‘Mimli Fili Mi yɛ Tsɔsemɔ ni Miná lɛ Hewɔ’

KAZUNA ni ji oblayoo fioo lɛ naa kpɛ ehe waa beni etsɔɔlɔ lɛ kɛfɔ̃ ehiɛ koni ekɛ ehe awo wiemɔ ko ni abaaha yɛ Blɔfo mli he akaŋshii ni baaya nɔ lɛ mli lɛ. Skulbii ni yɔɔ nɔtsamɔ skul srɔtoi fɛɛ ni yɔɔ Japan kooyigbɛ ŋshɔkpɔ wulu ni ji Hokkaido nɔ lɛ yɛ hegbɛ akɛ amɛkɛ amɛhe woɔ akaŋshii nɛɛ mli, shi eskul lɛ halako emlinyo ko koni ekɛ ehe awo nifeemɔ nɛɛ mli pɛŋ. Yɛ akaŋshii gbi lɛ nɔ lɛ, Kazuna tsui fã akɛni ekɛ skulbii krokomɛi aaafee 50 baashi akaŋ lɛ hewɔ. Egbeyeishemɔ lɛ mli bawa waa beni ena akɛ hii enyɔ ni baatsɔɔ mɛi ni bɔ mɔdɛŋ lɛ amaŋ wiemɔ ji Blɔfo wiemɔ lɛ.

Atsɛ́ mɛi ni bɔ mɔdɛŋ lɛ agbɛi, kɛjɛ mɔ ni ná jweremɔ nɔ̃ bibioo kwraa lɛ nɔ. Naagbee kwraa lɛ atsɛ́ Kazuna gbɛi lɛ, enaa kpɛ ehe waa. Lɛ kɛ etsɔɔlɔ ni ta emasɛi lɛ kwɛkwɛɛ amɛhiɛaŋ gãa-gãa kɛ naakpɛɛ. Kazuna tee kpoku lɛ nɔ eyahe ejweremɔ nɔ̃—ni ji jweremɔ nɔ̃ ni fe fɛɛ lɛ ní ekãhe enaa ekpɛ ehe lolo!

Kazuna ni mii eshɛ ehe lɛ tsɔɔ mli akɛ: “Kunim ni miye lɛ jɛ tsɔsemɔ ni Yehowa asafo lɛ tsɔɔ Teokrase Sɔɔmɔ Skul lɛ nɔ ekɛhaa lɛ hewɔ. Eŋɔɔ minaa waa akɛ miná tsɔsemɔ ni tamɔ nɛkɛ.” Nɛkɛ Sɔɔmɔ skul ni Kazuna kɛ ehe wo mli kɛjɛ egbekɛbiiashi lɛ ji Yehowa Odasefoi asafoŋ kpeei lɛ ateŋ ekome. Beni Kazuna sáa ehe kɛha akaŋshii lɛ, eje gbɛ esaa ehe jogbaŋŋ yɛ bɔ ni akɛ tsɔne ni awieɔ awoɔ mli tsuɔ nii ahaa, bɔ ni awieɔ kɛ miishɛɛ kɛ ekãa, bɔ ni akɛ gbɔmɔtso tsuɔ nii ahaa yɛ wiemɔ hamɔ mli, toibolɔi ahiɛkwɛmɔ kɛ saji krokomɛi ni atsɔɔ yɛ Teokrase Sɔɔmɔ Skul lɛ mli lɛ.

Ofainɛ, wɔmiifɔ̃ bo nine ni obakwɛ bɔ ni afeɔ skul nɛɛ ni afeɔ lɛ daa otsi lɛ ahaa yɛ Yehowa Odasefoi a-Maŋtsɛyeli Asa ni yɔɔ he ni oyɔɔ lɛ. Bo diɛŋtsɛ ba ni obakwɛ bɔ ni gbekɛbii kɛ onukpai fɛɛ náa he sɛɛ. Mɔ fɛɛ mɔ baanyɛ aba kpee lɛ. Kɛ obaasumɔ ni ole skul ni bɛŋkɛ bo fe fɛɛ yɛ he ni oyɔɔ lɛ, no lɛ ofainɛ ni ona Yehowa Odasefoi ni yɔɔ he ni oyɔɔ lɛ.