Sanebimɔi ni Jɛ Kanelɔi Adɛŋ

Ani wɔbaanyɛ wɔmu sane naa akɛ ateeŋ blema Israel Maŋtsɛ Salomo shi akɛni eyayeee Nyɔŋmɔ anɔkwa yɛ egbɔlɛ beaŋ lɛ hewɔ?—1 Maŋtsɛmɛi 11:3-9.

Eyɛ mli akɛ Biblia lɛ tsĩɔ hii kɛ yei komɛi ni sɔmɔ Nyɔŋmɔ ní ŋwanejee ko bɛ he akɛ abaatee amɛ shi lɛ agbɛii atã moŋ, shi etsɔɔɔ kɛji akɛ abaatee aŋkroaŋkroi fɛɛ ni etsĩ amɛ tã lɛ ashi. (Hebribii 11:1-40) Shi kɛlɛ, yɛ Salomo gbɛfaŋ lɛ, kɛji wɔkɛ nɔ ni awie yɛ ehe beni egbo lɛ to nɔ ni awie yɛ anɔkwafoi komɛi ahe beni amɛgboi lɛ he lɛ, no baaye abua wɔ ní wɔná bɔ ni Nyɔŋmɔ baatsu esane lɛ he nii eha lɛ he nilee ko.

Ŋmalɛi lɛ wieɔ shihilɛi enyɔ ni mɛi ni egboi lɛ nyɛɔ amɛyajeɔ mli lɛ ahe, ni nomɛi ji shihilɛ mli ni amɛjeɔ be kukuoo ko kɛ shihilɛ mli ni amɛjeɔ kɛyaa naanɔ lɛ. Awieɔ mɛi ni ateeŋ amɛ shi lɛ ahe akɛ ashɛrɛ amɛ ashwie “gehena” loo “la kpaakpo lɛ” mli. (Mateo 5:22; Marko 9:47, 48; Kpojiemɔ 20:14) Adam kɛ Hawa ni ji klɛŋklɛŋ adesai enyɔ lɛ, sɛɛgbɛtsɔɔlɔ Yuda Iskariot, kɛ mɛi krokomɛi ni Nyɔŋmɔ bu amɛ fɔ́ yɛ kojomɔ mli ní ekpata amɛhiɛ, tamɔ mɛi ni hi shi yɛ Noa gbii lɛ amli kɛ Sodom kɛ Gomora maji lɛ amlibii lɛ fata mɛi nɛɛ ahe. * Akɛ mɛi ni abaatee amɛ shi lɛ yatoɔ adesai akwamaŋ gbonyobu ní atsɛ́ɔ lɛ akɛ “Sheol” loo “Hades” lɛ mli beni amɛgboi sɛɛ. Be mli ni Biblia lɛ wieɔ amɛwɔsɛɛ shihilɛ he lɛ, etsɔɔ mli akɛ: “Ŋshɔ jie gbohii ni yɔɔ emli lɛ eha, ni gbele kɛ gbohiiaje jie gbohii ni yɔɔ amɛmli lɛ amɛha; ni akojo amɛ, mɔ fɛɛ mɔ, bɔ ni sa enitsumɔi lɛ.”—Kpojiemɔ 20:13.

Kɛ́ nakai ji sane lɛ, no lɛ anɔkwafoi ni atsĩ amɛ tã yɛ Hebribii yitso 11 lɛ mli lɛ yɛ Sheol loo Hades amɛmiimɛ kɛyashi abaatee amɛ shi. Nyɔŋmɔ tsuji anɔkwafoi tamɔ Abraham, Mose, kɛ David fata mɛi nɛɛ ahe. Agbɛnɛ, susumɔ nɔ ni Biblia lɛ wieɔ yɛ amɛgbele he lɛ he okwɛ. Yehowa kɛɛ Abraham akɛ: “Ni bo lɛ oootee otsɛmɛi lɛ aŋɔɔ yɛ hejɔlɛ mli, aaafũo yɛ gbɔlɛ kpakpa mli.” (1 Mose 15:15) Yehowa kɛɛ Mose hu akɛ: “Naa, okɛ otsɛmɛi lɛ yaawɔ.” (5 Mose 31:16) Ni Biblia lɛ wie David ni ji Salomo tsɛ lɛ he akɛ: “Kɛkɛ ni David kɛ etsɛmɛi lɛ yawɔ, ni afu lɛ yɛ David maŋ lɛŋ.” (1 Maŋtsɛmɛi 2:10) No hewɔ lɛ, kɛ́ akɛɛ ‘mɔ ko kɛ etsɛmɛi eyawɔ’ lɛ, belɛ aatsɔɔ akɛ nakai mɔ lɛ etee Sheol.

Mɛni awie yɛ Salomo he beni egbo lɛ? Biblia lɛ haa hetoo akɛ: “Gbii abɔ ni Salomo ŋɔ ye maŋtsɛ yɛ Yerusalem yɛ Israel muu lɛ fɛɛ nɔ ji afii nyɔŋmai-ejwɛ. Ni Salomo kɛ etsɛmɛi lɛ yawɔ, ni afu lɛ yɛ etsɛ David maŋ lɛŋ; ni ebi Rehabeam baye maŋtsɛ yɛ esɛɛ.” (1 Maŋtsɛmɛi 11:42, 43) Enɛ hewɔ lɛ, shishinumɔ yɛ mli akɛ aaamu sane naa akɛ, Salomo yɛ Sheol loo Hades, ni eemɛ kɛyashi abaatee lɛ shi.

Sane naamuu nɛɛ tsɔɔ akɛ mɛi krokomɛi ni Ŋmalɛi lɛ wie amɛhe tɛ̃ɛ akɛ ‘amɛkɛ amɛtsɛmɛi lɛ yawɔ’ lɛ hu baanyɛ aná shitee. Yɛ anɔkwale mli lɛ, awieɔ maŋtsɛmɛi ni baye nɔ yɛ Salomo sɛɛ lɛ ateŋ mɛi babaoo ni yeee anɔkwa lɛ hu ahe yɛ nɛkɛ gbɛ nɔ. Ebaanyɛ eba lɛ nakai, ejaakɛ “gbohiiashitee baaba, ni jalɔi kɛ mɛi ni ejaaa fɛɛ baate shi.” (Bɔfoi lɛ Asaji 24:15) Yɛ anɔkwale mli lɛ, ja atee “mɛi fɛɛ ni yɔɔ gbohiiabui lɛ amli” lɛ ashi kɛba wala mli dani wɔbaanyɛ wɔle mɛi diɛŋtsɛ ni ná shitee lɛ. (Yohane 5:28, 29) No hewɔ lɛ, yɛ nɔ̃ najiaŋ ni wɔɔma nɔ mi doo akɛ abaatee mɔ ko shi loo ateeŋ lɛ shi lɛ, wɔtoɔ wɔtsui shi, ejaakɛ wɔyɛ hekɛnɔfɔɔ yɛ Yehowa kojomɔi ni tɔmɔ ko bɛ he lɛ mli.

[Shishigbɛ niŋmaa]