“Galilea Fɛɛ Hewulamɔ Nɔ̃ Lɛ”

MAŊ ko yɛ ni atsĩii egbɛi tã yɛ Sanekpakpai lɛ amli he ko he ko, ni ekɛ Nazaret ni ji he ni Yesu da yɛ lɛ teŋ jɛkɛmɔ aaafee kilomitai 6.5 pɛ, ni maŋ nɛɛ kã Nazaret kooyi-anaigbɛ. Kɛlɛ, Flavius Josephus ni ji Yudanyo yinɔsaneŋmalɔ ni ehe gbɛi ni hi shi yɛ klɛŋklɛŋ afii 100 lɛ mli lɛ jie nakai maŋ lɛ yi akɛ eji “Galilea fɛɛ hewulamɔ nɔ̃ lɛ.” Nɛkɛ maŋ nɛɛ ji Sepphoris. Mɛni wɔle yɛ maŋ nɛɛ he?

Yɛ Herode Kpeteŋkpele lɛ gbele sɛɛ lɛ, ekolɛ yɛ afi 1 D.Ŋ.B. lɛ, Sepphorisbii lɛ tse atua amɛshi Roma, ni no ha abakpata amɛmaŋ lɛ hiɛ. Herode bi Antipa baŋɔ Galilea kɛ Peraea ákɛ gboshinii, ni ehala Sepphoris ní akpatã hiɛ lɛ ekɛfee emaŋtiase hee. Akɛ Helabii kɛ Romabii lɛ atsumaa he ŋaai tswa maŋ lɛ ama shi ekoŋŋ, shi Yudafoi titri ji mɛi ni hi jɛmɛ. Taakɛ Nilelɔ kpanaa Richard A. Batey tsɔɔ lɛ, “ebatsɔ maŋ titri ni nɔyelɔ lɛ jɛɔ jɛmɛ ekudɔɔ Galilea kɛ Perea,” kɛyashi beni Antipa to Tiberia maŋ lɛ shishi aaafee afi 21 Ŋ.B. ni ekɛbaye Sepphoris najiaŋ akɛ maŋtiase. Yesu hi shi yɛ he ko ni bɛŋkɛ maŋ lɛ yɛ nakai beaŋ.

Nilelɔ kpanaa James Strange ni yatsa shi yɛ he ni Sepphoris maŋ lɛ hi lɛ, heɔ eyeɔ akɛ be ko ni eho lɛ maŋ lɛ yɛ blema niŋmaai atoohei, jwetrii atoohe, tawuu nibii atoohe, shikatoohei, kɛ jaji ni ahɔ̃ɔ nibii ni akɛ sũ fee, glase, nibii ni akɛ dade fee, jwinei, kɛ niyenii srɔtoisrɔtoi fɛɛ yɛ jɛmɛ. Ayɛ nilolɔi kɛ atadei ahe guɔyelɔi, kɛ shwapoi ni ahɔ̃ɔ kɛŋtɛi, tsu mli saamɔ nibii, ojeŋmai, kɛ nibii krokomɛi ni tamɔ enɛɛmɛi yɛ jɛmɛ. Asusuɔ akɛ maŋbii lɛ ayifalɛ yɛ nakai bei lɛ amli lɛ ji aaafee 8,000 kɛmiimɔ 12,000.

Ani Yesu tee nakai maŋ wulu ni dekã bɛ jɛmɛ, ni kɛ Nazaret teŋ jɛkɛmɔ ji ŋmɛlɛtswaa kome gbɛnyiɛmɔ lɛ mli? Sanekpakpai lɛ haaa wɔ hetoo. Shi kɛlɛ, The Anchor Bible Dictionary lɛ wie akɛ, nakai “gbɛ kome ni afɔɔ nɔ tsɔmɔ, ni jɛɔ Nazaret kɛyaa Kana yɛ Galilea lɛ tsɔɔ Sepphoris maŋ lɛ mli.” (Yohane 2:1; 4:46) Kɛ́ oyɛ Nazaret lɛ, obaanyɛ ona gɔŋ ni yɔɔ Sepphoris lɛ, ni enɔ kwɔ fe nujɔɔ ni yɔɔ jɛmɛ lɛ aaafee mitai 120. Mɛi komɛi heɔ amɛyeɔ akɛ ekolɛ maŋ nɛɛ ji nɔ ni yɔɔ Yesu jwɛŋmɔ mli beni ekɛ abɛbua lɛ ha akɛ “maŋ ni ma gɔŋ nɔ lɛ, anyɛŋ aŋɔtee” lɛ.—Mateo 5:14.

Yɛ Yerusalem hiɛkpatamɔ yɛ afi 70 Ŋ.B. sɛɛ lɛ, Sepphoris batsɔ Yudafoi lɛ amaŋtiase wulu fe fɛɛ ni yɔɔ Galilea, ni yɛ sɛɛ mli lɛ ebatsɔ he ni Akuashɔŋ lɛ, ni ji Yudafoi akojomɔhe wulu lɛ hi. Yɛ be kpalaŋŋ mli lɛ, etee nɔ efee Yudafoi lɛ awolokasemɔhe titri ko.

[Shikpɔŋ he mfoniri/Mfoniri ni yɔɔ baafa 32]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

Galilea Ŋshɔ

GALILEA

Kana

Tiberia

SEPPHORIS

Nazaret

PEREA

[He ni Mfoniri ni yɔɔ baafa 32 lɛ Jɛ]

Sũ Nibii: Excavated by Wohl Archaeological Museum, Herodian Quarter, Jewish Quarter. Owned by Company for the Reconstruction of the Jewish Quarter in the Old City of Jerusalem, Ltd