Ha Nyɔŋmɔ Hiɛkalɔ Lɛ Akudɔ Bo
Ha Nyɔŋmɔ Hiɛkalɔ Lɛ Akudɔ Bo
‘Nyɛkua nyɛsɛɛ kɛbaa Nyɔŋmɔ hiɛkalɔ lɛ ŋɔɔ, mɔ nɔŋŋ ni fee ŋwɛi kɛ shikpɔŋ kɛ ŋshɔ kɛ nii fɛɛ ni yɔɔ amɛmli lɛ.’—BƆFOI LƐ ASAJI 14:15.
1, 2. Mɛni hewɔ esa jogbaŋŋ akɛ wɔkpɛlɛ Yehowa nɔ akɛ “Nyɔŋmɔ hiɛkalɔ” lɛ?
BENI bɔfo Paulo kɛ Barnaba etsa nuu ko yɛ Listra sɛɛ lɛ, Paulo ma nɔ mi eha mɛi ni na nɔ ni tee nɔ lɛ akɛ: “Wɔ hu gbɔmɛi adesai ji wɔ tamɔ nyɛ nɔŋŋ, ni wɔmiijaje sanekpakpa wɔmiitsɔɔ nyɛ, koni nyɛku nyɛsɛɛ kɛjɛ nɛkɛ yakayakanii nɛɛ ahe kɛba Nyɔŋmɔ hiɛkalɔ lɛ ŋɔɔ, mɔ nɔŋŋ ni fee ŋwɛi kɛ shikpɔŋ kɛ ŋshɔ kɛ nii fɛɛ ni yɔɔ amɛmli lɛ.”—Bɔfoi lɛ Asaji 14:15.
2 Kwɛ anɔkwale diɛŋtsɛ ni eji akɛ Yehowa jeee amaga ko ni wala bɛ emli, shi moŋ lɛ ji “Nyɔŋmɔ hiɛkalɔ” lɛ! (Yeremia 10:10; 1 Tesalonika 1:9, 10) Yɛ wala mli ni Yehowa yɔɔ lɛ sɛɛ lɛ, eji wɔwala Halɔ hu. “Lɛ . . . edɛŋ wala kɛ mumɔ kɛ nii fɛɛ jɛɔ haa gbɔmɛi fɛɛ.” (Bɔfoi lɛ Asaji 17:25) Eesumɔ ni wɔná wala ni yɔɔ amrɔ nɛɛ kɛ nɔ ni baaba wɔsɛɛ lɛ mli ŋɔɔmɔ. Paulo kɛfata he akɛ, Nyɔŋmɔ “efɔ̃ɔɔ lɛ diɛŋtsɛ ehe odaseyeli, shi moŋ efeɔ ejurɔ ni ehaa nugbɔ jɛɔ ŋwɛi nɛɔ haa nyɛ, kɛ afii ni baa nii pii hu, ekɛ ŋmaa kɛ miishɛɛ woɔ nyɛtsuiiaŋ obɔ.”—Bɔfoi lɛ Asaji 14:17.
3. Mɛni hewɔ wɔbaanyɛ wɔkɛ wɔhe afɔ̃ gbɛtsɔɔmɔi ni Nyɔŋmɔ kɛhaa lɛ anɔ lɛ?
3 Miishɛɛ ni Nyɔŋmɔ yɔɔ yɛ wɔwala shihilɛ he lɛ haa wɔnáa yiŋtoo ni wɔɔdamɔ nɔ wɔná hekɛnɔfɔɔ yɛ egbɛtsɔɔmɔi amli. (Lala 147:8; Mateo 5:45) Ekolɛ mɛi komɛi baafee amɛnii yɛ gbɛ kroko nɔ kɛji amɛkɛ Biblia mli gbɛtsɔɔmɔ ko ni amɛnuuu shishi loo etamɔ nɔ ni yɛ kpɛŋŋ kpe lɛ. Kɛlɛ, nilee yɛ mli akɛ aaaná hekɛnɔfɔɔ yɛ Yehowa gbɛtsɔɔmɔi amli. Ákɛ nɔkwɛmɔnɔ lɛ: kɛji akɛ Israelnyo ko nuuu mla ni teɔ shi eshiɔ gbonyo ni aaata he lɛ po shishi lɛ, mla lɛ nɔ ni eeeye lɛ he baaba sɛɛnamɔ kɛha lɛ. Klɛŋklɛŋ lɛ, toiboo ni eeefee lɛ baaha ebɛŋkɛ Nyɔŋmɔ hiɛkalɔ lɛ kpaakpa; nɔ ni ji enyɔ lɛ, mla lɛ nɔyeli baaye ebua lɛ koni eye ehe kɛjɛ helai ahe.—3 Mose 5:2; 11:24.
4, 5. (a) Dani Kristofoi abe lɛ aaashɛ lɛ, mɛɛ gbɛtsɔɔmɔi Yehowa kɛha yɛ lá he? (b) Te wɔfeɔ tɛŋŋ wɔleɔ akɛ gbɛtsɔɔmɔ ni Nyɔŋmɔ kɛha yɛ lá he lɛ kɔɔ Kristofoi hu ahe?
