Oniatsumɔi ní Haa Nyɔŋmɔ Tsui Nyɔɔ Emli

SANE ni nyiɛ sɛɛ nɛɛ jeee miishɛɛ sane. Maŋnyɛ Atalia etsɔ ŋaa gbɛ kɛ gbɔmɔgbee nɔ eshɔ̃ Yuda maŋtsɛyeli lɛ. Akɛni esusu akɛ agbe maŋtsɛyeli gboshiniyelɔi lɛ fɛɛ hewɔ lɛ, lɛ diɛŋtsɛ ewo ehe maŋnyɛ. Yoo kroko ni ji maŋtsɛ biyoo ni atsɛɔ lɛ Yehosheba ni sumɔɔ Yehowa kɛ e-Mla lɛ jogbaŋŋ lɛ kɛ ekãa ŋɔ abifao Yoash ni ji maŋtsɛyeli seshibii lɛ ateŋ mɔ kome lɛ eto. Yehosheba kɛ ewu ni ji Osɔfonukpa Yehoiada ŋɔ gboshiniyelɔ lɛ amɛto amɛshihilɛhe ni yɔɔ sɔlemɔtsu lɛ mli lɛ mli afii ekpaa.—2 Maŋtsɛmɛi 11:1-3.

Beni Yoash ye afii kpawo lɛ, no mli lɛ Osɔfonukpa Yehoiada efee klalo akɛ ebaaje gbɛjianɔ ni etoɔ koni ekɛkpá maŋnyɛ lɛ kɛjɛ sɛi ní etsɔ gbɛ gbonyo nɔ eshɔ̃ lɛ nɔ lɛ shishi. Ejie gbekɛ nuu lɛ kpo kɛjɛ teemɔhe lɛ, ni ewo lɛ maŋtsɛ ákɛ maŋtsɛyeli lɛ gboshiniyelɔ ni sa. Mɛi ni buɔ maŋtsɛ lɛ he lɛ tsirɛ Maŋnyɛ Atalia ni ji yiwalɔ lɛ yisɛɛ kɛjɛ sɔlemɔwe lɛ ni amɛyagbe lɛ, ni enɛ ha maŋbii lɛ ye amɛhe ni amɛná miishɛɛ. Yehoiada kɛ Yehosheba tsɔ amɛnifeemɔi anɔ amɛye amɛbua waa ni ato anɔkwa jamɔ shishi ekoŋŋ yɛ Yuda shikpɔŋ lɛ nɔ. Shi nɔ ni fe fɛɛ lɛ, amɛye amɛbua kɛha David odehei awekutɔkpãa ní baaha afɔ Mesia lɛ nɔ tsamɔ.—2 Maŋtsɛmɛi 11:4-21.

Esa akɛ Maŋtsɛ hee ni awo lɛ lɛ hu afee nii ni baaha Nyɔŋmɔ tsui anyɔ emli. Ehe miihia waa ni asaa Yehowa we lɛ. Hiɛnyam taomɔ ni naa wa ni Atalia ná akɛ lɛ pɛ eye Yuda nɔ lɛ ha aku hiɛ afɔ sɔlemɔtsu lɛ nɔ, ni ahà emli nibii fɛɛ hu. Enɛ hewɔ lɛ Yoash tswa efai shi akɛ ebaasaa sɔlemɔtsu lɛ. Etsɛɛɛ ni ekɛ famɔ ha koni abua shika ní he baahia naa kɛha Yehowa we lɛ saamɔ. Ekɛɛ akɛ: “Shika fɛɛ ni ajɔɔ nɔ ake ní akɛbaa Yehowa we lɛ, ni ji nuu fɛɛ nuu ni hoɔ yɛ kanemɔ mli lɛ shika lɛ, kɛ susuma fɛɛ susuma yi shika bɔ ni awo lɛ jara lɛ, shika fɛɛ hu ni mɔ ko jɛɔ lɛ diɛŋtsɛ etsui mli ekɛbaa Yehowa we lɛ, osɔfoi lɛ ateŋ mɔ fɛɛ mɔ ahe yɛ mɔ ni ele lɛ dɛŋ; ni amɛkɛsaa shĩa lɛ hei ní ekumɔ lɛ, he fɛɛ he ni aaana akɛ ekumɔ lɛ.”—2 Maŋtsɛmɛi 12:5, 6.

