666 Ejeee Teemɔŋ Sane ko Kɛkɛ

“Mɔ ko nyɛɛɛ nɔ ko ahe aloo ehɔɔ, akɛ ja mɔ ni yɔɔ okadi lɛ aloo kooloo lɛ gbɛi lɛ aloo egbɛi lɛ yibɔ lɛ kɛkɛ. Biɛ nilee lɛ yɔɔ. Mɔ ni yɔɔ jwɛŋmɔ lɛ abu kooloo lɛ yibɔ lɛ he akɔntaa; ejaakɛ gbɔmɔ yibɔ ni; ni eyibɔ lɛ ji ohai ekpaa kɛ nyɔŋmai ekpaa kɛ ekpaa.”—Kpojiemɔ 13:17, 18.

BIBLIA mli saneyitsei fioo komɛi téɔ miishɛɛ kɛ niiahesusumɔi babaoo ashi tamɔ gbalɛ ni kɔɔ “kooloo lɛ” okadi aloo egbɛi lɛ he teemɔŋ sane—ni ji yibɔ ni ji 666 lɛ he. Kooloo lɛ okadi lɛ ebafee sane ko ni akaa yiŋ awieɔ he babaoo yɛ tɛlivishiŋ kɛ Internet lɛ anɔ, kɛ agbɛnɛ hu yɛ sinii, woji, kɛ woji tɛtrɛbii amli.

Mɛi komɛi heɔ amɛyeɔ akɛ 666 lɛ ji Biblia mli anti-Kristo lɛ okadi. Mɛi krokomɛi kɛɔ akɛ edamɔ shi kɛha kadimɔnɔ ko ni anyɛɔ mɔ nɔ akɛhaa, tamɔ hewolonɔ kadimɔ loo yibɔ ko ni akpɛ́ yɛ dade ko nɔ ni akɛwo mɔ lɛ mli ni kadiɔ lɛ akɛ kooloo lɛ sɔɔlɔ. Mɛi krokomɛi hu heɔ amɛyeɔ akɛ nakai yibɔ ni ji 666 lɛ ji Katolik paapayeli lɛ he okadi. Kɛ́ akɛ Roma yibɔ okadii lɛ ye niŋmaa okadi henɔ ni yɔɔ paapa lɛ sabala ni ji, Vicarius Filii Dei (Najiaŋdamɔlɔ kɛha Nyɔŋmɔ Bi lɛ) najiaŋ, ní akɛ ŋaa tsake yibɔ okadii lɛ amli fioo ko lɛ, amɛnáa yibɔ ni ji 666. Mɛi krokomɛi hu kɛɔ akɛ abaanyɛ abu nɛkɛ yibɔ okadi nɛɛ nɔŋŋ naa kɛjɛ bɔ ni atsɛɔ Roma Nɔyelɔ Diocletian gbɛi yɛ Latin mli lɛ mli, kɛ agbɛnɛ hu kɛjɛ gbɛi ni akɛtsɛɔ Nero Kaisare yɛ Hebri wiemɔ mli lɛ mli. *

Shi kɛlɛ, taakɛ wɔbaana yɛ sane ni nyiɛ sɛɛ lɛ mli lɛ, shishitsɔɔmɔi ni aka yiŋ awie nɛɛ yɛ srɔto yɛ nɔ ni Biblia lɛ diɛŋtsɛ kɛɔ yɛ kooloo lɛ okadi lɛ he lɛ he. Biblia lɛ jieɔ lɛ kpo akɛ Nyɔŋmɔ mlifu baaba mɛi ni hiɛ kadimɔ nii lɛ eko lɛ anɔ, beni ekɛ amrɔ nɛɛ nibii agbɛjianɔtoo lɛ baa naagbee lɛ. (Kpojiemɔ 14:9-11; 19:20) No hewɔ lɛ, yibɔ ni ji 666 lɛ ni wɔɔnu shishi lɛ he hiaa kwraa fe ni wɔɔnu teemɔŋ sane ko shishi kɛkɛ. Miishɛɛ sane ji akɛ, Yehowa Nyɔŋmɔ, ni ji suɔmɔ he nɔkwɛmɔ nii ni fe fɛɛ, kɛ mumɔŋ la Jɛɛhe lɛ shiko etsuji efolo yɛ nɛkɛ sane ni he hiaa nɛɛ mli.—2 Timoteo 3:16; 1 Yohane 1:5; 4:8.

[Shishigbɛ niŋmaa]