni eye afii nɛɛhu lɛ ná wolo bibioo ni ji Yehowa Odasefoi kɛ Wolo-Kasemɔ * lɛ he miishɛɛ. Ekɛɛ akɛ: “Minyɛ fɔɔ wolo bibioo nɛɛ kɛ mitsɔɔlɔi lɛ hamɔ daa afi, shi afi nɛɛ, mi diɛŋtsɛ mikɛha. Yɛ wolo bibioo lɛ hewɔ lɛ, mitsɔɔlɔ lɛ hala mi akɛ ‘nikaselɔ ní ebɔ mɔdɛŋ waa yɛ otsi lɛ mli.’”
[Shishigbɛ niŋmaa]
^ kk. 56 Yehowa Odasefoi ji mɛi ni fee nibii ni atsĩ tã yɛ biɛ lɛ fɛɛ.
[Akrabatsa/Mfonirii ni yɔɔ baafa 21]
Shihilɛi Komɛi ni Mɛi Komɛi Kɛtsu Nii ni Amɛkɛwie Amɛhemɔkɛyeli lɛ He
Kɛ́ akɛ skul amaniɛbɔɔ ko loo nifeemɔ ko wo mɛi komɛi adɛŋ lɛ, amɛhalaa saneyitso ko ni baaha amɛná hegbɛ ni amɛkɛye odase
Oblahii kɛ oblayei babaoo kɛ vidio loo wolo ko ni wieɔ sane ni amɛsusuɔ he yɛ klas lɛ eha amɛtsɔɔlɔ lɛ
Beni oblahii kɛ oblayei komɛi kaneɔ Biblia lɛ loo Biblia kasemɔ wolo ko yɛ hejɔɔmɔ be mli lɛ, oblahii kɛ oblayei krokomɛi bɛŋkɛɔ amɛ ni amɛbiɔ amɛ saji
[Mfoniri ni yɔɔ baafa 18]
Mɛi ni yɔɔ niiashikpamɔ lɛ baanyɛ aye abua oblahii kɛ oblayei lɛ koni amɛsɔmɔ Yehowa