Yehowa Tsuji Yɛ Hiɛnɔkamɔ Kpakpa
Yehowa Tsuji Yɛ Hiɛnɔkamɔ Kpakpa
“Yakob shwɛɛnɔ lɛ aaatsɔ tamɔ bɔ́ ní jɛ Yehowa ŋɔɔ yɛ majimaji pii ateŋ, . . . ní ekɛ ehiɛ efɔ̃ɔɔ gbɔmɔ ko nɔ.”—MIKA 5:7, NW.
1. Mumɔŋ Israel ji hejɔɔmɔ jɛɛhe yɛ mɛɛ gbɛ nɔ?
YEHOWA ji Bɔlɔ kpele ni bɔ nugbɔ kɛ bɔ́. Sɛɛnamɔ ko bɛ he ákɛ akɛ hiɛ aaafɔ̃ adesai anɔ kɛha bɔ́ loo nugbɔnɛmɔ. Gbalɔ Mika ŋma akɛ: “Yakob shwɛɛnɔ lɛ aaatsɔ tamɔ bɔ́ ní jɛ Yehowa ŋɔɔ yɛ majimaji pii ateŋ, tamɔ futufuli ní shwãa jwɛi nɔ, ní ekɛ ehiɛ efɔ̃ɔɔ gbɔmɔ ko nɔ, ni ekwɛɛɛ gbɔmɛi abii gbɛ lɛ.” (Mika 5:7, NW) Namɛi ji ŋmɛnɛŋmɛnɛ beaŋ “Yakob shwɛɛnɔ” lɛ? Amɛji mumɔŋ Israelbii lɛ, “Nyɔŋmɔ Israel” shwɛɛnɔ lɛ. (Galatabii 6:16) Kɛha shikpɔŋ lɛ nɔ “majimaji pii” lɛ, amɛtamɔ “bɔ́ ni jɛ Yehowa ŋɔɔ” ni haa hejɔɔmɔ kɛ “futufuli ní shwãa jwɛi nɔ.” Hɛɛ, Kristofoi ni afɔ amɛ mu lɛ ji jɔɔmɔ ni jɛ Nyɔŋmɔ ŋɔɔ kɛha majimaji lɛ. Ákɛ Maŋtsɛyeli jajelɔi lɛ, Yehowa kɛ amɛ tsuɔ nii koni amɛkɛ eshɛɛ sane ni ji hiɛnɔkamɔ kpakpa lɛ aha majimaji lɛ.
2. Mɛni hewɔ wɔyɔɔ hiɛnɔkamɔ kpakpa yɛ jeŋ ni haomɔ yɔɔ mli lɛ fɛɛ sɛɛ lɛ?
2 Ebɛ naakpɛɛ mɔ akɛ je nɛɛ bɛ hiɛnɔkamɔ kpakpa. Maŋkwramɔŋ shihilɛ ni efee basabasa, jeŋba ni ekpɔtɔ, awuiyeli, shika he naagbai, hegbeyeiwoo, tawuu—wɔkpáa nibii nɛɛ agbɛ yɛ jeŋ ni Satan Abonsam yeɔ nɔ lɛ mli. (1 Yohane 5:19) Mɛi babaoo miishe nɔ ni wɔsɛɛ be lɛ baaji lɛ he gbeyei. Shi ákɛ Yehowa jálɔi lɛ, wɔsheee gbeyei, ejaakɛ wɔyɛ wɔsɛɛ be he hiɛnɔkamɔ ni yɔɔ shiŋŋ. Eji hiɛnɔkamɔ kpakpa ejaakɛ edamɔ Nyɔŋmɔ Wiemɔ lɛ nɔ. Wɔyɛ hemɔkɛyeli yɛ Yehowa kɛ e-Wiemɔ lɛ mli ejaakɛ nɔ ni ekɛɔ lɛ baa mli anɔkwale be fɛɛ be.
3. (a) Mɛni hewɔ Yehowa baafee nii kɛshi Israel kɛ Yuda lɛ? (b) Mɛni hewɔ Mika wiemɔi lɛ kɔɔ wɔhe ŋmɛnɛ lɛ?