4 Nakai nɔŋŋ eji yɛ Nyɔŋmɔ gbɛtsɔɔmɔi ni kɔɔ lá he lɛ he. Ekɛɛ Noa akɛ, esaaa akɛ adesai yeɔ lá. Kɛkɛ ni Nyɔŋmɔ fee lɛ faŋŋ yɛ Mla lɛ mli akɛ, afɔleshaa latɛ lɛ nɔ pɛ ekpɛlɛɔ ni akɛ lá atsu nii yɛ—kɛha eshaifaa. Nyɔŋmɔ tsɔ nakai gbɛtsɔɔmɔi lɛ anɔ eto lá ni akɛaatsu nii yɛ gbɛ ni nɔ kwɔ waa nɔ lɛ he gbɛjianɔ—wala yibaamɔ kɛtsɔ Yesu kpɔ̃mɔnɔ lɛ nɔ. (Hebribii 9:14) Hɛɛ, Nyɔŋmɔ gbɛtsɔɔmɔi lɛ yɛ kɛha wɔwala namɔ kɛ wɔhilɛ-kɛhamɔ. Beni Adam Clarke, ni ji afii ohai 19 lɛ mli Biblia mli nilelɔ lɛ wieɔ 1 Mose 9:4 lɛ he lɛ, eŋma akɛ: “Bokagbɛ Kristofoi kã he amɛyeɔ nɛkɛ fãmɔ [ni akɛha Noa] nɛɛ nɔ pɛpɛɛpɛ . . . Yɛ mla lɛ shishi lɛ, ayeee lá ko lá ko, ejaakɛ egbala jwɛŋmɔ kɛtee lá ni abaafɔse ashwie shi kɛha je lɛ nɔ; ni yɛ Kristofoi agbɛjianɔtoo lɛ mli lɛ, esaaa akɛ ayeɔ lá, ejaakɛ esa akɛ abu lɛ be fɛɛ be akɛ eji nɔ ko ni damɔ shi kɛha lá ni afɔse ashwie shi kɛha eshaifaa lɛ.”
5 Ekolɛ nɛkɛ woloŋlelɔ nɛɛ miiwie sanekpakpa lɛ mli shishijee nibii ni kɔɔ Yesu he lɛ ahe. Nɔ ni fata enɛ he ji tsu ni Nyɔŋmɔ tsu e-Bi lɛ kɛba koni ebagbo kɛha wɔ, ní efɔse elá lɛ eshwie shi bɔni afee ni wɔná naanɔ wala. (Mateo 20:28; Yohane 3:16; Romabii 5:8, 9) Woloŋlelɔ lɛ wiemɔi lɛ kɔɔ fãmɔ ni akɛha yɛ sɛɛ mli akɛ Kristo sɛɛnyiɛlɔi lɛ atsi amɛhe kɛjɛ lá he lɛ hu he.
6. Mɛɛ gbɛtsɔɔmɔi ni kɔɔ lá he akɛha Kristofoi, ni mɛni hewɔ?
6 Ole akɛ Nyɔŋmɔ kɛ mlai ohai abɔ ha Israelbii lɛ. Beni Yesu bagbo sɛɛ lɛ, ehe ebahiaaa ni ekaselɔi lɛ aye nakai mlai lɛ fɛɛ anɔ. (Romabii 7:4, 6; Kolosebii 2:13, 14, 17; Hebribii 8:6, 13) Shi kɛlɛ, yɛ be ko sɛɛ lɛ, sanebimɔ ko te shi yɛ gbɛnaa nii ko ni he hiaa waa he—hii aketiafoo. Ani esa akɛ afolɔ mɛi ni jeee Yudafoi ni miisumɔ ni amɛná Kristo lá lɛ he sɛɛ lɛ aketia, ni amɛkɛtsɔɔ akɛ amɛyɛ Mla lɛ shishi lolo? Yɛ afi 49 Ŋ.B. lɛ, Kristofoi anɔyeli kuu lɛ tsu nakai sane lɛ he nii. (Bɔfoi lɛ Asaji, yitso 15) Kɛtsɔ Nyɔŋmɔ mumɔ lɛ yelikɛbuamɔ nɔ lɛ, bɔfoi lɛ kɛ onukpai lɛ mu sane naa akɛ ketiafoo he gbɛnaanii ni kã mɔ nɔ lɛ ba naagbee beni akɛ Mla lɛ ba naagbee lɛ. Shi kɛlɛ, Nyɔŋmɔ taomɔ nii komɛi yɛ lolo ni esa akɛ Kristofoi atsu he nii. Yɛ wolo ko ni nɔyeli kuu lɛ ŋma kɛyaha asafoi lɛ mli lɛ, amɛŋma akɛ: “Esa Mumɔ krɔŋkrɔŋ lɛ hiɛ ni esa wɔ hu wɔhiɛ akɛ, wɔkɛ jatsu ko akafɔ̃ nyɛnɔ dɔŋŋ, akɛ ja nii ni he hiaa nɛɛ nɔŋŋ: akɛ nyɛhi looi ni agbe aha wɔji kɛ lá kɛ kooloi ni ashɔ̃tɔ kɛ ajwamaŋbɔɔ; kɛji nyɛhi enɛɛmɛi lɛ, nyɛfee jogbaŋŋ. Nyɛhia shi jogbaŋŋ!”—Bɔfoi lɛ Asaji 15:28, 29.
7. Te lá ni Kristofoi ‘aaatsi amɛhe kɛjɛ he’ lɛ he hiaa ha tɛŋŋ?
7 Eyɛ faŋŋ akɛ, nɔyeli kuu lɛ bu ‘he ni aaatsi kɛjɛ lá he’ lɛ akɛ eji jeŋba mli nifeemɔ ko ni he hiaa taakɛ bɔ ni he ni aaatsi kɛjɛ bɔlɛnamɔ mli jeŋba shara kɛ wɔŋjamɔ he lɛ ji lɛ nɔŋŋ. Enɛ maa nɔ mi akɛ lá ni agu eyeli lɛ ji hiɛdɔɔ sane. Kristofoi ni kɛ amɛhe woɔ wɔŋjamɔ loo bɔlɛnamɔ mli jeŋba shara mli ni amɛshwaaa amɛhe lɛ “anine shɛŋ Nyɔŋmɔ maŋtsɛyeli” lɛ nɔ; “amɛaaná amɛ gbɛnaa yɛ . . . gbele ni ji enyɔ lɛ” mli. (1 Korintobii 6:9, 10; Kpojiemɔ 21:8; 22:15) Kadimɔ srɔtofeemɔ ni yɔɔ enɛ mli lɛ: Hiɛ ni akuɔ ashwieɔ Nyɔŋmɔ gbɛtsɔɔmɔ ni kɔɔ krɔŋkrɔŋ ni lá ji lɛ he lɛ nɔ lɛ baanyɛ ekɛ naanɔ gbele aba. Bulɛ kpo ni ajieɔ yɛ Yesu afɔleshaa lɛ he lɛ baanyɛ ekɛ naanɔ wala aba.