Maŋbii lɛ jɛ amɛsuɔmɔ mli amɛtsu onia. Shi kɛlɛ osɔfoi lɛ kɛ amɛtsui muu fɛɛ tsuuu nitsumɔ ni akɛwo amɛdɛŋ akɛ amɛsaa sɔlemɔtsu lɛ he nii lɛ. Enɛ hewɔ lɛ, maŋtsɛ lɛ kpɛ eyiŋ akɛ lɛ diɛŋtsɛ ebaakwɛ nitsumɔ lɛ nɔ, ni ekɛ famɔ ha akɛ atsu oniai srɔtoi lɛ fɛɛ awo adeka krɛdɛɛ ko mli tɛ̃ɛ. Eha Yehoiada kwɛ onia ní atsu lɛ nɔ, ni sane ni aŋma lɛ kɛɔ akɛ: “Kɛkɛ ni osɔfo Yehoiada wó adeka ko, ni egbu enaanɔ̃ lɛ mli fɔlɔ, ni eŋɔma afɔleshãa latɛ lɛ masɛi, kɛ́ ooya Yehowa we lɛ, eye oninejurɔgbɛ; ni osɔfoi ni kwɛɔ shinaa lɛ shi lɛ ŋɔɔ shika fɛɛ ni akɛbaa Yehowa we lɛ amɛwoɔ mli. Ni ebaa mli akɛ, kɛ́ amɛna akɛ shika lɛ efá yɛ adeka lɛ mli lɛ, maŋtsɛ lɛ woloŋmalɔ lɛ kɛ osɔfonukpa lɛ baa, ni amɛbafĩmɔɔ amɛwoɔ kotokui amli, ni  amɛkaneɔ shika ni aná yɛ Yehowa we lɛ. Ni amɛtuɔ shika ni aŋmɛ lɛ amɛwoɔ mɛi ni kwɛɔ Yehowa we lɛ nitsulɔi lɛ anɔ lɛ adɛŋ; ni amɛ hu amɛkɛwoɔ tsogbɔlɔi kɛ tsumalɔi ni tsuɔ nii yɛ Yehowa we lɛ anyɔmɔ, kɛ gbogbotswalɔi kɛ tɛkolɔi lɛ, ni akɛ eko heɔ mplaŋi kɛ tɛi ni ako, ní aŋɔsaa Yehowa we lɛ tsukoi lɛ, kɛ nɔ fɛɛ nɔ ni afiteɔ yɛ shĩa lɛ saamɔ hewɔ lɛ.”—2 Maŋtsɛmɛi 12:10-13.

Maŋbii lɛ jɛ amɛtsui muu fɛɛ mli amɛtsu onia lɛ. Asaa Yehowa jamɔhe lɛ bɔni afee ni aya nɔ ajá lɛ yɛ gbɛ ni bulɛ yɔɔ mli nɔ. No hewɔ lɛ, akɛ oniai fɛɛ ni atsu lɛ tsu nii yɛ gbɛ kpakpa nɔ. Maŋtsɛ Yoash ha atsu he nii yɛ nakai gbɛ nɔ!

Ŋmɛnɛ, Yehowa asafo ni anaa lɛ kwɛɔ jogbaŋŋ bɔni afee ni akɛ shikai ni akɛkeɔ lɛ fɛɛ atsu nii yɛ gbɛ ni ja nɔ koni akɛha Yehowa jamɔ ashwere, ni anɔkwa Kristofoi efee amɛnii tamɔ bɔ ni nakai blema Israelbii lɛ fee lɛ—amɛjɛɔ amɛtsui muu fɛɛ mli amɛfeɔ nakai. Ekolɛ ofata mɛi ni tsu onia bɔni afee ni Maŋtsɛyeli lɛ he nibii aya hiɛ yɛ nyɛsɛɛ sɔɔmɔ afi lɛ mli lɛ ahe. Nyɛhaa wɔkadia gbɛ̀i komɛi ni atsɔ nɔ akɛ oniai ní nyɛtsu lɛ tsu nii.