3 Mika gbalɛ ni jɛ Nyɔŋmɔ mumɔŋ lɛ woɔ wɔ hewalɛ koni wɔnyiɛ yɛ Yehowa gbɛi amli ni ehaa wɔ nɔdaamɔ nɔ kɛha hiɛnɔkamɔ kpakpa. Yɛ afii 800 D.Ŋ.B. beni Mika gba lɛ, no mli lɛ aja Nyɔŋmɔ webii ni ekɛfee kpaŋmɔ lɛ mli afee amɛ maji enyɔ—Israel kɛ Yuda—ni amɛteŋ mɔ fɛɛ mɔ miiku ehiɛ eeshwie Nyɔŋmɔ kpaŋmɔ lɛ nɔ. Nɔ ni jɛ mli ba ji jeŋba fitemɔ, jamɔŋ hemɔkɛyeli kwamɔ, kɛ heloonaa nibii asɛɛtiumɔ babaoo. No hewɔ lɛ, Yehowa bɔ amɛ kɔkɔ akɛ ebaagbala amɛtoi. Eji anɔkwale akɛ, akɛ Nyɔŋmɔ kɔkɔbɔi lɛ ha mɛi ni hi shi yɛ Mika beaŋ lɛ. Shi shihilɛ ni yaa nɔ ŋmɛnɛ lɛ tamɔ nɔ ni tee nɔ yɛ Mika gbii lɛ amli lɛ nɔŋŋ aahu akɛ ewiemɔi lɛ kɔɔ wɔ hu wɔbe nɛɛ he. Enɛ baafee faŋŋ yɛ be mli ni wɔsusuɔ saji otii komɛi ni yɔɔ Mika wolo lɛ mli yitsei kpawo lɛ he lɛ.
Nɔ ni Mika Wolo lɛ Hiɛkpamɔ Tsɔɔ
4. Mɛɛ adafitswaa Mika yitso 1 kɛyashi yitso 3 lɛ kɛhaa?
4 Nyɛhaa wɔsusua nɔ ni yɔɔ Mika wolo lɛ mli lɛ he kuku wɔkwɛa. Yɛ yitso 1 lɛ mli lɛ, Yehowa kpa Israel kɛ Yuda atuatsemɔ lɛ he mama. Yɛ amɛ toigbele lɛ hewɔ lɛ, abaakpata Israel hiɛ ni Yuda toigbalamɔ lɛ baashɛ Yerusalem agbói lɛ anaa tɔ̃ɔ. Yitso 2 lɛ haa anaa akɛ, niiatsɛmɛi kɛ mɛi ni he wa lɛ miinyɛ mɛi ni he waaa ni bɛ yelikɛbuamɔ ko lɛ anɔ. Ni kɛlɛ, Nyɔŋmɔ kɛ shiwoo ko hu ha. Abaabua Nyɔŋmɔ webii lɛ anaa kɛbaakpe yɛ ekomefeemɔ mli. Yitso 3 lɛ bɔɔ Yehowa sanejajemɔi ni ekɛshiɔ maŋ onukpai kɛ gbalɔi atuatselɔi lɛ he amaniɛ. Hiɛnyiɛlɔi lɛ miitsɔ̃ jalɛsaneyeli hiɛ amɛmiibu shi, ni gbalɔi lɛ miiwie apasa wiemɔi. Yɛ enɛ fɛɛ sɛɛ lɛ, mumɔ krɔŋkrɔŋ lɛ wo Mika hewalɛ koni ejaje Yehowa fɔbuu kojomɔ ni baa lɛ.
5. Mɛni ji saji otii titrii ni yɔɔ Mika yitso 4 kɛ 5 lɛ mli?
5 Yitso 4 lɛ gbaa akɛ yɛ naagbee gbii lɛ amli lɛ, jeŋmaji fɛɛ baaho kɛya Yehowa we gɔŋ ni awo nɔ gojoo lɛ nɔ, koni etsɔɔ amɛ nii. Dani no aaaba lɛ, abaaŋɔ Yuda kɛya nomŋɔɔ mli yɛ Babilon, shi Yehowa baakpɔ̃ lɛ. Yitso 5 lɛ haa anaa akɛ abaafɔ́ Mesia lɛ yɛ Betlehem yɛ Yuda. Ebaakwɛ ewebii lɛ anɔ, ni ebaajie amɛ kɛjɛ maji ni teɔ shi woɔ amɛ lɛ adɛŋ.
6, 7. Mɛɛ saji otii ajie lɛ kpo yɛ Mika gbalɛ lɛ yitso 6 kɛ 7 lɛ mli?
