Bɔ ni Akaiɔ Mɛi Komɛi Ahaa

AAAFEE afii akpei etɛ ni eho nɛ lɛ, David miijo Israel Maŋtsɛ Saul naa foi. David tsu kɛtee Nabal, ni ji nuu niiatsɛ ko ni yɔɔ gwantɛŋi kɛ abotiai akuu babaoo lɛ ŋɔɔ koni eha amɛ niyenii kɛ nu. Yɛ anɔkwale mli lɛ, esa akɛ Nabal ajie hiɛsɔɔ kpo atsɔɔ David kɛ esɛɛnyiɛlɔi lɛ yɛ Nabal tookui lɛ ahe ni amɛbu lɛ hewɔ. Shi kɛlɛ, Nabal kpoo akɛ ebaafee amɛ gbɔ. Ekɛ bolɔmɔ wiemɔi po kã David hii lɛ ahiɛ. Nabal kɛ la miishwɛ, ejaakɛ David jeee mɔ ko ni akɛ lɛ wieɔ bɔ ni asumɔɔ.—1 Samuel 25:5, 8, 10, 11, 14.

Su ni Nabal jie lɛ kpo lɛ teɔ shi ewoɔ kusum nifeemɔ ni yɔɔ Boka Teŋgbɛ ni biɔ akɛ ajie gbɔfeemɔ su kpo atsɔɔ saralɔi kɛ gbɔi lɛ. No hewɔ lɛ, mɛɛ gbɛi nɛkɛ Nabal fee eha ehe? Biblia mli amaniɛbɔɔ lɛ kɛɔ akɛ, ‘ewiemɔ jóoɔ ni enifeemɔi ehiii’ ni ákɛ, eji “yakagbɔmɔ.” Egbɛi lɛ shishi ji “buulu,” ni ŋwanejee ko kwraa bɛ he akɛ ejie nakai sui lɛ akpo. (1 Samuel 25:3, 17, 25) Ani obaasumɔ ni akai bo yɛ nakai gbɛ nɔ? Ani ofeɔ keketee ni oŋmɛɛɛ sane he kɛji akɛ okɛ mɛi krokomɛi miiye, titri lɛ kɛ́ eba lɛ akɛ mɛi ni okɛná lɛ ahe efĩ amɛ fioo yɛ sane lɛ mli? Aloo ojieɔ mlihilɛ, gbɔfeemɔ, kɛ mɔ hesusumɔ kpo?

Abigail—Yoo Nilelɔ

Nabal mlilawoo nifeemɔ lɛ kɛ lɛ yawo naagba mli. David kɛ ehii lɛ ateŋ mɛi 400 kɔlɔ amɛklante amɛfimɔ amɛhɛ ni amɛyiŋ kɛtee koni amɛyatsɔɔ Nabal nɔ ko naa. Abigail, Nabal ŋa lɛ ná enu nɔ ni eba lɛ he. Ele akɛ nɔmɔ miihe aba. Mɛni ebaanyɛ efee? Ehe fee oya ni eyahoo niyenii babaoo ni ebua nibii srɔtoi anaa efata he, ni eyi gbɛ koni ekɛyatsĩ David kɛ ehii lɛ anaa. Beni ekɛ amɛ kpe lɛ, ekpa David fai koni ekashwie lá shi yakatswaa. David tsui he jɔ. Ebo efaikpamɔ lɛ toi ni eŋmɛɛ sane lɛ he. Nɛkɛ saji nɛɛ sɛɛ etsɛɛɛ ni Nabal gbo. Akɛni David yɔse Abigail sui kpakpai lɛ hewɔ lɛ, eŋɔ lɛ akɛ eŋa.—1 Samuel 25:14-42.

