Ani Aaha Wɔmiikase Nii Babaoo Tsɔ?

Maŋsɛɛ sanekpakpa jajelɔi ni ji gbalashihilɛ mli hefatalɔi komɛi tara ŋshɔ ko naa yɛ Afrika Anaigbɛ amɛmiikwɛ bɔ ni nyɔɔŋtsere lɛ eje fɛfɛo eha lɛ. Wu lɛ bi akɛ: “Te nilee ni adesai yɔɔ yɛ nyɔɔŋtsere lɛ he lɛ mli kwɔ ha tɛŋŋ, ni enyiɛ eshwɛ lolo ni esa akɛ akase?”

Eŋa lɛ ha hetoo akɛ: “Ŋɔɔ lɛ akɛ wɔbaanyɛ wɔna shikpɔŋ lɛ ni miitsi ehe taakɛ wɔnaa ni nyɔŋtsere lɛ feɔ lɛ—nilee enyiɛ mɛi yɔɔ yɛ he, ni enyiɛ eshwɛ lolo ni esa akɛ akase? Bo lɛ susumɔ he okwɛ! Jeee shikpɔŋ lɛ pɛ bɔleɔ hulu lɛ, shi moŋ hulu lɛ diɛŋtsɛ kɛ shibɔlemɔ ŋulamii krokomɛi ni wɔshikpɔŋ lɛ fata he lɛ fɛɛ hu bɔleɔ shi. Enɛ tsɔɔ akɛ ekolɛ be ko baŋ ni wɔɔna wɔhe ekoŋŋ yɛ je lɛŋ he tuuntu ni wɔtara amrɔ nɛɛ kɔkɔɔkɔ. Yɛ anɔkwale mli lɛ, nibii ni yɔɔ ŋwɛi niiaŋ tamɔ hulu kɛ ŋulamii lɛ ji nɔ ni yeɔ ebuaa wɔ ni wɔkɛnaa je lɛŋ he tuuntu ni wɔyɔɔ amrɔ nɛɛ. Wɔyɛ nibii komɛi ahe nilee babaoo, shi wɔbaanyɛ wɔkɛɛ yɛ gbɛ ko nɔ akɛ enɛ yeee ebuaaa wɔ ni wɔle he ni wɔyɔɔ!”

HEFATALƆI nɛɛ asaji ahesusumɔ lɛ gbalaa jwɛŋmɔ kɛyaa shishijee anɔkwalei komɛi anɔ. Etamɔ nɔ ni babaoo yɛ lolo ni esa akɛ akase. Yɛ anɔkwale mli lɛ, wɔteŋ mɔ fɛɛ mɔ kaseɔ nibii heei daa gbi. Shi kɛlɛ, ekɔɔɔ he eko nii abɔ ni wɔkaseɔ lɛ, etamɔ nɔ ni wɔnyɛɛɛ wɔkase nibii ni wɔtaoɔ wɔle lɛ oyayaayai taakɛ wɔshweɔ lɛ.

Eji anɔkwale akɛ, kɛfata nyɛmɔ ni ayɔɔ ni akɛkaseɔ nibii heei lɛ he lɛ, nyɛmɔ ni ayɔɔ ni akɛ nibii ni akase lɛ toɔ lɛ hu etee hiɛ babaoo. Kɛtsɔ tsɔnei ahe nilee ni aná lɛ nɔ lɛ, adesai nyɛɔ amɛkɛ nilee ni fa babaoo diɛŋtsɛ toɔ. Amrɔ nɛɛ anyɛɔ akɛ saji ni fa babaoo toɔ disk ni yɔɔ kɔmpiutai amli (hard disks) nɔ aahu akɛ ehe ebahia ni aná akɔntaabuu gbɛi heei koni akɛtsɔɔ saji falɛ ni anyɛɔ akɛtoɔ disk nɛɛ nɔ lɛ mli. Abaanyɛ akɛ saji ni fa babaoo ato CD-ROM kome pɛ nɔ; ni awieɔ akɛ abaanyɛ akɛ saji ni falɛ shɛɔ nɔ ni ale yɛ blɔfo mli akɛ 680 megabytes loo nɔ ni fe nakai ato nɔ. Abaanyɛ akɛ saji ni akɛtoɔ CD-ROM nɔ nɛɛ toi kpawo ato DVD kome pɛ nɔ, ni aafee ekomɛi po ni abaanyɛ akɛ saji ni fa fe nakai ato nɔ.

