Sanebimɔi ni Jɛ Kanelɔi Adɛŋ

Ani Yesu tsɔɔ yɛ esɔlemɔ he nɔkwɛmɔnɔ lɛ mli akɛ beni ashwieko ŋwɛibɔfoi fɔji lɛ kɛjɛko ŋwɛi lɛ, no mli lɛ aafee Nyɔŋmɔ suɔmɔnaa nii yɛ jɛmɛ?

Taakɛ aŋma yɛ Mateo 6:10 lɛ, Yesu kɛɛ: “Afee nɔ ni osumɔɔ yɛ shikpɔŋ lɛ nɔ, taakɛ afeɔ yɛ ŋwɛi lɛ.” Abaanyɛ anu nibimɔ nɛɛ shishi yɛ gbɛ̀i srɔtoi enyɔ nɔ. Klɛŋklɛŋ lɛ, ákɛ bi ni abiɔ koni afee Nyɔŋmɔ suɔmɔnaa nii yɛ shikpɔŋ nɔ taakɛ afeɔ momo yɛ ŋwɛi lɛ, loo nɔ ni ji enyɔ lɛ, bi ni abiɔ koni afee kɛmɔ shi kwraa yɛ ŋwɛi kɛ shikpɔŋ lɛ hu nɔ. * Nɔ ni Yesu wiemɔi ni ji “omaŋtsɛyeli lɛ aba,” ni tsɔ nakai wiemɔi lɛ ahiɛ lɛ tsɔɔ akɛ shishinumɔ ni ji enyɔ lɛ kɛ Ŋmalɛi lɛ kpãa gbee waa. Ni etsɔɔ bɔ ni shihilɛ lɛ yɔɔ beni Yesu yɔɔ shikpɔŋ lɛ nɔ lɛ kɛ be kakadaŋŋ ni nyiɛ sɛɛ kɛba lɛ mli. Yɛ mɛɛ gbɛ nɔ?

Kpojiemɔ wolo lɛ tsɔɔ nibii srɔtoi enyɔ ni baajɛ Nyɔŋmɔ Maŋtsɛyeli lɛ ni abaato shishi yɛ ŋwɛi lɛ mli aba. Klɛŋklɛŋ nɔ lɛ saa ŋwɛi diɛŋtsɛ he, ni nɔ ni ji enyɔ lɛ saa shikpɔŋ lɛ he. Kpojiemɔ 12:7-9, 12 lɛ kɛɔ akɛ: “Ta te shi yɛ ŋwɛi: Mikael kɛ ebɔfoi lɛ fã drako lɛ nɔ ta. Ni drako lɛ bɔfoi lɛ fata ehe kɛwu, ni amɛnyɛɛɛ, ni asaŋ amɛnáaa gbɛ dɔŋŋ yɛ ŋwɛi. Ni ashɛ́ drako kpeteŋkpele lɛ afɔ̃, mɔ ni ji blema onufu lɛ ní atsɛɔ lɛ diabolo (naafolɔlɔ loo abonsam) lɛ kɛ satan (henyɛlɔ) lɛ ní shishiuɔ jeŋ muu lɛ fɛɛ lɛ, ashɛ́ lɛ afɔ̃ shikpɔŋ lɛ nɔ, ni ashɛrɛ ebɔfoi lɛ hu ashwie afata ehe. No hewɔ lɛ nyɛ ŋwɛii kɛ nyɛ mɛi ni nyɛyɔɔ jɛi nyɛnáa tsuijurɔ! Kpóo ha mɛi ni yɔɔ shikpɔŋ lɛ nɔ kɛ ŋshɔ hiɛ lɛ! ejaakɛ abonsam lɛ ekpeleke shi kɛba nyɛŋɔɔ, egiri naakpa, ni ele akɛ be fioo kɛkɛ eyɔɔ.”

Satan kɛ daimonioi lɛ ni ashwie amɛ kɛjɛ ŋwɛi yɛ afi 1914 sɛɛ lɛ ha ajie mumɔŋ bɔɔ nii atuatselɔi lɛ fɛɛ kɛjɛ nakai shihilɛhe lɛ, ni no ha Yehowa bii ni ji ŋwɛibɔfoi anɔkwafoi, ni ji emumɔŋ adebɔɔ nii lɛ ateŋ mɛi ni yi fá waa lɛ ná miishɛɛ. (Hiob 1:6-12; 2:1-7; Kpojiemɔ 12:10) No hewɔ lɛ, ahã Yesu nibimɔ ni kɔɔ ŋwɛi he ni yɔɔ esɔlemɔ he nɔkwɛmɔnɔ lɛ mli lɛ hetoo. Mɛi fɛɛ ni shwɛ yɛ nakai ŋwɛi shihilɛhe lɛ ji mɛi ni yeɔ Yehowa anɔkwa ni amɛbaa amɛhe shi kwraa kɛhaa emaŋtsɛyeli lɛ.