WOJI KƐ VIDIOI AFEEMƆ

Afee woji kɛ vidioi ni nyiɛ sɛɛ nɛɛ bɔni afee ni akase, ni ajara yɛ jeŋ fɛɛ:

• Woji Wuji: 47,490,247

• Woji Bibii ni Daraaa: 6,834,740

• Woji Bibii: 167,854,462

• Kalandai: 5,405,955

• Woji Tɛtrɛbii: 1,179,266,348

• Dɛhiɛmɔ Woji: 440,995,740

• Vidioi: 3,168,611

Akalaa woji yɛ Afrika, Amerika Kooyigbɛ, Amerika Teŋgbɛ shikpɔji anɔ, Amerika Wuoyigbɛ, Asia, Europa, kɛ Pacific ŋshɔkpɔ maji anɔ—fɛɛ feɔ maji 19.

“Atsɛɔ mi Katelyn May. Miye afii kpaanyɔ. Mihiɛ dɔlai 28, ni miisumɔ ni mikɛha nyɛ koni mikɛye mabua kɛha tsɔji ni akɛkalaa woji lɛ ahe nyɔmɔwoo. Nyɛnyɛmi yoo fioo, Katelyn.”

“Wɔweku lɛ kpe koni wɔsusu tsɔji heei ni akɛkalaa woji lɛ ahe. Wɔbii lɛ ní mɔ kome eye afii 11, ni mɔ kroko lɛ hu eye afii 9 lɛ kpɛ amɛyiŋ akɛ amɛbaajie shika ni amɛkɛtoɔ lɛ eko ni amɛkɛtsu onia. Wɔyɛ he miishɛɛ akɛ wɔkɛ amɛnɔ̃ lɛ aaafata wɔnɔ̃ lɛ he ní wɔkɛmaje nyɛ.”

 TSUMAA

Nɔ ni nyiɛ sɛɛ nɛɛ ji tsũi komɛi ni aamamɔ koni akɛfi Yehowa Odasefoi anitsumɔi asɛɛ:

• Maŋtsɛyeli Asai ní aamamɔ yɛ maji ni bɛ shika tsɔ lɛ anɔ: 2,180

• Kpee Asai: 15

• Nitsumɔhe Niji: 10

• Majimaji ateŋ nitsulɔi ni kɛ amɛhe eha ni yɔɔ be-fɛɛ sɔɔmɔ lɛ mli: 2,342

“Wɔfee wɔklɛŋklɛŋ kpee yɛ wɔ-Maŋtsɛyeli Asa hee lɛ mli yɛ otsi nɛɛ naagbee. Wɔyɛ miishɛɛ waa akɛ wɔná he ko kpakpa ni wɔbaajie Yehowa Nyɔŋmɔ, ni ji wɔ-Tsɛ lɛ yi yɛ. Wɔmiida Yehowa kɛ nyɛ hu shi ákɛ kɛtsɔ Maŋtsɛyeli Asai babaoo amaamɔ nɔ lɛ, atsu wɔhiamɔ nii ahe nii aha wɔ. Yɛ anɔkwale mli lɛ, wɔ-Maŋtsɛyeli Asa lɛ he baaba sɛɛnamɔ diɛŋtsɛ kɛha akutsoŋbii lɛ.”—Chile.

“Nyɛmimɛi hii kɛ yei lɛ ahiɛ sɔɔ yelikɛbuamɔ ni Yehowa asafo lɛ kɛhaa lɛ waa diɛŋtsɛ. Wɔyaa nɔ wɔwieɔ miishɛɛ be ni wɔkɛ mɛi ni ma tsu lɛ ná mli ŋɔɔmɔ lɛ he lolo kɛbashi ŋmɛnɛ.”—Moldova.