6 Mika yitso 6 lɛ wieɔ naafolɔmɔi ni Yehowa kɛshiɔ ewebii lɛ yɛ saneyeli gbɛ nɔ lɛ he. Mɛni efee ni no eha ewebii lɛ tseɔ ehiɛ atua nɛɛ? Efeko nɔ ko. Yɛ anɔkwale mli lɛ, ekpaaa babaoo tsɔ̃ gbɛ kɛjɛɛɛ amɛdɛŋ. Eesumɔ ni ejálɔi lɛ aye jalɛ sane, amɛjie mlihilɛ kpo, ni amɛná heshibaa yɛ be mli ni amɛkɛ lɛ nyiɛɔ lɛ. Yɛ nɔ najiaŋ ni Israel kɛ Yuda aaafee nakai moŋ lɛ, amɛkɔ atuatsemɔ gbɛ, ni esa akɛ amɛna amanehulu yɛ nɔ ni jɛɔ mli kɛbaa lɛ hewɔ.
7 Yɛ naagbee yitso lɛ mli lɛ, Mika ye efɔŋ ni mɛi ni hi shi yɛ ebeaŋ lɛ fee lɛ he ŋkɔmɔ. Shi kɛlɛ, enijiaŋ ejeee wui, ejaakɛ etswa efai shi akɛ ‘ebaamɛ’ Yehowa. (Mika 7:7) Wolo lɛ ba naagbee kɛ wiemɔi ni tsɔɔ hekɛnɔfɔɔ akɛ, Yehowa baana ewebii lɛ mɔbɔ. Yinɔsane yeɔ he odase akɛ, ehiɛnɔkamɔ lɛ ba mli. Yɛ afi 537 D.Ŋ.B., beni Yehowa tsɔsemɔ ni ekɛha ewebii lɛ eba naagbee lɛ, ejɛ mɔbɔnalɛ mli esaa ekɛ shwɛɛnii ko ba amɛ diɛŋtsɛ amɛshikpɔŋ lɛ nɔ ekoŋŋ.
8. Te obaamua Mika wolo lɛ mli saji lɛ anaa oha tɛŋŋ?
8 Mɛɛ saji kpakpai po Yehowa jieɔ lɛ kpo kɛtsɔɔ Mika nɔ nɛkɛ! Nɛkɛ wolo ni ajɛ mumɔŋ aŋma nɛɛ kɛ kɔkɔbɔɔ nɔkwɛmɔnɔ ni tsɔɔ bɔ ni Nyɔŋmɔ kɛ mɛi ni kɛɔ akɛ amɛsɔmɔɔ lɛ shi amɛyeee anɔkwa lɛ yeɔ ehaa lɛ haa. Egbaa wɔ nibii ni yaa nɔ ŋmɛnɛ lɛ ahe sane. Ni ekɛ ŋaawoo ni jɛ ŋwɛi haa wɔ yɛ bɔ ni esa akɛ wɔba wɔjeŋ yɛ nɛkɛ jaramɔ bei nɛɛ amli bɔni afee ni wɔhiɛ wɔhiɛnɔkamɔ lɛ mli kpɛŋŋ.
Nuŋtsɔ Maŋtsɛ Yehowa Wie
9. Taakɛ Mika 1:2 tsɔɔ lɛ, mɛni Yehowa baafee?
9 Nyɛhaa wɔpɛia Mika wolo lɛ mli jogbaŋŋ kɛmɔ shi agbɛnɛ. Wɔkaneɔ yɛ Mika 1:2 akɛ: “Nyɛboa toi, nyɛ majimaji fɛɛ kwa! nyɛfea toi, shikpɔŋ kɛ emli nii lɛ! ní Nuŋtsɔ Yehowa, ni ji Nuŋtsɔ lɛ, ajɛ esɔlemɔwe krɔŋkrɔŋ lɛ aye odase ashi nyɛ!” Eji oyɛ shihilɛ mli yɛ Mika beaŋ kulɛ, ŋwanejee ko bɛ he akɛ nakai wiemɔi lɛ baagbala ojwɛŋmɔ. Eji anɔkwale akɛ, amɛgbalaa ojwɛŋmɔ ejaakɛ Yehowa miiwie kɛmiijɛ esɔlemɔwe krɔŋkrɔŋ lɛ, ni jeee Israel kɛ Yuda pɛ ekɛwieɔ lɛ, shi moŋ ekɛ gbɔmɛi ni yɔɔ he fɛɛ he lɛ. Yɛ Mika gbii lɛ amli lɛ, gbɔmɛi lɛ kɛ be kpalaŋŋ eku amɛhiɛ amɛshwie Nuŋtsɔ Maŋtsɛ Yehowa nɔ. Etsɛŋ ni enɛ baatsake. Yehowa etswa efai shi akɛ ebaatsu shihilɛ lɛ he nii.
