Susumɔ Nii Ahe Jogbaŋŋ Feemɔ—Onii yɛ Nilee Mli

SUSUMƆ shihilɛ nɛɛ he okwɛ: Yesu Kristo miitsɔɔ mli akɛ jamɔ mli henyɛlɔi ni yɔɔ Yerusalem lɛ baapiŋ lɛ waa, ni no sɛɛ lɛ amɛbaagbe lɛ. Enaanyo ni bɛŋkɛ lɛ kpaakpa, ni ji bɔfo Petro nyɛɛɛ ahe aye. Yɛ anɔkwale mli lɛ, eŋɔ Yesu kɛtee afãgbɛ ni ekã ehiɛ. Anyɛŋ aje anɔkwayeli mli ni Petro jɛ esusu nii ahe lɛ he ŋwane kwraa. Shi te Yesu bu Petro susumɔ lɛ eha tɛŋŋ? Yesu kɛɛ akɛ: “Ho misɛɛ, satan! ootɔ̃tɔ̃ minane: ejaakɛ ojwɛŋŋ Nyɔŋmɔ nii ahe, shi gbɔmɛi anii ahe moŋ ojwɛŋɔ.”—Mateo 16:21-23.

Kwɛ bɔ ni enɛ baaha Petro naa akpɛ ehe aha! Yɛ nɔ najiaŋ ni eeefee yelikɛbualɔ moŋ lɛ, yɛ shihilɛ nɛɛ mli lɛ eji ‘nanetɔ̃tɔ̃mɔ nɔ̃’ kɛha e-Nuŋtsɔ ni esumɔɔ lɛ waa lɛ. Te enɛ ba lɛ eha tɛŋŋ? Ekolɛ Petro ŋmɛɛ ehe eha adesai asusumɔ mli tɔmɔ ko ni egbɛ eshwã—ni ji hé ni aheɔ nɔ pɛ ni ataoɔ ahe aye lɛ ayeɔ lɛ.

Kaafee Mɔ ni Kɛ Ehiɛ Fɔ̃ɔ Ehe Nɔ Tsɔ

Nɔ ko ni baanyɛ afite nyɛmɔ ni wɔyɔɔ ni wɔkɛsusuɔ nii ahe jogbaŋŋ lɛ ji hiɛ ni akɛfɔ̃ɔ he nɔ tsɔ su ni wɔɔná. Bɔfo Paulo bɔ nanemɛi Kristofoi ni yɔɔ blema Korinto lɛ kɔkɔ akɛ: “Mɔ ni susuɔ akɛ edamɔ shi lɛ akwɛ ehe ni ahi koni ekagbee shi.” (1 Korintobii 10:12) Mɛni hewɔ Paulo kɛɛ nakai? Ekolɛ akɛni ele bɔ ni ewaaa akɛ aaatsɔmɔ adesai asusumɔi lɛ hewɔ—bɔ ni ebaa lɛ po akɛ Kristofoi ajwɛŋmɔi ‘fiteɔ kɛjɛɔ krɔŋŋfeemɔ ni ajie atsɔɔ Kristo lɛ mli’ lɛ.—2 Korintobii 11:3.

Enɛ ba Paulo blematsɛmɛi lɛ ayinɔbii lɛ fɛɛ nɔ. Yɛ nakai be lɛ mli lɛ, Yehowa kɛɛ amɛ akɛ: “Jeee mijwɛŋmɔi lɛ ji nyɛjwɛŋmɔi lɛ, ni jeee nyɛgbɛ̀i lɛ ji migbɛ̀i lɛ.” (Yesaia 55:8) Amɛbu “amɛhe nilelɔi,” ni enɛ kɛ amanehulu ba amɛnɔ. (Yesaia 5:21) Belɛ, nilee yɛ mli akɛ wɔɔpɛi bɔ ni wɔɔfee ni wɔsusu nii ahe jogbaŋŋ lɛ mli, ni wɔtsi wɔhe kɛjɛ amanehulu ni tamɔ nakai nɔŋŋ he.