“Mi kɛ miŋa ye wɔgbalashihilɛ ní eye afii 35 lɛ he gbi jurɔ nyɛsɛɛ nɛɛ. Wɔmiisusu nɔ ni wɔbaahe kɛke wɔhe yɛ nakai gbi lɛ nɔ lɛ he, ni wɔkpɛ wɔyiŋ akɛ wɔkɛ nɔ ko baaku sɛɛ wɔkɛha Yehowa kɛ esafo lɛ, ejaakɛ kɛ́ jeee amɛdɛŋ yelikɛbuamɔ hewɔ kulɛ, ekolɛ wɔyeŋ omanye yɛ wɔgbalashihilɛ lɛ mli. Wɔbaasumɔ ni akɛ shika ni fata wolo ni wɔŋma nɛɛ he lɛ atsu nii kɛye abua kɛma Maŋtsɛyeli Asa yɛ maji ni bɛ shika tsɔ lɛ ateŋ ekome nɔ.”

“Minine shɛ gboshinii ko nɔ nyɛsɛɛ nɛɛ, ni akɛni ‘mitaomɔ nibii’ lɛ faaa, ni ‘mihiamɔ nii’ hu faaa kwraa hewɔ lɛ, miisumɔ ni nyɛkɛ shika ni fata wolo ni miŋma nɛɛ he lɛ aye abua kɛma Maŋtsɛyeli Asai ní he hiaa waa yɛ maji babaoo anɔ lɛ.”

 YELIKƐBUAMƆ NI AKƐHAA MƐI NI OSHARA ENINA AMƐ

Bei pii lɛ osharai baa trukaa yɛ naagbee gbii nɛɛ amli. Yehowa Odasefoi lɛ ateŋ mɛi babaoo tsuɔ onia kroko amɛfataa oniai ni amɛtsuɔ lɛ ahe bɔni afee ni anyɛ akɛye abua amɛnyɛmimɛi ni yɔɔ hei ni osharai eba yɛ lɛ. Ákɛ kaimɔnɔ lɛ, akɛ oniai ni atsuɔ kɛha mɛi ni oshara enina amɛ lɛ fataa jeŋ muu fɛɛ nitsumɔ lɛ nɔ̃ lɛ he. Nɔ ni nyiɛ sɛɛ nɛɛ ji hei ni Yehowa Odasefoi lɛ eye ebua mɛi ni oshara enina amɛ lɛ ateŋ ekomɛi:

• Afrika

• Asia

• Caribbean kpokpaa nɔ

• Pasifik ŋshɔkpɔi anɔ

“Mi kɛ miwu miida nyɛ shi waa yɛ nibii ni nyɛkɛbaye nyɛbua wɔ beni lasuogbelei lɛ fite wɔnibii ni wɔyɔɔ lɛ hewɔ. Wɔnyɛ wɔwo wɔtsu lɛ yiteŋ ekoŋŋ. Wɔhiɛ esɔ he waa akɛ nyɛbaye nyɛbua wɔ oya nɔŋŋ.”

“Atsɛɔ mi Connor, ni miye afii 11. Akɛni mina nɔ ni ba beni ŋshɔŋ shikpɔŋhosomɔ lɛ ba hewɔ lɛ, miisumɔ ni maye mabua. Miheɔ miyeɔ akɛ enɛ baaye ebua minyɛmimɛi hii kɛ yei lɛ.”

 BE-FƐƐ SƆƆLƆI KRƐDƐƐI

Kristofoi babaoo kɛ amɛbe fɛɛ sɔmɔɔ yɛ sanekpakpa jajemɔ nitsumɔ lɛ mli loo yɛ Betel shĩai amli. Akɛ onia ni ajɛɔ suɔmɔ mli akɛhaa lɛ yeɔ abuaa be-fɛɛ sɔɔlɔi lɛ ateŋ mɛi komɛi. Amɛteŋ mɛi komɛi ji mɛi ni nyiɛ sɛɛ nɛɛ:

• Maŋsɛɛ sanekpakpa shiɛlɔi: 2,635

• Nɔkwɛlɔi gbɛfalɔi: 5,325

• Betel nitsulɔi: 20,092

“Akɛni minyɛŋ mayasɔmɔ yɛ Betel amrɔ nɛɛ hewɔ lɛ [gbekɛ nuu ni eye afii enumɔ], miijɛ suɔmɔ babaoo mli mikɛ shika nɛɛ miimaje. Kɛji mida lɛ, maya ni mayatsu nii waa yɛ Betel.”