8. Mɛni tsɔɔ akɛ mra be mli Kristofoi lɛ kɛ hiɛdɔɔ susu Nyɔŋmɔ gbɛtsɔɔmɔi ni kɔɔ lá he lɛ he?
8 Te mra be mli Kristofoi lɛ nu Nyɔŋmɔ gbɛtsɔɔmɔi yɛ lá he lɛ shishi amɛha tɛŋŋ, ni te amɛfee amɛnii yɛ he amɛha tɛŋŋ? Kaimɔ wiemɔi ni Clarke wie lɛ, akɛ: “Yɛ Kristofoi agbɛjianɔtoo lɛ mli lɛ, esaaa akɛ ayeɔ lá, ejaakɛ esa akɛ abu lɛ be fɛɛ be akɛ eji nɔ ko ni damɔ shi kɛha lá ni afɔse ashwie shi kɛha eshaifaa.” Yinɔsane maa nɔ mi akɛ mra be mli Kristofoi lɛ kɛ hiɛdɔɔ tsu sane lɛ he nii. Tertullian ŋma akɛ: “Susumɔ mɛi ni kɛ amimyeli gbalaa awuiyelɔi ni yitseiaŋ wala lɛ alá yɛ shwɛmɔhei lɛ . . . kɛyaa koni amɛkɛyatsa gbiligbili helai ni yeɔ amɛ lɛ ahe okwɛ.” Yɛ be mli ni wɔŋjalɔi yeɔ lá lɛ, Tertullian kɛɛ akɛ, Kristofoi “kɛ kooloi alá po fataaa [amɛ]niyenii ahe . . . Kɛji nyɛmiikojo Kristofoi lɛ, nyɛhaa amɛ loo ni lá sɔŋŋ akɛfee. Yɛ anɔkwale mli lɛ nyɛle akɛ [eji] nɔ ko ni mla eŋmɛɛɛ amɛ gbɛ akɛ amɛye.” Hɛɛ, yɛ gbele ni akɛwo Kristofoi lɛ ahe gbeyei lɛ fɛɛ sɛɛ lɛ, amɛyeee lá kɔkɔɔkɔ. Gbɛtsɔɔmɔi ni Nyɔŋmɔ kɛha lɛ bafee nɔ ni he hiaa amɛ waa.
9. Yɛ lá ni esaaa akɛ ayeɔ tɛ̃ɛ lɛ sɛɛ lɛ, mɛni fata lá ni aaatsi he kɛjɛ he lɛ he?
9 Ekolɛ mɛi komɛi baasusu akɛ nɔ ni nɔyeli kuu lɛ tsɔɔ kɛkɛ ji akɛ, esaaa akɛ Kristofoi lɛ yeɔ lá loo amɛnuɔ lá tɛ̃ɛ, loo ni amɛaaye lòo kɛ elá loo niyenii ni lá futu mli. Eji anɔkwale akɛ, nakai ji nɔ ni klɛŋklɛŋ fãmɔ ni Nyɔŋmɔ kɛha Noa lɛ tsɔɔ. Ni yɛ anɔkwale mli lɛ, akpɔ ni bɔfoi lɛ wo lɛ hu biɔ ni Kristofoi atsi amɛhe kɛjɛ ‘nibii ni ashɔ̃tɔ,’ ni ji kooloi ni afɔseee amɛlá ashwieee shi lɛ he. (1 Mose 9:3, 4; Bɔfoi lɛ Asaji 21:25) Kɛlɛ, mra be mli Kristofoi lɛ le akɛ ekɔɔ nibii babaoo he. Bei komɛi lɛ ayeɔ lá yɛ tsofafeemɔ yiŋtoi ahewɔ. Tertullian yɔse akɛ wɔŋjalɔi komɛi yeɔ lá ŋmɔŋ koni amɛkɛtsá gbiligbili. Ni ekolɛ akɛ lá tsu nii yɛ gbɛ̀i srɔtoi anɔ koni akɛtsá helai, loo taakɛ amɛsusu lɛ, koni amɛkɛha amɛgbɔmɔtsoŋ hewalɛnamɔ aya hiɛ. Enɛ hewɔ lɛ, yɛ Kristofoi agbɛfaŋ lɛ, lá ni amɛhaŋ agbala awo amɛ mli yɛ “tsofafeemɔ” yiŋtoi ahewɔ lɛ fata kpoomɔ ni aaakpoo lá lɛ he. Amɛyaa nɔ amɛhiɛɔ nakai shidaamɔ lɛ mli ni ekɔɔɔ he eko kɛji no kɛ amɛwala baawo oshara mli tete po.
