Wala Shihilɛ He Sane

Tsɔsemɔ Ko Ni Miná He Sɛɛ Miwala Gbii Abɔ Fɛɛ

TAAKƐ HAROLD GLUYAS GBA

Mikɛ nɔ ni fe afii 70 etee nɔ ekai nɔ ko ni mina yɛ migbekɛbiiashi. No mli lɛ mita Awo kpata lɛ shishi miikwɛ wolo ko ni kpɛtɛ nɔ ko he ni aŋma yɛ nɔ akɛ “Ceylon Tea,” lɛ. Yei ni miitse tii baai yɛ Ceylon (amrɔ nɛɛ Sri Lanka) ŋmɔji ni efee foloŋŋ amli lɛ mfoniri hu yɛ nɔ. Eyɛ mli akɛ jɛmɛ kɛ wɔshĩa ni yɔɔ Australia Wuoyigbɛ ni jwɛi fioo pɛ yɔɔ jɛmɛ lɛ jɛkɛ moŋ, shi eha mibɔi bɔ ni jɛmɛ baatamɔ aha lɛ he susumɔ. Mɛɛ maŋ ni yɔɔ fɛo ni yɔɔ miishɛɛ po Ceylon baaji nɛkɛ! No mli lɛ mileee kwraa akɛ mikɛ mishihilɛ mli afii 45 baahi nakai ŋshɔkpɔ ni nɔ yɔɔ fɛo lɛ nɔ akɛ maŋsɛɛ sanekpakpa shiɛlɔ.

AFƆ mi yɛ April afi 1922, ni jeŋ ni afɔ mi awo lɛ yɛ srɔto yɛ jeŋ ni yɔɔ ŋmɛnɛŋmɛnɛ lɛ he. Miweku lɛ tsuɔ nii yɛ ŋmãa ŋmɔ ko ni yɔɔ Kimba maŋ bibioo ni etse ehe banee ni yɔɔ Australia shikpɔŋ wulu lɛ teŋgbɛ lɛ mli, ni eyɛ Australia shia ŋa agbo lɛ wuoyigbɛ. Naagbai eyi shihilɛ ni yɔɔ jɛmɛ lɛ mli obɔ, ni ekomɛi ji nuhɔmɔ, filikilɔi ahe naagba, kɛ hulu gbaŋgbaŋ ni haa latsaa tsaa mɔ. Mimami tsuɔ nii waa koni ekɛkwɛ Ataa kɛ wɔ gbekɛbii ekpaa lɛ yɛ ziŋele tsu ko mli.

Shi kɛha mi lɛ, Australia maŋ lɛ ji he ko ni heyeli kɛ miishɛɛ yɔɔ jɛmɛ. Mikaiɔ bɔ ni minaa kpɛɔ mihe yɛ miblahiiaŋ kɛ́ mina tsina osai ni yɔɔ hewalɛ waa ni miihu jwɛi, loo ahumii ni emli eyi obɔ kɛ mulu lɛ agbɛɛmɔ ni haa maŋ lɛ mli feɔ hoo lɛ. No hewɔ lɛ, yɛ anɔkwale mli lɛ minikasemɔ yɛ shihilɛ mli lɛ je shishi kwraa  dani mibɔi skulyaa yɛ skul bibioo ko ni kɛ wɔshia jɛkɛmɔ ji kilomitai 5, ni tsɔɔlɔ kome pɛ tsɔɔ nii yɛ jɛmɛ lɛ mli.

Eyɛ mli akɛ mifɔlɔi eyaaa sɔlemɔ—akɛni gbɛ ni kã wɔŋmɔ lɛ kɛ he ni sɔlemɔ lɛ yɔɔ lɛ teŋ jɛkɛ lɛ hewɔ moŋ,—shi amɛsumɔɔ Nyɔŋmɔjamɔ. Fɛɛ sɛɛ lɛ, yɛ afi 1930 shishijee mli lɛ, Awo bɔi Biblia mli wiemɔi ni Kojolɔ Rutherford hãa, ni redio nitsumɔhe ko ni yɔɔ Adelaide lɛ tswaa daa otsi lɛ toiboo. Misusu akɛ Kojolɔ Rutherford ji shiɛlɔ ko ni yɔɔ Adelaide, no hewɔ lɛ minaaa he miishɛɛ tsɔ. Shi daa otsi lɛ Awo kɛ miishɛɛ mɛɔ Rutherford wiemɔi ni atswaa lɛ, ni eboɔ toi jogbaŋŋ, eyɛ mli akɛ anuuu egbee jogbaŋŋ yɛ wɔ redio bibioo ni akɛ batre enyɔ woɔ mli lɛ nɔ.

Shwane ko ni latsaa miitsa, ni mulu hu miitswa lɛ, tsɔne momo ko ni ahàko sɛɛ bama wɔshia lɛ hiɛ, ni hii enyɔ ko ni esaa amɛhe jogbaŋŋ je kpo kɛjɛ mli. Yehowa Odasefoi ji amɛ. Awo bo amɛshɛɛ sane lɛ toi, ni ewo woji babaoo ni amɛkɛha lɛ ni ebɔi kanemɔ amrɔ nɔŋŋ lɛ he too. Woji nɛɛ ná enɔ hewalɛ aahu akɛ ekɛfɔ Ataa hiɛ koni ekɛ tsɔne awó lɛ kɛya wɔkutsoŋbii lɛ aŋɔɔ koni ekɛ amɛ agba nibii ni ekaseɔ lɛ he sane.

Mɛi Anɔ Hewalɛ Kpakpa Námɔ Mli Sɛɛnamɔ

Enɛ sɛɛ etsɛɛɛ lɛ, naagba shihilɛ ni yɔɔ Australia lɛ nyɛ wɔnɔ ni wɔfã kɛtee Adelaide, ni ji maŋtiase ni jɛkɛmɔ ji kilomitai 500 lɛ mli. Wɔweku lɛ kɛ Yehowa Odasefoi Asafo ni yɔɔ Adelaide lɛ bɔi bɔɔ ni wɔtee wɔhiɛ yɛ mumɔŋ. Wɔshimɔ lɛ hu ha mikpa shishijee skul ni miyaa lɛ. No hewɔ lɛ mikɛ afii kpawo tee skul, ni mikpa yaa beni miye afii 13 pɛ. Miji mɔ ko ni nɔ ko jeee ehe sane, no hewɔ lɛ eji jeee nyɛmimɛi kpakpai srɔtoi—gbɛgbalɔi loo be-fɛɛ sɔɔlɔi—lɛ ni ná mihe miishɛɛ kulɛ, mitiuŋ Nyɔŋmɔ jamɔ he nibii asɛɛ.

Beni be shwie mli lɛ, hewalɛ ni nyɛmimɛi ni yɔɔ ekãa nɛɛ ná yɛ minɔ lɛ ha miná mumɔŋ shidaamɔ yɛ mimli ni ayɔseee. Mináa amɛkɛ bɔɔ he miishɛɛ, ni mihiɛ sɔɔ mumɔ ni amɛkɛtsuɔ nii kɛ mɔdɛŋbɔɔ lɛ. No hewɔ lɛ beni atswa adafi yɛ kpee ko ni afee yɛ Adelaide yɛ afi 1940 lɛ ákɛ akɛ he awo be-fɛɛ sɔɔmɔ lɛ mli lɛ, naakpɛɛ sane ji akɛ mikɛ migbɛi ha. No mli lɛ abaptisiko mi po ni shiɛmɔ nitsumɔ lɛ he niiashikpamɔi fioo pɛ miyɔɔ. Shi kɛlɛ, gbii fioo sɛɛ lɛ, afɔ̃ mi nine koni miyafata gbɛgbalɔi akuu bibioo ko ni yɔɔ Warrnambool, ni ji maŋ ko ni kɛ Adelaide jɛkɛmɔ ji kilomitai ohai abɔ, ni bɛŋkɛ Victoria maŋ ni kɛ jɛmɛ jɛkɛɛɛ lɛ ahe.

Yɛ shishijee ni bɛ shiŋŋ nɛɛ fɛɛ sɛɛ lɛ, etsɛɛɛ ni miná suɔmɔ kɛha shiɛmɔ nitsumɔ lɛ, ni eji suɔmɔ ko ni manyɛ mikɛ miishɛɛ akɛɛ akɛ enaa bako shi yɛ afii lɛ amli. Yɛ anɔkwale mli lɛ, eji tsakemɔ be kɛha mi, ni mibɔi hiɛyaa diɛŋtsɛ yɛ mumɔŋ. Mikase bɔ ni ehe hiaa akɛ atsi abɛŋkɛ mɛi ni yɔɔ suɔmɔ kɛha Nyɔŋmɔjamɔ he nibii lɛ kpaakpa lɛ. Miyɔse bɔ ni hewalɛ kpakpa ni amɛnáa yɛ mɛi anɔ lɛ baanyɛ ajie nɔ ni hi fe fɛɛ ni yɔɔ wɔmli lɛ kpo atsɔɔ, ekɔɔɔ he ko skul abɔ ni wɔtee, kɛ bɔ ni nibii ni wɔkase yɛ nɛkɛ gbɛ nɔ  lɛ he baanyɛ aba sɛɛnamɔ kɛha wɔ wɔwala gbii abɔ fɛɛ.

Kaai Wo Mi Hewalɛ

Mibɔi gbɛgbamɔ nitsumɔ lɛ etsɛɛɛ kwraa ni agu Yehowa Odasefoi anitsumɔ lɛ yɛ Australia. Akɛni mileee nɔ ni mafee hewɔ lɛ, mibi gbɛtsɔɔmɔ kɛjɛ nyɛmimɛi lɛ aŋɔɔ, ni amɛtsɔɔ mli akɛ aguko akɛ wɔkɛ mɛi akawie Biblia lɛ mli sane. No hewɔ lɛ mikɛ gbɛgbalɔi krokomɛi bɔi Biblia mli shɛɛ sane ni yɔɔ mlɛo shiɛmɔ yɛ shia kɛ shia. Enɛ wo mi hewalɛ kɛha kaai ni etsɛŋ ni baaba minɔ lɛ.

No sɛɛ nyɔji ejwɛ lɛ miná afii 18, ni abi ni mikɛ mihe abaha kɛha asraafoi anitsumɔ. Enɛ ha miná hegbɛ koni mikɛfã mihemɔkɛyeli lɛ he yɛ asraafoi onukpai kɛ kojolɔi srɔtoi ahiɛ. No mli lɛ nyɛmimɛi aaashɛ 20 yɛ Adelaide tsuŋwoohe lɛ mli yɛ amɛhe ni amɛkɛwooo maŋ saji amli lɛ hewɔ, ni etsɛɛɛ ni mihu miyafata amɛhe. Ahaa wɔtsuɔ nii dɛŋdɛŋ, wɔtsoɔ tɛ ni wɔsaa gbɛjegbɛi. Enɛ ye ebua mi ni miná sui tamɔ tsuishiŋmɛɛ kɛ faishitswaa. Yɛ naagbee lɛ wɔjeŋba kpakpa kɛ shi ni wɔfi lɛ ha mɛi ni buɔ gboklɛfoi lɛ ahe lɛ ateŋ mɛi babaoo ná bulɛ amɛha wɔ.

Enɔ nyɔji babaoo sɛɛ ni ajie mi lɛ dani miye niyenii kpakpa ko shikome ekoŋŋ, ni mije gbɛgbamɔ nitsumɔ lɛ shishi ekoŋŋ. Shi no mli lɛ anáaa mɛi ni akɛaafee ekome kɛtsu gbɛgbamɔ nitsumɔ lɛ, no hewɔ lɛ akɛfɔ mihiɛ kɛji akɛ masumɔ ni mikometoo matsu nii yɛ he ko ni ayeɔ okwaa yɛ ni etse ehe banee yɛ Australia Wuoyigbɛ lɛ. Mikpɛlɛ nɔ, ni mikɛ meele fã gbɛ kɛtee Yorke Ŋshɔkpɔ lɛ nɔ, ni nibii ni mikɛ baaye odase kɛ okɔokpe pɛ mihiɛ. Beni miyashɛ lɛ, weku ko ni he yɔɔ miishɛɛ kɛ mi tee gbɔiatoohe bibioo ko mli, ni yoo ko ni yɔɔ mlihilɛ kɛ mi hi shi tamɔ ebinuu yɛ jɛmɛ. Yɛ gbi lɛ mli lɛ, mikɛ okɔokpe fãa gbɛ yɛ gbɛ ni nɔ yɔɔ mulu nɔ, ni mishiɛɔ yɛ maji bibii ni egbɛ eshwã ŋshɔkpɔ lɛ nɔ lɛ amli. Bɔni afee ni manyɛ mashiɛ kɛya hei ni yɔɔ shɔŋŋ lɛ, bei komɛi lɛ miyeɔ jenamɔ lɛ yɛ gbɔiatoohei bibii amli. Mitsɔ nɛkɛ gbɛ nɔ mikɛ okɔokpe fã gbɛ kilomitai ohai abɔ ni miná niiashikpamɔi babaoo ni yɔɔ miishɛɛ. Egbaaa minaa tsɔ akɛ mikometoo mitsuɔ sɔɔmɔ nitsumɔ lɛ, ni kɛ́ mina akɛ Yehowa miikwɛ minɔ lɛ, ehaa mitsiɔ mibɛŋkɛɔ lɛ kpaakpa.

He ni Anuɔ akɛ Ashɛko lɛ He Nitsumɔ

Yɛ afi 1946 lɛ, aŋma wolo ko kɛfɔ̃ mi nine koni matsu gbɛfaa nitsumɔ akɛ nyɛmimɛi lɛ asɔɔlɔ (ni amrɔ nɛɛ atsɛɔ lɛ akɛ kpokpaa nɔkwɛlɔ lɛ). Enɛ biɔ ni mayasara asafoi ni yɔɔ kpokpaa ni akɛha mi lɛ amli lɛ. Yɛ anɔkwale mli lɛ, mina gbɛnaanii ni fata nitsumɔ nɛɛ he lɛ akɛ eji nitsumɔ ni wa. Gbi ko lɛ minu akɛ nyɛminuu ko miikɛɛ akɛ, “Harold jeee mɔ ni he esa kɛ wiemɔ hamɔ, shi ebɔɔ mɔdɛŋ yɛ shiɛmɔ nitsumɔ lɛ mli.” Wiemɔ nɛɛ wo mi hewalɛ waa diɛŋtsɛ. Mile jogbaŋŋ akɛ mihe esako tsɔ yɛ wiemɔ hamɔ kɛ nibii ahe gbɛjianɔtoo mli, shi miheɔ miyeɔ akɛ shiɛmɔ nitsumɔ lɛ ji Kristofoi anitsumɔ titri.

Yɛ afi 1947 lɛ, aná saramɔ ni Nyɛminuu Nathan Knorr kɛ Milton Henschel ni jɛ Yehowa Odasefoi anitsumɔhe yitso ni yɔɔ Brooklyn lɛ baa amɛbasara wɔ lɛ he miishɛɛ waa. Enɛ ji saramɔi nɛɛ ateŋ klɛŋklɛŋnɔ ni nyiɛ saramɔ ni Nyɛminuu Rutherford ba yɛ afi 1938 lɛ sɛɛ. Afee kpee wulu ko yɛ Sydney kɛfata saramɔ nɛɛ he. Taakɛ gbɛgbalɔi krokomɛi ni darako lɛ babaoo ji lɛ, miyɛ maŋsɛɛ sanekpakpa shiɛmɔ he tsɔsemɔ ni akɛhaa yɛ Buu-Mɔɔ Biblia Gilead Skul ni  agbele naa etsɛko yɛ South Lansing, New York, U.S.A. lɛ he miishɛɛ. Wɔteŋ mɛi babaoo ni tee kpee lɛ ayiŋ fee wɔ kɔshikɔshi kɛji akɛ skul babaoo ni mɔ etee ji nɔ ni abaadamɔ nɔ ahala mɛi kɛha skul nɛɛ. Shi kɛlɛ, Nyɛminuu Knorr tsɔɔ mli akɛ kɛji akɛ wɔbaanyɛ wɔkane sane ko yɛ Buu-Mɔɔ wolo tɛtrɛɛ lɛ mli ni wɔkai emli saji otii lɛ, no lɛ ekolɛ wɔbaaye omanye yɛ Gilead.

Minu he akɛ ekolɛ skul babaoo ni miyaaa lɛ haŋ atsɛ́ mi. Shi nɔ ni fee mi naakpɛɛ ji akɛ, enɔ nyɔji babaoo sɛɛ lɛ abi mi koni miŋma wolo kɛbi ni aha maya kɛha Gilead tsɔsemɔ. Fee sɛɛ lɛ akpɛlɛ minɔ akɛ nikaselɔ, ni mitee klas ni ji 16 ni afee yɛ afi 1950 mli lɛ. Enɛ bafee niiashikpamɔ ni yɔɔ miishɛɛ ni ha mihekɛnɔfɔɔ lɛ mli bawa waa diɛŋtsɛ. Eha miyɔse akɛ skul abɔ ni mɔ ko etee lɛ jeee nɔ titri kɛha omanyeyeli. Shi moŋ mɔdɛŋbɔɔ kɛ toiboo ji nii titri ni ataoɔ. Wɔ tsɔɔlɔi lɛ wo wɔ hewalɛ koni wɔfee nɔ ni fe fɛɛ ni wɔɔnyɛ. Beni mikɛ amɛ ŋaawoo lɛ tsu nii lɛ, mitee mihiɛ waa ni minyɛ minu tsɔsemɔ ni akɛhaa lɛ shishi jogbaŋŋ.

Kɛjɛ Australia Kɛtee Ceylon

Beni wɔgbe skul lɛ naa lɛ, aha mi kɛ nyɛmimɛi krokomɛi enyɔ ni jɛ Australia lɛ nitsumɔ yɛ Ceylon (amrɔ nɛɛ Sri Lanka). Wɔyashɛ maŋtiase ni ji Colombo lɛ mli yɛ September afi 1951. Jɛmɛ edɔ ni efee frɔnɔɔ, ni wɔna nibii heei, wɔnu gbɛɛmɔi heei, ni wɔnu nibii heei afũ kɛ ŋma he. Beni wɔyi shi yɛ meele lɛ mli lɛ, maŋsɛɛ sanekpakpa shiɛlɔi ni miisɔmɔ yɛ maŋ lɛ mli momo lɛ ateŋ mɔ kome fua mi atuu ni ekɛ dɛhiɛmɔ wolo ko ni miitswa maŋshiɛmɔ ni abaaha enɔ Hɔgbaa yɛ maŋ lɛ gwabɔɔhe lɛ mli lɛ ha mi. Nɔ ni fee mi naakpɛɛ ji akɛ, aŋma migbɛi yɛ dɛhiɛmɔ wolo lɛ nɔ—ákɛ mɔ ni baaha wiemɔ lɛ! Obaanyɛ ofee mitsui ni fã lɛ he mfoniri yɛ ojwɛŋmɔ mli. Shi afii ni mikɛtsu gbɛgbamɔ nitsumɔ lɛ yɛ Australia lɛ etsɔse mi koni makpɛlɛ nitsumɔ fɛɛ nitsumɔ ni akɛbaaha mi lɛ nɔ. No hewɔ lɛ yɛ Yehowa yelikɛbuamɔ naa lɛ, miha maŋshiɛmɔ lɛ yɛ omanyeyeli mli. Wɔyi etɛ lɛ kɛ nyɛmimɛi hii oshijafoi ejwɛ ni yɔɔ maŋsɛɛ sanekpakpa shiɛlɔi ashia ni yɔɔ Colombo lɛ mli yɛ nakai beaŋ lɛ bɔi Sinhala wiemɔ ni wa lɛ kasemɔ koni wɔkɛyatsu nii yɛ shiɛmɔ nitsumɔ lɛ mli. Bei babaoo lɛ wɔtsuɔ nii akɛ aŋkroaŋkroi, ni beni wɔna akɛ maŋbii lɛ buɔ mɔ ni amɛfeɔ gbɔ lɛ, wɔná miishɛɛ. Etsɛɛɛ kwraa ni mɛi ni baa kpee lɛ ayifalɛ bɔi hiɛyaa.

Beni be shwie mli lɛ, mibɔi nyɛmiyoo fɛfɛo ko ni atsɛɔ lɛ Sybil, ni ji gbɛgbalɔ ko ni mikɛkpe beni mikɛ meele fãa gbɛ kɛyaa Gilead Skul lɛ he susumɔ waa. No mli lɛ eefã gbɛ kɛmiiya majimaji ateŋ kpee ni abaafee yɛ New York lɛ. Sɛɛ mli lɛ etee Gilead klas ni ji 21 lɛ, ni aha lɛ nitsumɔ yɛ Hong Kong yɛ afi 1953. Mikpɛ miyiŋ akɛ maŋma lɛ wolo, ni wɔtee nɔ wɔŋmala wɔhe woji kɛyashi Sybil bafata mihe yɛ Ceylon yɛ afi 1955, ni wɔbote gbalashihilɛ mli yɛ jɛmɛ.

