Mɛɛ Wolokasemɔ Baanyɛ Aha Oye Omanye yɛ Shihilɛ Mli?

ANI okɛ naagbai komɛi ekpe pɛŋ ní ná onɔ hewalɛ aahu akɛ onu he tamɔ mɔ ko ni miishiu yɛ nu mli? Kɛ́ oyatsuuu naagbai nɛɛ eko he nii jogbaŋŋ lɛ, kwɛ naagba wulu ni baanyɛ ajɛ mli aba! Akɛ nyɛmɔ ni akɛtsuɔ naagbai fɛɛ ahe nii yɛ omanyeyeli mli, ní asaŋ akɛkpɛɔ yiŋ hu yɛ nilee mli be fɛɛ be lɛ fɔɔɔ mɔ ko mɔ ko. Enɛ hewɔ wolokasemɔ he hiaa lɛ. Nɛgbɛ obaanyɛ oná wolokasemɔ ni baaye abua bo koni onyɛ odamɔ shihilɛ mli naagbai anaa lɛ yɛ?

Mɛi pii ni ji mɛi ni edara yɛ afii amli kɛ oblahii kɛ oblayei bluublu jieɔ yi akɛ skulyaa he hiaa. Nilelɔi komɛi po kɛɔ akɛ “amɛheɔ amɛyeɔ diɛŋtsɛ akɛ kɛ́ mɔ bɛ kɔleji yijiemɔ wolo lɛ, enaŋ nitsumɔ kpakpa ko etsu.” Shi kɛlɛ, adesai ahiamɔ nii babaoo yɛ ní nibii tamɔ hiɛyaa ni mɔ ená yɛ shihilɛ mli, nii ni eyɔɔ loo nibii ni enyɛ efee yɛ shihilɛ mli lɛ nyɛŋ atsu he nii. Ákɛ nɔkwɛmɔnɔ lɛ, ani skulyaa babaoo baanyɛ aha otsɔ fɔlɔ kpakpa, gbalashihilɛ mli hefatalɔ kpakpa loo naanyo kpakpa? Yɛ anɔkwale mli lɛ, gbɔmɛi ni abuɔ amɛ waa yɛ hiɛyaa ni amɛná yɛ woloŋlee gbɛfaŋ lɛ baanyɛ ajie sui gbohii akpo, amɛnine anyɛ shi yɛ amɛweku shihilɛ mli aloo amɛwo amɛsɛ̃ kpãa po.

Mɛi komɛi kɛ amɛhiɛ fɔ̃ɔ jamɔi ni yɔɔ lɛ anɔ kɛha tsɔsemɔ kɛ gbɛtsɔɔmɔ, shi amɛnijiaŋ jeɔ wui ejaakɛ amɛnáaa nɔ̃ diɛŋtsɛ ni baaye abua amɛ kɛkpee amɛshihilɛ mli naagbai lɛ anaa. Beni Emilia * ni jɛ Mexico lɛ maa enɛ nɔ mi lɛ, ewie akɛ: “Afii 15 ni eho nɛ ní minu he akɛ mi kɛ miwu nyɛŋ ahi shi dɔŋŋ. Wɔbéɔ daa gbi. Minyɛɛɛ maha ekpa dãanumɔ. Bei pii lɛ, ehe bahiaa ni mashi wɔbii bibii lɛ yɛ shia koni miyafo shi kɛtao miwu. Eha mihao waa. Mitee sɔlemɔ shii abɔ kɛyatao nɔ ko ni baaye abua mi kɛná minaagbai lɛ anaa tsabaa. Eyɛ mli akɛ akaneɔ Biblia lɛ yɛ be kɛ beaŋ moŋ, shi minuuu ŋaawoo kome folo po ni kɔɔ shihilɛ mli ni miyɔɔ lɛ he; ni asaŋ mɔ ko mɔ ko tsiii kɛbɛŋkɛɛɛ mi koni etsɔɔ mi nɔ ni esa akɛ mafee. Sɔlemɔtsu lɛ mli ní miyataa kɛ sɔlemɔi komɛi amli ní mitĩɔ shii abɔ lɛ haaa mitsui anyɔ mimli.” Ekolɛ mɛi krokomɛi hu anijiaŋ baaje wui kɛ́ amɛna akɛ amɛ diɛŋtsɛ amɛjamɔŋ hiɛnyiɛlɔi lɛ baaa amɛjeŋ jogbaŋŋ. Enɛ hewɔ lɛ, mɛi babaoo heee amɛyeee akɛ jamɔ baanyɛ ekɛ tsɔsemɔ loo woloŋlee ni baaha mɔ aye omanye yɛ shihilɛ mli lɛ aha.

No hewɔ lɛ, ekolɛ obaabi ohe akɛ, ‘Mɛɛ wolokasemɔ esa akɛ maná bɔni afee ni maye omanye yɛ shihilɛ mli?’ Ani anɔkwa Kristojamɔ baanyɛ aha sanebimɔ ni he hiaa nɛɛ hetoo? Abaasusu enɛ he yɛ sane ni nyiɛ sɛɛ lɛ mli.

[Shishigbɛ niŋmaa]