Maŋtsɛyeli Jajelɔi Bɔ Amaniɛ

‘Nyɛbaa ni Nyɛbayea Nyɛbuaa Wɔ’

AKƐ ninefɔɔ hã odasefoi ni yɔɔ Austria, Germany, kɛ Switzerland ni wieɔ Germany wiemɔ lɛ yɛ July afi 2000 mli koni amɛfã kɛyahi Bolivia. Mɛni hewɔ? Ejaakɛ Mennobii (Sɔlemɔ mli bii komɛi) ni wieɔ Germany wiemɔ ni yɔɔ maji ni okwaafoi yɔɔ mli yɛ Santa Cruz, yɛ Bolivia shikpɔŋkuku ni dalɛ shɛɔ kilomitai 300 ni etse ehe banee lɛ mli lɛ miijie miishɛɛ kpo yɛ Biblia lɛ he.

Odasefoi aaafee 140 here ninefɔɔ lɛ nɔ. Mɛi komɛi yahi jɛmɛ otsii fioo komɛi, ni mɛi krokomɛi hu kɛ afi loo nɔ ni fe nakai yahi jɛmɛ. Amɛkɛ nakai feemɔ jie mumɔ ko ni tamɔ klɛŋklɛŋ afii 100 lɛ mli maŋsɛɛ sanekpakpa shiɛlɔi ni bo tsɛmɔ akɛ: ‘Nyɛbaa Makedonia ni nyɛbayea nyɛbuaa wɔ’ lɛ toi lɛ nɔŋŋ eko.—Bɔfoi lɛ Asaji 16:9, 10.

Te odaseyeli yɛ nakai shikpɔŋkuku lɛ mli yɔɔ ha tɛŋŋ? Onukpa ko ni yɔɔ asafo ni yɔɔ jɛmɛ lɛ mli lɛ tsɔɔ mli akɛ: “Gbɛfaa kɛmiiya Mennobii amaji 43 lɛ amli ekome mli lɛ baanyɛ ahé tsɔne ko ni nyɛɔ eyaa he fɛɛ he lɛ ŋmɛlɛtswaa kpaanyɔ kɛfo gbɛjegbɛ ko ni awoko nɔ kootaa. Bei pii lɛ hei ni yɔɔ shɔŋŋ lɛ asaramɔ heɔ gbii ejwɛ, ni ebiɔ ni awɔ yɛ buui amli jenamɔ komɛi amli. Shi eka shi faŋŋ akɛ nɔ ni jɛɔ mɔdɛŋbɔɔ nɛɛ mli baa lɛ he yɛ sɛɛnamɔ, ejaakɛ gbɔmɛi nɛɛ ateŋ mɔ ko nuko sanekpakpa lɛ pɛŋ.”

Klɛŋklɛŋ lɛ Mennobii lɛ ateŋ mɛi babaoo sumɔɔɔ ni amɛboɔ toi. Shi mɔdɛŋ ni Odasefoi lɛ bɔ shii abɔ lɛ ye ebua amɛ koni amɛyɔse nɔ ni amɛyɔɔ kɛha amɛ lɛ. Ákɛ nɔkwɛmɔnɔ lɛ, okwaafonyo ko kɛɛ akɛ eekane Awake! wolo tɛtɛrɛɛ lɛ afi sɔŋŋ nɛ. Kɛkɛ ni ekɛfata he akɛ: “Mile akɛ mɛi babaoo ni yɔɔ biɛ lɛ kɛ nyɛ kpãaa gbee yɛ nɔ ni nyɛwieɔ lɛ he, shi miheɔ miyeɔ akɛ no ji anɔkwale lɛ.” Nuu ko kɛɛ yɛ maŋ kroko mli akɛ: “Mikutsoŋbii lɛ ateŋ mɛikomɛi kɛɔ akɛ amale gbalɔi ji nyɛ, ni mɛi krokomɛi hu kɛɔ akɛ nyɛ nyɛyɔɔ anɔkwale lɛ. Miitao ni mi diɛŋtsɛ mana.”

Amrɔ nɛɛ ayɛ asafo ko ni wieɔ Germany wiemɔ yɛ Bolivia, kɛ emli shiɛlɔi 35, ní be-fɛɛ shiɛlɔi 14 fata amɛhe. Kɛbashi bianɛ lɛ, tsutsu Mennobii 14 ebatsɔmɔ Maŋtsɛyeli shiɛlɔi, ni mɛi 9 krokomɛi baa kpee daa. Nuu onukpa ko ni abaptisi lɛ nyɛsɛɛ nɛɛ kɛɛ akɛ: “Wɔnaa Yehowa gbɛtsɔɔmɔ lɛ faŋŋ. Etsu nyɛmimɛi hii kɛ yei ni wieɔ Germany wiemɔ ni yɔɔ niiashikpamɔ kɛba koni amɛbaye amɛbua wɔ. Wɔhiɛ esɔ enɛ waa diɛŋtsɛ.” Nuu lɛ biyoo ni eye afii 17 ni abaptisi lɛ lɛ hu kɛfata he akɛ: “Ekãa ni nyɛmimɛi hii kɛ yei ni eba biɛ lɛ yɔɔ lɛ tsɛŋeɔ mɔ waa. Amɛteŋ mɛi babaoo ji gbɛgbalɔi, ní kɛ amɛbe kɛ shika yeɔ buaa mɛi krokomɛi. Ehaa misumɔɔ akɛ mafee nakai nɔŋŋ.”

Yɛ anɔkwale mli lɛ mɛi ni kɛ amɛhe hã koni ‘amɛyaye amɛbua’ lɛ miiná miishɛɛ babaoo kɛ tsui ni nyɔɔ mɔ mli.