10. Mɛni hewɔ wiemɔi ni yɔɔ Mika 1:2 lɛ he hiaa wɔ lɛ?
10 Nakai nɔŋŋ hu shihilɛ lɛ ji yɛ wɔgbii nɛɛ amli. Kpojiemɔ 14:18-20 lɛ tsɔɔ akɛ Yehowa kɛ adesai miigba sane ekoŋŋ kɛmiijɛ esɔlemɔwe krɔŋkrɔŋ lɛ. Etsɛŋ ni Yehowa baatsu shihilɛ lɛ he nii, ni nibii ni yɔɔ gbeyei baahoso adesai ekoŋŋ. Nɛkɛ be nɛɛ mli lɛ, abaashɛ ‘shikpɔŋ muu lɛ fɛɛ nɔ wein yibii shabii lɛ’ ni ehiii lɛ afɔ̃ wein ŋaanɔ kpeteŋkpele, ni ji Yehowa mlifu lɛ mli koni ekpata Satan nibii agbɛjianɔtoo lɛ hiɛ kwraa.
11. Mɛni wiemɔi ni yɔɔ Mika 1:3, 4 lɛ tsɔɔ?
11 Bó nɔ ni Yehowa baafee lɛ toi. Mika 1:3, 4 lɛ kɛɔ akɛ: “Naa, Yehowa eje kpo kɛjɛ egbɛhe lɛ, ni eeeyi shi, ní ebanyiɛ shikpɔŋ lɛ nɔ hei grɔŋŋi lɛ anɔ. Ni gɔji lɛ aaasere yɛ eshishi, ni jɔɔi lɛ amli aaagbalagbalai, tamɔ wo agbaku sereɔ yɛ la hiɛ, tamɔ nu ní hoɔ shwimshwim yɛ he ko ní ema enaa shi.” Ani Yehowa baashi eshihilɛhe ni yɔɔ ŋwɛi lɛ, koni enyiɛ Shiwoo Shikpɔŋ lɛ nɔ gɔji kɛ jɔɔi lɛ amli diɛŋtsɛ? Dabi. Ehe ehiaaa ni efee nakai. Esa akɛ egbala ejwɛŋmɔ kɛba shikpɔŋ lɛ nɔ kɛkɛ bɔni afee ni atsu eyiŋtoo lɛ he nii. Kɛfata he lɛ, jeee shikpɔŋ lɛ diɛŋtsɛ baana nibii ni awie he lɛ he amanehulu lɛ, shi moŋ mɛi ni yɔɔ nɔ lɛ. Kɛ́ Yehowa tsu shihilɛ lɛ he nii lɛ, nɔ ni baajɛ mli kɛba lɛ baafee hiɛkpatamɔ kɛha mɛi ni yeee anɔkwa lɛ—tamɔ nɔ ni gɔji lɛ esere tamɔ wo agbaku, ni shikpɔŋhosomɔ ko eha jɔɔi lɛ amli egbalagbalai.
12, 13. Yɛ 2 Petro 3:10-12 lɛ kɛ gbeekpamɔ naa lɛ, mɛni haa wɔhiɛnɔkamɔ lɛ feɔ shweshweeshwe?
