Maŋtsɛyeli Jajelɔi Bɔ Amaniɛ

Odase ni Ayeɔ Mɛi yɛ Amɛnitsumɔhe

MƐNI bɔfo Mateo, Petro, Andrea, Yakobo, kɛ Yohane yɔɔ ni je amɛhe? Yesu tsɛ́ amɛ fɛɛ beni amɛyɔɔ amɛnitsumɔhei. Petro, Andrea, Yakobo, kɛ Yohane bɛ deka kwraa yɛ amɛ wuoyaa nitsumɔ lɛ mli beni Yesu fɔ̃ amɛ nine akɛ: “Ba ni obanyiɛ misɛɛ” lɛ. Beni afɔ Mateo nine koni ebatsɔ Yesu kaselɔ lɛ, no mli lɛ eyɛ toohemɔ nitsumɔhe lɛ.—Mateo 4:18-21; 9:9.

Nyɔmɔwoo baanyɛ ajɛ mɛi ni ayeɔ amɛ odase yɛ amɛnitsumɔhei lɛ amli kɛba. Akɛni Yehowa Odasefoi ni yɔɔ Japan lɛ eyɔse enɛ hewɔ lɛ, amɛbɔ mɔdɛŋ waa nyɛsɛɛ nɛɛ koni amɛkɛ amɛhe awo sɔɔmɔ nitsumɔ fã nɛɛ mli. Mɛni jɛ mli kɛba? Anyɛ afee sɛɛsaramɔi akpei abɔ yɛ nyɔji fioo komɛi amli, ni aje Biblia mli nikasemɔi aaafee 250 ashishi. Susumɔ niiashikpamɔi ni nyiɛ sɛɛ nɛɛ ahe okwɛ.

Be-fɛɛ sɔɔlɔ ko ni yɔɔ Tokyo lɛ kɛ niyelihe nɔkwɛlɔ ko ni kɛ Odasefonyo ko gba sane aaafee afii 30 ni eho nɛ, beni eji skul gbekɛ lɛ kpe. Eyɛ mli akɛ nitsumɔ nɔkwɛlɔ lɛ nuuu nɔ ni akɛ lɛ wie he beni eji skulnyo lɛ shishi moŋ, shi ená Biblia lɛ he miishɛɛ. Yɛ emiishɛɛ shi ni atee ekoŋŋ amrɔ nɛɛ hewɔ lɛ, ekpɛlɛ amrɔ nɔŋŋ ni akɛ lɛ fee Biblia mli nikasemɔ yɛ Nilee Ni Kɛ Mɔ Yaa Naanɔ Wala Mli wolo lɛ mli. * Kɛfata he lɛ, lɛ diɛŋtsɛ eto gbɛjianɔ kɛkaneɔ Biblia lɛ daa gbɛkɛ dani eyawɔɔ.

Gbɛgbalɔ krɛdɛɛ ko tee shiɛmɔ yɛ nitsumɔhe ko. Eyɛ mli akɛ eyanaaa nitsumɔ nɔkwɛlɔ lɛ moŋ, shi oblayoo ni here telifon lɛ nɔ yɛ nɔkwɛlɔ lɛ ɔfis lɛ bi akɛ, “Ani obaasumɔ ni okɛ mi awie?” Beni amɛkɛ be kuku egba sane yɛ telifon lɛ nɔ sɛɛ lɛ, yoo lɛ je kpo kɛba heni ahereɔ gbɔi yɛ lɛ, ni ebakɛɛ akɛ eyɛ he miishɛɛ akɛ ebaakane Biblia lɛ. Gbɛgbalɔ krɛdɛɛ lɛ to gbɛjianɔ koni ebaha lɛ Biblia lɛ eko, ni ekɛ lɛ je Biblia mli nikasemɔ shishi yɛ shwɛmɔhe ko ni bɛŋkɛ jɛmɛ lɛ, ni amɛfeɔ enɛ daa leebi dani yoo lɛ yaa nitsumɔ.

Yɛ nitsumɔhe kroko mli lɛ, nuu ko na akɛ enaanyo nitsulɔ ko shɛrɛ Buu-Mɔɔ kɛ Awake! woji tɛtrɛbii lɛ ni ekpɛlɛ nɔ lɛ eshwie amrɔ nɔŋŋ, beni Odasefonyo lɛ shi etee sɛɛ. Beni nuu lɛ tee shia lɛ, eyagba eŋa ni ji Odasefonyo lɛ nɔ ni tee nɔ lɛ, ni ewie akɛ, eji lɛ ni kulɛ, kɛhooo lɛ ebaabo sane lɛ toi fioo. Ebiyoo ni nu nɔ ni ewie lɛ yagba Odasefonyo ko ni shiɛɔ yɛ nakai nitsumɔhe shikpɔŋkuku lɛ mli lɛ sane lɛ. Odasefonyo lɛ yasara nuu nɛɛ amrɔ nɔŋŋ yɛ ɔfis lɛ ni ekɛ lɛ je Biblia mli nikasemɔ shishi. Etsɛɛɛ ni nuu lɛ bɔi kpeei ni afeɔ yɛ Hɔgbaa lɛ yaa daa.

Sɛɛnamɔi krokomɛi ejɛ gbɔmɛi ni ayeɔ amɛ odase yɛ amɛnitsumɔhei lɛ amli kɛba. Shiɛlɔi babaoo ni yɔɔ Japan lɛ ahe ebasa waa yɛ sɛɛsaramɔi ni afeɔ yɛ nihɔɔmɔhei, guɔyeli nibii afeemɔhei kɛ ɔfis srɔtoi lɛ amli. Kɛfata he lɛ, kɛtsɔ nɛkɛ odaseyeli gbɛ̀i nɛɛ anɔ lɛ, nine enyɛ eshɛ mɛi babaoo ni ekpa shiɛmɔyaa lɛ anɔ, ni akɛ amɛ eje nikasemɔi ashishi ekoŋŋ. Nɔ ni ejɛ mli kɛba lɛ sa kadimɔ waa. Nyɛsɛɛ nɛɛ, asafo ko ni yɔɔ Tokyo teŋgbɛ lɛ bɔ shia Biblia mli nikasemɔi 108 he amaniɛ, ni enɛ fa fe yibɔ ni abu he akɔntaa yɛ afi ni ho lɛ mli lɛ toi enyɔ.

[Shishigbɛ niŋmaa]