Hiamɔ Nii Ko He Nitsumɔ Yɛ Makedonia
Hiamɔ Nii Ko He Nitsumɔ Yɛ Makedonia
“BA Makedonia ni obaye obua wɔ!” (Bɔfoi lɛ Asaji 16:9) Wiemɔ nɛɛ ni nuu ko ní bɔfo Paulo na yɛ ninaa mli wie lɛ haa anaa bɔ ni ehe hiaa ni ajaje Nyɔŋmɔ Maŋtsɛyeli lɛ he sanekpakpa lɛ atsɔɔ yɛ shikpɔŋkukuji heei ni yɔɔ Greece maŋtiasei ni yɔɔ amrɔ nɛɛ lɛ amli.
Esa akɛ Yehowa Odasefoi ni yɔɔ Makedonia maŋ ni yɔɔ ŋmɛnɛ lɛ ateŋ mɔ fɛɛ mɔ ashiɛ atsɔɔ maŋbii 1,840. Gbɔmɛi lɛ ateŋ mɛi babaoo nuko Yehowa Nyɔŋmɔ he sane dã. Hɛɛ, ehe miihia waa ni mɛi ni yɔɔ maŋ nɛɛ mli lɛ anu toiŋjɔlɛ he shɛɛ sane lɛ.—Mateo 24:14.
Nyɔŋmɔ gbele gbɛ kɛha nakai hiamɔ nii lɛ he nitsumɔ. Gbi ko yɛ November mli yɛ afi 2003 mli lɛ, atswa tɛlifon ko ni akpaaa gbɛ kɛtee Yehowa Odasefoi anitsumɔhe ni yɔɔ Skopje yɛ Makedonia lɛ. Atswa tɛlifon nɛɛ kɛjɛ Center for International Cooperation (Nitsumɔhe ni Kwɛɔ Majimaji Ateŋ Ekomefeemɔ Nɔ) ni yɔɔ Makedonia lɛ, ni amɛmiibi koni Odasefoi lɛ abafee agba fioo ko ní amɛbaanyɛ amɛjɛ jɛmɛ ni amɛgbála amɛhemɔkɛyelii lɛ amli amɛtsɔɔ mɛi yɛ he ni ato ni akɛ jarayeli nibii baatsɔɔ maŋbii yɛ lɛ, ni nifeemɔ nɛɛ baahe gbii etɛ ni ebaaje shishi yɛ November 20. Mɛɛ hegbɛ ni nɔ bɛ ní aaatsɔ nɔ koni nine ashɛ mɛi akpekpei abɔ ni nuko Maŋtsɛyeli sanekpakpa lɛ he nɔ ko pɛŋ lɛ anɔ enɛ ji nɛkɛ!
Yehowa Odasefoi ní kɛ amɛhe eha lɛ tsu nii kɛ ekãa kɛma agba lɛ, ni amɛkɛ amɛwoji srɔtoisrɔtoi ni aŋmala yɛ Makedonia wiemɔ mli bawo mli koni amɛkɛtsɔɔ maŋbii lɛ. Ato woji nɛɛ ekomɛi ashwie agba lɛ hiɛgbɛ bɔni afee ni mɛi ni eba nifeemɔ lɛ shishi ni yɔɔ he miishɛɛ lɛ anyɛ aŋɔ eko kɛya. Woji ni akɛbatsɔɔ yɛ nifeemɔ lɛ shishi lɛ ha mɛi babaoo ná hegbɛ amɛnine shɛ mumɔŋ nu ní hãa mɔ he jɔɔ lɛ lɛ nɔ yaka.—Kpojiemɔ 22:17.
Mɛi ni ba nifeemɔ lɛ shishi lɛ nyá woji tamɔ Nɔ Diɛŋtsɛ ni Kɛ Weku Miishɛɛ Baa kɛ Questions Young People Ask—Answers That Work * ni wieɔ amɛshihilɛi ahe lɛ ahe titri. Mɛi 98 kɛ amɛ adrɛs ha koni Yehowa Odasefoi abasara amɛ. Mɛi babaoo wie Yehowa Odasefoi anitsumɔ lɛ he ekpakpa, ni amɛjie amɛyi yɛ amɛwoji ni nɔ bɛ lɛ hewɔ.