12 Gbalɛ mli wiemɔi ni yɔɔ Mika 1:3, 4 lɛ baanyɛ akai bo gbalɛ kroko ni ajɛ mumɔŋ agba ni wieɔ hiɛkpatamɔ nifeemɔi yɛ shikpɔŋ lɛ nɔ lɛ he lɛ. Taakɛ áŋma afɔ̃ shi yɛ 2 Petro 3:10 lɛ, bɔfo Petro ŋma akɛ: “[Yehowa, NW] gbi lɛ baaba tamɔ julɔ baa nyɔɔŋ, ni no mli lɛ ŋwɛi lɛ aaaho aya kɛ gbɛɛmɔ, ni je nɛŋ shishijee nii lɛ aaasere yɛ la mli, ni shikpɔŋ kɛ emli nitsumɔi lɛ aaashã.” Taakɛ bɔ ni Mika gbalɛ lɛ ji lɛ, Petro wiemɔi lɛ kɔɔɔ ŋwɛi kɛ shikpɔŋ diɛŋtsɛ he. Amɛkɔɔ amanehulu kpeteŋkpele ko ni baa nibii agbɛjianɔtoo ni leee Nyɔŋmɔ nɛɛ nɔ lɛ he.
13 Yɛ nakai hiɛkpatamɔ ni baa lɛ fɛɛ sɛɛ lɛ, Kristofoi baanyɛ aná hiɛnɔkamɔ yɛ wɔsɛɛ be mli, taakɛ Mika fee lɛ. Yɛ mɛɛ gbɛ nɔ? Kɛtsɔ ŋaawoo ni anaa yɛ kukuji ni nyiɛ sɛɛ yɛ Petro wolo lɛ mli ni wɔkɛaatsu nii lɛ nɔ. Bɔfo lɛ jaje akɛ: “Mɛɛ gbɔmɛi sa akɛ nyɛtsɔmɔ yɛ jeŋbai krɔŋkrɔŋi kɛ Nyɔŋmɔ jamɔi amli? mɛi ni kwɛɔ gbɛ ni amɛshweɔ [Yehowa, NW] gbi lɛ baa lɛ!” (2 Petro 3:11, 12) Hiɛnɔkamɔ ni wɔyɔɔ kɛha wɔsɛɛ be lɛ baaba mli diɛŋtsɛ kɛji wɔná toiboo tsui ni wɔkwɛ akɛ wɔsu yɛ krɔŋŋ ni wɔshihilɛ eyi obɔ kɛ nifeemɔi ni Nyɔŋmɔ gbeyeishemɔ kɛ hetuu-kɛhamɔ yɔɔ mli lo lɛ. Kɛ́ wɔhiɛnɔkamɔ lɛ baafee nɔ ni yɔɔ shweshweeshwe lɛ, no lɛ esa akɛ wɔkai hu akɛ Yehowa gbi lɛ baaba diɛŋtsɛ.
14. Mɛni hewɔ Israel kɛ Yuda sa toigbalamɔ lɛ?
14 Yehowa tsɔɔ nɔ hewɔ ni esa akɛ agbala ewebii lɛ atoi lɛ. Mika 1:5 jajeɔ akɛ: “Yakob mlatɔ̃mɔ lɛ kɛ Israel we lɛ he eshai lɛ ahewɔ ni enɛɛmɛi fɛɛ baa nɛɛ. Mɛɛ ji Yakob mlatɔ̃mɔ lɛ? ani jeee Samaria ni? ni mɛɛ ji Yuda hei grɔŋŋi lɛ? ani jeee Yerusalem ni?” Yehowa hewɔ jɛ ni Israel kɛ Yuda yɔɔ shihilɛ mli lɛ. Ni kɛlɛ, amɛtse atua amɛshi lɛ, ni amɛ atuatsemɔ lɛ eyashɛ amɛmaŋtiasei wuji ni ji Samaria kɛ Yerusalem mli.
Nifeemɔi Fɔji Fa Kɛteke Nɔ
15, 16. Mɛɛ nifeemɔi fɔji ahe fɔ́ Mika yinɔbii lɛ ye?
15 Awie Mika yinɔbii lɛ anɔ fɔŋ feemɔ lɛ he jogbaŋŋ yɛ Mika 2:1, 2 akɛ: “Kpóo ha mɛi ni jwɛŋɔ nishaianii ni amɛtoɔ nifɔjianii ahe ŋaai yɛ amɛsaai anɔ lɛ! kɛ́ je tsɛre lɛ, amɛfeɔ, ejaakɛ eyɛ amɛdɛ̃ hewalɛ mli. Ni amɛhiɛ kɔ̃ɔ abɔɔi anɔ, ni amɛshɔ̃ɔ, kɛ shiai, ni amɛŋɔɔ; ni amɛyeɔ mɔ kɛ ewe kɛ mɔ kɛ egboshinii amim.”
