“Esa Akɛ Aboɔ Nyɔŋmɔ Moŋ Toi Fe Gbɔmɛi”

Akpɔ̃ Wɔ Kɛ “Lá ni Jara Wa”

NIBII ni Yehowa efee ni tsɔɔ akɛ esumɔɔ wɔ lɛ ateŋ ewulu fe fɛɛ ji e-Bi koome lɛ ni etsu ni ekɛ ewala baha ákɛ kpɔmɔnɔ lɛ. Kpɔmɔnɔ ni tamɔ nakai he miihia wɔ ejaakɛ wɔji eshafeelɔi, ni ákɛ adesai ni yeee emuu lɛ, wɔteŋ “mɔ ko mɔ ko nyɛŋ enyɛmi ekpɔ̃, loo ní eeeha Nyɔŋmɔ eyi nii . . . koni ehi shi daa.” (Lala 49:7-10) Kwɛ bɔ ni wɔdaa Nyɔŋmɔ shi akɛ “eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ená naanɔ wala”!— Yohane 3:16.

Mɛɛ gbɛ nɔ kpɔmɔnɔ lɛ haa wɔyeɔ wɔhe? Nyɛhaa wɔsusua nibii ejwɛ komɛi ni suɔmɔ kpele ni Yehowa Nyɔŋmɔ jie lɛ kpo etsɔɔ wɔ nɛɛ haa wɔyeɔ wɔhe kɛjɛɔ he lɛ ahe wɔkwɛa.

Kpɔmɔnɔ lɛ Haa Wɔyeɔ Wɔhe

Klɛŋklɛŋ lɛ, Yesu afɔleshaa lɛ baanyɛ aha wɔye wɔhe kɛjɛ esha ni akɛfɔ́ wɔ lɛ he. Esha mli afɔ́ wɔ fɛɛ yɛ. Hɛɛ, eshafeelɔi ji wɔ kɛji akɛ wɔkuko Yehowa mla po mli. Yɛ mɛɛ gbɛ nɔ? Romabii 5:12 lɛ kɛɔ akɛ: “Gbɔmɔ kome [Adam] nɔ esha tsɔ kɛba je lɛŋ, ni gbele tsɔ esha nɔ kɛba.” Akɛni Adam eshafeelɔ lɛ bii ji wɔ hewɔ lɛ, wɔ hu afɔ́ wɔ akɛ mɛi ni yeee emuu. Shi kɛlɛ, kpɔmɔnɔ lɛ jara ni awo lɛ haa wɔyeɔ wɔhe kɛjɛɔ esha ni akɛfɔ́ wɔ ni yeɔ wɔ nyɔŋ lɛ dɛŋ. (Romabii 5:16) Yesu ‘sa enaa gbele eha mɔ fɛɛ mɔ,’ ni ejie nibii gbohii ni esha kɛba Adam shwiei anɔ lɛ kɛtee.—Hebribii 2:9; 2 Korintobii 5:21; 1 Petro 2:24.

Nɔ ni ji enyɔ lɛ, kpɔmɔnɔ lɛ baanyɛ aha wɔye wɔhe kɛjɛ awui ni gbele yeɔ lɛ he. “Esha dɛŋ nyɔmɔwoo lɛ gbele ni.” (Romabii 6:23) Eshafeemɔ he toigbalamɔ ji gbele. Kɛtsɔ Nyɔŋmɔ Bi lɛ gbele afɔleshaa lɛ nɔ lɛ, adesai toibolɔi náa hegbɛ akɛ amɛaaná naanɔ wala. Yɛ anɔkwale mli lɛ, “mɔ ni heɔ bi lɛ nɔ yeɔ lɛ, eyɛ naanɔ wala; shi mɔ ni booo bi lɛ toi lɛ, enaŋ wala, shi moŋ Nyɔŋmɔ mlifu hiɔ enɔ.”—Yohane 3:36.

Kadimɔ akɛ, ja wɔná hemɔkɛyeli yɛ Nyɔŋmɔ Bi lɛ mli dani wɔbaanyɛ wɔye wɔhe kɛjɛ nibii gbohii ni esha kɛba lɛ ahe. Enɛ biɔ ni wɔfee tsakemɔi yɛ wɔshihilɛ mli ni wɔfee Nyɔŋmɔ suɔmɔnaa nii. Esa akɛ wɔtsi wɔhe kɛjɛ nibii fɔji ni wɔfeɔ lɛ fɛɛ ahe, koni wɔfee nibii ni saa Nyɔŋmɔ hiɛ. Bɔfo Petro kɛɛ akɛ esa akɛ ‘wɔtsake wɔtsui, ni wɔku wɔsɛɛ, koni agbe wɔhe eshai lɛ.’—Bɔfoi lɛ Asaji 3:19.