Kwɛmɔ Ohe Nɔ Jogbaŋŋ yɛ Heloonaa Susumɔi Ahe

Heloonaa susumɔi ná Korintobii komɛi anɔ hewalɛ gbonyo. (1 Korintobii 3:1-3) Amɛma adesai ajeŋ nilee nɔ mi babaoo fe Nyɔŋmɔ Wiemɔ lɛ. Ŋwanejee ko bɛ he akɛ Hela nilelɔi ni susuɔ nii ahe ni hi shi yɛ nakai gbii lɛ amli lɛ ji hii ni le nii waa. Shi, yɛ Nyɔŋmɔ hiɛ lɛ, kwashiai ji amɛ. Paulo kɛɛ akɛ: “Aŋma akɛ: ‘Mafite nilelɔi anilee, ni ŋaalɔi aŋaa lɛ hu maha afee yaka.’  Nɛgbɛ nilelɔ yɔɔ? nɛgbɛ woloŋmalɔ yɔɔ? nɛgbɛ je nɛŋ naataalɔ yɔɔ? Ani Nyɔŋmɔ ehako je lɛŋ nilee lɛ atsɔ kwashiai asane?” (1 Korintobii 1:19, 20) Nɔ ni kudɔ nakai nilelɔi lɛ ji “je nɛŋ mumɔ lɛ” shi jeee Nyɔŋmɔ mumɔ lɛ. (1 Korintobii 2:12) Amɛ jeŋ nileei kɛ amɛsusumɔi lɛ kɛ Yehowa susumɔ lɛ kpaaa gbee.

Mɔ titri ni heloonaa susumɔi nɛɛ jɛ ji Satan Abonsam, mɔ ni kɛ onufu tsu nii ni ekɛlaka Hawa lɛ. (1 Mose 3:1-6; 2 Korintobii 11:3) Ani eji mɔ ko ni he yɔɔ oshara lolo kɛha wɔ? Hɛɛ! Taakɛ Nyɔŋmɔ Wiemɔ lɛ tsɔɔ lɛ, Satan “eshwila” mɛi “ajwɛŋmɔi” aahu akɛ amrɔ nɛɛ ‘eeshishiu jeŋ muu lɛ fɛɛ.’ (2 Korintobii 4:4; Kpojiemɔ 12:9) Kwɛ bɔ ni ehe hiaa waa akɛ wɔɔkwɛ wɔhe nɔ jogbaŋŋ yɛ eŋaatsɔɔi lɛ ahe!—2 Korintobii 2:11.

Le Ohe Nɔ Kwɛmɔ yɛ “Gbɔmɛi Aŋaa Fɔŋ Too” He

Bɔfo Paulo bɔ kɔkɔ hu eshi “gbɔmɛi aŋaa fɔŋ too.” (Efesobii 4:14) Ekɛ “nitsulɔi shishiulɔi” ni feɔ amɛhe tamɔ nɔ ni amɛwieɔ anɔkwale, shi amɛtsɔmɔɔ sane hiɛ amɛbumɔɔ shi lɛ kpe. (2 Korintobii 11:12-15) Bɔni afee ni nɛkɛ hii nɛɛ anine ashɛ otii ni mamɔ amɛhiɛ lɛ anɔ lɛ, ekolɛ amɛkɛ odaseyelii ni fiɔ amɛsusumɔi pɛ asɛɛ, wiemɔi ni teeɔ henumɔi ashi, anɔkwalei fã kɛ fã ni lakaa mɔ, wiemɔi ni bɛ tɛ̃ɛ ni esaaa kɛ nitsumɔ, kɛ amalei kpetekpeleei po baatsu nii.