16 Aŋkroaŋkroi hiɛjoolɔi lɛ kãa shi gbɛkɛ ni amɛtsɔɔ ŋaa koni amɛshɔ̃ amɛnaanyo abɔɔi kɛ shiai kɛjɛ edɛŋ. Kɛ́ je tsɛre lɛ, amɛhe feɔ oya koni amɛtsu amɛŋaatsɔi lɛ ahe nii. Eji amɛkai Yehowa kpaŋmɔ lɛ kulɛ, amɛfeŋ nifɔjianii ni tamɔ nɛkɛ. Gbɛjianɔtoi yɛ Mose Mla lɛ mli ni buɔ ohiafoi ahe. Yɛ Mose Mla lɛ mli lɛ, esaaa akɛ weku ko gboshinii jeɔ edɛŋ ni enine shɛɛɛ nɔ dɔŋŋ. Shi kɛlɛ, enɛ jeee aŋkroaŋkroi ni amɛji hiɛjoolɔi lɛ ahe sane ko. Amɛkuɔ amɛhiɛ amɛshwieɔ wiemɔi ni yɔɔ 3 Mose 19:18 lɛ nɔ, he ni kɛɔ akɛ: “Suɔmɔ onaanyo, taakɛ bɔ ni osumɔɔ bo diɛŋtsɛ ohe” lɛ.
17. Mɛni baanyɛ aba kɛ́ mɛi ni kɛɔ akɛ amɛmiisɔmɔ Nyɔŋmɔ lɛ kɛ heloonaa nibii ye klɛŋklɛŋ gbɛhe yɛ amɛshihilɛ mli?
17 Enɛ tsɔɔ nɔ ni baanyɛ aba kɛji mɛi ni kɛɔ akɛ amɛsɔmɔɔ Nyɔŋmɔ lɛ hiɛ kpa mumɔŋ otii ni amɛkɛmamɔ amɛhiɛ lɛ anɔ ni amɛkɛ heloonaa nibii ye klɛŋklɛŋ gbɛhe lɛ. Paulo bɔ Kristofoi ni yɔɔ egbii lɛ amli lɛ kɔkɔ akɛ: “Mɛi ni taoɔ nii pii aná lɛ gbeeɔ kaa kɛ tsɔne kɛ kwashiai akɔnɔi pii ni fiteɔ mɔ ní tsiɔ mɛi ewoɔ hiɛkpatamɔ kɛ laajemɔ mli lɛ amli.” (1 Timoteo 6:9) Kɛ́ mɔ ko ha shika ni eeená lɛ fee oti titri yɛ shihilɛ mli lɛ, belɛ eejá apasa nyɔŋmɔ—Mamona, loo Nifalɛ. Nakai apasa nyɔŋmɔ lɛ kɛ wɔsɛɛ be he hiɛnɔkamɔ ni ma shi shiŋŋ haaa.—Mateo 6:24; NW shishigbɛ niŋmaa.
18. Mɛni baaba mɛi ni diɔ heloonaa ninámɔ sɛɛ yɛ Mika gbii lɛ amli lɛ anɔ?
18 Mɛi babaoo ni hi shi yɛ Mika gbii lɛ amli lɛ kase nii kɛtsɔ niiashikpamɔ ni naa wa waa nɔ akɛ, heloonaa nibii ni akɛ he fɔ̃ɔ nɔ lɛ ji yakayakanii. Taakɛ Mika 2:4 lɛ tsɔɔ lɛ, Yehowa kɛɛ akɛ: “Nakai gbi lɛ nɔ lɛ aaabu nyɛhe abɛ, ni aaalá yaafo lala akɛ: Eba mli, afite wɔ kwrakwra! etsake mimaŋ lɛ gbɛfaŋnɔ lɛ; kwɛ bɔ ni etsi lɛ kɛjɛ mihe! ekɛ wɔŋmɔji lɛ eha henyɛlɔ!” Hɛɛ, nɛkɛ julɔi nɛɛ ni juɔ mɛi ashiai kɛ abɔɔi lɛ aweku gboshinii ni amɛ diɛŋtsɛ amɛyɔɔ lɛ baaje amɛdɛŋ. Abaashwie amɛ kɛya maŋsɛɛ shikpɔŋ nɔ, ni amɛnii ni amɛyɔɔ lɛ baatsɔmɔ haanii kɛha “henyɛlɔi,” loo majimaji lɛ amli bii lɛ. Hiɛnɔkamɔi fɛɛ ni amɛyɔɔ kɛha wɔsɛɛ be lɛ baafee efolo.
