Nɔ Hewɔ ni Mɛi Ayelikɛbuamɔ He Hiaa wɔ

“Mɛi enyɔ hi fe mɔ kome . . . Kɛ́ shi amɛgbee lɛ, mɔ kome aaawó enaanyo nɔ.”—Maŋtsɛ Salomo

MAŊTSƐ SALOMO ni hi shi yɛ blema Israel lɛ kɛɛ akɛ: “Mɛi enyɔ hi fe mɔ kome; ejaakɛ amɛnáa amɛdeŋmegbomɔ lɛ mli nyɔmɔwoo kpakpa. Ejaakɛ kɛ́ shi amɛgbee lɛ, mɔ kome aaawó enaanyo nɔ; shi mɔ kome too lɛ, kɛ́ egbee shi lɛ, kpóo ha lɛ, ejaakɛ mɔ ni tĩa enyɔ ni aaawó enɔ bɛ!” (Jajelɔ 4:9, 10) Nɛkɛ nilelɔ ni kpaa adesai ashihilɛ shi ekwɛɔ nɛɛ maa bɔ ni nanemɛi ní wɔɔbɔ lɛ he hiaa ha kɛ bɔ ni ehe hiaa ni wɔkatsi wɔhe kɛjɛ mɛi ahe lɛ nɔ mi. Shi kɛlɛ, enɛ jeee adesa ko susumɔ ko kɛkɛ. Salomo wiemɔ lɛ jɛ ŋwɛi nilee kɛ mumɔ krɔŋkrɔŋ lɛ mli.

Nilee bɛ mli akɛ wɔɔtsi wɔhe kɛaajɛ mɛi ahe. Adesai ahe hiaa amɛhe. Hewalɛwoo kɛ yelikɛbuamɔ ni jɛ mɛi krokomɛi adɛŋ he miihia wɔteŋ mɔ fɛɛ mɔ. Biblia mli abɛ ko kɛɔ akɛ: “Mɔ ni etse ehe lɛ, akɔnɔ nii etaoɔ, ni etseɔ nɔ ni hi ha lɛ fɛɛ hiɛ atua.” (Abɛi 18:1) No hewɔ lɛ, ebɛ naakpɛɛ mɔ akɛ jeŋ nilelɔi ni kaseɔ adesai ashihilɛ he nii lɛ woɔ aŋkroaŋkroi hewalɛ ni amɛkɛ amɛhe awo kuu ko mli ni amɛná mɛi krokomɛi ahe miishɛɛ.

Nɔ ni fata nibii ni Nilelɔ Robert Putnam jie yi akɛ ebaatsĩɛ kwasafoŋ shihilɛ hiɛ ekoŋŋ lɛ he ji “hewalɛ ni jamɔŋ hemɔkɛyeli naa yɛ mɛi anɔ lɛ mli hewalɛ ní aaawo.” Yehowa Odasefoi bɔɔ mɔdɛŋ waa yɛ enɛ gbɛfaŋ ejaakɛ amɛnine shɛɔ hebuu nɔ yɛ asafoi ni tamɔ weku ni yɔɔ jeŋ fɛɛ lɛ mli. Yɛ bɔfo Petro wiemɔi lɛ kɛ gbeekpamɔ naa lɛ, ‘amɛyɛ suɔmɔ kɛha nyɛmimɛi anaanyobɔɔ muu lɛ fɛɛ,’ ní amɛyɔɔ ‘gbeyeishemɔ kɛha Nyɔŋmɔ lɛ.’ (1 Petro 2:17) Odasefoi lɛ hu kpooɔ amɛhe ni amɛaatsi kɛaajɛ mɛi ahe kɛ nibii gbohii ni jɛɔ mli kɛbaa lɛ, ejaakɛ nifeemɔi kpakpai babaoo ní kɔɔ anɔkwa jamɔ he lɛ haa amɛyeɔ amɛbuaa amɛnanemɛi lɛ koni amɛkase anɔkwale ni yɔɔ Nyɔŋmɔ Wiemɔ, ni ji Biblia lɛ mli lɛ.—2 Timoteo 2:15.

