Nɔ ni Loofɔji Baanyɛ Atsɔɔ Wɔ

“NYƐKWƐA ŋwɛi loofɔji lɛ: amɛduuu nii, asaŋ amɛkũuu, asaŋ amɛbuaaa naa amɛwooo aboŋoi amli; shi nyɛtsɛ ni yɔɔ ŋwɛi lɛ lɛɔ amɛ kɛ̃. Ani nyɛhiii aahu fe amɛ?” (Mateo 6:26) Yesu Kristo wie wiemɔi nɛɛ yɛ maŋshiɛmɔ ko ni ehe gbɛi waa ni eha yɛ gɔŋ ko ni bɛŋkɛ Galilea Ŋshɔ lɛ masɛi lɛ nɔ lɛ mli. Jeee esɛɛnyiɛlɔi lɛ pɛ bo lɛ toi. Asafo babaoo ni baanyɛ abatsɔmɔ ekaselɔi ni jɛ shikpɔŋ lɛ nɔ hei srɔtoi fɛɛ lɛ yɛ jɛmɛ. Amɛteŋ mɛi babaoo ji ohiafoi ni kɛ helatsɛmɛi eba koni Yesu atsa amɛ.—Mateo 4:23–5:2; Luka 6:17-20.

Beni Yesu etsa mɛi ni he yeɔ lɛ fɛɛ sɛɛ lɛ, egbala ejwɛŋmɔ kɛba mumɔŋ hiamɔ nii ni he hiaa titri lɛ nɔ. Nɔ ni fata nikasemɔi ni ekɛha lɛ ahe ji nɔ ni atsi tã yɛ yiteŋgbɛ lɛ.

Ŋwɛi loofɔji kɛ be saŋŋ ehi shihilɛ mli. Amɛteŋ ekomɛi kɛ kooloi bibii ni ji filikilɔi lɛɔ amɛhe, ni ekrokomɛi hu kɛ aduawai kɛ dumɔwui lɛɔ amɛhe. Kɛji akɛ Nyɔŋmɔ eto niyenii ni fa tamɔ nɛkɛ he gbɛjianɔ eha loofɔji lɛ, eka shi faŋŋ akɛ ebaanyɛ eye ebua adesai ni ji etsuji lɛ koni amɛná amɛdaaŋ ŋmãa. Ekolɛ ebaafee enɛ kɛtsɔ yelikɛbuamɔ ni ekɛaaha amɛ koni amɛná nitsumɔ lɛ nɔ, bɔni afee ni amɛnine ashɛ shika nɔ kɛha niyenii. Aloo ekolɛ ebaaha amɛ diɛŋtsɛ amɛniyenii ni amɛbaadu lɛ ashwere. Yɛ hiamɔ bei amli lɛ, Nyɔŋmɔ baanyɛ atsirɛ akutsoŋbii loo nanemɛi ni mli hi lɛ atsuii koni amɛkɛ mɛi ni ehia amɛ lɛ aja nɔ fɛɛ nɔ ni amɛyɔɔ.

Babaoo yɛ ni wɔbaanyɛ wɔkase kɛtsɔ loofɔlɔ shihilɛ ni wɔɔkwɛ jogbaŋŋ lɛ nɔ. Nyɔŋmɔ kɛ henumɔi ni yɔɔ naakpɛɛ ebɔ loofɔji koni amɛfee tsũi ní amɛbaanyɛ amɛlɛ amɛbii yɛ mli. Kadimɔ loofɔlɔ tsũi henɔi srɔtoi enyɔ. Afrika loofɔlɔ ko ni ji rock martin lɛ tsũ ji nɔ ni afee he mfoniri yɛ abɛkugbɛ lɛ. Ama yɛ tɛsaa nɔ loo shĩa gbogbo he. Loofɔlɔ tsũi nɛɛ ayiteŋ haanɔ lɛ ji tɛsaa ko ni tsotsoro shi lɛ, loo taakɛ atsɔɔ yɛ mfoniri nɛɛ mli lɛ, tsũ ko yiteŋ haanɔ shishigbɛ lɛ. Nɔ ni akɛfee loofɔlɔ tsũ lɛ mli shikpɔŋ ji ŋmilitsa ŋmɔtɔ bibii ni atsara lɛ tamɔ kɔɔpoo henɔ ko. Nuu kɛ yoo lɛ fɛɛ tsuɔ nii waa koni amɛkɛbua ŋmilitsa ŋmɔtɔi anaa, ni ekolɛ ebaahe nɔ ni fe nyɔŋ kome dani amɛbaagbe amɛtsũ lɛ naa. Kɛkɛ lɛ amɛkɛ jwɛi kɛ tsɛji ehà emligbɛ. Amɛ fɛɛ amɛkɛ amɛhe woɔ amɛbi lɛ niyenii hamɔ mli. Loofɔlɔ nuu ko ni ji masked weaver lɛ tsũ ji nɔ ni yɔɔ shishigbɛ lɛ. Nɛkɛ Afrika loofɔlɔ ni tsuɔ nii waa nɛɛ kɛ jwɛii anaabui ni naa ba loo tsei krokomɛi akpãai maa etsũ. Ebaanyɛ egbe loofɔlɔ tsũ kome maa naa yɛ gbi kome mli ni ekolɛ ebaalo nɔ ni fe 30 kɛ́ shɛ amɛbe yɛ afi mli!

Mɛni ji nɔ ni wɔkaseɔ? Kɛji akɛ Nyɔŋmɔ kɛ hesaai kɛ tsũmaa he nibii ni fa tamɔ nɛkɛ haa loofɔji koni amɛkɛmamɔ loofɔlɔ tsũi lɛ, ekã shi faŋŋ akɛ ebaanyɛ eye ebua etsuji adesai koni amɛná shihilɛhei ni he hiaa amɛ lɛ. Shi kɛlɛ, kɛji akɛ wɔmiitao ni Yehowa Nyɔŋmɔ aye abua wɔ ni wɔnine ashɛ wɔheloonaa hiamɔ nii anɔ lɛ, Yesu tsɔɔ akɛ nɔ kroko hu he miihia. Yesu wo shi akɛ: “Shi nyɛtaoa Nyɔŋmɔ maŋtsɛyeli lɛ kɛ ejalɛ lɛ tsutsu, ni akɛ nii nɛɛ fɛɛ aaafata he aha nyɛ.” (Mateo 6:33) Ekolɛ obaabi akɛ, ‘Mɛni he Nyɔŋmɔ Maŋtsɛyeli lɛ sɛɛgbɛ ní aaatao lɛ kɔɔ?’ Yehowa Odasefoi ni jaa nɛkɛ wolo tɛtrɛɛ nɛɛ, baaná he miishɛɛ akɛ amɛaaha nakai sanebimɔ lɛ hetoo.