19, 20. Mɛni ba Yudafoi ni kɛ amɛhiɛ fɔ̃ Yehowa nɔ lɛ anɔ?
19 Shi kɛlɛ, afiteŋ mɛi ni kɛ amɛhiɛ fɔ̃ɔ Yehowa nɔ lɛ ahiɛnɔkamɔi lɛ. Yehowa yeɔ kpaŋmɔ ni ekɛ Abraham kɛ David fee lɛ anɔkwa, ni enaa mɛi ni tamɔ Mika, ni amɛsumɔɔ lɛ lɛ ni amɛyeɔ ŋkɔmɔ yɛ amɛmaŋbii ni amɛtsi amɛhe kɛjɛ Nyɔŋmɔ he kɛtee shɔŋŋ lɛ mɔbɔ. Yɛ jalɔi lɛ ahewɔ lɛ, abaasaa akɛ amɛ aba ekoŋŋ yɛ Nyɔŋmɔ be ni sa mli.
20 Enɛ ba mli yɛ afi 537 D.Ŋ.B., beni Babilon egbee shi sɛɛ ni Yuda shwɛɛnii ko ku amɛsɛɛ kɛtee amɛmaŋ lɛ. Wiemɔi ni yɔɔ Mika 2:12 lɛ ná eklɛŋklɛŋ mlibaa yɛ nakai beaŋ. Yehowa kɛɔ akɛ: “Buamɔ mabua onaa, bo Yakob muu lɛ fɛɛ! Kpeemɔ hu makpee Israel mɛi ni eshwɛ lɛ kɛaakpe! Maŋɔ amɛ mato he kome tamɔ tooi ni yɔɔ tsũ mli, loo tamɔ tooikuu ni yɔɔ amɛlɛɛhe lɛ teŋ, ni amɛaafee hoo yɛ mɛi lɛ afalɛ hewɔ.” Mɛɛ suɔmɔ po Yehowa yɔɔ nɛkɛ! Yɛ be mli ni etsɔse ewebii lɛ asɛɛ lɛ, eha shwɛɛnii ko ku amɛsɛɛ koni amɛbasɔmɔ lɛ yɛ shikpɔŋ ni ekɛha amɛblematsɛmɛi lɛ nɔ.
Nibii ni Tamɔ No ni Sa Kadimɔ yɛ Wɔgbii Nɛɛ Amli
21. Shihilɛi ni yɔɔ bianɛ lɛ tamɔ Mika gbii lɛ amli nɔ lɛ yɛ mɛɛ gbɛ nɔ?
21 Beni wɔsusuɔ Mika klɛŋklɛŋ yitsei enyɔ lɛ ahe lɛ, ani onaa kpɛ ohe yɛ bɔ ni nibii je amɛhe amɛha ŋmɛnɛ lɛ? Taakɛ eji yɛ Mika gbii lɛ amli lɛ, mɛi babaoo yɛ ŋmɛnɛ ni amɛkɛɔ akɛ amɛsɔmɔɔ Nyɔŋmɔ. Ni kɛlɛ, taakɛ Yuda kɛ Israel ji lɛ, amɛmli egbála ni amɛkɛ amɛhe ewuwuu tai. Niiatsɛmɛi babaoo ni yɔɔ Kristendom lɛ ateŋ mɛi komɛi ewa ohiafoi lɛ ayi. Jamɔ mli hiɛnyiɛlɔi babaoo kuɔ amɛhiɛ amɛshwieɔ nifeemɔi ni Biblia buɔ lɛ fɔ lɛ nɔ shii abɔ. Ŋwanejee ko bɛ he akɛ no hewɔ ni etsɛŋ ni Kristendom, kɛ “Babilon kpeteŋkpele lɛ,” ni ji jeŋ fɛɛ apasa jamɔ maŋtsɛyeli lɛ mɛi ni eshwɛ lɛ baaba naagbee lɛ! (Kpojiemɔ 18:1-5) Ni kɛlɛ, tamɔ bɔ ni Mika gbii lɛ mli nɔkwɛmɔnɔ lɛ ji lɛ, Yehowa baaná tsuji anɔkwafoi ni baashwɛ yɛ shikpɔŋ nɔ.
