Ejurɔfeemɔ Yɛ Fimɔ Bei Amli

BƆFO Paulo wo hewalɛ akɛ: “Nyɛhaa wɔfea mɛi fɛɛ ejurɔ, shi titri lɛ mɛi ni ji hemɔkɛyeli lɛ webii lɛ.” (Galatabii 6:10) Yehowa Odasefoi ni yɔɔ je lɛŋ fɛɛ lɛ bɔɔ mɔdɛŋ koni amɛkɛ nakai shishitoo mla lɛ atsu nii jogbaŋŋ yɛ amɛshihilɛi amli, ni amɛfee mɔ fɛɛ mɔ ejurɔ, titri lɛ amɛnanemɛi heyelilɔi. Anaa enɛ shii abɔ yɛ hiamɔ bei amli. Nyɛhaa wɔsusua nɔkwɛmɔnɔ ko ni ba nyɛsɛɛ nɛɛ, ni jɛ maji etɛ anɔ lɛ he wɔkwɛa.

Yɛ December afi 2002 mli lɛ, lasuogbele ko ni naa wa batutua Guam ekãa naa, ni emli kɔɔyɔɔ ni tswaa ni naa wa lɛ hiɛ foi nɔ ni fe kilomitai 300 yɛ ŋmɛlɛtswaa kome mli. Shiai babaoo kumɔ, ni ekomɛi ahiɛ kpata kwraa. Asafoi ni yɔɔ jɛmɛ lɛ to nisaamɔ kui ahe gbɛjianɔ koni amɛye amɛbua Odasefoi awekui ni oshara eba amɛnɔ lɛ. Guam nitsumɔhe nine lɛ kɛ tsumaa nibii kɛ nitsulɔi ha koni akɛsaa shiai lɛ, ni Hawaii nitsumɔhe nine lɛ hu kɛ sɛɛfimɔ ha. Yɛ otsii komɛi asɛɛ lɛ, kapintɛfoi akuu ko jɛ Hawaii bashɛ shi koni amɛye amɛbua kɛma tsũi lɛ ekoŋŋ, ni bɔni afee ni nyɛmimɛi ni yɔɔ jɛmɛ lɛ anyɛ amɛye amɛbua mɛi ni jɛ Hawaii lɛ, amɛteŋ mɛi komɛi kɔ amɛnitsumɔ mli hejɔɔmɔ gbii. Ekomefeemɔ mumɔ ni miishɛɛ yɔɔ mli lɛ fee odaseyeli nɔ kɛha mɛi fɛɛ ni yɔɔ akutso lɛ mli lɛ.

La je trukaa yɛ he ko ni kɛ Maŋtsɛyeli Asa lɛ jɛkɛɛɛ kwraa mli yɛ akutso ko ni yɔɔ Mandalay maŋtiase lɛ mli yɛ Myanmar. Nyɛmiyoo ko ni ekpa shiɛmɔyaa kɛ eweku lɛ shia bɛŋkɛ jɛmɛ. Kɔɔyɔɔ lɛ miitswa kɛmiiya eshia lɛ gbɛ, no hewɔ lɛ ejo foi kɛtee asa lɛ nɔ kɛha yelikɛbuamɔ. No mli lɛ aasaa asa lɛ he nibii komɛi, no hewɔ lɛ nyɛmimɛi hii pii yɛ jɛmɛ. Efee amɛ naakpɛɛ akɛ amɛkɛ nyɛmiyoo lɛ kpe ejaakɛ amɛleee akɛ eyɛ akutso lɛ mli. Oya nɔŋŋ ni nyɛmimɛi lɛ yaye amɛbua kɛjie weku lɛ nibii fɛɛ kɛba heni yɔɔ shweshweeshwe. Beni yoo lɛ wu ni jeee Odasefonyo lɛ nu la lɛ he lɛ, eshá foi kɛtee shia, ni eyana ni nyɛmimɛi lɛ miiye amɛmiibua eweku lɛ. Enaa kpɛ ehe ni ehiɛ sɔ enɛ, ni etsui nyɔ emli hu ejaakɛ bei pii lɛ julɔi juɔ nibii kɛjɛɔ shiai ni eyaje shihilɛ ni tamɔ nakai mli lɛ amli. Mlihilɛ kpo ni nyɛmimɛi lɛ jie nɛɛ tsirɛ nyɛmiyoo lɛ kɛ ebinuu koni amɛkɛ Kristofoi asafo lɛ abɔ ekoŋŋ, ni amrɔ nɛɛ amɛbaa kpeei ni afeɔ lɛ fɛɛ.

Yɛ nyɛsɛɛ sɔɔmɔ afi lɛ mli lɛ, mɛi ni yɔɔ Mozambique lɛ ateŋ mɛi babaoo kɛ hɔmɔ kpe yɛ nuhɔmɔ kɛ ŋmɔshi nibii ni hiɛ kpata lɛ ahewɔ. Yehowa Odasefoi anitsumɔhe nine ni yɔɔ jɛmɛ lɛ tsu shihilɛ lɛ he nii kɛtsɔ niyenii ni ekɛha mɛi ni ehia amɛ lɛ nɔ. Ajaa niyenii lɛ yɛ Maŋtsɛyeli  Asai lɛ anɔ, bei komɛi lɛ afeɔ enɛ beni akpa kpeei lɛ asɛɛ. Nyɛmiyoo ko ni ji fɔlɔ kome lɛ kɛɛ akɛ: “Miba kpee lɛ akɛ mɔ ni ehao, ni mileee nɔ ni mikɛbaaha mibii lɛ ni amɛye kɛji wɔku wɔsɛɛ kɛtee shia.” Yelikɛbuamɔ ni suɔmɔ yɔɔ mli ni nyɛmimɛi lɛ kɛha oya lɛ wo lɛ hewalɛ. Ekɛɛ akɛ: “Etamɔ gbohiiashitee kɛha mi!”

Odasefoi lɛ hu ‘feɔ ejurɔ’ yɛ mumɔŋ gbɛfaŋ kɛtsɔ Biblia lɛ mli shɛɛ sane ni shɛjeɔ mɔ mii ni ehaa mɔ hiɛnɔkamɔ ni amɛkɛhaa mɛi lɛ nɔ. Amɛheɔ amɛyeɔ taakɛ nilelɔ ni hi shi yɛ blema beaŋ lɛ he eye lɛ nɔŋŋ akɛ: “Shi mɔ ni boɔ mi toi lɛ aaahi shi shweshweeshwe, ni ehe aaajɔ lɛ ní efɔŋ gbeyeishemɔ bɛŋ.”—Abɛi 1:33.

[Mfonirii ni yɔɔ baafa 31]

1, 2. Niyenii ni aja aha mɛi ni ehia amɛ lɛ yɛ Mozambique

3, 4. Kɔɔyɔɔ ni naa wa ni tswa yɛ Guam lɛ kpata shiai babaoo ahiɛ

[He ni Sane lɛ Jɛ]

Gbekɛ, abɛku: Andrea Booher/FEMA News Photo; yoo, ŋwɛigbɛ: AP Photo/Pacific Daily News, Masako Watanabe