Biblia Mli Tsɔsemɔ ní Awo He Hewalɛ

Yesu Kristo kɛ nitsumɔ wo esɛɛnyiɛlɔi lɛ adɛŋ akɛ ‘amɛyafee jeŋmaji fɛɛ kaselɔi.’ (Mateo 28:19) Yɛ ewiemɔi lɛ atoiboo naa lɛ, Yehowa Odasefoi miishiɛ ni amɛmiitsɔɔ Biblia mli shɛɛ sane lɛ yɛ shikpɔji 235 nɔ, ni amɛbɛ dekã kwraa. Amɛkalaa Biblia kasemɔ he woji ni amɛjaraa yɛ wiemɔi 413 mli.

Yɛ anɔkwale mli lɛ, Kristofonyo ko be ni ekɛaatsu nii kɛye ebua mɛi babaoo ni amɛkase Nyɔŋmɔ kɛ E-yiŋtoi ahe nii lɛ ji nɔ ni he hiaa fe fɛɛ. Yehowa Odasefoi kɛ amɛbe kɛ amɛhewalɛ babaoo miitsu nii kɛmiiye kɛmiibua amɛkutsoŋbii. Amɛjɛɔ mlihilɛ mli amɛtsuɔ onia hu, ni oniai ni amɛtsuɔ lɛ fɛɛ eye ebua yɛ gbɛ̀i srɔtoi anɔ bɔni afee ni ale Yehowa gbɛi kɛ eyiŋtoi lɛ yɛ shikpɔŋ muu lɛ fɛɛ nɔ. Eba akɛ Yehowa baaya nɔ ajɔɔ mɔdɛŋ srɔtoi ni abɔɔ ni akɛye abua mɛi krokomɛi koni amɛkase ehe nii babaoo nɛɛ nɔ. (Abɛi 19:17) Suɔmɔ mli ni ajɛɔ ayeɔ abuaa nɛɛ haa Yehowa tsui nyɔɔ emli!—Hebribii 13:15, 16.

[Akrabatsa ni yɔɔ baafa 28-30]

Gbɛ̀i ni Mɛi Komɛi Tsɔɔ Nɔ Amɛkeɔ Nii

ONIATSUMƆI KƐHA JEŊ MUU FƐƐ NITSUMƆ LƐ

Mɛi pii kɛ shika ko fɔ̃ɔ shi, loo amɛtoɔ he gbɛjianɔ ni amɛkɛwoɔ oniatsumɔ adekai ni akadi amɛ akɛ “Oniatsumɔi Kɛha Jeŋ Muu Fɛɛ Nitsumɔ Lɛ—Mateo 24:14” lɛ mli.

Daa nyɔŋ nɔ lɛ, asafoi kɛ shika nɛɛ majeɔ kɛyaa Yehowa Odasefoi anitsumɔhe ni yɔɔ maŋ nɔ he ni amɛyɔɔ lɛ. Abaanyɛ akɛ shika ni ataoɔ akɛke lɛ amaje tɛ̃ɛ kɛyaha Watch Tower Bible and Tract Society of Pennsylvania, Attention Treasurer’s Office, 25 Columbia Heights, Brooklyn, New York 11201-2483, aloo abaanyɛ akɛya Yehowa Odasefoi anitsumɔhe nine ni sɔmɔɔ maŋ ni oyɔɔ mli lɛ. Kɛ́ akɛ tsɛk miitsɔ adrɛs ni yɔɔ yiteŋgbɛ lɛ nɔ kɛmiiha lɛ, esa akɛ aŋma “Watch Tower” yɛ nɔ akɛ mɛi ni aawo shika lɛ aaha. Abaanyɛ akɛ jwetrii aloo ojarawa nibii krokomɛi hu ake. Esa akɛ aŋma wolo fioo ko afata nɛkɛ nikeenii nɛɛ ahe ni akɛtsɔɔ akɛ amɛji nibii ni akɛmiike kwraa.

