Sanebimɔi ni Jɛ Kanelɔi Adɛŋ

Ani nɔ ni bɔfo Paulo kɛɛ beni edamɔ Akuashɔŋ lɛ hiɛ akɛ, “Farisifonyo ji mi” lɛ etsɔɔɔ akɛ eeŋmɛɛ e-Kristofoi ahemɔkɛyeli lɛ he kɛmiisaa?

Dani wɔɔnyɛ wɔnu Paulo wiemɔi ni jeɔ kpo yɛ Bɔfoi lɛ Asaji 23:6 nɛɛ ashishi lɛ, ehe miihia ni wɔsusu nɔ ni ba ni ha ewie nakai lɛ he.

Yudafoi asafo ko ni feɔ basabasa batutua Paulo yɛ Yerusalem, ni no sɛɛ lɛ ekɛ asafo yuu lɛ wie. Etsɔɔ mli akɛ: “[Yerusalem] alɛ mi yɛ, ni Gamaliel naji anaa atsɔse mi yɛ, yɛ wɔtsɛmɛi lɛ amla lɛ naa fitsofitso.” Eyɛ mli akɛ asafo yuu lɛ bo Paulo toi be saŋŋ beni ejieɔ enaa lɛ moŋ, shi sɛɛ mli beni amɛmli fu lɛ, asafoiatsɛ nukpa lɛ ha akɛ Paulo tee asraafoi amɔ̃ɔ lɛ mli. Be mli ni aahe ayi Paulo kpelebii lɛ mli nɔŋŋ kɛkɛ ni ebi akɛ: “Nyɛyɛ hegbɛ akɛ nyɛyiɔ Romanyo ko ni abuko lɛ fɔ lɛ kpelebii lo?”—Bɔfoi lɛ Asaji 21:27–22:29.

Enɔ jetsɛremɔ lɛ, asafoiatsɛ nukpa lɛ kɛ Paulo yadamɔ Yudafoi asaneyelihe wulu ni ji Akuashɔŋ lɛ hiɛ. Paulo tɛje ehiɛ kɛkwɛ Akuashɔŋ lɛ mli bii lɛ ahiɛ kɛkpe, ni eyoo akɛ amɛji Sadukifoi kɛ Farisifoi sɔŋŋ. Kɛkɛ ni ekɛɛ: “Ataamɛi kɛ anyɛmimɛi, mi lɛ Farisifonyo ji mi kɛ Farisifonyo bi hu; hiɛnɔkamɔ kɛ gbohiiashitee lɛ hewɔ akojoɔ mi nɛɛ.” Wiemɔ nɛɛ ha béi ni mli wa bate shi yɛ Farisifoi lɛ kɛ Sadukifoi lɛ ateŋ, “ejaakɛ Sadukifoi lɛ kɛɔ akɛ gbohiiashitee ko bɛ ni asaŋ ŋwɛibɔfo loo mumɔ ko hu bɛ; shi Farisifoi lɛ kɛɔ akɛ enyɔ lɛ fɛɛ yɛ.” Farisifoi ni yɔɔ amɛteŋ lɛ ekomɛi kɛ mlifu bé waa, ni amɛkɛɛ: “Wɔnaaa nɔ ko fɔŋ ko yɛ nɛkɛ gbɔmɔ nɛɛ he.”—Bɔfoi lɛ Asaji 23:6-10.

Akɛni ale Paulo jogbaŋŋ akɛ eji Kristofonyo ni yɔɔ ekãa waa hewɔ lɛ, enyɛŋ ekɔne Sadukifoi lɛ ayiŋ akɛ eji Farisifoi akuu lɛ mlinyo ni kɛ amɛ miitsu nii lolo. Farisifoi ni yɔɔ jɛmɛ lɛ po ekpɛlɛŋ mɔ ni heee amɛtsɔɔmɔi lɛ fɛɛ eyeee lɛ nɔ akɛ eji amɛteŋ mɔ kome. Enɛ hewɔ lɛ, ekã shi faŋŋ akɛ Paulo wiemɔ akɛ eji Farisifonyo lɛ shishinumɔ yawaa he ko, ni Farisifoi ni yɔɔ jɛmɛ lɛ nu ewiemɔi lɛ ashishi nakai.

Paulo kɛɛ akɛ gbohiiashitee he hiɛnɔkamɔ lɛ hewɔ akojoɔ lɛ lɛ, ni etsɔ enɛ nɔ efee lɛ faŋŋ akɛ etamɔ Farisifoi lɛ yɛ shishinumɔ nɛɛ naa. Kɛji ebalɛ akɛ aaje ŋwane yɛ gbohiiashitee lɛ he lɛ, no lɛ Paulo hemɔkɛyeli lɛ baaha eyafi Farisifoi lɛ asɛɛ moŋ fe nɔ ni ekɛ Sadukifoi ni heee gbohiiashitee lɛ amɛyeee lɛ aaakpã gbee.

Farisifoi lɛ ahemɔkɛyelii yɛ saji komɛi tamɔ gbohiiashitee, ŋwɛibɔfoi kɛ Mla lɛ mli nibii komɛi ahe lɛ eteee shi ewooo nibii ni Paulo heɔ eyeɔ akɛ Kristofonyo lɛ. (Filipibii 3:5) No hewɔ lɛ, yɛ saji nɛɛ agbɛfaŋ lɛ, Paulo baanyɛ akɛɛ akɛ eji Farisifonyo, ni Akuashɔŋ lɛ mli bii ni boɔ lɛ toi lɛ hu nu ewiemɔi lɛ ashishi yɛ shishinumɔ nɛɛ kɛkɛ naa. Paulo miitsɔ nɛkɛ gbɛ nɔ ekɛ Yudanyo ni eji lɛ miitsu nii koni ekɛkpee jwɛŋmɔ fɔŋ ni Yudafoi asaneyelihe wulu lɛ hiɛ yɛ ehe lɛ naa.

Shi kɛlɛ, anɔkwale ni eji akɛ Yehowa tee nɔ ekpɛlɛ Paulo nɔ lɛ ji odaseyeli ni fe fɛɛ ni tsɔɔ akɛ Paulo eŋmɛɛɛ ehemɔkɛyeli lɛ he kɛsaaa. Gbi nɔ ni Paulo wie akɛ eji Farisifonyo lɛ nɔ nyɔɔŋteŋ lɛ, Yesu kɛɛ lɛ akɛ: “Ha otsui anyɔ omli, ejaakɛ bɔ ni oye mihe odase yɛ Yerusalem nɛɛ, ja oyaye odase nakai nɔŋŋ yɛ Roma hu.” Akɛni Nyɔŋmɔ kpɛlɛ Paulo nɔ hewɔ lɛ, esa akɛ wɔmu sane naa akɛ Paulo eŋmɛɛɛ e-Kristofoi ahemɔkɛyeli lɛ he kɛsaaa.—Bɔfoi lɛ Asaji 23:11.