Bei pii lɛ, saji ahe adafitswalɔi kɛ wiemɔ tamɔ “jamɔ kuu” tsuɔ nii ni amɛkɛwoɔ mɛi krokomɛi ahiɛgbele. Beni ajieɔ nibii ayi ahaa Parliamentary Assembly of the Council of Europe lɛ, awo ŋaa akɛ “awo” maŋ onukpai ni pɛiɔ jamɔ kui heei amli lɛ “hewalɛ koni amɛtsi amɛhe kɛjɛ nakai wiemɔ lɛ kɛ nitsumɔ he.” Mɛni hewɔ? Anuɔ he akɛ, ahiɛɛɛ jwɛŋmɔ kpakpa ko kwraa yɛ wiemɔ ni ji “teemɔŋ jamɔ kuu” lɛ he. Ekɛɛ kɛfata he akɛ: “Ŋmɛnɛ, yɛ mɛi babaoo ajwɛŋmɔ mli lɛ, jamɔ kuu ehiii kwraa loo eyɛ oshara waa.” Yɛ nakai gbɛ nɔ nɔŋŋ lɛ, Hela woloŋlelɔi lɛ folɔ bɔfo Paulo naa yɛ gbɛ ni ejaaa nɔ akɛ eji “naafuutsɛ,” loo “mɔ ni kɔlɔɔ dumɔwui.” Akɛ enɛ miitsɔɔ akɛ ejeee mɔ ko mɔ ko fe naafuu wielɔ ko kɛkɛ, mɔ ko ni halaa nileei bibii ni ewieɔ he. Yɛ anɔkwale mli lɛ, Paulo ‘miijaje Yesu kɛ gbohiiashitee lɛ he sanekpakpa lɛ eetsɔɔ.’—Bɔfoi lɛ Asaji 17:18.

Ani ŋaa gbɛ̀i ni saji ahe adafitswalɔi kɛtsuɔ nii lɛ yeɔ omanye? Hɛɛ. Amɛji mɛi titrii ni kɛ wekui amli hetsɛ̃ kɛ jamɔ mli hetsɛ̃ ba kɛtsɔ gbɔmɛi asusumɔi yɛ maji loo jamɔi krokomɛi ahe lɛ ni amɛfiteɔ lɛ nɔ. Mɛi babaoo kɛtsu nii ni amɛkɛba mɛi fioo ni asumɔɔɔ amɛsane lɛ ashi. Adolf Hitler kɛ gbɛ̀i ni tamɔ nakai tsu nii jogbaŋŋ beni eha ale Yudafoi lɛ kɛ mɛi krokomɛi akɛ “mɛi ni baa shi,” “mɛi fɔji,” kɛ “mɛi ni he yɔɔ oshara” kɛha Maŋ lɛ. Kaaha lakamɔ ni tamɔ enɛ miifite osusumɔ kɔkɔɔkɔ.—Bɔfoi lɛ Asaji 28:19-22.

Kaalaka Ohe

Ewaaa hu akɛ wɔɔlaka wɔhe. Yɛ anɔkwale mli lɛ, ebaanyɛ efee nɔ ni wa waa akɛ wɔɔŋmɛɛ susumɔi komɛi ni wɔbuɔ amɛ waa lɛ he loo wɔɔbu akɛ naagba yɛ he. Mɛni hewɔ? Ejaakɛ wɔjɛɔ henumɔŋ wɔkɛ wɔhe kpɛtɛɔ wɔsusumɔi ahe. Kɛkɛ lɛ ekolɛ wɔbaalaka wɔhe kɛtsɔ nibii ahe ni wɔbaasusu yɛ gbɛ ni ejaaa nɔ lɛ nɔ—kɛtsɔ yiŋtoi ni wɔɔtsɔɔ koni wɔkɛbu nɔ ni ji efɔŋ diɛŋtsɛ kɛ hemɔkɛyelii ni lakaa mɔ lɛ bem lɛ nɔ.

