Sanebimɔi ni Jɛ Kanelɔi Adɛŋ

Mɛni hewɔ David ni ji Yehowa anɔkwa tsulɔ lɛ ŋmɛ gbɛ koni eŋa Mikal afee mɔ ni yɔɔ amaga lɛ, taakɛ atsɔɔ mli yɛ 1 Samuel 19:12, 13 lɛ?

Klɛŋklɛŋ lɛ, nyɛhaa wɔsusua emli wiemɔi ni fata he lɛ ahe kuku. Beni ayabɔ David ŋa amaniɛ yɛ ŋaa ni Maŋtsɛ Saul etsɔ koni ekɛgbe David lɛ he lɛ, efee he nɔ ko amrɔ nɔŋŋ. Biblia lɛ kɛɔ akɛ: “Mikal shi David kɛtsɔ samfɛlɛ mli kɛyi shi, ni eyiŋ etee ni ejo foi ni eje edɛŋ. Kɛkɛ ni Mikal wó amaga [ni eka shi faŋŋ akɛ edalɛ kɛ esu tamɔ gbɔmɔ lɛ] efɔ̃ saa lɛ nɔ, ni eŋɔ abotia wolo nɔhaanɔ ehà eyitso gbɛ, ni eŋɔ mama ehà he.” Beni bɔfoi ni Saul tsu lɛ ba koni amɛbamɔ David lɛ, Mikal kɛɛ amɛ akɛ: “Ehe miiye.” Ŋaa nɛɛ ha David taomɔ lɛ sɛɛ tsɛ, ni eha David ná hegbɛ ejo foi.—1 Samuel 19:11-16.

Nibii ni ana yɛ shitsaa mli lɛ tsɔɔ akɛ yɛ blema bei amli lɛ, amagai ni akɛtoɔ lɛ jeee kɛha ekɛ nitsumɔ yɛ jamɔ mli pɛ, shi moŋ kɛha mla naa yiŋtoi ahe nitsumɔ hu. Taakɛ bɔ ni mla naa niŋmaai ni yeɔ odase kɛ shamansheo haa aleɔ mɔ ni yɔɔ hegbɛ akɛ eyeɔ gboshinii ko ŋmɛnɛ lɛ, nakai ji bɔ ni amagai lɛ ji yɛ blema beaŋ. Amaga ni oblanyo ko ni ebote gbalashihilɛ mli yɔɔ lɛ baanyɛ aha ená mla naa hegbɛ yɛ shihilɛi komɛi amli koni ekɛŋɔ eshaanuu ni egbo lɛ gboshinii. Ekolɛ enɛ tsɔɔ nɔ hewɔ ni yɛ be ko ni tsɔ hiɛ lɛ mli lɛ, Rahel kɔ etsɛ amaga lɛ, kɛ nɔ hewɔ ni etsɛ tsui ye akɛ enine aaashɛ nɔ ekoŋŋ lɛ mli. Rahel wu ni ji Yakob leee nɔ ni eŋa efee lɛ he nɔ ko, yɛ nakai sane ni ba lɛ mli.—1 Mose 31:14-34.

Beni Israelbii lɛ batsɔ maŋ lɛ, amɛnine shɛ Kitai Nyɔŋma ni emli nɔ ni ji enyɔ lɛ je gbɛ egu amagai ni afeɔ ahaa he lɛ kwraa lɛ nɔ. (2 Mose 20:4, 5) Sɛɛ mli lɛ, gbalɔ Samuel tsɛ́ mla nɛɛ yisɛɛ yɛ gbɛ ni bɛ tɛ̃ɛ nɔ beni ekɛ Maŋtsɛ Saul wieɔ lɛ. Ekɛɛ akɛ: “Atuatsemɔ lɛ etamɔ klamɔ esha nɔŋŋ, ni toiwalɛ tamɔ wɔŋjamɔ kɛ amagajamɔ!” (1 Samuel 15:23) Yɛ yiŋtoo nɛɛ hewɔ lɛ, eka shi faŋŋ akɛ amaga lɛ ebafeŋ nɔ ni tsuɔ gboshinii ahe nii yɛ Israel. Kɛlɛ, etamɔ nɔ ni nɛkɛ blema Yudafoi apasa hemɔkɛyeli nɛɛ kã he etee nɔ yɛ Israel shiai komɛi amli. (Kojolɔi 17:5, 6; 2 Maŋtsɛmɛi 23:24) Yɛ anɔkwale ni eji akɛ Mikal kɛ amaga to enibii amli lɛ tsɔɔ akɛ etsui yeee emuu yɛ Yehowa hiɛ. David hu leee amaga lɛ he nɔ ko loo ákɛ eŋmɛ gbɛ, ejaakɛ Mikal ji Maŋtsɛ Saul biyoo.

Atsɔɔ bɔ ni David naa hetuu-kɛhamɔ ni akɛaaha Yehowa pɛ lɛ mli yɛ wiemɔi ni ji: “Yehowa da kpele ni esa yijiemɔ babaoo, ni ehe yɛ gbeyei fe nyɔŋmɔi lɛ fɛɛ. Ejaakɛ maji lɛ fɛɛ anyɔŋmɔi lɛ amagai ni, shi Yehowa lɛ, lɛ efee ŋwɛi” lɛ mli.—1 Kronika 16:25, 26.

[Mfoniri ni yɔɔ baafa 29]

Kitai Nyɔŋma lɛ mli nɔ ni ji enyɔ lɛ guɔ amagai afeemɔ, tamɔ amaga ni akɛtsɔɔ yɛ biɛ lɛ

[He ni Sane lɛ Jɛ]

From the book The Holy Land, Vol. II, 1859