Ani Okaiɔ?

Ani onyã Buu-Mɔɔ srɔtoi ni ba nyɛsɛɛ nɛɛ akanemɔ he? Ojogbaŋŋ, kwɛmɔ akɛ obaanyɛ oha sanebimɔi ni nyiɛ sɛɛ nɛɛ ahetoo lo:

• Yitsei enyiɛ yɔɔ Mika wolo lɛ mli, mɛɛ be aŋma, ni te shihilɛ lɛ yɔɔ ha tɛŋŋ yɛ nakai beaŋ?

Mika wolo lɛ hiɛ yitsei kpawo. Gbalɔ Mika ŋma wolo lɛ yɛ klɛŋklɛŋ afii 800 D.Ŋ.B., beni aja Nyɔŋmɔ webii ni ekɛ amɛ efee kpaŋmɔ lɛ mli afee amɛ maji enyɔ lɛ—ni ji Israel kɛ Yuda.—8/15, baafa 9.

• Taakɛ Mika 6:8 tsɔɔ lɛ, mɛni Nyɔŋmɔ taoɔ yɛ wɔdɛŋ?

Esa akɛ ‘wɔfee nɔ ni ja gbɛ.’ Nyɔŋmɔ gbɛ ni etsɔɔ nɔ efeɔ nii lɛ ji jalɛ he tɛi ni afolɔ ashwie shi, no hewɔ lɛ esa akɛ wɔfĩ eshishitoo mlai ni kɔɔ jalɛsaneyeli kɛ anɔkwayeli he lɛ asɛɛ. Ekɛɔ wɔ akɛ ‘wɔsumɔ ejurɔfeemɔ.’ Kristofoi jieɔ ejurɔfeemɔ kpo kɛtsɔ mɛi krokomɛi ahiamɔ nii ahe nii ni amɛtsuɔ lɛ nɔ, tamɔ nɔ ni amɛfeɔ beni oshara ko eba sɛɛ lɛ. Bɔni afee ni ‘wɔkɛ’ Yehowa “anyiɛ yɛ heshibaa mli” lɛ, esa akɛ wɔyɔse he ni wɔnyɛmɔi yashɛɔ ni wɔkɛ wɔhe afɔ̃ enɔ.—8/15, baafa 20-22.

• Kɛ́ Kristofonyo ko nitsumɔ je edɛŋ lɛ, mɛni ekolɛ esa akɛ efee?

Ebaafee nɔ ni nilee yɔɔ mli akɛ mɔ lɛ aaasaa apɛi eshihilɛ mli ekoŋŋ ekwɛ. Mɔ lɛ baanyɛ afã kɛyahi shia bibioo ko mli loo eŋmɛɛ heloonaa nibii ni eyɔɔ ni he ehiaaa lɛ ahe ni ekɛha eshihilɛ afee mlɛo. Yɛ anɔkwale mli lɛ, ehe miihia ni ekpa yeyeeyefeemɔ yɛ daa gbi hiamɔ nibii ahe, ni ená hekɛnɔfɔɔ yɛ Nyɔŋmɔ mli akɛ ebaanyɛ eha lɛ nibii ni baaha ekã he ehi wala mli. (Mateo 6:33, 34)—9/1, baafa 14-15.

• Mɛni esa akɛ wɔha ehi wɔjwɛŋmɔ mli beni wɔkeɔ nii yɛ yookpeemɔ shishi loo akeɔ wɔ eko lɛ?

Nikeenii ni jara wa ahe ehiaaa, ni asaŋ esaaa akɛ akpáa nomɛi hu agbɛ. Nihalɔ lɛ tsuiŋ su lɛ ji nɔ ni he hiaa fe fɛɛ. (Luka 21:1-4) Ejeee mlihilɛ nifeemɔ akɛ aaatsɛ́ mɔ ni kɛ nikeenii ko bake lɛ gbɛi. No feemɔ baanyɛ awo mɔ hiɛgbele. (Mateo 6:3)—9/1, baafa 29.

• Mɛni hewɔ esa akɛ wɔsɔle ni wɔkafɔ̃ɔ lɛ?

Sɔlemɔ ni wɔsɔleɔ daa lɛ baanyɛ aha wɔkɛ Nyɔŋmɔ teŋ wekukpaa lɛ mli awa gbagbalii, ni ebaasaa wɔ koni wɔkpee kaai ni mli wawai anaa. Wɔsɔlemɔi baanyɛ afee kuku loo nɔ ni sɛɛ kɛ, yɛ bɔ ni hiamɔ nii lɛ ji kɛ bɔ ni shihilɛi ni yɔɔ lɛ ji lɛ naa. Sɔlemɔ woɔ hemɔkɛyeli mli hewalɛ, ni eyeɔ ebuaa wɔ koni wɔtsu naagbai ahe nii.—9/15, baafa 15-18.

• Te esa akɛ wɔnu 1 Korintobii 15:29 lɛ ni atsɔɔ shishi yɛ shishitsɔɔmɔi komɛi amli akɛ “baptisimɔ kɛha gbohii” lɛ shishi wɔha tɛŋŋ?