Lá ni Akɛtsuɔ Nii akɛ Tsofa
10. Mɛɛ gbɛ̀i komɛi anɔ akɛ lá tsuɔ nii yɛ tsofafeemɔ mli yɛ, ni mɛɛ sanebimɔ enɛ teeɔ lɛ shi?
10 Akɛ lá fɔɔ nitsumɔ yɛ tsofafeemɔi amli ŋmɛnɛ. Lá ŋmɔŋ ni agbalaa awoɔ mɔ mli ni akɛtsu nii yɛ mra be mli lɛ ji lá diɛŋtsɛ—ni ajieɔ kɛjɛɔ mɛi ni kɛ amɛhe haa lɛ amli, akɛtoɔ, ni akɛhaa helatsɛmɛi, ekolɛ mɛi ni apila amɛ yɛ tawuu mli lɛ. Yɛ be ko sɛɛ lɛ, niiamlitaolɔi kase bɔ ni ajaraa lá mli awoɔ fãi srɔtoi amli. Kɛtsɔ nibii titri ni ajieɔ kɛjɛɔ lá mli ni agbalaa awoɔ mɔ mli lɛ nɔ lɛ, tsofafeelɔi nyɛɔ amɛjaraa lá ni mɔ ko ebajie lɛ mli amɛhaa helatsɛmɛi babaoo, ekolɛ amɛkɛ plasma haa mɔ ko ni epila ni amɛkɛ walayibii tsuji haa mɔ kroko. Niiamlipɛimɔi ni atee nɔ afee lɛ etsɔɔ akɛ, abaanyɛ atsu lá fãi titri lɛ ateŋ ekome, tamɔ plasma lɛ he nii, ní aná nibii srɔtoi babaoo kɛjɛ mli, ni abaanyɛ akɛha helatsɛmɛi babaoo lolo. Nɛkɛ nifeemɔ gbɛ nɛɛ miiya nɔ lolo, ni aabɔ nibii srɔtoi babaoo ni anáa kɛjɛɔ lá fãi titri lɛ amli ni akɛmiitsu nii yɛ gbɛ̀i heei anɔ lɛ he amaniɛ. Te esa akɛ Kristofonyo afee enii yɛ enɛ he eha tɛŋŋ? Etswa efai shi waa akɛ bɔ fɛɛ bɔ ni fee lɛ eheŋ lá kɔkɔɔkɔ, shi etsofafeelɔ lɛ wo lɛ hewalɛ koni ekpɛlɛ lá fãi titri lɛ ateŋ eko nɔ, ekolɛ wala yibii tsuji ni akɛwo rɔba kotoku mli lɛ nɛkɛ. Loo ekolɛ nibii srɔtoi babaoo ni anáa kɛjɛɔ lá fãi titri lɛ ateŋ eko mli lɛ bibioo ko futu tsofa ni abaaha lɛ lɛ mli. Te esa akɛ Nyɔŋmɔ sɔɔlɔ afee enii yɛ sanebimɔi ni tamɔ nɛkɛ lɛ ahe eha tɛŋŋ, be mli ni eyɔɔ ejwɛŋmɔ mli akɛ lá yɛ krɔŋkrɔŋ, ni ákɛ Kristo lá lɛ báa wala yi yɛ gbɛ ni da fe fɛɛ nɔ lɛ?
11. Mɛɛ tsofafeemɔ he shidaamɔ ni ja jogbaŋŋ ni kɔɔ lá he Odasefoi kɛ afii babaoo ehiɛ mli?
11 Yɛ afii nyɔŋmɔi abɔ ni eho lɛ amli lɛ, Yehowa Odasefoi ha amɛshidaamɔ yɛ lá he lɛ fee faŋŋ. Ákɛ nɔkwɛmɔnɔ lɛ, amɛŋma sane ko ni akala awo The Journal of the American Medical Association (November 27, 1981; asaa akala awo wolo ni ji How Can Blood Save Your Life?, baafa 27-29 lɛ mli) lɛ mli. * Atsɛ́ ŋmalɛi ayisɛɛ kɛjɛ Mose Klɛŋklɛŋ Wolo lɛ, Mose Wolo ni Ji Enyɔ lɛ, kɛ Bɔfoi lɛ Asaji lɛ amli yɛ nakai sane lɛ mli. Ekɛɛ akɛ: “Eyɛ mli akɛ akɛ tsofafeemɔ mli wiemɔi tsuuu nii yɛ kukuji nɛɛ amli moŋ, shi Odasefoi buɔ ŋmalɛi nɛɛ akɛ eteɔ shi eshiɔ lá diɛŋtsɛ, wala yibii tsuji loo RBCs [red blood cells] ni akɛwo rɔba kotoku mli, kɛ plasma, kɛ agbɛnɛ hu wala yibii yɛji loo WBC [white blood cell] kɛ platelet ni agbalaa awoɔ mɔ mli lɛ.” Atsɔɔ mli yɛ saneyitso ni ji “Nibii ni Feɔ Lá” ni je kpo yɛ afi 2001 Emergency Care nikasemɔ wolo lɛ mli akɛ: “Nibii titri srɔtoi ji nɔ ni feɔ lá: plasma, wala yibii tsuji, wala yibii yɛji, kɛ platelets.” No hewɔ lɛ, yɛ anɔkwa saji ni kɔɔ tsofafeemɔ he lɛ kɛ gbeekpamɔ naa lɛ, Odasefoi ekpɛlɛɛɛ lá diɛŋtsɛ loo efãi titri ejwɛ ni agbalaa awoɔ mɔ mli lɛ ateŋ eko kwraa nɔ.
12. (a) Mɛɛ shidaamɔ ni akɔ yɛ nibii srɔtoi ni anáa kɛjɛɔ lá fãi ejwɛ titri lɛ amli akɛha? (b) Nɛgbɛ abaanyɛ aná enɛ he saji krokomɛi yɛ?
