Amɛshiɛɔ Sanekpakpa lɛ Amɛtsɔɔ Mumuii

“AMƐHAA onáa mumɔŋ shidaamɔ!” Nɛkɛ ji bɔ ni nɔkwɛlɔ ni kwɛɔ mɛi ni edara yɛ afii amli lɛ ashihilɛhe ni yɔɔ Navalcarnero yɛ Madrid ni yɔɔ Spain lɛ nɔ lɛ wie nyɛsɛɛ nɛɛ yɛ bɔ ni Yehowa Odasefoi saraa enitsumɔhe lɛ hewɔ. Mɛni ha ewie nakai?

Mɛi ni yɔɔ Rosas del Camino shihilɛhe lɛ ateŋ mɛi babaoo ji mumuii. Shi kɛlɛ, akɛni Odasefoi lɛ ebɔ mɔdɛŋ amɛkase Spain Mumuii Awiemɔ hewɔ lɛ, amɛbaanyɛ amɛkɛ shihilɛhe nɛɛ mli bii lɛ agba sane. Nɔkwɛlɔ lɛ jie Odasefoi lɛ ayi yɛ amɛbe ni amɛkɛtsuɔ nii ní amɛkɛtsɔɔ mɛi ni yɔɔ hiamɔ nii krɛdɛɛ nɛɛ mumɔŋ sui kpakpai, ni amɛheee nɔ ko lɛ hewɔ. Eyɔse hewalɛ kpakpa ni Maŋtsɛyeli lɛ he sanekpakpa lɛ ená yɛ mɛi ni yɔɔ jɛmɛ lɛ anɔ lɛ. Ni mɛi ni yɔɔ jɛmɛ lɛ—titri lɛ mɛi ni nuuu nii jogbaŋŋ loo amɛnaaa nii jogbaŋŋ lɛ—hu náa Odasefoi lɛ asaramɔi lɛ ahe miishɛɛ waa diɛŋtsɛ.

Yehowa Odasefoi kɛ Eulogio ni ji mumuii ni yɔɔ jɛmɛ lɛ ateŋ mɔ kome ni eshwila hu lɛ kaseɔ Biblia lɛ amrɔ nɛɛ. Gbi ko beni nikasemɔ lɛ yaa nɔ lɛ, nuu nukpa ko ba jɛmɛ ni ekɛ lalafoo wiemɔ ko ni mɛi ni yɔɔ jɛmɛ lɛ fo koni amɛkɛjie hiɛsɔɔ ni amɛyɔɔ lɛ kpo lɛ baha Odasefonyo lɛ. Lalafoo wiemɔ lɛ yitso ji, “Odasefonyo ni Mɔ Aaatsɔ.” Efã ko kɛɛ akɛ: “Amɛtsui nyɔɔ amɛmli yɛ shihilɛ mli, amɛbaa amɛjeŋ jogbaŋŋ, ni Yehowa haa amɛnáa nilee ni haa mɔ mli filiɔ lɛ lɛ. Amɛyaa mɛi ashĩai amli ni amɛbaa daa nɛɛ akɛni amɛŋɔɔ amɛhiɛ amɛfɔ̃ɔ Yehowa nɔ lɛ hewɔ.”

Yehowa mli hekɛnɔfɔɔ nɛɛ nɔŋŋ ji nɔ ni tsirɛɔ Odasefoi ni yɔɔ je lɛŋ he fɛɛ he lɛ ateŋ mɛi babaoo ni amɛkaseɔ mumuii ni yɔɔ amɛmaŋ lɛ mli lɛ awiemɔ. Amɛtsɔɔ nɛkɛ gbɛ nɔ amɛshiɛɔ Biblia mli hiɛnɔkamɔ he shɛɛ sane ni woɔ mɔ hewalɛ lɛ amɛtsɔɔ mumuii lɛ.