Mɛɛ gbɛi nɛkɛ Abigail fee eha ehe? Taakɛ shishijee Hebri wiemɔ lɛ tsɔɔ lɛ, eji “yoo ko ni yɔɔ jwɛŋmɔ,” loo “nilelɔ.” Eka shi faŋŋ akɛ eji nilelɔ ni hiɛ kã shi, ni ele bɔ ni atsuɔ sane he nii ahaa kɛ be ni esa akɛ afee nakai. Ejɛ anɔkwayeli mli etsu shihilɛ lɛ he nii koni ekɛbu ewu buulu lɛ kɛ eshiabii lɛ ahe kɛjɛ amanehulu mli. Yɛ naagbee lɛ, egbo ákɛ mɔ ni efee gbɛi kpakpa ni ekaaa ákɛ yoo nilelɔ.—1 Samuel 25:3; New International Version.

 Mɛɛ Gbɛi Nɛkɛ Petro Fee Efɔ̃ Shi?

Nyɛhaa wɔyaa klɛŋklɛŋ afii 100 Ŋ.B. lɛ mli ni wɔsusu Yesu bɔfoi 12 lɛ ahe wɔkwɛa. Ŋwanejee ko bɛ he akɛ amɛteŋ mɔ ni wieɔ yɛ faŋŋ mli ni efeɔ enii kpalakpala fe fɛɛ ji Petro loo Kefa, ní tsutsu ko lɛ eji wolɛɛnyo yɛ Galilea lɛ. Eka shi faŋŋ akɛ eji mɔ ko ni wieɔ kɛ ekãa ni esheee gbeyei akɛ ebaajie ehenumɔi akpo etsɔɔ. Ákɛ nɔkwɛmɔnɔ lɛ, be ko lɛ Yesu fɔ́ ekaselɔi lɛ anaji ahe eha amɛ. Te Petro fee enii eha tɛŋŋ beni eshɛ enɔ akɛ abaafɔ́ enaji ahe lɛ?

Petro kɛɛ Yesu akɛ: “Nuŋtsɔ, bo ofɔ́ɔ minaji ahe nɛɛ?” Yesu here nɔ akɛ: “Nɔ ni mifeɔ nɛɛ, amrɔamrɔ nɛɛ oleee, shi kɛ́ fee sɛɛ lɛ obaale.” Petro ha hetoo akɛ: “Kaafɔ́ minaji ahe kɔkɔɔkɔ.” Kadimɔ bɔ ni Petro fee enii kpalakpala kɛ nɔmimaa eha. Te Yesu here nɔ eha tɛŋŋ?

Yesu jie lɛ naa akɛ: “Kɛji mifɔ́ɔɔ ohe lɛ, obɛ gbɛfaŋnɔ ko yɛ miŋɔɔ.” Simon Petro kɛɛ lɛ akɛ: “Nuŋtsɔ, jeee minaji ahe kɛkɛ, shi moŋ miniji kɛ miyitso hu.” Agbɛnɛ, Petro miifee nii kɛmiiteke nɔ! Shi ole bɔ ni Petro feɔ enii ehaa be fɛɛ be. Ekɛ kutumpɔo loo lakamɔ tsuuu nii.—Yohane 13:6-9.

Akɛ adesai agbɔjɔmɔi ni Petro yɔɔ lɛ hu kaiɔ lɛ. Ákɛ nɔkwɛmɔnɔ lɛ, ekwa Kristo shii etɛ yɛ mɛi ni folɔ enaa akɛ eji Yesu ni jɛ Nazaret ní abu lɛ fɔ lɛ sɛɛnyiɛlɔ lɛ ahiɛ. Beni Petro yɔse etɔmɔ lɛ, efó yikɔyikɔ. Esheee gbeyei akɛ ebaajie awerɛho kɛ dɔlɛ ni eyeɔ lɛ kpo. Eji nɔ ni sa kadimɔ waa hu akɛ Sanekpakpa ŋmalɔi lɛ ŋmala Petro kwamɔ nifeemɔ nɛɛ he sane amɛfɔ̃ shi—eeenyɛ eba akɛ Petro diɛŋtsɛ ji mɔ ni gba amɛ sane lɛ! Ebaa ehe shi ni ekpɛlɛɔ etɔmɔi anɔ. Ani oyɛ nakai su lɛ eko?—Mateo 26:69-75;  Marko 14:66-72; Luka 22:54-62; Yohane 18:15-18, 25-27.