NIBII NI AKƐHA SHI AKƐKEKO LƐ AHE GBƐJIANƆTOO

Abaanyɛ akɛ shika aha Watch Tower koni ekɛtsu enibii ahe nii yɛ jeŋ fɛɛ. Shi kɛ́ mɔ ni kɛha lɛ miitao lɛ, akɛbaaha lɛ. Bɔni afee ni oná sane nɛɛ mlitsɔɔmɔ lolo lɛ, ofainɛ ŋmaa kɛyabi yɛ Treasurer’s Office lɛ kɛtsɔ adrɛs ni atsɔɔ yɛ yiteŋgbɛ lɛ nɔ.

EJURƆFEEMƆ NI AKPƐ YIŊ YƐ HE

Kɛfata shika ni akɛkeɔ kwraa lɛ he lɛ, ayɛ gbɛ̀i krokomɛi hu ni atsɔɔ nɔ akeɔ nii koni ehe aba sɛɛnamɔ kɛha Maŋtsɛyeli nitsumɔ lɛ yɛ jeŋ fɛɛ. Enɛɛmɛi ateŋ ekomɛi ji:

Inshuɔrans: Abaanyɛ aŋma Watch Tower gbɛi akɛ mɛi ni baaná inshuɔrans gbɛjianɔtoo lɛ he sɛɛ yɛ mɔ ni kɛhaa lɛ gbele sɛɛ, aloo mɛi ni baaná enitsumɔ hejɔɔmɔ mli gbɛjianɔtoo lɛ he sɛɛ.

Shika ni Akɛtoɔ Shikatoohe: Abaanyɛ aha shika ni akɛto, shika nɔ woji, aloo akɛ nitsumɔ mli hejɔɔmɔ mli shika ato aloo akɛha Watch Tower yɛ mɔ lɛ gbele sɛɛ, yɛ bɔ ni nyɛmaŋ lɛ shikatoohei ŋmɛɔ gbɛ ni afee lɛ naa.

Nitsumɔi Amli Gbɛfaŋnɔ kɛ Shika ni Akɛfaa Shikatoohei kɛ Ehe Kpa: Abaanyɛ akɛ nitsumɔi amli gbɛfaŋnɔ ni ayɔɔ kɛ shika ni akɛfaa shikatoohei kɛ ehe kpa lɛ aha Watch Tower akɛ nibii ni akɛmiike kwraa.

Shikpɔji kɛ Tsũi: Abaanyɛ akɛ shikpɔji kɛ tsũi ni baahi hɔɔmɔ, loo shĩa ko ni mɔ ko yɔɔ mli lɛ aha kɛtsɔ ke kwraa ni akɛaake nɔ, aloo ni abaashi shikpɔŋ loo tsũ lɛ yɛ mɔ ni kɛke lɛ dɛŋ, koni ehi tsũ lɛ mli aloo ekwɛ nɔ aahu kɛyashi be mli ni ebaagbo. Ha nitsumɔhe nine ni yɔɔ maŋ mli he ni oyɔɔ lɛ ale dani okɛ shikpɔŋ loo tsũ ko aha.

Daa Afi Shika ni Anáa yɛ Nikeenii Ahe: Daa afi shika ni anáa yɛ nikeenii ahe ji gbɛjianɔ ko ni atoɔ ni mɔ ko kɛ shika loo nibii ni jara wawai haa koni nitsumɔhe nine pɔtɛɛ ko ní Yehowa Odasefoi kɛtsuɔ nii lɛ akwɛ nɔ. Yɛ no najiaŋ lɛ, mɔ ni kɛha lɛ, loo mɔ ko ni mɔ ni kɛha lɛ ehala lɛ lɛ nine shɛɔ shika falɛ pɔtɛɛ ko nɔ daa afi yɛ ewala be fɛɛ mli. Atseɔ tóo yɛ shika ni mɔ ni kɛha lɛ nine shɛɔ nɔ lɛ nɔ yɛ afi mli ni daa afi shika ni anáa lɛ jeɔ nitsumɔ shishi lɛ.