Abaanyɛ akɛ nɔmimaa awie akɛ, beni enɛ nako aba, ní ŋwɛibɔfoi fɔji lɛ nyɛɔ amɛyaa ŋwɛi lolo po lɛ, no mli lɛ amɛfataaa Nyɔŋmɔ weku lɛ he, ni amɛyɛ naatsĩi shishi kwraa. Ákɛ nɔkwɛmɔnɔ lɛ, Yuda 6 lɛ tsɔɔ akɛ yɛ klɛŋklɛŋ afii 100 Ŋ.B. lɛ mli beebe lɛ, akɛ ‘naanɔ kpãai efimɔ amɛ ato mumɔŋ duŋ kpii mli aha gbi wulu lɛ nɔ kojomɔ lɛ.’ Agbɛnɛ hu 2 Petro 2:4 lɛ kɛɔ akɛ: “Nyɔŋmɔ eŋɔɔɔ bɔfoi ni fee esha lɛ ahe ekeee amɛ, shi moŋ ekɛ [mumɔŋ] duŋ kpii kpãai fĩmɔ amɛ ewo gbohiiaje bu [ni ji shihilɛ ni tsɔɔ shi ni aba amɛ kwraa] lɛ mli, ni eŋɔ amɛ eha ákɛ akɛ amɛ ato aha kojomɔ.” *

Nɔ ni tamɔɔɔ kwamɔ shihilɛ mli ni amɛyɔɔ beni amɛyɔɔ ŋwɛi lolo lɛ kwraa lɛ, ŋwɛibɔfoi fɔji lɛ kɛ hegbɛ kpele eye shikpɔŋ lɛ nɔ. Yɛ anɔkwale mli lɛ, Nyɔŋmɔ Wiemɔ lɛ tsɛɔ Satan akɛ “je nɛŋ lumɔ lɛ,” ni etsɛɔ daimonioi lɛ akɛ “je nɛŋ lumɛi ni yɔɔ benɛ  be duŋ lɛ mli lɛ.” (Yohane 12:31; Efesobii 6:11, 12; 1 Yohane 5:19) Hegbɛ ni Abonsam yɔɔ nɛɛ hewɔ ni enyɛ ebi Yesu koni efee jamɔ nifeemɔ kome pɛ eha lɛ koni ekɛ “jeŋ maŋtsɛyelihei fɛɛ kɛ amɛnunyam lɛ” aha lɛ lɛ. (Mateo 4:8, 9) No hewɔ lɛ eka shi faŋŋ akɛ, kɛ́ Nyɔŋmɔ Maŋtsɛyeli lɛ ‘ba’ shikpɔŋ lɛ nɔ lɛ, ekɛ tsakemɔi wuji baaba.

Kɛ́ Nyɔŋmɔ Maŋtsɛyeli lɛ ‘ba’ shikpɔŋ nɛɛ nɔ lɛ, ebaaha aná nibii agbɛjianɔtoo hee ko kwraa. Maŋtsɛyeli lɛ baajwara nɔyelii fɛɛ ni adesa to shishi lɛ wɔtsɔwɔtsɔ, ni ebaatsɔ nɔyeli pɛ ni yɔɔ shikpɔŋ lɛ nɔ. Yɛ nakai beaŋ nɔŋŋ lɛ, eshishibii ni ji adesai ni sheɔ Nyɔŋmɔ gbeyei lɛ baatsɔ “shikpɔŋ hee.” (2 Petro 3:13; Daniel 2:44) Maŋtsɛyeli lɛ baajie esha hu kɛjɛ adesai toibolɔi lɛ ahe, ni yɛ naagbee lɛ ebaaha shikpɔŋ lɛ atsɔ jeŋ muu fɛɛ paradeiso, ni ebaatsɔ nakai gbɛ nɔ ejie Satan nɔyeli lɛ he nibii fɛɛ kɛya.—Romabii 8:20, 21; Kpojiemɔ 19:17-21.

Kɛ́ Mesia Maŋtsɛyeli lɛ tsu Nyɔŋmɔ suɔmɔnaa nii lɛ ahe nii egbe naa yɛ Afii Akpe lɛ naagbee lɛ, ‘Bi lɛ diɛŋtsɛ hu baaŋɔ ehe eto mɔ ni ŋɔ nii fɛɛ to eshishi lɛ shishi, koni Nyɔŋmɔ afee nibii fɛɛ ayitso.’ (1 Korintobii 15:28) Kɛkɛ lɛ naagbee kaa ni kɛ́ agbe naa lɛ abaakpata Satan, edaimonioi lɛ, kɛ adesai atuatselɔi fɛɛ ni alaka amɛ lɛ ahiɛ kwraa yɛ “gbele ni ji enyɔ lɛ” mli lɛ baaba. (Kpojiemɔ 20:7-15) Yɛ no sɛɛ lɛ, bɔɔ nii fɛɛ ni yɔɔ ŋwɛi kɛ shikpɔŋ lɛ nɔ, ni yɔɔ nilee lɛ kɛ mlifilimɔ baaba amɛhe shi amɛha Yehowa suɔmɔ maŋtsɛyeli lɛ kɛya naanɔ. No baafee Yesu wiemɔi ni yɔɔ esɔlemɔ he nɔkwɛmɔnɔ lɛ mli lɛ mlibaa kwraa ni mɔɔ shi yɛ gbɛ fɛɛ gbɛ nɔ.—1 Yohane 4:8.

[Shishigbɛ niŋmai]