Suɔmɔ kɛ Naanyobɔɔ Tsake Amɛshihilɛ

Yehowa Odasefoi tamɔ akutso ko ni ekomefeemɔ yɔɔ amɛteŋ ni emli bii lɛ ateŋ mɔ fɛɛ mɔ tsuɔ gbɛfaŋnɔ ko ni he hiaa waa he nii yɛ mli. Ákɛ nɔkwɛmɔnɔ lɛ, susumɔ Miguel, Froylán, kɛ Alma Ruth ní amɛyi etɛ lɛ fɛɛ jɛ weku kome mli yɛ Latin Amerika lɛ asane lɛ he okwɛ. Afɔ́ amɛ kɛ wú mli hela ko ni haa mɛi feɔ kpitibii. Mɛi etɛ lɛ fɛɛ taa helatsɛmɛi ashwiili mli. Mɛɛ gbɛ nɔ Odasefoi ni amɛkɛbɔ lɛ ená amɛshihilɛ nɔ hewalɛ yɛ?

Miguel wie akɛ: “Mikɛ naagbai kpe yɛ bei kɛ bei amli, shi beni mikɛ Yehowa webii lɛ bɔi bɔɔ lɛ, mishihilɛ tsake. Ní mɔ aaatsi ehe kɛaajɛ mɛi ahe lɛ yɛ oshara waa. Nanemɛi heyelilɔi ni mikɛ  amɛ bɔɔ yɛ Kristofoi akpeei ashishi, kɛ shi ni mikɛ amɛ hiɔ daa otsi lɛ ye ebua mi waa ni miná miishɛɛ kɛ tsui ni nyɔɔ mɔ mli.”

Alma Ruth kɛfata he akɛ: “Miyaje nɔnyɛɛ shihilɛi ni mli wa waa mli; miye awerɛho waa. Shi beni mikase Yehowa he nii lɛ, minu he akɛ manyɛ maná mikɛ lɛ teŋ wekukpaa ni yɔɔ gbagbalii. No bafee nɔ ko ni jara wa waa yɛ mishihilɛ mli. Miweku lɛ eye ebua wɔ waa, ni no efee wɔ ekome waa nakai lɛ.”

Miguel tsɛ jɛ suɔmɔ mli etsɔɔ Miguel nikanemɔ kɛ niŋmaa. No sɛɛ lɛ, Miguel hu ye ebua Froylán kɛ Alma Ruth koni amɛkase nikanemɔ kɛ niŋmaa. Enɛ he hiaa waa kɛha amɛmumɔŋ shidaamɔ. Alma Ruth kɛɛ akɛ: “Nikanemɔ ni wɔkase lɛ ye ebua wɔ waa ejaakɛ nakai feemɔ baanyɛ alɛ wɔ yɛ mumɔŋ kɛtsɔ Biblia lɛ kɛ Biblia kasemɔ woji akanemɔ nɔ.”

Amrɔ nɛɛ, Miguel miisɔmɔ akɛ Kristofonyo onukpa. Froylán ekane Biblia muu lɛ fɛɛ shii nɛɛhu. Alma Ruth elɛɛ sɔɔmɔ ni ekɛhaa Yehowa lɛ mli kɛtsɔ sɔɔmɔ ni esɔmɔɔ akɛ daa gbɛgbalɔ, loo be-fɛɛ Maŋtsɛyeli jajelɔ ni ekɛ ehe wo mli kɛjɛ afi 1996 lɛ nɔ. Ewie akɛ: “Kɛtsɔ Yehowa jɔɔmɔ nɔ lɛ, mishɛ oti nɛɛ he, akɛni minyɛmimɛi yei ni misumɔɔ lɛ fiɔ misɛɛ, mɛi ni jeee akɛ amɛye amɛbua mi ni mashiɛ kɛkɛ shi moŋ amɛye amɛbua mi hu koni makwɛ Biblia mli nikasemɔi 11 ni minyɛ mije shishi lɛ nɔ lɛ hewɔ.”