Shamaŋsheo kɛ Nii ni Ahaa Mɔ Kroko Gbɛi Kãa Nɔ: Abaanyɛ akɛ nibii ni ayɔɔ loo shika ake Watch Tower kɛtsɔ shamaŋsheo ni aŋma yɛ mla naa nɔ, aloo abaanyɛ aha Watch Tower gbɛi akã shika ni akɛto lɛ nɔ akɛ mɔ ni baaná he sɛɛ. Bei komɛi lɛ, jamɔ gbɛjianɔtoo ko gbɛi ni kãa shika ko nɔ lɛ haa enáa toowoo mli heyelii komɛi.

Taakɛ gbɛi “charitable planning” (ejurɔfeemɔ ni akpɛ yiŋ yɛ he) tsɔɔ lɛ, nɛkɛ nikeei henɔi nɛɛ biɔ gbɛjianɔtoo yɛ mɔ ni kɛ nii keɔ lɛ gbɛfaŋ. Bɔni afee ni akɛye abua aŋkroaŋkroi ni miisumɔ koni amɛye amɛbua Yehowa Odasefoi ajeŋ muu fɛɛ nitsumɔ lɛ kɛtsɔ nɛkɛ ejurɔfeemɔ ni akpɛ yiŋ yɛ he nɛɛ ateŋ eko nɔ lɛ, afee wolo bibioo ko yɛ Ŋleshi Blɔfo wiemɔ kɛ Spain wiemɔ mli ni yitso ji Charitable Planning to Benefit Kingdom Service Worldwide (Ejurɔfeemɔ ni Akpɛ Yiŋ yɛ He Koni Ehe Aba Sɛɛnamɔ Kɛha Maŋtsɛyeli Nitsumɔ yɛ Jeŋ Fɛɛ). Aŋma wolo bibioo nɛɛ yɛ sanebimɔi babaoo ni nine eshɛ nɔ ni kɔɔ nikeenii, shamaŋsheoi, kɛ nii ni ahaa mɔ kroko gbɛi kãa nɔ lɛ he lɛ ahetoohamɔ naa. Mɛi babaoo enyɛ eye ebua kɛfi Yehowa Odasefoi ajamɔ lɛ kɛ nitsumɔi ni amɛtsuɔ kɛwaa adesai lɛ asɛɛ yɛ jeŋ fɛɛ, yɛ be mli ni amɛkane wolo bibioo lɛ ni amɛkɛ amɛ diɛŋtsɛ amɛmla kɛ toowoo he ŋaawolɔi esusu he lɛ sɛɛ, ni yɛ nakai beaŋ nɔŋŋ lɛ, amɛha sɛɛnamɔi ni amɛnáa yɛ toowoo mli yɛ enɛ feemɔ mli lɛ etee hiɛ. Nine baanyɛ ashɛ wolo bibioo nɛɛ nɔ kɛtsɔ eko ni aaashɛ kɛjɛ Charitable Planning Office (Nitsumɔhe ni Kwɛɔ Ejurɔfeemɔ ni Akpɛ Yiŋ yɛ He lɛ Nɔ) lɛ dɛŋ tɛ̃ɛ lɛ nɔ.

Bɔni afee ni oná enɛ mlitsɔɔmɔ lolo lɛ, obaanyɛ obi kɛjɛ Charitable Planning Office lɛ, kɛtsɔ woloŋmaa loo tɛlifoŋ tswaa nɔ, kɛtsɔ adrɛs ni atsɔɔ yɛ shishigbɛ lɛ loo Yehowa Odasefoi anitsumɔhe nine ni sɔmɔɔ maŋ ni oyɔɔ mli lɛ nɔ.

Charitable Planning Office

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telephone: (845) 306-0707

[He ni Mfoniri ni yɔɔ baafa 27 lɛ Jɛ]

Faithful vidio: Stalin: U.S. Army photo