Yɛ otsii fioo komɛi asɛɛ beni Petro ekwa Kristo sɛɛ lɛ, Petro ní mumɔ krɔŋkrɔŋ lɛ eyi lɛ obɔ lɛ kɛ ekãa shiɛ etsɔɔ Yudafoi babaoo yɛ Pentekoste gbi lɛ nɔ. Enɛ tsɔɔ diɛŋtsɛ akɛ Yesu ní átee lɛ shi lɛ yɛ hekɛnɔfɔɔ yɛ emli.—Bɔfoi lɛ Asaji 2:14-21.

Yɛ be kroko mli lɛ, Petro yagbee tsɔne kroko mli. Bɔfo Paulo tsɔɔ mli akɛ dani Yudafoi nyɛmimɛi komɛi ni jɛ Antiokia lɛ aaabashɛ shi lɛ, no mli lɛ Petro kɛ Jeŋmajiaŋbii heyelilɔi lɛ bɔɔ yɛ faŋŋ mli. Shi, etsi ehe kɛjɛ mɛnɛɛmɛi ahe ejaakɛ “eeshe mɛi ni jɛ ketiafolɔi lɛ ateŋ” ni jɛ Yerusalem amɛbashɛ shi etsɛko lɛ “gbeyei.” Paulo kpa Petro jeŋbai enyɔ ni eyɔɔ lɛ he mama.—Galatabii 2:11-14.

Ni kɛlɛ, kaselɔi lɛ ateŋ namɔ wie beni shihilɛ lɛ mli bawa ni ebafee tamɔ nɔ ni Yesu sɛɛnyiɛlɔi lɛ ateŋ mɛi babaoo efee klalo akɛ amɛbaashi lɛ lɛ? Be lɛ ji be mli ni Yesu tsɔɔ nɔ ko hee ko ni kɔɔ bɔ ni eheloo ni abaaye kɛ elá ni abaanu lɛ he hiaa ha lɛ he lɛ. Ekɛɛ akɛ: “Kɛji nyɛyeee gbɔmɔ bi lɛ heloo ni nyɛnuuu elá lɛ, nyɛbɛ wala yɛ nyɛmli.” Yesu sɛɛnyiɛlɔi ni ji Yudafoi lɛ ateŋ mɛi babaoo anane tɔ̃tɔ ni amɛkɛɛ akɛ: “Wiemɔ ni wa nɛ; namɔ aaanyɛ toi abo?” Mɛni ba yɛ no sɛɛ? “Jɛ no nɔ lɛ ekaselɔi lɛ ateŋ mɛi pii ku amɛsɛɛ ni amɛkɛ lɛ enyiɛɛɛ dɔŋŋ.”—Yohane 6:50-66.

Yɛ nɛkɛ be ni mli wa nɛɛ mli lɛ, Yesu tsɔ ehiɛ eha bɔfoi 12 lɛ ni ebi amɛ sane ko ni taa mɔ tsuiŋ waa akɛ: “Ani nyɛ hu nyɛmiisumɔ akɛ nyɛaatee?” Petro jie naa akɛ: “Nuŋtsɔ, namɔ ŋɔɔ wɔɔtee? Bo oyɔɔ naanɔ wala wiemɔ lɛ; ni wɔ lɛ wɔhe wɔye ni asaŋ wɔná wɔle akɛ bo ji Kristo, Nyɔŋmɔ hiɛkalɔ lɛ bi lɛ.”—Yohane 6:67-69.

Mɛi gbɛi nɛkɛ Petro fee efɔ̃ shi? Mɔ fɛɛ mɔ ni kaneɔ saji ni kɔɔ ehe lɛ hiɛ baasɔ bɔ ni eji anɔkwafo ni kɛ sane eteee, bɔ ni eyeɔ anɔkwa, kɛ bɔ ni ejɛɔ esuɔmɔ mli ni ekpɛlɛɔ lɛ diɛŋtsɛ egbɔjɔmɔi anɔ lɛ. Mɛɛ gbɛi kpakpa po efee eha ehe nɛkɛ!