Nɔkwɛmɔnɔ kpakpa kroko hu ni yɔɔ ji Emelia, mɔ ni ná oshara ni ehe bahia akɛ eta helatsɛmɛi ashwiili mli yɛ pilamɔi ni ená yɛ enaji kɛ emliteŋ wu lɛ he lɛ hewɔ lɛ. Yehowa Odasefoi ni yɔɔ Mexico City lɛ kɛ lɛ kase Biblia lɛ, ni yɛ afi 1996 mli lɛ abaptisi lɛ. Emelia kɛɛ akɛ: “Dani male anɔkwale lɛ, mika akɛ magbe mihe; misumɔɔɔ akɛ mihiɔ wala mli dɔŋŋ. Minu he akɛ mifee shwɛm waa, ni mifoɔ be fɛɛ be. Shi beni mikɛ mihe bɔ Yehowa webii lɛ ahe lɛ, minu nyɛmimɛi anyɛmifeemɔ suɔmɔ lɛ he. Mihe miishɛɛ ni amɛná lɛ bafee ekãawoo nɔ̃. Onukpai lɛ ateŋ mɔ kome ebatsɔ tamɔ minyɛmi nuu loo tsɛ ko kɛha mi. Ekɛ asafoŋ sɔɔlɔi komɛi kɛ mi yaa kpeei kɛ shiɛmɔ beni mita mishwiili lɛ mli lɛ.”

José, ni abaptisi lɛ akɛ Yehowa Odasefoi lɛ ateŋ mɔ kome yɛ afi 1992 mli lɛ kome pɛ yɔɔ. Eye afii 70, ni eba nitsumɔ mli hejɔɔmɔ yɛ afi 1990 mli. José yajeɔ nɔnyɛɛ shihilɛ mli, shi beni Odasefonyo ko shiɛ eha lɛ lɛ, amrɔ nɔŋŋ ni ebɔi Kristofoi akpeei yaa. Enya nibii ni enu kɛ nibii ni ena yɛ jɛmɛ lɛ he. Ákɛ nɔkwɛmɔnɔ lɛ, ena naanyobɔɔ su ni kã nyɛmimɛi lɛ ateŋ lɛ ni enu he  akɛ amɛsusuɔ ehe akɛ mɔ ko. Asafoŋ onukpai kɛ sɔɔlɔi ni yɔɔ asafo mli ni eyɔɔ lɛ kwɛɔ lɛ amrɔ nɛɛ. (Filipibii 1:1; 1 Petro 5:2) Heyelilɔi ni tamɔ nɛkɛ “etsɔmɔ tsuiwoo” nɔ̃ eha lɛ. (Kolosebii 4:11) Amɛkɛ lɛ yaa datrɛfonyo lɛ ŋɔɔ, amɛyasaraa lɛ yɛ eshia, ni amɛwoɔ lɛ hewalɛ yɛ henumɔŋ yɛ opireshɛn ejwɛ ni afee lɛ lɛ mli. Ekɛɛ akɛ: “Amɛsusuɔ mihe. Amɛji miweku lɛɛlɛŋ. Mináa mikɛ amɛ naanyobɔɔ lɛ he miishɛɛ.”

Nɔ̃ Hamɔ Haa Anáa Miishɛɛ Diɛŋtsɛ

Beni Maŋtsɛ Salomo kɛɛ akɛ “mɛi enyɔ hi fe mɔ kome” lɛ, no mli lɛ ewie bɔ ni sɛɛnamɔ ko kwraa bɛ hewalɛ fɛɛ ni mɔ ko kɛaatiu heloonaa ninámɔ sɛɛ gbɛ lɛ he lɛ egbe naa etsɛko kwraa. (Jajelɔ 4:7-9) No ji nɔ tuuntu ni mɛi babaoo kɛ ekãa tiuɔ sɛɛ ŋmɛnɛ, eyɛ mli moŋ akɛ enɛ biɔ ni mɔ kɛ adesa teŋ sharamɔ ni aaaya nɔ yɛ weku lɛ mli kɛ esɛɛ fɛɛ lɛ ashã afɔle.

Nakai hiɛjoomɔ kɛ pɛsɛmkunya mumɔ lɛ eha mɛi pii etsi amɛhe kɛjɛ mɛi ahe. Enɛ haaa amɛná miishɛɛ loo amɛtsui anyɔ amɛmli yɛ shihilɛ mli, ejaakɛ nijiaŋwujee kɛ hiɛnɔkamɔ ni abɛ ji nɔ ni ehe shi waa yɛ mɛi ni ŋmɛɔ gbɛ ni mumɔ ni tamɔ nɛkɛ naa amɛ nɔ hewalɛ lɛ ateŋ. Nɔ ni tamɔɔɔ nakai lɛ, saji ni agba kɛtsɔ hiɛ lɛ tsɔɔ nibii kpakpai ni jɛɔ mɛi ni sɔmɔɔ Yehowa yɛ suɔmɔ ni amɛyɔɔ kɛha lɛ kɛ naanyo gbɔmɔ lɛ ní akɛ amɛ aaabɔ lɛ mli baa. Kristofoi akpeei ni amɛaaya daa, sɛɛfimɔ kɛ mɔ he susumɔ ni nanemɛi Kristofoi jieɔ lɛ kpo, kɛ amɛhe ni amɛkɛwoɔ shiɛmɔ nitsumɔ lɛ mli kɛ ekãa lɛ ji nibii ni he hiaa titri yɛ yelikɛbuamɔ ni akɛhaa aŋkroaŋkroi nɛɛ lɛ mli bɔni afee ni amɛye henumɔi ni esaaa ní he ni atsiɔ kɛjɛɔ mɛi ahe kɛbaa lɛ nɔ kunim.—Abɛi 17:17; Hebribii 10:24, 25.

Akɛni wɔkɛ wɔhe fɔ̃ɔ mɛi krokomɛi anɔ kɛha yelikɛbuamɔ hewɔ lɛ, shishinumɔ yɛ he akɛ nibii ni wɔfeɔ wɔhaa mɛi krokomɛi lɛ haa wɔtsui nyɔɔ wɔmli. Albert Einstein, ni mɛi krokomɛi ná enitsumɔ lɛ he sɛɛ lɛ kɛɛ akɛ: “Esa akɛ ana bɔ ni mɔ ko he yɔɔ sɛɛnamɔ eha lɛ . . . yɛ nɔ ni ekɛhaa lɛ mli shi jeee yɛ nɔ ni enine shɛɔ nɔ lɛ mli.” Enɛ kɛ wiemɔi nɛɛ ni wɔ-Nuŋtsɔ Yesu Kristo wie lɛ kpãa gbee, akɛ: “Nɔ̃ hamɔ mli yɛ [miishɛɛ, NW] fe hemɔ.” (Bɔfoi lɛ Asaji 20:35) No hewɔ lɛ, yɛ be mli ni ehi akɛ aaajie suɔmɔ kpo atsɔɔ wɔ lɛ, eji nɔ ni hi jogbaŋŋ diɛŋtsɛ hu akɛ wɔɔjie suɔmɔ kpo wɔtsɔɔ mɛi krokomɛi.

Nɔkwɛlɔ gbɛfalɔ ko ni kɛ afii babaoo esara asafoi koni ewo amɛ hewalɛ yɛ mumɔŋ ní eye ebua kɛmamɔ kpeehei kɛha Kristofoi ni bɛ nɔ ko tsɔ lɛ tsɔɔ ehenumɔi amli yɛ nɛkɛ gbɛ nɔ akɛ: “Miishɛɛ ni miyɔɔ akɛ miisɔmɔ minyɛmimɛi lɛ, kɛ amɛhiɛ su ni tsɔɔ hiɛsɔɔ sɔŋŋ lɛ kanyaa mi koni maya nɔ ni matao hegbɛi ni mikɛye mabua. Niiashikpamɔ ni miná lɛ tsɔɔ akɛ mɛi krokomɛi ahe miishɛɛ ni aaaná lɛ ji nɔ diɛŋtsɛ ni kɛ miishɛɛ baa. Ni mile akɛ ákɛ onukpai lɛ, esa akɛ ‘wɔtsɔmɔ tamɔ abobaahe yɛ kɔɔyɔɔ naa . . . , tamɔ faai yɛ ŋã kpataa nɔ loo tɛsaa kpele ko ni haa hɔ̃ɔŋ yɛ shikpɔŋ gbiŋ nɔ.’”—Yesaia 32:2.

Kwɛ Bɔ ni Ehi akɛ Aaafee Ekome Kɛhi Shi!

Yɛ anɔkwale mli lɛ, sɛɛnamɔ kpele kɛ anɔkwa miishɛɛ jɛɔ mɛi krokomɛi ni aaaye abua amɛ kɛ mɛi ni sɔmɔɔ Yehowa lɛ ní ataoɔ amɛ kɛ naanyobɔɔ lɛ mli kɛbaa. Lalatsɛ lɛ lá akɛ, “Kwɛ bɔ ni ehi, bɔ ni eyɔɔ fɛo, kɛ́ nyɛmimɛi fee ekome kɛhi shi  lɛ!” (Lala 133:1) Weku ekomefeemɔ ji nɔ ko ni he hiaa waa yɛ yelikɛbuamɔ ni akɛaaha he lɛ mli, taakɛ eba lɛ yɛ Miguel, Froylán, kɛ Alma Ruth sane lɛ mli lɛ. Ni mɛɛ jɔɔmɔ eji nɛkɛ akɛ anɔkwa jamɔ aaafee wɔ ekome! Beni bɔfo Petro kɛ ŋaawoo eha Kristofoi wumɛi kɛ ŋamɛi egbe naa sɛɛ lɛ, eŋma akɛ: “Shi naagbee lɛ, nyɛ fɛɛ nyɛhiɛa jwɛŋmɔ kome, nyɛnanaa nyɛhaa nyɛhe, nyɛdɔa nyɛhe akɛ nyɛmimɛi, nyɛmli ajɔa ahaa nyɛhe, nyɛjwɛŋa heshibaa jwɛŋmɔ.”—1 Petro 3:8.

Anɔkwa naanyobɔɔ kɛ sɛɛnamɔi kpelei baa, yɛ henumɔŋ kɛ mumɔŋ fɛɛ. Beni bɔfo Paulo kɛ enanemɛi ni yɔɔ hemɔkɛyeli lɛ mli lɛ wieɔ lɛ, ewo amɛ hewalɛ akɛ: “Nyɛshɛjea mɛi ni tsui faa lɛ amii; nyɛherea mɛi ni feɔ gbedee lɛ; nyɛtoa nyɛtsui shi nyɛhaa mɛi fɛɛ. . . . Daa nɛɛ nyɛnyiɛa ekpakpafeemɔ sɛɛ nyɛhaa nyɛhe kɛ mɛi fɛɛ.”—1 Tesalonikabii 5:14, 15.

No hewɔ lɛ, taomɔ gbɛ̀i ni anyɛɔ atsuɔ he nii koni ofee mɛi krokomɛi ejurɔ. “Nyɛhaa wɔfea mɛi fɛɛ ejurɔ, shi titri lɛ mɛi ni ji hemɔkɛyeli lɛ webii lɛ,” ejaakɛ enɛ baaha shishinumɔ diɛŋtsɛ aba oshihilɛ mli ni ebaaha oná miishɛɛ ni otsui anyɔ omli. (Galatabii 6:9, 10) Yesu kaselɔ Yakobo ŋma akɛ: “Kɛji nyɛmi nuu ko loo nyɛmi yoo ko nyiɛ yayai ni enáaa edaa ŋmãa lɛ, ni nyɛteŋ mɔ ko yakɛɛ amɛ akɛ: Nyɛyaa yɛ hejɔlɛ mli: nyɛyawerea la, ni nyɛyayea nii nyɛtɔrɔa; shi ehaaa amɛ nii ni hiaa gbɔmɔtso lɛ: mɛɛ sɛɛnamɔ yɔɔ mli?” (Yakobo 2:15, 16) Hetoo kɛha nakai sanebimɔ lɛ yɛ faŋŋ. Ehe miihia ni ‘wɔteŋ mɔ fɛɛ mɔ akafo enɔ̃ mli, shi moŋ efo enaanyo hu nɔ̃ mli.’—Filipibii 2:4.

Kɛfata heloonaa gbɛfaŋ yelikɛbuamɔ ni Yehowa Odasefoi kɛhaa mɛi krokomɛi lɛ he yɛ be mli ni ehe ebahia ni atsu hiamɔ nii krɛdɛɛ ko he nii lɛ loo kɛji oshara ko ba lɛ, amɛkɛ ekãa babaoo tsuɔ nii kɛyeɔ amɛbuaa nanemɛi adesai yɛ gbɛ titri ko ni he hiaa waa nɔ—kɛtsɔ Nyɔŋmɔ Maŋtsɛyeli lɛ sanekpakpa lɛ shiɛmɔ nɔ. (Mateo 24:14) Odasefoi ni fa fe 6,000,000 ní kɛ amɛhe woɔ nɛkɛ shɛɛ sane ni haa mɔ hiɛnɔkamɔ kɛ miishɛjemɔ nɛɛ jajemɔ mli lɛ ji odaseyeli ni tsɔɔ anɔkwa miishɛɛ ni amɛjieɔ lɛ kpo yɛ mɛi krokomɛi ahe. Shi yelikɛbuamɔ ni amɛkɛhaa kɛtsɔ Ŋmalɛ Krɔŋkrɔŋ lɛ nɔ lɛ hu yeɔ ebuaa ni atsuɔ adesa hiamɔ nii kroko hu he nii. Mɛni ji no?