Bɔfo Paulo miitsɔɔ akɛ abaptisiɔ loo amiiɔ Kristofoi ni afɔ amɛ mu lɛ nu awoɔ shihilɛ gbɛ ko ni baaha amɛhiɛ amɛ emuuyeli lɛ mli kɛyashi gbele mli lɛ mli tamɔ Kristo nɔ̃ lɛ ji lɛ. No sɛɛ lɛ, ateeɔ amɛ shi kɛyaa mumɔŋ shihilɛ mli taakɛ atee Kristo shi lɛ.—10/1, baafa 29.

• Te wɔfeɔ tɛŋŋ wɔleɔ akɛ Kristofonyo ni mɔ ko aaatsɔ lɛ biɔ babaoo fe nifɔjianii ni atsĩ tã yɛ 1 Korintobii 6:9-11 lɛ ni aaakwa lɛ?

Jeee nifɔjianii tamɔ ajwamaŋbɔɔ, wɔŋjamɔ, kɛ dãatɔɔ pɛ bɔfo Paulo kɛɛ akwa. Beni etsɔɔ akɛ ekolɛ ehe baahia ni afee tsakemɔi krokomɛi lɛ, etsa nɔ yɛ kuku ni nyiɛ sɛɛ lɛ mli akɛ: “Miyɛ nibii fɛɛ hegbɛ moŋ, shi kɛlɛ jeee nibii fɛɛ hi.”—10/15, baafa 18-19.

• Namɛi ji yei ni hi shi yɛ blema beaŋ ni ha Nyɔŋmɔ tsui nya lɛ ateŋ mɛi komɛi?

Amɛteŋ mɛi komɛi ji Shifra kɛ Pua ni ji yeifɔyei ni booo Farao famɔ akɛ amɛgbe Israel gbekɛbii hii ni abaafɔ lɛ toi lɛ. (2 Mose 1:15-20) Rahab ni ji yoo ajwamaŋ ko ni jɛ Kanaan lɛ bu Israelbii maŋ shikpálɔi enyɔ ahe. (Yoshua 2:1-13; 6:22, 23) Akɛni Abigail jie nilee kpo hewɔ lɛ, eye ebua ni akɛhere mɛi ayiwala, ni ekɛbu David he koni ekaye la yi sɔ̃. (1 Samuel 25:2-35) Amɛji nɔkwɛmɔnii kɛha yei ŋmɛnɛ.—11/1, baafa 8-11.

• Taakɛ atsɔɔ mli yɛ Kojolɔi 5:20 lɛ, “ŋulamii tete je amɛgbɛhei ni amɛkɛ” Sisera “wu” yɛ mɛɛ gbɛ nɔ?

Mɛi komɛi nuɔ he akɛ enɛ tsɔɔ yelikɛbuamɔ ni jɛ Nyɔŋmɔ ŋɔɔ. Mɛi krokomɛi tsɔɔ akɛ eji ŋwɛibɔfoi adɛŋ yelikɛbuamɔ, tɛi ni nɛ kɛjɛ ŋwɛi bashwie shi, loo Sisera he ni ekɛfɔ̃ɔ ŋulamiiaŋkwɛlɔi agbalɛi anɔ. Akɛni Biblia lɛ gbálaaa enɛ mli fitsofitso hewɔ lɛ, wɔbaanyɛ wɔnu wiemɔ lɛ shishi akɛ eji Nyɔŋmɔ he ni ekɛwo sane lɛ mli kɛha Israel ta lɛ henɔ ko.—11/15, baafa 30.

• Eyɛ mli akɛ jamɔŋ shikpilikpiifeemɔ kɛ sane ni kɔɔɔ mɔ he efa waa moŋ, shi mɛni hewɔ mɛi babaoo kã he amɛkɛɔ akɛ amɛheɔ Nyɔŋmɔ nɔ amɛyeɔ lɛ?

Mɛi komɛi yaa sɔlemɔ koni amɛná jwɛŋmɔŋ toiŋjɔlɛ. Mɛi krokomɛi yaa kɛ hiɛnɔkamɔ akɛ amɛbaaná wala yɛ gbele sɛɛ loo gbɔmɔtsoŋ hewalɛnamɔ, ninámɔ kɛ omanyeyeli. Yɛ hei komɛi lɛ, mɛi bɔɔ mɔdɛŋ koni amɛkɛ no amɔ mumɔŋ hɔmɔ ní yeɔ amɛ yɛ maji ni bɔɔ jwetri amɛhaa amɛhe ní yeɔ Komunist susumɔ najiaŋ lɛ hewɔ lɛ naa. Yiŋtoi nɛɛ ni Kristofonyo ko leɔ lɛ baanyɛ aye abua lɛ koni ekɛ shiatsɛmɛi lɛ aje sanegbaai ni shishinumɔ yɔɔ mli shishi.—12/1, baafa 3.