Nuu ko hiɛ ebinuu fioo ko nineshi kɛba agba lɛ shishi. Nuu nɛɛ bi koni atsɔɔ lɛ he ni ebaaná gbekɛbii awoji yɛ. Odasefoi lɛ kɛ Mi-Wolo ni Gbaa Biblia Mli Saji * wolo lɛ eko tsɔɔ lɛ. Ekwɛ wolo lɛ mli shwiaa, kɛkɛ ni ekɛ miishɛɛ bi ejara. Beni aha ele akɛ tooyeli ni ajɛɔ suɔmɔ mli akɛhaa ji nɔ ni akɛfiɔ Yehowa Odasefoi anitsɔɔmɔ nitsumɔ lɛ sɛɛ lɛ, enɛ ha emiishɛɛ lɛ bada jogbaŋŋ. (Mateo 10:8) Ekɛ wolo lɛ tsɔɔ ebinuu lɛ ni ekɛɛ lɛ akɛ: “Wolo nɛɛ yɛ fɛo jogbaŋŋ! Daa gbi lɛ, makane emli sane yitso kome matsɔɔ bo!”
Adesai ashihilɛ he nilelɔ kpanaa ko ni ji tsɔɔlɔ lɛ tsi bɛŋkɛ agba lɛ. Eyɛ jamɔ he miishɛɛ jogbaŋŋ, titri lɛ saji ni kɔɔ Yehowa Odasefoi ahemɔkɛyelii ahe. Beni nilelɔ nɛɛ kwɛɔ wolo ni ji Nyɔŋmɔ Sɛɛ Gbɛ ni Adesai Taoɔ * lɛ mli lɛ, ekɛɛ akɛ: “Ato wolo nɛɛ mli saji lɛ ahe gbɛjianɔ jogbaŋŋ! Nɛkɛ ji bɔ pɛ ni misusuɔ akɛ esa akɛ ato saji ahe gbɛjianɔ aha.” Sɛɛ mli lɛ, skulbii ni etsɔɔ amɛ nii lɛ ateŋ mɛikomɛi ba agba lɛ shishi koni amɛbaŋɔ wolo ni tsɔɔlɔ lɛ nine eshɛ nɔ lɛ eko amɛha amɛhe. Amɛmiisumɔ ni amɛkase nakai wolo kometoo lɛ nɔŋŋ. Amɛheɔ amɛyeɔ akɛ amɛtsɔɔlɔ lɛ kɛ wolo lɛ mli saji baatsu nii ni ekɛtsɔɔ amɛ nii yɛ klas.
Nifeemɔ ni akɛ jarayeli nibii tsɔɔ yɛ shishi nɛɛ ha mɛikomɛi ná hegbɛ ni amɛbale Ŋmalɛ mli anɔkwalei ni amɛkɛkpeko pɛŋ lɛ. Oblahii kɛ oblayei bibii ni ji mumuii nyiɛ kutuu kɛba agba lɛ shishi ni amɛbakwɛ woji ní akɛtsɔɔ lɛ. Odasefoi lɛ ateŋ mɔ kome ha amɛ wiemɔ kuku, ni gbekɛyoo fioo ko tsɔɔ shishi yɛ mumuii awiemɔ mli eha amɛ. Beni wielɔ lɛ kɛ mfonirii ni yɔɔ wolo ni ji Gbɔmɔ ni Fe Mɔ Fɛɛ Mɔ ni Ehi Shi Pɛŋ * lɛ mli tsuɔ nii lɛ, egbála mli etsɔɔ amɛ akɛ Yesu tsá helatsɛmɛi, ni mumuii fata he. Amɛmii shɛ amɛhe beni “amɛnu” akɛ Biblia lɛ ewo shi ákɛ etsɛŋ ni Yesu baafee nakai nɔŋŋ eha mɛi ni yɔɔ shikpɔŋ nɔ yɛ wɔgbii nɛɛ amli hu lɛ. Amɛteŋ mɛi babaoo kɛ miishɛɛ kpɛlɛ ni aha amɛ Biblia kasemɔ woji, ni akɛ amɛ to gbɛjianɔ koni Odasefonyo ko ni le mumuii awiemɔ abasara amɛ.
