Ani Ohaa Henumɔ ni Haa Onaa Kpɛɔ Ohe lɛ Yaa Hiɛ?

ANI oyɔse akɛ Biblia ŋmalɔi lɛ yaa nɔ amɛhaa henumɔ ni haa amɛnaa kpɛɔ amɛhe lɛ tsuɔ nii beni amɛjieɔ hiɛsɔɔ ni amɛyɔɔ kɛha Nyɔŋmɔ nitsumɔi kɛ esui lɛ akpo lɛ? Lalatsɛ lɛ jaje akɛ: “Bɔ ni atsɔ afee mi lɛ yɛ . . . naakpɛɛ.” (Lala 139:14) Gbalɔ Yesaia ŋma akɛ: “Yehowa, mi-Nyɔŋmɔ jio. Miikafoo, miijie ogbɛi lɛ yi, ejaakɛ otsu naakpɛɛ nii.” (Yesaia 25:1) Aloo susumɔ naakpɛɛ kɛ woo ni je kpo yɛ bɔfo Paulo wiemɔi lɛ amli lɛ ahe okwɛ: “Oo, bɔ ni Nyɔŋmɔ nifálɛ kɛ ŋaa kɛ nilee mli kwɔ ha nɛ!”—Romabii 11:33.

The Oxford Encyclopedic English Dictionary lɛ tsɔɔ “naakpɛɛ” shishi akɛ “henumɔ ko ni nɔ ko ni akpaaa gbɛ, nɔ ko ni aleee, loo nɔ ko ni anyɛɛɛ atsɔɔ mli haa anáa, titri lɛ nɔ ko ni tiɔ mɔ shi trukaa, ní haa mɔ hiɛ feɔ lɛ yaa loo ehaa esumɔɔ akɛ eeená ele, kɛ ekrokomɛi ni fata he.”

Ani omii shɛɛɛ ohe akɛ ooona gbekɛbii bibii ní egbɛ amɛhiŋmɛiiaŋ waa yɛ amɛnaa ni ekpɛ amɛhe yɛ nɔ ko hee ni amɛna, amɛnu he yɛ amɛmli, loo amɛkɛ amɛtoi nu lɛ hewɔ? Mɔbɔ sane ji akɛ, bei pii lɛ mɔ naa ni kpɛɔ ehe yɛ nɔ ko ni esumɔɔ akɛ eeená ele loo nɔ ko hee he lɛ baa shi beni mɔ lɛ afii yaa hiɛ lɛ.

Shi kɛlɛ, yɛ Biblia ŋmalɔi ni atsɛ amɛwiemɔi asɛɛ bianɛ nɔŋŋ lɛ agbɛfaŋ lɛ, henumɔ ni haa mɔ naa kpɛɔ ehe lɛ ji amɛmligbɛ sui lɛ fã. Esɛɛ tsɛɔ. Mɛni hewɔ? Amɛha henumɔ ni haa amɛnaa kpɛɔ amɛhe lɛ tee hiɛ kɛtsɔ hiɛsɔɔ ni amɛkɛjwɛŋ Nyɔŋmɔ nitsumɔi lɛ ahe lɛ nɔ. Lalatsɛ lɛ sɔle akɛ: “Mijwɛŋɔ afii ni eho jeeŋmɔ lɛ kɛ nibii fiaa ni ofee ni mikaiɔ lɛ ahe; misusuɔ odebɔɔ nibii ni yɔɔ naakpɛɛ lɛ ahe.”—Lala 143:5, The New English Bible.

Kwɛ bɔ ni esa yijiemɔ akɛ abaanyɛ ana henumɔ ni haa mɔ naa kpɛɔ ehe nɛɛ yɛ Nyɔŋmɔ jálɔi ni yɔɔ ŋmɛnɛŋmɛnɛ lɛ ahe! Ani oyɛ eko? Ani ooha henumɔ nɛɛ miiya hiɛ?