12 Sane ni kɔɔ tsofafeemɔ he lɛ tsa nɔ akɛ: “Shishinumɔ ni Odasefoi yɔɔ yɛ Nyɔŋmɔ jamɔ he lɛ eteee shi ewooo [nibii srɔtoi ni anáa kɛjɛɔ lá fãi titri lɛ amli] tamɔ albumin, immune globulins, kɛ hemophiliac preparations kɛ nitsumɔ; esa akɛ Odasefonyo fɛɛ Odasefonyo diɛŋtsɛ akpɛ eyiŋ yɛ enɛɛmɛi ahe kɛji ebaakpɛlɛ nɔ loo ekpɛlɛŋ nɔ.” Kɛjɛ afi 1981 kɛbaa nɛɛ, akɛ nibii srɔtoi ni anáa kɛjɛɔ lá fãi titri lɛ amli (nibii srɔtoi ni anáa kɛjɛɔ lá fãi ejwɛ titri lɛ amli) lɛ babaoo etsu nii yɛ tsofafeemɔ mli. Enɛ hewɔ lɛ, Buu-Mɔɔ ni je kpo yɛ June 15, 2000 lɛ kɛ saji ni yeɔ ebuaa ni kɔɔ sane nɛɛ he lɛ ha yɛ “Sanebimɔi ni Jɛ Kanelɔi Adɛŋ” ni je kpo yɛ mli lɛ mli. Bɔni afee ni mɛi akpekpei abɔ ni amrɔ nɛɛ amɛkaneɔ wolo tɛtrɛɛ nɛɛ aná he sɛɛ lɛ, asaa akala hetoo lɛ yɛ wolo tɛtrɛɛ nɛɛ baafa 29-31 lɛ mli. Ekɛ saji amlitsɔɔmɔ ni mli kã shi faŋŋ kɛ saji ahesusumɔ haa, ni kɛlɛ, obaana akɛ ekɛ saji otii ni asusu he yɛ afi 1981 lɛ kpãa gbee.
Gbɛfaŋnɔ ni Ohenilee Tsuɔ
13, 14. (a) Mɛni ji henilee, ni ekɔɔ lá he saji ahe yɛ mɛɛ gbɛ nɔ? (b) Mɛɛ gbɛtsɔɔmɔi ni kɔɔ lòo yeli he Nyɔŋmɔ kɛha Israel, shi mɛɛ sanebimɔi ekolɛ etee lɛ shi?
13 Saji ni tamɔ nɛkɛ lɛ biɔ ni akɛ henilee atsu nii. Mɛni hewɔ? Kristofoi kpɛlɛɔ nɔ akɛ ehe miihia ni amɛfee toiboo amɛha Nyɔŋmɔ gbɛtsɔɔmɔi, shi yɛ shihilɛi komɛi amli lɛ, ebiɔ ni mɔ kɛ ehenilee atsu nii ni ekɛkpɛ eyiŋ. Henilee ji mligbɛ nyɛmɔ ko ni akɛŋmɛɔ saji akwɛɔ ni akpɛɔ yiŋ yɛ he, titri lɛ saji ni kɔɔ jeŋba he. (Romabii 2:14, 15) Shi kɛlɛ, ole akɛ esoro mɔ fɛɛ mɔ henilee. * Biblia lɛ tsɔɔ akɛ mɛi komɛi ‘ahenileei mli waaa,’ ni tsɔɔ akɛ mɛi krokomɛi yɛ henilee ni mli wa. (1 Korintobii 8:12) Esoro hiɛyaa ni Kristofoi srɔtoi fɛɛ ená yɛ Nyɔŋmɔ suɔmɔnaa nii ahe nikasemɔ mli, yɛ esusumɔi lɛ ahesusumɔ mli, kɛ yɛ bɔ ni amɛkɛtsuɔ nii amɛhaa yɛ amɛyiŋkpɛi amli lɛ he. Wɔbaanyɛ wɔkɛ sane ni kɔɔ Yudafoi lɛ kɛ lòo ni amɛyeɔ lɛ afee enɛ he nɔkwɛmɔnɔ.
14 Biblia lɛ feɔ lɛ faŋŋ akɛ mɔ ni feɔ toiboo ehaa Nyɔŋmɔ lɛ yeŋ kooloo ko ni afɔseee elá lɛ ashwieee shi. Nakai gbɛtsɔɔmɔ lɛ he hiaa aahu akɛ yɛ hiamɔ shihilɛ ko po mli beni Israel asraafoi lɛ yaye loo ni amɛfɔseee elá lɛ amɛshwieee shi lɛ, ebafee tɔ̃mɔ ni hiɛdɔɔ yɔɔ he loo esha yɛ amɛgbɛfaŋ. (5 Mose 12:15, 16; 1 Samuel 14:31-35) Kɛlɛ, ekolɛ sanebimɔi komɛi tetee shi. Kɛ́ Israelnyo ko gbe too lɛ, mɛɛ gbɛ nɔ esa akɛ ekɛ oyaiyeli afɔse elá lɛ eshwie shi? Ani esa akɛ efo kooloo lɛ sɛ̃ koni lá lɛ aho? Ani ehe baahia ni akɛ esɛɛgbɛ naji lɛ atsotsoro shi kɛma eyitso shi koni lá lɛ atsere ashwie shi? Be enyiɛ esa akɛ etsotsoro shi? Te ebaatsu tsina agbo he nii eha tɛŋŋ? Beni ekɛ kooloo lɛ etsotsoro shi ni lá lɛ eho sɛɛ po lɛ, ekolɛ eko baashwɛ yɛ lòo lɛ mli lolo. Ani ebaanyɛ eye lòo ni tamɔ nɛkɛ? Namɔ baakpɛ yiŋ yɛ enɛ he?