Enɛ ba klɛŋklɛŋ afii 100 lɛ mli Kristofoi komɛi anɔ. Amɛle Nyɔŋmɔ Wiemɔ lɛ, shi amɛhaaa ni no akudɔ amɛsusumɔ. Amɛbafee ‘mɛi ni kɛ apasa susumɔ shishiu amɛhe.’ (Yakobo 1:22, 26) Nibii ni tsɔɔ akɛ wɔŋmɛɛ wɔhe wɔha nɛkɛ he lakamɔ nɛɛ ateŋ ekome ji kɛji wɔna akɛ wɔmli fuɔ yɛ be mli ni ateɔ shi ashiɔ wɔhemɔkɛyelii lɛ. Yɛ nɔ najiaŋ ni wɔmli aaafu lɛ, ehe miihia ni wɔná jwɛŋmɔ ni ja ni wɔbo nɔ ni mɛi krokomɛi yɔɔ kɛɛmɔ lɛ toi jogbaŋŋ—kɛji akɛ wɔnu he po akɛ wɔsusumɔ lɛ ja.—Abɛi 18:17.

Taomɔ “Nyɔŋmɔ He Nilee”

Mɛni wɔbaanyɛ wɔfee koni wɔsusu nii ahe jogbaŋŋ? Yelikɛbuamɔ babaoo yɛ, shi esa akɛ  wɔjɛ wɔsuɔmɔ mli wɔtsu he nii. Nilelɔ Maŋtsɛ Salomo kɛɛ akɛ: “Mibi, kɛ́ omɔ miwiemɔi lɛ amli, ní okɛ mikitai lɛ to omasɛi, koni oba otoi shi oha nilee, ní okɛ otsui ha sanesɛɛkɔmɔ; hɛɛ, kɛ́ obolɔ otsɛ́ sɛɛyoomɔ, ní owó ogbee nɔ oha sane shishinumɔ, kɛji otao esɛɛ gbɛ tamɔ jwiɛtɛi, ní otao tamɔ jwetrii ní aŋɔtee lɛ: No dani ooonu Yehowa gbeyeishemɔ shishi, ni oooná Nyɔŋmɔ he nilee.” (Abɛi 2:1-5) Hɛɛ, kɛ́ wɔbɔ mɔdɛŋ waa ni wɔha Nyɔŋmɔ Wiemɔ lɛ mli anɔkwalei lɛ yimɔ wɔjwɛŋmɔ kɛ wɔtsui mli obɔbɔ lɛ, wɔbaaná nilee, sɛɛyoomɔ, kɛ sanesɛɛkɔmɔ diɛŋtsɛ. Yɛ gbɛ ko nɔ lɛ, wɔmiitao nibii ni jara wa kwraa fe jwiɛtɛi loo heloonaa jwetri kroko.—Abɛi 3:13-15.

Eyɛ faŋŋ akɛ ŋaalee kɛ nilee ji nibii ni he hiaa waa yɛ nii ahe susumɔ jogbaŋŋ he. Nyɔŋmɔ Wiemɔ lɛ kɛɔ akɛ: “Ŋaalee aaabote otsui mli ni nilee aaaŋɔɔ osusuma naa; jwɛŋmɔ aaabaa oyi jogbaŋŋ, sane shishinumɔ aaabu ohe, ní ejieo kɛjɛ gbɛ fɔŋ nɔ, kɛjɛ mɛi ni wieɔ nibii kɔ̃ɔdɔ̃ji lɛ adɛŋ, mɛi hu ni shiɔ jalɛ tempɔŋi lɛ, ni amɛyanyiɛɔ dujiaŋ gbɛ̀i anɔ lɛ.”—Abɛi 2:10-13.

