Tɛlivishiŋ Ani Anyɛɔ Ashiɔ Bi Ahaa lɛ ni Ehiɔ?

BEI komɛi lɛ, tɛlivishiŋ ni mɔ sũɔ ehaa ebii ni amɛkwɛɔ lɛ haa ehe jɔɔ lɛ ni enyɛɔ etsuɔ nibii komɛi ni etsuɔ he nii lɛ ahe nii. Shi mɛɛ hewalɛ enɛ baanyɛ aná yɛ gbekɛbii lɛ anɔ?

Adafitswaa wolo ni ji The New York Times lɛ bɔ amaniɛ akɛ: “Nibii ni haoɔ mɔ ní ajieɔ yɛ tɛlivishiŋ nɔ lɛ baanyɛ aná gbekɛbii bibii kwraa lɛ po anɔ hewalɛ.” Yɛ niiamlipɛimɔ ko ni afee nyɛsɛɛ nɛɛ lɛ mli lɛ, ajie oblayoo ko ni kɛ shwɛmɔ nii ko miishwɛ yɛ gbɛ̀i srɔtoi anɔ yɛ tɛlivishiŋ nɔ atsɔɔ gbekɛbii ni amɛye afi komekomei. Times adafitswaa wolo lɛ bɔ amaniɛ akɛ: “Kɛ́ oblayoo lɛ fee nɔ ko ní tsɔɔ akɛ eeshe shwɛmɔ nii lɛ gbeyei lɛ, gbekɛbii lɛ fɔ̃ɔ shwɛmɔ nii lɛ kɛ shwɛmɔ, ni bei pii lɛ amɛfeɔ basaa, amɛtũɔ amɛhiɛ, amɛfeɔ gidigidi, loo amɛjwaa yaafo. Shi kɛ́ oblayoo lɛ kɛ shwɛmɔ nii lɛ shwɛ kɛ miishɛɛ lɛ, gbekɛbii lɛ náa he miishɛɛ babaoo akɛ amɛkɛ shwɛmɔ nii lɛ aaashwɛ.”

Ŋwanejee ko bɛ he akɛ tɛlivishiŋ nyɛɔ enáa gbekