Nii Babaoo ni Ataoɔ Aná

“Kɛji wɔshweɔ ni wɔná nɔ fɛɛ nɔ lɛ, no lɛ wɔtsui enyɔŋ wɔmli kɔkɔɔkɔ yɛ nibii ni wɔyɔɔ lɛ ahe.”—Worldwatch Institute amaniɛbɔɔ.

“MƐNI wɔtaoɔ? Nɔ fɛɛ nɔ. Mɛɛ be wɔtaoɔ ni wɔnine ashɛ nɔ? Amrɔ nɛɛ nɔŋŋ.” Nɛkɛ sabala nɛɛ hé shi waa yɛ kɔleji skulbii komɛi ateŋ yɛ afi 1960 afii lɛ amli. Ŋmɛnɛ, ekolɛ anuŋ ni akɛ nɛkɛ wiemɔi nɛɛ nɔŋŋ miitsu nii, shi yiŋtoo ni hɔ sɛɛ lɛ kã he eyɛ lolo. Yɛ anɔkwale mli lɛ, etamɔ nɔ ni nii babaoo ni ataoɔ aná lɛ ebafee su ko ni kadiɔ wɔbe nɛɛ.

Ákɛ abaaná nii babaoo ni abua heloonaa nibii anaa aha he lɛ ebatsɔ oti ni ma mɛi babaoo ahiɛ yɛ shihilɛ mli. Jimmy Carter, ni eji U.S. tsutsu maŋ Nɔyelɔ lɛ kɛɛ be ko akɛ: “Jeee nɔ ni mɔ ko feɔ lɛ nɔ adamɔɔ akɛleɔ lɛ dɔŋŋ shi moŋ nibii ni mɔ lɛ yɔɔ.” Ani nibii krokomɛi yɛ ni amɛhe yɛ sɛɛnamɔ kwraa fe heloonaa nibii ni mɔ yɔɔ lɛ? Kɛ́ nakai ni lɛ, mɛni ji nomɛi, ni mɛɛ sɛɛnamɔi wɔbaaná kɛjɛ amɛmli?