Ehe miihia titri ni wɔha Nyɔŋmɔ susumɔi akudɔ wɔjwɛŋmɔ yɛ haomɔ loo oshara bei amli. Henumɔi ni mli wa, tamɔ mlifu loo gbeyeishemɔ baanyɛ aha ewa kɛha wɔ akɛ wɔɔsusu nii ahe jogbaŋŋ. Salomo kɛɛ akɛ: “Weiyeli hãa nilelɔ yeɔ sɛkɛ.” (Jajelɔ 7:7) ‘Wɔmli po baanyɛ awo Yehowa la.’ (Abɛi 19:3) Yɛ mɛɛ gbɛ nɔ? Kɛtsɔ shwamɔ ni wɔɔshwa Nyɔŋmɔ yɛ wɔnaagbai ahewɔ ni wɔkɛtsu nii ni wɔkɛbu nibii ni wɔfeɔ ni ekɛ emlai kɛ eshishitoo mlai lɛ kpaaa gbee lɛ bem lɛ nɔ. Yɛ nɔ najiaŋ ni wɔɔsusu akɛ wɔle nɔ fɛɛ nɔ jogbaŋŋ lɛ, eba akɛ wɔkɛ heshibaa baabo ŋaawolɔi ni le nii ní taoɔ ni amɛkɛ Ŋmalɛi lɛ atsu nii koni amɛkɛye amɛbua wɔ lɛ toi. Ni kɛ́ ehe miihia lɛ, nyɛhaa wɔfea klalo akɛ wɔbaaŋmɛɛ susumɔi ni wɔhiɛ mli waa lɛ po he kɛji ebafee faŋŋ akɛ tɔmɔi yɛ he lɛ.—Abɛi 1:1-5; 15:22.

‘Yaa Nɔ Obi Nyɔŋmɔ’

Wɔyɛ yiŋfutumɔ kɛ oshara bei amli. Kɛ́ wɔkɛ jwɛŋmɔ kpakpa baatsu nii jogbaŋŋ ni wɔfee wɔnii yɛ nilee mli lɛ, no lɛ daa sɔlemɔ kɛha Yehowa gbɛtsɔɔmɔ he miihia waa. Paulo ŋma akɛ: “Nyɛkahaoa yɛ nɔ ko nɔ ko he, shi moŋ nɔ fɛɛ nɔ mli lɛ nyɛkɛ sɔlemɔ kɛ faikpamɔ kɛ shidaa atsĩa nyɛtutɔmɔi lɛ atã yɛ Nyɔŋmɔ hiɛ; ni Nyɔŋmɔ hejɔlɛ ni fe jwɛŋmɔi fɛɛ lɛ aaato nyɛtsuii kɛ nyɛjwɛŋmɔi lɛ yɛ Kristo Yesu mli!” (Filipibii 4:6, 7) Kɛ́ wɔbɛ nilee ni wɔkɛaatsu naagbai loo kaai ni haoɔ mɔ he nii lɛ, no lɛ ehe miihia ni ‘wɔya nɔ wɔkpa Nyɔŋmɔ ni haa mɛi fɛɛ faa ni ewieee mɔ ko hiɛ lɛ fai.’—Yakobo 1:5-8.

Akɛni bɔfo Petro le akɛ ehe miihia ni nanemɛi Kristofoi kɛ nilee atsu nii hewɔ lɛ, etao ni ‘etsĩɛ amɛjwɛŋmɔ krɔŋŋ lɛ hiɛ.’ Eesumɔ ni ‘amɛkai gbalɔi krɔŋkrɔŋi lɛ awiemɔi ni amɛwie sá lɛ, kɛ Nuŋtsɔ,’ Yesu Kristo ‘yiwalaherelɔ lɛ kitã’ lɛ. (2 Petro 3:1, 2) Kɛ́ wɔfee enɛ ni wɔha wɔsusumɔ kɛ Yehowa Wiemɔ lɛ kpa gbee lɛ, no lɛ wɔbaasusu nii ahe jogbaŋŋ ni wɔbaafee nii yɛ nilee mli.

[Mfonirii ni yɔɔ baafa 21]

Mra be mli Kristofoi lɛ ha nilee ni Nyɔŋmɔ gbeyeishemɔ yɔɔ mli kudɔ amɛsusumɔi, shi jeee jeŋ nilee susumɔi

[He ni Sane lɛ Jɛ]

Jeŋ nilelɔi kɛjɛ abɛkugbɛ kɛyaa ninejurɔgbɛ: Epicurus: Photograph taken by courtesy of the British Museum; Cicero: Reproduced from The Lives of the Twelve Caesars; Plato: Roma, Musei Capitolini

[Mfonirii ni yɔɔ baafa 23]

Sɔlemɔ kɛ Nyɔŋmɔ Wiemɔ lɛ kasemɔ he miihia