Mɛni Mɛi Kaiɔ yɛ Yesu He?

Yesu shikpɔŋ nɔ sɔɔmɔ nitsumɔ lɛ ye afii etɛ kɛ fã pɛ. Ni kɛlɛ, te esɛɛnyiɛlɔi lɛ kaiɔ lɛ amɛhaa tɛŋŋ? Akɛni eye emuu ni esha ko esha ko bɛ ehe hewɔ lɛ, ani etse ehe yɛ mɛi krokomɛi ahe ni ekɛ amɛteŋ jɛkɛ? Ani ekɛ hewalɛ ni eyɔɔ lɛ tsu nii yɛ gbɛ ni ejaaa nɔ akɛni ele akɛ eji Nyɔŋmɔ Bi lɛ hewɔ? Ani ewo esɛɛnyiɛlɔi lɛ ahe gbeyei ni enyɛ amɛnɔ koni amɛfee toiboo amɛha lɛ? Ani ebu ehe waa fe nine ni no hewɔ lɛ etseee ehiɛ ehaaa mɔ ko? Ani ebɛ dekã kwraa aahu akɛ enáaa be kɛha mɛi ni egbɔjɔ kɛ helatsɛmɛi, loo kɛha gbekɛbii? Ani egbe mɛi ni jɛ maji krokomɛi anɔ kɛ yei ahe guɔ, taakɛ hii ni hi shi yɛ nakai beaŋ lɛ fɔɔ feemɔ lɛ? Mɛni sane ni aŋma afɔ̃ shi lɛ kɛɔ wɔ?

Yesu yɛ gbɔmɛi ahe miishɛɛ. Esɔɔmɔ nitsumɔ lɛ mlipɛimɔ tsɔɔ akɛ etsá akpakei kɛ helatsɛmɛi yɛ shihilɛi pii amli. Ekɛ ehe ha bɔni afee ni eye ebua mɛi ni ehia amɛ lɛ. Ená gbekɛbii ahe miishɛɛ, ni ekɛɛ ekaselɔi lɛ akɛ: “Nyɛhaa gbekɛbii lɛ abaa miŋɔɔ, ni nyɛkatsĩa amɛ gbɛ.” Kɛkɛ ni Yesu ‘loo gbekɛbii lɛ atuu, ni eŋɔ eniji eshwie amɛnɔ, ni ejɔɔ amɛ.’ Ani onáa be ohaa gbekɛbii, loo obɛ dekã kwraa ní oooha amɛba omasɛi?—Marko 10:13-16; Mateo 19:13-15.

Beni Yesu yɔɔ shikpɔŋ lɛ nɔ lɛ, no mli lɛ akɛ jamɔŋ mlai kɛ akpɔi ni tekeɔ nɔ ni Mla lɛ biɔ lɛ eshwie Yudafoi lɛ anɔ tamɔ jatsu ni tsii. Amɛjamɔŋ hiɛnyiɛlɔi lɛ kɛ jatsu ni tsiitsii miishwie mɛi anɔ, yɛ be mli ni amɛ diɛŋtsɛ lɛ, amɛkɛ amɛwao kome folo wooo shishi. (Mateo 23:4; Luka 11:46) No hewɔ lɛ, kwɛ bɔ ni esoro Yesu kwraa hã! Ekɛɛ akɛ: “Nyɛbaa miŋɔɔ, nyɛ mɛi fɛɛ ni etɔ nyɛ ni nyɛjatsui fe nyɛ lɛ, ni maha nyɛ hejɔɔmɔ.”—Mateo 11:28-30.