Nɔ ni ji etɛ lɛ, Yesu afɔleshaa lɛ haa wɔyeɔ wɔhe kɛjɛɔ henilee ni buɔ mɔ fɔ he. Mɛi fɛɛ ni jɔɔ amɛhe nɔ amɛhaa Yehowa, ní amɛbatsɔmɔɔ e-Bi lɛ kaselɔi ni abaptisi amɛ lɛ naa hejɔɔmɔ. (Mateo 11:28-30) Yɛ emuu ni wɔyeee lɛ fɛɛ sɛɛ lɛ, wɔkɛ henilee ni mli tse sɔmɔɔ Nyɔŋmɔ, ni no haa wɔmli filiɔ wɔ diɛŋtsɛ. (1 Timoteo 3:9; 1 Petro 3:21) Kɛ́ wɔjaje wɔhe eshai lɛ wɔtsɔɔ, ni wɔje wɔgbɛ̀i fɔji lɛ ahe lɛ, anaa wɔ mɔbɔ, ni no haaa wɔhenilee abu wɔ fɔ.—Abɛi 28:13.

Eyeɔ Buaa Wɔ, ni Ehaa Wɔnáa Hiɛnɔkamɔ

Naagbee lɛ, hemɔkɛyeli ni wɔnáa yɛ kpɔmɔnɔ lɛ mli lɛ haa wɔyeɔ wɔhe kɛjɛɔ gbeyeishemɔ akɛ wɔnaŋ shidaamɔ kpakpa yɛ Nyɔŋmɔ hiɛ lɛ he. Bɔfo Yohane ŋma akɛ: “Kɛ́ mɔ ko fee esha jiŋŋ, wɔyɛ mlidamɔlɔ [“yelikɛbualɔ,” NW] yɛ tsɛ lɛ ŋɔɔ, Yesu Kristo, jalɔ lɛ.” (1 Yohane 2:1) Beni bɔfo Paulo wieɔ nii ni Yesu  tsuɔ ákɛ yelikɛbualɔ lɛ he lɛ, eŋma akɛ: “Enyɛɔ mɛi ni tsɔɔ enɔ kɛbaa Nyɔŋmɔ ŋɔɔ lɛ ayiwala ehereɔ kwraa, ejaakɛ eyɛ daa koni edamɔ mli eha amɛ.” (Hebribii 7:25) Bei abɔ ni esha kã he eyɔɔ wɔhe nɛɛ, Osɔfonukpa Yesu Kristo yelikɛbuamɔ he baahia wɔ, bɔni afee ni wɔná shidaamɔ kpakpa yɛ Nyɔŋmɔ hiɛ. Yesu sɔmɔɔ ákɛ osɔfonukpa ehaa wɔ yɛ mɛɛ gbɛ nɔ?

Yesu shitee yɛ afi 33 Ŋ.B. sɛɛ gbii 40 lɛ, ekwɔ kɛtee ŋwɛi, ni ekɛ “[e]lá ni jara wa” lɛ yaha Nyɔŋmɔ. No hewɔ lɛ, etsɛŋ ni Yesu baaha adesai toibolɔi aye amɛhe kɛjɛ esha kɛ gbele he. * (1 Petro 1:18, 19) Belɛ, ani okpɛlɛɛɛ nɔ akɛ esa akɛ wɔsumɔ Yesu Kristo, ni wɔfee toiboo wɔha lɛ?

Kɛfata he lɛ, esa akɛ wɔsumɔ Yehowa hu, ni wɔbo lɛ toi. Lɛ eto ‘kpɔmɔnɔ ni haa wɔyeɔ wɔhe’ lɛ he gbɛjianɔ. (1 Korintobii 1:30) Lɛ eduroɔ wɔ wala ŋmɛnɛ, ni ákɛ wɔbaaná naanɔ wala wɔsɛɛ lɛ hu yɛ lɛ nɔŋŋ edɛŋ. No hewɔ lɛ, nilee yɛ mli akɛ ‘wɔɔbo Nyɔŋmɔ moŋ toi fe gbɔmɛi.’—Bɔfoi lɛ Asaji 5:29.

[Shishigbɛ niŋmaa]

[Akrabatsa/Mfonirii ni yɔɔ baafa 9]

ANI OLE?

• Mu Gɔŋ lɛ nɔ Yesu jɛ ekwɔ kɛtee ŋwɛi.—Bɔfoi lɛ Asaji 1:9, 12.

• Beni Yesu yaa ŋwɛi lɛ, ebɔfoi anɔkwafoi lɛ pɛ na lɛ.—Bɔfoi lɛ Asaji 1:2, 11-13.