Sanebimɔi ni Jɛ Kanelɔi Adɛŋ

Kɛji akɛ Kristofonyo ko nuɔ gbeei komɛi lɛ, ani no tsɔɔ diɛŋtsɛ akɛ daimonioi miitutua lɛ?

Dabi. Yɛ be mli ni ábɔ amaniɛ akɛ daimonioi jieɔ amɛhe kpo faŋŋ yɛ nakai gbɛ nɔ lɛ, aŋkroaŋkroi babaoo ni nuɔ gbeei aloo amɛnáa jwɛŋmɔŋ naagbai ni haoɔ mɔ, ni anyɛɛɛ atsɔɔ shishi lɛ ekase kɛtsɔ niiamlipɛimɔ nɔ akɛ amɛyɛ gbɔmɔtsoŋ hewalɛnamɔ he naagba.

Yɛ klɛŋklɛŋ afii 100 lɛ mli po lɛ, ayɔse faŋŋ akɛ bei komɛi lɛ nibii ni jɛɔ daimonioi atutuamɔi kɛ gbɔmɔtsoŋ hewalɛnamɔ mli kɛbaa lɛ je amɛhe. Yɛ Mateo 17:14-18 lɛ, wɔkaneɔ oblanyo fioo ko ni Yesu tsa lɛ lɛ he sane. Eyɛ mli akɛ oblanyo fioo lɛ jie gbiligbili nifeemɔi ni naa wa kpo moŋ, shi daimonio diɛŋtsɛ ji nɔ ni hɔ epiŋmɔ lɛ sɛɛ. Shi kɛlɛ, yɛ be ko ni tsɔ hiɛ lɛ mli, beni akɛ gbɔmɛi babaoo ni miipiŋ ba Yesu ŋɔɔ kɛha tsamɔ lɛ, mɛi komɛi ni fata he ji “mɛi ni daimonioi yɔɔ amɛmli kɛ mɛi ni yeɔ gbiligbili.” (Mateo 4:24, wɔma efã ko nɔ mi.) Eka shi faŋŋ akɛ, ana akɛ mɛi ni yeɔ gbiligbili lɛ ateŋ mɛi komɛi yɛ ni jeee daimonioi ji nɔ ni haoɔ amɛ. Amɛnaagbai lɛ jɛ gbɔmɔtsoŋ hewalɛ ni amɛbɛ lɛ hewɔ.

Abɔɔ amaniɛ akɛ mɛi ni naa nɔ kɛjɛɔ jwɛŋmɔŋ hela, ni ji hela ko ni bei babaoo lɛ akɛ tsofa tsaa lɛ mli lɛ, nuɔ gbeei aloo ehaa amɛfeɔ amɛnii tamɔ nɔ ni hewalɛ ko ni nɔ kwɔ fe adesai anɔ̃ miiná amɛnɔ hewalɛ. * Gbɔmɔtsoŋ naagba mli shihilɛi krokomɛi baanyɛ ekɛ jwɛŋmɔŋ futumɔ aba ni baaha mɛi komɛi asusu yɛ gbɛ ni ejaaa nɔ akɛ daimonioi ji mɛi ni hɔ sɛɛ. No hewɔ lɛ, yɛ be mli ni ekolɛ mɔ aŋkro ni kɛɔ akɛ enuɔ gbeei aloo eyɛ jwɛŋmɔŋ naagbai krokomɛi ni haoɔ mɔ lɛ sumɔŋ ni eku ehiɛ eshwie daimonioi atutuamɔi anɔ lɛ, esa akɛ bɔ fɛɛ bɔ ni eji lɛ awo lɛ hewalɛ koni epɛi mli ekwɛ akɛ nɔ ni baa enɔ lɛ kɔɔ gbɔmɔtsoŋ hewalɛ ni ebɛ lɛ he lo.

[Shishigbɛ niŋmaa]