15. Te Yudafoi komɛi fee amɛnii yɛ looi ayeli he amɛha tɛŋŋ, shi mɛɛ gbɛtsɔɔmɔ Nyɔŋmɔ kɛha?
15 Feemɔ Yudanyo ko ni yɔɔ ekãa yɛ Nyɔŋmɔ jamɔ mli ni kɛ sanebimɔi ni tamɔ nɛkɛ miikpe lɛ he mfoniri okwɛ. Ekolɛ ebaasusu akɛ gbɛ ni hi fe fɛɛ ni ebaanyɛ ekɔ ji ni etsi ehe kɛjɛ lòo ni ahɔ̃ɔ yɛ lòo jaji anɔ, taakɛ bɔ ni mɔ kroko hu baakpoo akɛ eeeye lòo ko kɛ susumɔ akɛ agbe aha wɔji lɛ. Ekolɛ Yudafoi krokomɛi yeɔ lòo yɛ be mli ni amɛgbe kusum nifeemɔi komɛi ni atsɔɔ nɔ akɛfɔseɔ lá lɛ ashwieɔ shi lɛ naa. * (Mateo 23:23, 24) Te osusuɔ bɔ ni mɛi baafee amɛnii yɛ gbɛ̀i srɔtoi anɔ nɛɛ he ohaa tɛŋŋ? Kɛfata he lɛ, akɛni Nyɔŋmɔ biii nifeemɔi tamɔ nɔ ni atsɔɔ mli kɛtsɔ hiɛ lɛ kɛjɛɛɛ Yudafoi lɛ adɛŋ hewɔ lɛ, ani ebaafee nɔ ni sa jogbaŋŋ akɛ amɛkɛ sanebimɔi babaoo aaaya rabifoi lɛ aŋɔɔ bɔni afee ni amɛkpɛ yiŋ amɛha amɛ yɛ eko fɛɛ eko he? Eyɛ mli akɛ nifeemɔi ni tamɔ nɛkɛ tee nɔ yɛ Yudafoi ajamɔ lɛ mli moŋ, shi eji miishɛɛ sane akɛ wɔɔle akɛ Yehowa kɛ gbɛtsɔɔmɔ haaa anɔkwa jalɔi koni amɛtsɔ gbɛ̀i ni tamɔ nakai anɔ amɛkɛtao lá he saji anaa. Nyɔŋmɔ kɛ gbɛtsɔɔmɔi ni he hiaa titri yɛ kooloi ni he tse ni aaagbe kɛ amɛlá ni aaafɔse ashwie shi lɛ ha, shi ekɛ mlitsɔɔmɔ kroko fataaa he.—Yohane 8:32.
16. Mɛni hewɔ ekolɛ Kristofoi baaná susumɔi srɔtoi yɛ nibii ni anáa kɛjɛɔ lá fãi titri lɛ amli lɛ mli bibioo ko ni amɛaaha akɛgbu amɛ lɛ he lɛ?
16 Taakɛ atsĩ tã yɛ kuku 11 kɛ 12 lɛ mli lɛ, Yehowa Odasefoi ekpɛlɛɛɛ lá diɛŋtsɛ ni agbalaa awoɔ mɔ mli loo efãi titri ejwɛ—ni ji plasma, wala yibii tsuji, wala yibii yɛji, kɛ platelets ni agbalaa awoɔ mɔ mli lɛ anɔ. Ni nibii srɔtoi ni anáa kɛjɛɔ lá fãi titri lɛ amli, tamɔ serum srɔtoi ni wala yibii yɔɔ mli ni akɛwuɔ ashiɔ helai loo akɛjɔɔ onufu ebɔɔ naa lɛ hu? (Kwɛmɔ baafa 30, kuku 4 lɛ mli.) Mɛi komɛi emu sane naa akɛ, nibii srɔtoi ni anáa kɛjɛɔ lá fãi titri lɛ amli ni tamɔ nɛkɛ lɛ jeee lá diɛŋtsɛ, ni no hewɔ lɛ, fãmɔ akɛ ‘atsi he kɛjɛ lá he’ lɛ kɔɔɔ enɛɛmɛi ahe. (Bɔfoi lɛ Asaji 15:29; 21:25; baafa 31, kuku 1) Eji sɔ̃ ni kã amɛ diɛŋtsɛ amɛnɔ. Mɛi krokomɛi ahenilee haa amɛkpooɔ nɔ fɛɛ nɔ ni ajie kɛjɛ lá mli (kooloo nɔ̃ loo gbɔmɔ nɔ̃), ní nibii srɔtoi ni anáa kɛjɛɔ lá fãi titri lɛ ateŋ eko mli, kɛ́ eji nɔ ko nyɛkɛsiɔɔ po lɛ fata he. * Kɛlɛ, mɛi krokomɛi yɛ ni ekolɛ amɛbaakpɛlɛ ni akɛ plasma protein agbu amɛ ni amɛkɛwuu amɛshi hela ko ni amɛyeɔ loo ni amɛkɛjɔɔ onufu ko ebɔɔ naa, shi ekolɛ, amɛkpɛlɛŋ nibii krokomɛi ni anáa kɛjɛɔ lá fãi titri lɛ amli lɛ nɔ. Kɛfata he lɛ, nibii komɛi ni anáa kɛjɛɔ lá fãi titrii ejwɛ lɛ ateŋ eko mli lɛ baanyɛ atsu wala yibaamɔ he nii yɛ gbɔmɔtso lɛ mli tamɔ bɔ ni lá fã titri ni ajie kɛjɛ mli lɛ feɔ lɛ nɔŋŋ, ni ekolɛ Kristofoi babaoo ekpɛlɛŋ enɛ nɔ.
17. (a) Wɔhenilee baanyɛ aye abua wɔ kɛ́ wɔkɛ sanebimɔi ni kɔɔ nibii srɔtoi ni anáa kɛjɛɔ lá fãi titri lɛ amli lɛ ahe lɛ miikpe yɛ mɛɛ gbɛ nɔ? (b) Mɛni hewɔ yiŋ ni akpɛɔ yɛ sane nɛɛ he lɛ ji hiɛdɔɔ sane lɛ?