Hé klɛŋklɛŋ ni akɛha wɔ akɛ wɔyatsu nii yɛ akɛ maŋsɛɛ sanekpakpa shiɛlɔi ni ji gbalashihilɛ mli hefatalɔi lɛ ji Jaffna, ni ji maŋtiase ko ni yɔɔ Sri Lanka kooyigbɛ shɔŋŋ lɛ. Yɛ afi 1950 lɛ teŋgbɛ lɛ, no mli lɛ maŋkwramɔ gbɛjianɔtoo srɔtoi amli ni mɛi yɔɔ lɛ kɛ mligbalamɔ miiba Sinhala kɛ Tamil akutsei lɛ ateŋ, ni eetsɔ nɔ ni abaadamɔ nɔ awuu ta yɛ afii nyɔŋmai abɔ ni baaba lɛ mli. Kwɛ miishɛɛ ni eji akɛ aaana akɛ Sinhala kɛ Tamil Odasefoi lɛ baabaa amɛhe yi yɛ be ko mli yɛ nakai jaramɔ afii lɛ amli! Kaai nɛɛ tsuu nyɛmimɛi lɛ ahemɔkɛyeli lɛ he ni ewo mli hewalɛ.

 Shiɛmɔ kɛ Nitsɔɔmɔ yɛ Sri Lanka

Ákɛ aaatsake he awo Hindu kɛ Muslim maji akusum mli lɛ biɔ tsuishitoo kɛ hiɛmiamɔ. Yɛ enɛ fɛɛ sɛɛ lɛ, wɔhiɛ sɔ kusumii enyɔ lɛ fɛɛ kɛ amɛ sui kpakpai lɛ. Akɛni efɔɔɔ kaa akɛ aaana ni maŋsɛɛ bii tara maŋ lɛ bɔs mli hewɔ lɛ, bei pii lɛ emli ni wɔtaraa lɛ haa ataa hiŋmɛi gãa kɛkwɛɔ wɔ. Sybil kpɛ eyiŋ akɛ ebaafee ehiɛ ŋmɔlɔŋmɔlɔ kɛ́ eba lɛ nakai. Kwɛ miishɛɛ ni eji kɛji akɛ wɔna akɛ hiɛ ni anyaŋe lɛ etsɔmɔ hiɛ ni efee ŋmɔlɔŋmɔlɔ!

Gbi ko lɛ awa wɔ adamɔ shi yɛ he ko ni atsi gbɛ yɛ. Beni mɔ ni buɔ jɛmɛ lɛ ebi heni wɔjɛ kɛ heni wɔyaa lɛ, agbɛnɛ esanebimɔi lɛ bakɔ wɔ diɛŋtsɛ wɔshihilɛ he.

“Namɔ ji yoo nɛɛ?”

Miha hetoo akɛ, “Miŋa ni.”

“Bei enyiɛ nɛ ni nyɛbote gbalashihilɛ mli?”

“Afii kpaanyɔ.”

“Nyɛyɛ bii?”

“Dabi.”

“Sua! Ani nyɛtee helatsamɔhe?”

Shishijee lɛ bɔ ni maŋbii lɛ taoɔ nɔ fɛɛ nɔ ale lɛ ha wɔnaa kpɛ wɔhe, shi sɛɛ mli lɛ wɔna akɛ eji gbɛ ni maŋbii lɛ tsɔɔ nɔ amɛhaa aleɔ akɛ amɛyɛ mɛi krokomɛi ahe anɔkwa miishɛɛ. Yɛ anɔkwale mli lɛ, eji amɛsui kpakpai lɛ ateŋ ekome. Kɛ́ mɔ ko damɔ maŋ lɛ mli he ko be fioo ko pɛ lɛ, maŋ lɛ mlinyo ko baajɛ mlihilɛ mli ebi lɛ kɛ́ ebaasumɔ ni aye abuɔ lɛ yɛ gbɛ ko nɔ.