Kɛfata woji ni aŋmala yɛ Makedonia wiemɔ mli ni akɛtsɔɔ lɛ ahe lɛ, akɛ woji ni yɔɔ Albania, Blɔfo, kɛ Turkey wiemɔi amli hu tsɔɔ yɛ nifeemɔ lɛ shishi. Nuu ko ni nuuu Makedonia wiemɔ bi ni aha lɛ wolo ko yɛ Blɔfo wiemɔ mli. Beni aha lɛ Buu-Mɔɔ kɛ Awake! woji tɛtrɛbii lɛ ekomɛi sɛɛ lɛ, etsĩ tã akɛ ejɛ Turkey. Enaa kpɛ ehe waa beni akɛ wolo ko ni yɔɔ lɛ diɛŋtsɛ emaŋ wiemɔ mli tsɔɔ lɛ lɛ! Eyɔse akɛ Yehowa Odasefoi miisumɔ koni amɛye amɛbua mɛi fɛɛ.
Mɛɛ odase ni hi jogbaŋŋ po aye mɛi yɛ nakai nifeemɔ lɛ shishi nɛkɛ, ni kwɛ bɔ ni ewoɔ mɔ hewalɛ ákɛ aaana mɛi babaoo miijie miishɛɛ kpo yɛ Biblia mli anɔkwale lɛ he! Hɛɛ, Yehowa gbele gbɛ koni aha Maŋtsɛyeli lɛ he sanekpakpa lɛ ayashɛ mɛi babaoo aŋɔɔ yɛ Makedonia.
[Shishigbɛ niŋmai]
^ kk. 6 Yehowa Odasefoi ji mɛi ni fee woji nɛɛ fɛɛ.
^ kk. 7 Yehowa Odasefoi ji mɛi ni fee woji nɛɛ fɛɛ.
^ kk. 8 Yehowa Odasefoi ji mɛi ni fee woji nɛɛ fɛɛ.
^ kk. 9 Yehowa Odasefoi ji mɛi ni fee woji nɛɛ fɛɛ.
[Akrabatsa/Mfonirii ni yɔɔ baafa 9]
HIƐYAA KO NI SA KADIMƆ!
Nɔ ni ba yɛ May 17 afi 2003 lɛ ha mɔdɛŋ ni abɔɔ koni agbɛ Nyɔŋmɔ Maŋtsɛyeli lɛ he sanekpakpa lɛ ashwã lɛ tee hiɛ babaoo. Gbi nɛɛ nɔ ajɔɔ Yehowa Odasefoi anitsumɔhe hee ni yɔɔ Skopje lɛ nɔ. Akɛ afii enyɔ tsu nii ni akɛlɛɛ tsutsu nitsumɔhe lɛ mli, ni ehee nɛɛ dalɛ shɛɔ tsutsu nɔ lɛ toi ejwɛ.
Ayɛ tsũi srɔtoi etɛ, ni nitsumɔhe lɛ nɔkwɛmɔ kɛ woji ashishitsɔɔmɔ ɔfis srɔtoi, kɛ wɔɔhei, nihoomɔhe, kɛ niiahefɔmɔhe yɛ tsũi nɛɛ amli. Guy Pierce ni eji Yehowa Odasefoi a-Nɔyeli Kuu lɛ mlinyo lɛ ji mɔ ni kɛ nitsumɔhe lɛ nɔjɔɔmɔ he wiemɔ lɛ hã. Gbɔi jɛ maji nyɔŋma nɔ kɛba nɔjɔɔmɔ nifeemɔ lɛ shishi. Tsũi fɛfɛji heei lɛ ha amɛ fɛɛ amɛmii shɛ amɛhe jogbaŋŋ.
[Shikpɔŋ he mfoniri ni yɔɔ baafa 8, 9]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
BULGARIA
MAKEDONIA
Skopje
ALBANIA
GREECE
[Mfoniri ni yɔɔ baafa 8]
Skopje, yɛ Makedonia