Gbɔmɛi ahe jɔ amɛ beni amɛkɛ Yesu bɔ lɛ. Ewooo ekaselɔi lɛ ahe gbeyei ní no baaha ewa kɛha amɛ akɛ amɛaatsɔɔ amɛsusumɔi. Yɛ anɔkwale mli lɛ, ebi amɛ saji koni amɛtsɔɔ amɛsusumɔi. (Marko 8:27-29) Ebaahi jogbaŋŋ akɛ nɔkwɛlɔi Kristofoi aaabi amɛhe akɛ: ‘Ani nakai nɔŋŋ minanemɛi heyelilɔi lɛ naa mi? Ani onukpai  krokomɛi lɛ kɛɔ mi amɛsusumɔi diɛŋtsɛ, loo amɛshashaoɔ shi akɛ amɛaafee nakai?’ Kwɛ bɔ ni eji hejɔɔmɔ kɛ́ anyɛɔ atsiɔ abɛŋkɛɔ nɔkwɛlɔi, amɛboɔ mɛi krokomɛi atoi, ni amɛyɛ tswãa lɛ! Nɔ ni kpɛŋŋ feemɔ tsuɔ pɛ ji ewooo sanegbaa kpakpa ni mɔ aaajɛ etsuiŋ fɛɛ ekɛ ehe awo mli lɛ he hewalɛ.

Eyɛ mli akɛ Yesu ji Nyɔŋmɔ Bi moŋ, shi ekɛ hewalɛ loo hegbɛ ni eyɔɔ lɛ tsuuu nii yɛ gbɛ ni ejaaa nɔ. Yɛ no najiaŋ lɛ, ekɛ mɛi ni boɔ lɛ toi lɛ susu saji ahe. Nakai ji bɔ ni eba lɛ beni Farisifoi lɛ bɔ mɔdɛŋ ni amɛtsɔ̃ lɛ kɛtsɔ sanebimɔ ni yɔɔ nigii ni amɛbi lɛ nɔ, akɛ: “Ani eja akɛ atsuɔ onia ahaa Kaisare, aloo ejaaa?” Yesu kɛɛ amɛ koni amɛkɛ oniatsumɔ shika lɛ eko atsɔɔ lɛ, ni ebi amɛ akɛ: “Namɔ mfoniri nɛ kɛ nɔ ni aŋma yɛ nɔ nɛɛ?” Amɛjie naa akɛ: “Kaisare nɔ̃ŋ.” Kɛkɛ ni ekɛɛ amɛ akɛ: “Belɛ nyɛŋɔa Kaisare nii nyɛhaa Kaisare, ni Nyɔŋmɔ nii lɛ nyɛŋɔhaa Nyɔŋmɔ!” (Mateo 22:15-21) Sane naatsɔɔmɔ ni ja ni mli ka shi faŋŋ nɛɛ ha amɛ sanebimɔ lɛ hetoo kwraa.

Ani Yesu woɔ mɔ naa ŋmɔlɔ? Ekolɛ ebaafee nikanelɔi lɛ ateŋ mɛi komɛi ŋmɔlɔ yɛ be mli ni amɛkaneɔ sane ni Yesu wie akɛ ejaraŋ kɛhaŋ yoma akɛ eeetsɔ abui hiŋmɛi mli, tamɔ bɔ ni ejaraa kɛhaa niiatsɛ akɛ eeebote Nyɔŋmɔ Maŋtsɛyeli lɛ mli lɛ. (Mateo 19:23, 24) Jwɛŋmɔ ni ahiɛ akɛ yoma ko miibɔ mɔdɛŋ ni etsɔ abui hiŋmɛi diɛŋtsɛ mli lɛ ji nɔ ko ni awo he tsɔ. Wiemɔ he ni awoɔ nɛɛ he nɔkwɛmɔnɔ kroko hu ji ní ooona kuli ni kã onyɛmi hiŋmɛi nɔ, shi onaaa mplaŋ ni kã bo diɛŋtsɛ ohiŋmɛi nɔ lɛ. (Luka 6:41, 42) Dabi, Yesu jeee mɔ ko ni kɛ tsɔsemɔ haa yɛ gbɛ ni yɔɔ kpɛŋŋ nɔ. Eji mɔ ko ni dɔɔ mɔ he ni jieɔ naanyobɔɔ su kpo. Naaŋmɔlɔwoo nifeemɔ baanyɛ aba nijiaŋwujee shi yɛ haomɔ bei amli kɛha Kristofoi ni yɔɔ ŋmɛnɛ lɛ.