22. Mɛɛ kui enyɔ kɛ amɛhiɛ efɔ Nyɔŋmɔ Maŋtsɛyeli lɛ nɔ?
22 Yɛ afi 1919 mli lɛ, Kristofoi anɔkwafoi ni afɔ amɛ mu lɛ tsi amɛhe kwraa kɛjɛ Kristendom he ni amɛje shishi akɛ amɛbaajaje Maŋtsɛyeli lɛ he sanekpakpa lɛ amɛtsɔɔ majimaji fɛɛ. (Mateo 24:14) Klɛŋklɛŋ kwraa lɛ, amɛtao mumɔŋ Israel lɛ mli bii lɛ ateŋ mɛi ni eshwɛ lɛ. Kɛkɛ ni abɔi “tooi krokomɛi” lɛ anaabuamɔ, ni kui enyɔ lɛ batsɔ “kuu kome kɛ kwɛlɔ kome.” (Yohane 10:16) Eyɛ mli akɛ amrɔ nɛɛ, amɛmiisɔmɔ Nyɔŋmɔ yɛ shikpɔji 234 nɔ moŋ, shi ato Yehowa jálɔi anɔkwafoi nɛɛ fɛɛ ahe gbɛjianɔ diɛŋtsɛ yɛ ‘ekomefeemɔ mli.’ Ni amrɔ nɛɛ, tooi alɛɛhe lɛ efee ‘hoo kɛ hii afalɛ,’ ni yei kɛ gbekɛbii hu fata he. Amɛ hiɛnɔkamɔ lɛ bɛ nibii agbɛjianɔtoo nɛɛ mli, shi moŋ eyɛ Nyɔŋmɔ Maŋtsɛyeli lɛ mli, nɔ ni etsɛŋ ni ekɛ paradeiso baaba shikpɔŋ lɛ nɔ lɛ.
23. Mɛni hewɔ oheɔ oyeɔ akɛ ohiɛnɔkamɔ lɛ baaba mli diɛŋtsɛ lɛ?
23 Mika yitso 2 lɛ naagbee kuku lɛ wie yɛ Yehowa jálɔi anɔkwafoi lɛ ahe akɛ: “Amɛmaŋtsɛ lɛ aaatsɔ amɛhiɛ, ni Yehowa aaafee amɛsafokaŋ.” Ani oona ohe yɛ nakai kunimyeli akoshimɔ lɛ mli, ni oonyiɛ o-Maŋtsɛ, Yesu Kristo sɛɛ, kɛ Yehowa diɛŋtsɛ akɛ asafokaŋ? Kɛ́ nakai ni lɛ, no lɛ ná nɔmimaa akɛ obaaye kunim ni ohiɛnɔkamɔ lɛ baaba mli kɛ̃. Enɛ baafee faŋŋ diɛŋtsɛ yɛ be mli ni wɔsusuɔ Mika gbalɛ lɛ mli nibii krokomɛi lɛ ahe lɛ.
Te Obaaha Hetoo Oha Tɛŋŋ?
• Mɛni hewɔ Yehowa kpɛ eyiŋ akɛ ebaagbala Yuda kɛ Israel toi yɛ Mika gbii lɛ amli lɛ?
• Mɛni baanyɛ aba kɛ́ mɛi ni kɛɔ akɛ amɛmiisɔmɔ Nyɔŋmɔ lɛ kɛ heloonaa nibii ye klɛŋklɛŋ gbɛhe yɛ amɛshihilɛ mli?
• Yɛ Mika yitso 1 kɛ yitso 2 lɛ he susumɔ sɛɛ lɛ, mɛni hewɔ oheɔ oyeɔ akɛ ohiɛnɔkamɔ lɛ baaba mli diɛŋtsɛ lɛ?
[Nikasemɔ lɛ he Sanebimɔi]
[Mfoniri ni yɔɔ baafa 9]
Mika gbalɛ lɛ baanyɛ awo wɔ hewalɛ yɛ mumɔŋ
[Mfonirii ni yɔɔ baafa 10]
Taakɛ Yuda shwɛɛnii ni hi shi yɛ afi 537 D.Ŋ.B. lɛ ji lɛ, mumɔŋ Israelbii lɛ kɛ amɛnanemɛi lɛ haa anɔkwa jamɔ yaa hiɛ