Tsakemɔi kɛ Yiŋsusumɔi

Wɔnine shɛ nitsumɔi srɔtoi anɔ kɛfata wɔnitsumɔ akɛ maŋsɛɛ sanekpakpa shiɛlɔi lɛ ahe yɛ Sri Lanka yɛ afii ni eho lɛ amli. Aha mitsu nii akɛ kpokpaa bibioo kɛ kpokpaa wulu nɔkwɛlɔ, kɛ Nitsumɔhe Nine Ajinafoi Akuu lɛ mlinyo. Beni shɛɔ afi 1996 lɛ, no mli lɛ miye aaafee afii 75. Kɛ́ misusu nɔ ni fe afii 45 ni mikɛsɔmɔ akɛ maŋsɛɛ sanekpakpa shiɛlɔ yɛ Sri Lanka lɛ he lɛ, mináa miishɛɛ. Mɛi aaafee 20 ba klɛŋklɛŋ kpee ni mitee yɛ Colombo lɛ. Amrɔ nɛɛ nakai yibɔ lɛ etee hiɛ kɛyashɛ nɔ ni fe 3,500! Mikɛ Sybil buɔ mɛnɛɛmɛi ateŋ mɛi babaoo akɛ wɔmumɔŋ bii kɛ nabii. Shi kɛlɛ nitsumɔi babaoo yɛ ni abaatsu yɛ maŋ lɛ mli fɛɛ—nitsumɔ ko ni ebiɔ ni akɛ mɛi ni wɔye amɛ onukpa lɛ ahewalɛi kɛ nyɛmɔi atsu. Akɛni enɛ yɔɔ wɔjwɛŋmɔ mli hewɔ lɛ, wɔkpɛlɛ nibimɔ ni Nɔyeli Kuu lɛ kɛfɔ wɔhiɛ koni wɔku wɔsɛɛ kɛya Australia lɛ nɔ. Enɛ eha gbalashihilɛ mli hefatalɔi ni darako ená hegbɛ kɛyaye wɔnajiaŋ yɛ Sri Lanka akɛ maŋsɛɛ sanekpakpa shiɛlɔi.

Amrɔ nɛɛ miye afii 83, ni mikɛ Sybil fɛɛ yɛ miishɛɛ akɛ loloolo lɛ wɔyɛ gbɔmɔtsoŋ hewalɛ bɔ ni sa ni wɔkɛaatsa wɔgbɛgbamɔ krɛdɛɛ nitsumɔ lɛ nɔ yɛ Adelaide ni mihi tsutsu lɛ. Wɔshiɛmɔ nitsumɔ lɛ haa wɔjwɛŋmɔ naa baa ni wɔfeɔ tswãa. Eye ebua wɔ hu koni wɔtsake wɔhe kɛwo shihilɛ ko ni yɔɔ srɔto kwraa yɛ maŋ nɛɛ mli lɛ mli.

Yehowa etee nɔ eha wɔ heloonaa nibii fɛɛ, ni nyɛmimɛi hii kɛ yei ni yɔɔ wɔ asafo lɛ mli lɛ sumɔɔ wɔ ni amɛyeɔ amɛbuaa wɔ waa. Minine shɛ nitsumɔ hee ko nɔ nyɛsɛɛ nɛɛ. Aha mi hegbɛ ni masɔmɔ akɛ asafoŋ woloŋmalɔ. Enɛ eha miyɔse akɛ Yehowa yaa nɔ etsɔseɔ mi beni mibɔɔ mɔdɛŋ koni masɔmɔ lɛ yɛ anɔkwayeli mli lɛ. Kɛ́ misusu afii ni eho lɛ ahe lɛ, minaa kpɛɔ mihe be fɛɛ be akɛ gbekɛ nuu ni jeee fɛi, ni nɔ ko jeee ehe sane ni jɛ jwɛiaŋ lɛ ená tsɔsemɔ kpakpa ni tamɔ nɛkɛ—tsɔsemɔ ko ni ehe eba sɛɛnamɔ yɛ wala gbii abɔ fɛɛ mli lɛ.

[Mfoniri ni yɔɔ baafa 26]

Beni wɔbote gbalashihilɛ mli yɛ afi 1955

[Mfoniri ni yɔɔ baafa 27]

Mikɛ Rajan Kadirgamar, ni ji nyɛminuu ko ni yɔɔ maŋ lɛ mli lɛ yɛ afi 1957

[Mfoniri ni yɔɔ baafa 28]

Mikɛ Sybil ŋmɛnɛ