Mɔbɔnalɛ ni Yesu Yɔɔ Kɛha Yei

Te yei nuɔ he amɛhaa tɛŋŋ kɛ amɛyɛ Yesu masɛi lɛ? Eji anɔkwale akɛ eyɛ yei sɛɛnyiɛlɔi babaoo ni yeɔ anɔkwa, ní lɛ diɛŋtsɛ enyɛ Maria fata he. (Luka 8:1-3; 23:55, 56; 24:9, 10) Yei nyɛɔ amɛtsiɔ amɛbɛŋkɛɔ Yesu ni gbeyeishemɔ ko bɛ mli aahu akɛ be ko lɛ yoo ko ni ‘ale lɛ akɛ eji eshafeelɔ lɛ,’ kɛ ehiŋmɛiiaŋ yaafonui fɔ́ enaji ahe ni ekɛ tsofa-kɛ-ŋma kpa he. (Luka 7:37, 38) Yoo kroko ko ní lá eho lɛ afii babaoo lɛ tsɔ asafo ko teŋ koni eta etade lɛ he bɔni afee ni atsa lɛ. Yesu jie eyi yɛ ehemɔkɛyeli lɛ hewɔ. (Mateo 9:20-22) Hɛɛ, yei na Yesu akɛ mɔ ko ni anyɛɔ abɛŋkɛɔ lɛ.

Be ko lɛ, Yesu kɛ Samariayoo ko gba sane yɛ nubu ko he. Yoo lɛ naa kpɛ ehe aahu akɛ, ekɛɛ akɛ: “Te tɛŋŋ ni bo Yudanyo lɛ obaa mi Samariayoo lɛ nu ni onuŋ?” Sane lɛ ji akɛ, Yudafoi kɛ Samariabii bɛ nɔ ko kwraa feemɔ. Yesu tee nɔ ni etsɔɔ lɛ anɔkwale ko ni yɔɔ naakpɛɛ ni kɔɔ ‘nu ni baatsɔ nu hiŋmɛi ni baaha enine  ashɛ naanɔ wala nɔ’ lɛ he. Ejie miishɛɛ kpo yɛ yei ahe. Enuuu he akɛ aagba enaa.—Yohane 4:7-15.

Akaiɔ Yesu yɛ mlihilɛ sui kpakpai babaoo ni eyɔɔ, kɛ agbɛnɛ hu he-kɛ-afɔleshaa mumɔ ni eyɔɔ lɛ he. Eji suɔmɔ ni Nyɔŋmɔ gbeyeishemɔ yɔɔ mli he nɔkwɛmɔnɔ ni fe fɛɛ. Yesu to okadi efɔ̃ shi eha mɛi fɛɛ ni baasumɔ ni amɛtsɔmɔ esɛɛnyiɛlɔi lɛ. Te onyiɛɔ enɔkwɛmɔnɔ lɛ sɛɛ kpaakpa ohaa tɛŋŋ?—1 Korintobii 13:4-8; 1 Petro 2:21.

Mɛɛ Gbɛ nɔ Akaiɔ Ŋmɛnɛŋmɛnɛ Beaŋ Kristofoi?

Kristofoi anɔkwafoi babaoo egboi yɛ ŋmɛnɛŋmɛnɛ beaŋ, amɛteŋ mɛi babaoo lɛ yɛ amɛgbɔlɛ beaŋ, ni mɛi krokomɛi hu beni amɛhiɛ fãko tsɔ. Shi amɛ́fee gbɛi kpakpa amɛfɔ̃ shi. Akaiɔ amɛteŋ mɛi komɛi tamɔ Crystal, mɔ ni gbo yɛ egbɔlɛ beaŋ lɛ, yɛ suɔmɔ kɛ mɔ hesusumɔ ni amɛyɔɔ lɛ hewɔ. Akaiɔ mɛi krokomɛi hu ni tamɔ Dirk, ni gbo beni eye afii 40 kɛyaa lɛ yɛ miishɛɛ ni amɛjieɔ lɛ kpo kɛ amɛsuɔmɔ mli ni amɛjɛɔ amɛkɛ amɛhe haa lɛ hewɔ.

Agbɛnɛ, José ni jɛ Spain lɛ sane lɛ hu yɛ. Yɛ afi 1960 afii lɛ amli beni agu Yehowa Odasefoi ashiɛmɔ nitsumɔ lɛ yɛ nakai maŋ lɛ mli lɛ, no mli lɛ José ebote gbalashihilɛ mli ni eyɛ biyei etɛ ni darako. Eyɛ nitsumɔ kpakpa ni etsuɔ yɛ Barcelona. Shi yɛ nakai beaŋ lɛ, Kristofoi onukpai ni he esa ahe miihia waa yɛ Spain wuoyigbɛ. José shi nitsumɔ ni etsuɔ lɛ ni ekɛ eweku lɛ fã kɛtee Málaga. Esa akɛ amɛkpee ohia shihilɛi anaa, ni bei babaoo lɛ enáaa nitsumɔ etsu.

Ni kɛlɛ, ale José akɛ anɔkwafo, mɔ ni feɔ nɔkwɛmɔnɔ kpakpa yɛ shiɛmɔ nitsumɔ lɛ mli kɛ be mli ni etsɔseɔ ebiyei lɛ, ni enyɛ etsu enɛ yɛ sɛɛfimɔ ni eŋa Carmela kɛha lɛ lɛ hewɔ. Kɛji akɛ aatao mɔ ko koni eto Kristofoi akpeei wuji ahe gbɛjianɔ yɛ kpokpaa lɛ nɔ lɛ, José kɛ ehe haa be fɛɛ be. Dɔlɛ sane ji akɛ, beni eye afii 50 kɛyaa lɛ, hela ko ni naa wa baloo lɛ, ni no ha eje mli. Shi kɛlɛ, efee gbɛi kpakpa efɔ̃ shi akɛ mɔ ko ni anyɛɔ amuɔ afɔ̃ɔ enɔ, asafoŋ onukpa ni tsuɔ nii waa, kɛ wu kɛ tsɛ ni yɔɔ suɔmɔ.

No hewɔ lɛ, te abaakai bo aha tɛŋŋ? Eji ogbo nyɛ kulɛ, mɛni mɛi baakɛɛ yɛ ohe ŋmɛnɛ? Enɛ ji sanebimɔ ko ni baakanya wɔ fɛɛ koni wɔya wɔhiɛ yɛ bɔ ni wɔfeɔ wɔnii wɔhaa lɛ mli.

Mɛni wɔbaanyɛ wɔfee koni wɔná gbɛi kpakpa? Wɔbaanyɛ ni wɔya wɔhiɛ be fɛɛ be yɛ mumɔ lɛ yibii lɛ akpojiemɔ mli, ni ji—suɔmɔ, tsuishitoo, mlihilɛ, mlijɔlɛ, kɛ henɔyeli kɛ ekrokomɛi ni fata he. (Galatabii 5:22, 23) Hɛɛ, bɔ fɛɛ bɔ ni fee lɛ, “gbɛi kpakpa hi fe mu kpakpa, ni gbele gbi hi fe fɔmɔ gbi.”—Jajelɔ 7:1; Mateo 7:12.

[Mfoniri ni yɔɔ baafa 5]

Akaiɔ Abigail yɛ nilelɔ ni eji lɛ hewɔ

[Mfoniri ni yɔɔ baafa 7]

Akaiɔ Petro akɛ mɔ ni feɔ nii kpalakpala ni kɛlɛ eji anɔkwafo

[Mfoniri ni yɔɔ baafa 8]

Yesu ná be eha gbekɛbii