17 Nɔ ni Biblia lɛ kɛɔ yɛ henilee he lɛ yeɔ ebuaa wɔ kɛ́ wɔkpɛ yiŋ ni tamɔ nɛkɛ. Klɛŋklɛŋ lɛ esa akɛ okase nɔ ni Nyɔŋmɔ Wiemɔ lɛ kɛɔ yɛ sane lɛ he ni obɔ mɔdɛŋ ni oha ekudɔ ohenilee. No baaye ebua bo ni okpɛ oyiŋ yɛ gbɛ ni kɛ Nyɔŋmɔ gbɛtsɔɔmɔi kpãa gbee nɔ moŋ fe nɔ ni oooha mɔ kroko akpɛ yiŋ aha bo. (Lala 25:4, 5) Susumɔ ni mɛi komɛi hiɛ yɛ nibii srɔtoi ni anáa kɛjɛɔ lá fãi titri lɛ amli ni agbalaa awoɔ mɔ mli lɛ he ji akɛ, ‘Eji henilee sane, ni no hewɔ lɛ ehe ehiaaa.’ Eji susumɔ ni ejaaa. Anɔkwale ni eji akɛ ajɛɔ henilee mli akpɛɔ yiŋ yɛ saji komɛi ahe lɛ etsɔɔɔ akɛ amɛhe ehiaaa. Ebaanyɛ efee nɔ ni hiɛdɔɔ yɔɔ he waa diɛŋtsɛ. Yiŋtoo kome ji akɛ, ebaanyɛ esa aŋkroaŋkroi ni esoro amɛhenilee yɛ wɔnɔ lɛ he lɛ ahe. Wɔnaa enɛ yɛ Paulo ŋaawoo ni ekɛha yɛ kooloo ni ekolɛ agbe aha wɔŋ ko ni yɛ sɛɛ mli lɛ ayahɔ̃ɔ lòo lɛ yɛ jara nɔ lɛ mli. Esa akɛ Kristofonyo hiɛ ahi ehe nɔ koni ‘ekaye henilee ni mli waaa lɛ awui.’ Kɛji etɔtɔ mɛi krokomɛi anaji lɛ, no lɛ ebaanyɛ ‘eha enyɛmi ni Kristo bagbo yɛ lɛ hu ehewɔ lɛ hiɛ akpata,’ ni ebaatɔ̃ Kristo nɔ. No hewɔ lɛ, yɛ be mli ni esa akɛ mɔ diɛŋtsɛ akpɛ eyiŋ yɛ saji ni kɔɔ nibii srɔtoi ni anáa kɛjɛɔ lá fãi titri lɛ amli lɛ ahe lɛ, esa akɛ akɛ hiɛdɔɔ diɛŋtsɛ asusu yiŋkpɛi ni tamɔ nɛkɛ lɛ ahe.—1 Korintobii 8:8, 11-13; 10:25-31.
18. Mɛɛ gbɛ nɔ Kristofonyo aaatsɔ ekwa ehenilee ni eeegbe lɛ yɛ yiŋ ni ekpɛɔ yɛ lá he lɛ mli?
18 Oti kroko yɛ ni maa hiɛdɔɔ ni yɔɔ yiŋ ni akpɛɔ yɛ lá he lɛ nɔ mi. Enɛ ji hewalɛ ni yiŋkpɛi ni tamɔ nɛkɛ lɛ baanyɛ aná yɛ onɔ. Kɛji akɛ nibii srɔtoi ni anáa kɛjɛɔ lá fãi titri lɛ amli bibioo ko ni oooha agbala awo omli lɛ baagba ohenilee ni Biblia lɛ etsɔse lɛ lɛ naa lɛ, no lɛ esaaa akɛ okuɔ ohiɛ oshwieɔ nɔ. Ni esaaa akɛ okuɔ ohiɛ oshwieɔ nɔ ni ohenilee kɛɔ bo lɛ nɔ akɛni mɔ ko kɛɛ bo kɛkɛ akɛ, “Tɔmɔ ko bɛ he akɛ ooohe; mɛi pii ehe” lɛ hewɔ. Kaimɔ akɛ, mɛi akpekpei abɔ ni yɔɔ ŋmɛnɛ lɛ kuɔ amɛhiɛ amɛshwieɔ amɛhenilee nɔ, ni amɛhenilee bafeɔ nɔ ni egbo, ni ehaa amɛmaleɔ loo amɛfeɔ nibii fɔji krokomɛi ni amɛshwaaa amɛhe yɛ gbɛ ko nɔ. Eka shi faŋŋ akɛ Kristofoi sumɔŋ ni amɛkɔ gbɛ ni tamɔ nɛkɛ.—2 Samuel 24:10; 1 Timoteo 4:1, 2.