Ewa kɛha wɔ ákɛ wɔɔnu gbɛ̀i ni adesai tsɔɔ nɔ ŋmɛnɛ amɛkɛ shɛɛ saji haa amɛhe lɛ ashishi. Woji akalamɔ tsɔnei kalaa adafitswaa woji, woji tɛtrɛbii, kɛ woji wuji babaoo yɛ be kukuoo mli. Kɔmpiuta he nɔ ko bibioo nɔ kɛkɛ ní mɔ ko ni kɛ Internet lɛ miitsu nii lɛ baanyɛ lɛ baaha enine ashɛ saji akpekpei abɔ nɔ amrɔ nɔŋŋ. Aatsɔ gbɛ̀i nɛɛ kɛ ekrokomɛi anɔ aaha mɛi anine miishɛ saji anɔ oyayaayai fe bɔ ni abaanyɛ akase fɛɛ. Bei komɛi lɛ, akɛ saji ni fa babaoo ni akɛhaa nɛɛ toɔ ŋshɔ he, ni kɛ́ wɔɔwie he yɛ mfonirifeemɔŋ shishinumɔ naa lɛ, esa akɛ wɔkase bɔ ni asereɔ yɛ mli ahaa bɔni afee ni wɔkamii nu. Saji nɛɛ  afalɛ po kɛkɛ nyɛɔ wɔ nɔ koni wɔhala mli jogbaŋŋ.

Yiŋtoo kroko hu hewɔ ni esa akɛ wɔhala saji nɛɛ amli ji akɛ, emli kpotoo ji nɔ ni sɛɛnamɔ diɛŋtsɛ ko bɛ he. Yɛ anɔkwale mli lɛ, saji nɛɛ ekomɛi ehiii, ni ehe ehiaaa ni wɔle. Kaimɔ akɛ nilee kɛ saji ni nine shɛɔ nɔ lɛ yɛ tsakpãa—ebaanyɛ efee sane kpakpa loo sane ni ehiii, sane ni sɛɛnamɔ yɔɔ he loo nɔ ni he bɛ sɛɛnamɔ. Nɔ ni haa mɛi ayiŋ futuɔ amɛ kwraa yɛ saji nɛɛ ahe ji akɛ, saji komɛi ni mɛi babaoo buɔ akɛ eji anɔkwale lɛ ejaaa. Kɛ́ mɛi ni hiɛ hegbɛi ni nɔ kwɔlɔ lɛ po wie lɛ, kwɛ bɔ ni bei pii lɛ yɛ sɛɛ mli lɛ anaa akɛ saji ni amɛwie lɛ ejaaa loo ákɛ eji amale ha! Ákɛ nɔkwɛmɔnɔ lɛ, susumɔ blema Efeso maŋ woloŋmalɔ, ní ekã shi faŋŋ akɛ abuɔ lɛ akɛ eji maŋ onukpa ni le nii lɛ he okwɛ. Ekɛɛ akɛ: “Mɛɛ gbɔmɔ po leee akɛ Artemi kekenam lɛ kɛ amaga ní kpeleke shi kɛjɛ Dio ŋɔɔ [ŋwɛi, NW] lɛ Efesobii amaŋ nɛŋ ewulɔmɔ yɔɔ?” (Bɔfoi lɛ Asaji 19:35, 36) Eyɛ mli akɛ etamɔ nɔ ni mɛi fɛɛ le sane nɛɛ, ni mɛi pii po baakɛɛ akɛ eji sane ko ni anyɛŋ he ŋwane aje moŋ, shi ejeee anɔkwale akɛ nakai amaga lɛ kpeleke shi kɛjɛ ŋwɛi. No hewɔ lɛ, yiŋtoo kpakpa hewɔ ni Ŋmalɛ Krɔŋkrɔŋ lɛ bɔɔ Kristofoi akɔkɔ koni amɛkwɛ amɛhe nɔ jogbaŋŋ yɛ “apasa nilee” he lɛ.—1 Timoteo 6:20.

Yiŋtoo ko ni yɔɔ hiɛdɔɔ hewɔ ní esa akɛ wɔhala nibii ni wɔkaseɔ lɛ amli ji akɛ wɔwala sɛɛ kɛɛɛ. Ekɔɔɔ he eko afii abɔ ni oye lɛ, nibii babaoo yɛ ní kulɛ obaasumɔ ni okase amɛhe nii, shi onaa akɛ owala sɛɛkɛlɛ ni yɔɔ kuku lɛ eŋmɛŋ bo gbɛ ni onyɛ ofee nakai.

Ani naagba nɛɛ sɛɛ baafo gbi ko? Ani abaanyɛ aná nilee ko ni baanyɛ aha mɔ wala sɛɛ atsɛ, ní kɛ́ aaahi po lɛ eha ehi shi kɛya naanɔ? Ani nilee ni tamɔ nɛkɛ yɛ? Kɛ́ eko yɛ lɛ, ani mɛi fɛɛ anine baanyɛ ashɛ nɔ? Ani be ko baashɛ ni nilee srɔtoi ni nine shɛɔ nɔ lɛ fɛɛ baafee nɔ ni ji anɔkwa taakɛ wɔkpaa gbɛ lɛ? Maŋsɛɛ sanekpakpa jajelɔi ni ji gbalashihilɛ mli hefatalɔi ní wɔtsĩ amɛtã kɛtsɔ hiɛ lɛ ená hetooi ni haa mɔ tsui nyɔɔ emli amɛha sanebimɔi nɛɛ, ni bo hu obaanyɛ ofee nakai nɔŋŋ. Ofainɛ kanemɔ sane ni nyiɛ sɛɛ ní baaha oná hiɛkamɔ ákɛ obaanyɛ okase nii kɛya naanɔ lɛ.