Ani Adesai Baanyɛ Aha Ohia Sɛɛ Afo?

GBƆMƐI akpekpei abɔ daraa kɛbatsɔmɔɔ onukpai ni amɛleee nɔ ni ji ohia. Ebako gbi ko pɛŋ akɛ amɛyakamɔ shi amɛwɔ kɛ amɛmusuŋ hɔmɔ ni fɛ̃i hu miiye amɛ yɛ hehaanɔ ni amɛbɛ hewɔ. Shi kɛlɛ, gbɔmɛi nɛɛ ateŋ mɛi komɛi yɛ ni ohiafoi anii feɔ amɛ mɔbɔ, ni no hewɔ lɛ amɛbɔɔ mɔdɛŋ waa kɛyeɔ buaa amɛ.

Shi kɛlɛ, ohia kã he eji shihilɛ ni naa wa ni yɔɔ diɛŋtsɛ kɛha mɛi ni maŋ tai, nu afuai, nugbɔ ni enɛɛɛ, kɛ naagbai krokomɛi haoɔ amɛ lɛ. Naagbai nɛɛ haoɔ Afrikabii ni yeɔ okwaa fiofio kɛkwɛɔ amɛhe lɛ. Enɛ enyɛ amɛteŋ mɛikomɛi anɔ ni amɛshi amɛshihilɛhei kɛyahi maŋtiasei wuji amli loo amɛtsɔmɔ abobalɔi yɛ maŋ kroko mli. Shihilɛ kpakpa ni akɛɔ akɛ eyɔɔ maŋtiasei amli lɛ eha akrowai amli bii krokomɛi hu efã kɛtee jɛmɛ.

Bei pii lɛ, ayeɔ ohia yɛ maŋtiasei ni gbɔmɛi ayi fa fe nine yɛ mli lɛ amli. Anáaa shikpɔŋ ni adu nii yɛ nɔ yɛ hei ni tamɔ nakai. Ewa akɛ aaaná nitsumɔ. Nijiaŋwujee haa mɛi babaoo kɛ amɛhe yawoɔ awuiyeli nifeemɔi amli. Gbɔmɛi ni yɔɔ maŋtiasei amli lɛ bolɔɔ kɛha yelikɛbuamɔ, shi adesai anɔyelii nyɛɛɛ amɛná ohia ni mɛi babaoo yaa nɔ amɛyeɔ lɛ anaa tsabaa. Beni London adafitswaa wolo ni ji The Independent lɛ tsɛ́ɔ amaniɛbɔɔ ko ni Jeŋmaji Ekomefeemɔ lɛ kɛha yɛ November afi 2003 lɛ mli lɛ yisɛɛ lɛ, ewie akɛ: “Gbɔmɛi ni hɔmɔ yeɔ amɛ yɛ je lɛŋ lɛ ayifalɛ kã he eeya hiɛ.” Wolo lɛ kɛfata he akɛ: “Jeŋ fɛɛ akɔntaabuu tsɔɔ akɛ, gbɔmɛi akpekpei 842 yɛ shihilɛ mli ŋmɛnɛ ní amɛnáaa niyenii kpakpa ni fa amɛye—ni mɛi nɛɛ ayifalɛ miiya nɔ eeya hiɛ, ni daa afi lɛ, gbɔmɛi akpekpei 5 bafataa he.”

Yehowa Odasefoi anitsumɔhe nine ni yɔɔ South Africa lɛ nine shɛɔ woji anɔ kɛjɛɔ ohiafoi adɛŋ yɛ be kɛ beaŋ. Ákɛ nɔkwɛmɔnɔ lɛ, nuu ko ni jɛ Bloemfontein ŋma akɛ: “Mibɛ nitsumɔ, no hewɔ lɛ be fɛɛ be ni maná nɔ ko ni manyɛ maju yɛ maŋtiase lɛ mli lɛ, mijuɔ. Kɛ́ mifeee nakai lɛ, hɔmɔ baaye wɔ gbii babaoo kɛfata fɛ̃i ni naa wa lɛ he. Nitsumɔ ko kwraa bɛ. Mɛi babaoo nyiɛ gbɛjegbɛi lɛ ahe amɛmiitao nitsumɔ kɛ niyenii. Mile mɛikomɛi ni yataoɔ niyenii yɛ jwɛi nii amli. Mɛikomɛi hu gbeɔ amɛhe. Mɛi babaoo ahiɛnɔkamɔ etã, ni amɛnii efee mɔbɔ tamɔ mi nɔŋŋ. Etamɔ nɔ ni hiɛnɔkamɔ ko kwraa bɛ kɛha wɔsɛɛ. Ani Nyɔŋmɔ ni bɔ wɔ kɛ henumɔ akɛ wɔye nii ni wɔná hehaanɔ lɛ enaaa nɔ ni yaa nɔ nɛɛ?”

Saji ni gbaa nuu nɛɛ naa lɛ ahetooi ni shɛjeɔ mɔ mii yɛ. Taakɛ bɔni sane ni nyiɛ sɛɛ lɛ baatsɔɔ lɛ, anaa hetooi nɛɛ yɛ Nyɔŋmɔ Wiemɔ ni ji Biblia lɛ mli.