Hiamɔ Nii ko He Nitsumɔ

Bɔni afee ni wɔná anɔkwa miishɛɛ lɛ, ehe miihia ni wɔná wɔkɛ Nyɔŋmɔ teŋ wekukpaa kpakpa. Awieɔ akɛ: “Anɔkwale ni eji akɛ nɔ ko kanyaa gbɔmɔ yɛ he fɛɛ he ni eyɔɔ yɛ bei fɛɛ mli, kɛjɛ shishijee kɛbashi ŋmɛnɛ gbi nɛɛ koni ebo etsɛ́ nɔ ko ni eheɔ eyeɔ akɛ enɔ kwɔ ni eyɛ hewalɛ kwraa fe lɛ lɛ tsɔɔ akɛ jamɔ ji nɔ ko ni akɛfɔ́ɔ mɔ, ni esa akɛ akpɛlɛ enɛ nɔ yɛ jeŋ nilee naa. . . . Esa akɛ bɔ ni adesai ni yɔɔ jeŋ fɛɛ lɛ taoɔ mɔ ko ni ji ofe sɛɛ gbɛ kɛ hemɔkɛyeli ni ayɔɔ yɛ nakai mɔ lɛ mli lɛ aha wɔnaa akpɛ wɔhe kɛ woo.”—Man Does Not Stand Alone, by A. Cressy Morrison.

Yesu Kristo jaje akɛ: “Miishɛɛ ji mɛi ni amɛhiɛ yɔɔ amɛmumɔŋ hiamɔ nii anɔ lɛ.” (Mateo 5:3, NW) Gbɔmɛi nyɛɛɛ aya nɔ jogbaŋŋ kɛji akɛ amɛtsi amɛhe kɛjɛ adesai krokomɛi ahe be kpalaŋŋ. Shi kɛlɛ, eji hiɛdɔɔ sane waa akɛ wɔɔtsi wɔhe kɛaajɛ wɔ-Bɔlɔ lɛ he. (Kpojiemɔ 4:11) Esa akɛ “Nyɔŋmɔ he nilee” ni wɔɔná kɛ ekɛ nitsumɔ afee nɔ ko ni he hiaa yɛ wɔshihilɛ mli. (Abɛi 2:1-5) Yɛ anɔkwale mli lɛ, esa akɛ wɔtswa wɔfai shi akɛ wɔbaatsu wɔmumɔŋ hiamɔ nii ahe nii, ejaakɛ wɔnyɛŋ wɔhi shi ni Nyɔŋmɔ yelikɛbuamɔ bɛ mli ni wɔtsi wɔhe kɛjɛ ehe. Shihilɛ ni yɔɔ miishɛɛ kɛ nɔ ni haa mɔ tsui nyɔɔ emli diɛŋtsɛ ní wɔɔná lɛ damɔ wɔkɛ Yehowa, ‘Mɔ ni Kwɔ Fe Fɛɛ yɛ shikpɔŋ lɛ nɔ’ lɛ teŋ wekukpaa kpakpa ní wɔɔná lɛ nɔ.—Lala 83:19.

[Mfoniri ni yɔɔ baafa 5]

Miguel: “Mikɛ naagbai kpe yɛ be kɛ bei amli, shi beni mikɛ Yehowa webii bɔi bɔɔ lɛ, mishihilɛ tsake”

[Mfoniri ni yɔɔ baafa 5]

Alma Ruth: “Beni mikase Yehowa he nii lɛ, minu he akɛ manyɛ maná mikɛ lɛ teŋ wekukpaa ni yɔɔ gbagbalii”

[Mfoniri ni yɔɔ baafa 6]

Emelia: “Dani male anɔkwale lɛ, . . . minu he akɛ mifee shwɛm waa”

[Mfoniri ni yɔɔ baafa 7]

Anɔkwa jálɔi ni wɔkɛ amɛ bɔɔ lɛ yeɔ ebuaa ni wɔnine shɛɔ wɔmumɔŋ hiamɔ nii anɔ