Ani Onuɔ He akɛ Ohe Bɛ Sɛɛnamɔ?

LENA ená susumɔi gbohii akɛ ehe bɛ sɛɛnamɔ yɛ afii abɔ ni ekɛhi shi lɛ mli. Ekɛɛ akɛ: “Afii abɔ ni akɛto mi kaabonaa shii abɔ yɛ migbekɛbiiashi lɛ fite bulɛ babaoo ni miyɔɔ kɛha mi diɛŋtsɛ mihe lɛ. Mibanu he akɛ mihe bɛ sɛɛnamɔ ko kwraa.” Simone hu wie nɔ ni ba enɔ yɛ eblayeiaŋ lɛ he akɛ, “Minu he yɛ mimligbɛ tɔ̃ɔ akɛ mihe bɛ sɛɛnamɔ kwraa ni ákɛ mihe ehiaaa tsɔ.” Etamɔ nɔ ni awerɛhoyeli ni naa wa ni jɛɔ henumɔi ni tamɔ nɛkɛ mli kɛbaa lɛ egbɛ eshwã waa ŋmɛnɛ. Nitsumɔhe ko ni oblahii kɛ oblayei tswaa jɛmɛ tɛlifoŋ koni awo amɛ ŋaa lɛ kɛɛ akɛ, mɛi ni tswaa jɛmɛ lɛ ateŋ mɛi aaafee mlijaa fã tsɔɔ akɛ “amɛnuɔ he be fɛɛ be akɛ amɛhe bɛ sɛɛnamɔ.”

Taakɛ mɛi ni le enɛ he saji jogbaŋŋ lɛ ateŋ mɛi komɛi tsɔɔ lɛ, nɔ ni haa mɛi nuɔ he akɛ amɛsaaa lɛ ji bɔ ni mɛi krokomɛi buɔ amɛ akɛ amɛhe bɛ sɛɛnamɔ lɛ. Susumɔ ni tamɔ nɛkɛ lɛ baanyɛ aba kɛ́ ayaa nɔ awieɔ mɔ ko hiɛ nyanyaanya, awieɔ ashiɔ mɔ lɛ babaoo bɔ ni esaaa, loo kɛ́ afee mɔ lɛ niseniianii loo ashishiu lɛ. Yɛ  nɔ ni kɛ enɛ baa lɛ fɛɛ sɛɛ lɛ, naagbai ni jɛɔ mli kɛbaa lɛ baanyɛ afee nɔ ni jeɔ mɔ nijiaŋ wui ni fiteɔ nii po. Helatsamɔ mli niiamlipɛimɔ ni afee nyɛsɛɛ nɛɛ lɛ tsɔɔ akɛ bei pii lɛ, aŋkroaŋkroi ni náa susumɔi gbohii yɛ amɛ diɛŋtsɛ amɛhe lɛ heee amɛ diɛŋtsɛ amɛhe kɛ mɛi krokomɛi amɛyeee, ni kɛtsɔ nakai feemɔ nɔ lɛ amɛfiteɔ amɛkɛ mɛi krokomɛi ateŋ wekukpaai kɛ naanyobɔi ní amɛyɔseee. Niiamlipɛimɔ ni afee lɛ he amaniɛbɔɔ lɛ tsɔɔ mli akɛ, “‘amɛtéeɔ’ shihilɛi diɛŋtsɛ ni amɛsumɔɔɔ kwraa akɛ amɛkɛkpeɔ lɛ ‘ashi.’”

Bei pii lɛ, mɛi ni nuɔ he nakai lɛ ji mɛi ni haa nɔ ni Biblia lɛ tsɛ́ɔ lɛ akɛ “ŋkɔmɔyeli” lɛ gbáa amɛnaa lɛ. (Lala 94:19) Amɛnuɔ he akɛ amɛjeee mɛi ni sa tsɔ. Kɛ sane ko ba lɛ, amɛkɛ oyaiyeli buɔ amɛhe fɔ́ akɛ enɛ jɛ amɛ. Eyɛ mli akɛ ekolɛ mɛi krokomɛi baajie amɛyi yɛ nibii ni amɛnyɛ amɛfee lɛ hewɔ moŋ, shi amɛnuɔ he yɛ amɛmligbɛ tɔ̃ɔ akɛ amɛtamɔ osatofoi ni etsɛŋ ni abaakpá amɛ shi. Akɛni mɛi babaoo heɔ amɛyeɔ akɛ amɛjeee mɛi ni sa akɛ amɛnáa miishɛɛ hewɔ lɛ, amɛkɛ amɛhe woɔ jeŋba ni fiteɔ mɔ lɛ mli aahu akɛ amɛnuɔ he akɛ amɛnyɛŋ amɛjaje shihilɛ lɛ. Akɛni Lena ni atsĩ etã kɛtsɔ hiɛ lɛ nu he akɛ ehe bɛ sɛɛnamɔ hewɔ lɛ, enyɛɛɛ eye nii jogbaŋŋ, ni ewie akɛ, “Minyɛɛɛ nɔ ko nɔ ko matsake.”

Ani hiɛnɔkamɔ ko kwraa bɛ kɛha mɛi ni “ŋkɔmɔyeli” ni tamɔ nɛkɛ lɛ haa amɛnuɔ he akɛ amɛhe bɛ sɛɛnamɔ yɛ amɛshihilɛ be ni eshwɛ lɛ fɛɛ mli? Ani abaanyɛ afee nɔ ko koni akɛye henumɔi ni tamɔ nakai lɛ anɔ? Biblia kɛ shishitoo mlai kɛ ŋaawoi kpakpai ni eye ebua mɛi babaoo ni eha amɛye naagba nɛɛ nɔ kunim lɛ haa. Mɛni ji shishitoo mlai nɛɛ ekomɛi, ni mɛɛ gbɛ nɔ eye ebua mɛi ni kɛ naagba nɛɛ kpeɔ lɛ koni amɛná miishɛɛ yɛ shihilɛ mli? Sane ni nyiɛ sɛɛ lɛ baatsɔɔ enɛ mli.