19. Mɛɛ nɔ titri esa akɛ wɔha ehi wɔjwɛŋmɔ mli yɛ be mli ni wɔkpɛɔ wɔyiŋ yɛ tsofafeemɔ he saji ni kɔɔ lá he lɛ ahe?
19 Beni hetoo ni asaa akala ni yɔɔ baafa 29-31 lɛ baa naagbee lɛ, ekɛɛ akɛ: ‘Ani anɔkwale ni eji akɛ abaanyɛ ahiɛ susumɔi srɔtoi kɛ yiŋ ni ajɛɔ henilee mli akpɛɔ srɔtoi yɛ sane ko he lɛ haa ebafeɔ nɔ ni he ehiaaa? Dabi. Eji hiɛdɔɔ sane.’ Nakai eji diɛŋtsɛ ejaakɛ ekɔɔ wekukpaa ni kã okɛ “Nyɔŋmɔ hiɛkalɔ” lɛ teŋ lɛ he. Nakai wekukpaa lɛ pɛ ji nɔ ni baanyɛ ekɛ naanɔ wala aba kɛtsɔ hewalɛ ni yɔɔ Yesu lá ni efɔse eshwie shi lɛ mli ni hereɔ mɔ yiwala lɛ nɔ. Okɛ bulɛ ni mli kwɔ aha lá yɛ nɔ ni Nyɔŋmɔ tsɔɔ nɔ ekɛtsuɔ lɛ hewɔ—kɛha wala yibaamɔ. Paulo ŋma yɛ gbɛ ni ja nɔ akɛ: “Nyɛbɛ hiɛnɔkamɔ ko, ni nyɛbɛ Nyɔŋmɔ tete yɛ je nɛŋ. Shi agbɛnɛ, Kristo Yesu mli lɛ, nyɛ ni sá ni nyɛyɔɔ shɔŋŋ lɛ, nyɛtsɔ Kristo lá lɛ nɔ nyɛbɛŋkɛ.”—Efesobii 2:12, 13, wɔma efã ko nɔ mi.
[Shishigbɛ niŋmai]
^ kk. 11 Yehowa Odasefoi ji mɛi ni fee.
^ kk. 13 Be ko lɛ, Paulo kɛ Kristofoi krokomɛi ejwɛ tee sɔlemɔwe lɛ koni amɛyatsuu amɛhe yɛ kusum naa. Yɛ nakai be lɛ mli lɛ, Mla lɛ tsuuu nii dɔŋŋ, shi kɛlɛ, Paulo fee enii yɛ onukpai ni yɔɔ Yerusalem lɛ aŋaawoo naa. (Bɔfoi lɛ Asaji 21:23-25) Shi kɛlɛ, ekolɛ Kristofoi komɛi nu he akɛ amɛyaŋ sɔlemɔtsu lɛ mli loo ni amɛkɛ amɛhe aaawo nifeemɔ ni tamɔ nɛkɛ mli. Esoro mɛi ni hi shi yɛ nakai be lɛ mli lɛ ateŋ mɔ fɛɛ mɔ henilee, ni nakai nɔŋŋ eji ŋmɛnɛ.
^ kk. 15 Encyclopaedia Judaica lɛ wieɔ mlai ni yɔɔ “ŋwanyaŋŋ kɛ nɔ ni mli ka shi faŋŋ” ni kɔɔ loo ni “Yudafoi kpɛlɛɔ eyeli nɔ” lɛ ahe. Etsɔɔ minitii abɔ ni esa akɛ lòo aye yɛ nu mli, bɔ ni esa akɛ aka yɛ tso tɛtrɛɛ nɔ aha, ŋoo daramɔ ni esa akɛ akɛshwã nɔ, kɛ agbɛnɛ shii abɔ ni esa akɛ afɔ he yɛ nu ŋanii mli.
^ kk. 16 Nɔ titri ni yɔɔ tsofai komɛi ni akɛfɔɔ mɛi gbuu lɛ ekomɛi amli ji wala yibii srɔtoi ni akɛfutu ni jeee lá mli ajie kɛjɛ. Shi yɛ shihilɛi komɛi amli lɛ, ekolɛ akɛ nibii ni anáa kɛjɛɔ lá fãi titri lɛ ateŋ eko mli, tamɔ albumin fioo futuɔ.—“Kwɛmɔ Sanebimɔi ni Jɛ Kanelɔi Adɛŋ” ni je kpo yɛ October 1, afi 1994 Buu-Mɔɔ lɛ mli lɛ mli.
Ani Okaiɔ?
• Mɛɛ gbɛtsɔɔmɔi ni kɔɔ lá he Nyɔŋmɔ kɛha Noa, Israelbii lɛ, kɛ Kristofoi?
• Mɛni Yehowa Odasefoi kpooɔ kwraa yɛ lá he?
• Nibii srɔtoi ni anáa kɛjɛɔ lá fãi titri lɛ ateŋ eko mli ni mɔ aaaha agbala awo emli lɛ kɔɔ mɔ diɛŋtsɛ henilee he yɛ mɛɛ gbɛ nɔ, shi mɛni no etsɔɔɔ?
• Mɛni hewɔ esa akɛ wɔha wekukpaa ni kã wɔ kɛ Nyɔŋmɔ teŋ lɛ afee nɔ titri ni kã wɔjwɛŋmɔ nɔ yɛ wɔyiŋkpɛi amli lɛ?
[Nikasemɔ lɛ he Sanebimɔi]
[Akrabatsa ni yɔɔ baafa 22]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
WƆSHIDAAMƆ TITRI YƐ LÁ HE
LÁ MUU
▾ ▾ ▾ ▾
ESAAA Wala Wala Platelets Plasma
yibii yibii
tsuji yɛji
KRISTOFONYO ▾ ▾ ▾ ▾
LƐ DIƐŊTSƐ Nibii srɔtoi Nibii srɔtoi Nibii srɔtoi Nibii srɔtoi
BAAKPƐ EYIŊ ni anáa kɛjɛɔ ni anáa kɛjɛɔ ni anáa kɛjɛɔ ni anáa kɛjɛɔ
wala yibii wala yibii platelets plasma mli
tsuji amli yɛji amli amli
[Mfoniri ni yɔɔ baafa 20]
Nɔyeli kuu lɛ mu sane naa akɛ esa akɛ Kristofoi ‘atsi amɛhe kɛjɛ lá he’
[Mfoniri ni yɔɔ baafa 23]
Kaaku ohiɛ oshwie ohenilee nɔ kɛji akɛ ookpɛ oyiŋ yɛ nibii srɔtoi ni anáa kɛjɛɔ lá fãi titri lɛ ateŋ eko mli lɛ he