Sanebimɔi ni Jɛ Kanelɔi Adɛŋ

Mɛni ba yɛ sane ni aŋma afɔ shi yɛ 2 Mose 4:24-26 lɛ mli lɛ mli, ni namɔ wala yɔɔ oshara mli lɛ?

Mose kɛ eŋa Zipora, kɛ ebihii Gershom kɛ Eliezer nyiɛ gbɛ kɛmiiya Mizraim be mli ni sane ni nyiɛ sɛɛ lɛ ba: “Eba mli yɛ gbɛ lɛ nɔ yɛ shitoohe lɛ akɛ Yehowa bahɛŋ lɛ, ni eetao lɛ egbe. Kɛkɛ ni Zipora kɔ tɛ ni naa ba, ni eŋɔfo ebi lɛ ketia, ni eshɛ efɔ enaji anaa ni ekɛɛ: Lɛɛlɛŋ akɛ lá ayemforowu jio ha mi. Kɛkɛ ni eŋmɛɛ ehe. Ketiafoo lɛ hewɔ lɛ ekɛɛ lɛ akɛ: Lá ayemforowu jio lɛ.” (2 Mose 4:20, 24-26) Eyɛ mli akɛ nɛkɛ sane nɛɛ bɛ faŋŋ ni anyɛŋ aná nɔmimaa yɛ eshishinumɔ diɛŋtsɛ he moŋ, shi Ŋmalɛi lɛ kɛ mlitsɔɔmɔ ko haa yɛ kukuji nɛɛ ahe.

Sane lɛ etsɔɔɔ mɔ tuuŋtu ni wala yɔɔ oshara mli lɛ. Shi kɛlɛ, wɔbaanyɛ wɔmu sane naa yɛ gbɛ ni ja nɔ akɛ jeee Mose wala yɔɔ oshara mli lɛ, ejaakɛ etsɛko tsɔ ni enine shɛ ŋwɛi nitsumɔ ko nɔ akɛ enyiɛ Israelbii lɛ ahiɛ kɛshi Mizraim. (2 Mose 3:10) Etamɔ nɔ ni enyɛŋ eba akɛ Nyɔŋmɔ bɔfo lɛ baawo Mose wala he gbeyei be mli ni enyiɛ gbɛ kɛyaa koni eyatsu nakai nitsumɔ lɛ he nii lɛ. No hewɔ lɛ, ebaanyɛ efee ebihii lɛ ateŋ mɔ kome wala. Mla ni akɛha Abraham yɛ mra be mli ni kɔɔ ketiafoo he lɛ kɛɛ akɛ: “Ni nuu foolɔ ko ni afoko lɛ ketia lɛ, aaafo nɛkɛ susuma nɛɛ yɛ emaŋ lɛŋ ashɛ afɔ̃; ejaakɛ ekwa mikpaŋmɔ lɛ.” (1 Mose 17:14) Eka shi faŋŋ akɛ Mose eku ehiɛ efɔ ketia ni eeefo ebi lɛ nɔ, ni no hewɔ lɛ, Yehowa bɔfo lɛ wo gbekɛ nuu lɛ wala he gbeyei.

Beni Zipora fo ebinuu lɛ ketia koni ekɛjaje saji lɛ, namɔ naji anaa eshɛ efɔ lɛ? Yehowa bɔfo lɛ ji mɔ ni yɔɔ hewalɛ ni ekɛbaagbe gbekɛ nuu foolɔ lɛ. Belɛ, shishinumɔ yɛ mli akɛ Zipora baashɛ ketia lɛ efɔ ŋwɛibɔfo lɛ naji anaa, ni ekɛ no afee odaseyeli ni tsɔɔ akɛ etsu kpaŋmɔ lɛ he nii.

Zipora wiemɔ akɛ “lá ayemforowu jio ha mi” lɛ ji wiemɔ ni efɔɔɔ kaa. Mɛni wiemɔ nɛɛ tsɔɔ yɛ ehe? Kɛtsɔ toiboo ni Zipora fee eha nibii ni ketiafoo he kpaŋmɔ lɛ biɔ lɛ nɔ lɛ, ekpɛlɛ wekukpaa kpaŋmɔ ko ni ka ekɛ Yehowa teŋ lɛ nɔ. Mla kpaŋmɔ ni Yehowa kɛ Israelbii lɛ fee yɛ sɛɛ mli lɛ tsɔɔ akɛ, yɛ wekukpaa kpaŋmɔ mli lɛ, abaanyɛ asusu Yehowa he akɛ wu kɛ fã kroko lɛ he akɛ ŋa. (Yeremia 31:32) No hewɔ lɛ, kɛtsɔ tsɛmɔ ni Zipora tsɛ Yehowa (kɛtsɔ enajiaŋdamɔlɔ bɔfo lɛ nɔ) akɛ “lá ayemforowu” lɛ nɔ lɛ, etamɔ nɔ ni eeekpɛlɛ lɛ diɛŋtsɛ ehe shi ni ebaa ehaa nakai kpaŋmɔ lɛ mli taomɔnii lɛ anɔ. Etamɔ nɔ ni ekpɛlɛ ŋa gbɛhe yɛ ketiafoo he kpaŋmɔ lɛ mli lɛ nɔ, ni Yehowa Nyɔŋmɔ ji wu lɛ. Yɛ fɛɛ mli lɛ, yɛ toiboo ni efee eha Nyɔmɔ taomɔnii kɛ faishitswaa lɛ hewɔ lɛ, ebinuu lɛ ye ehe kɛjɛ oshara mli.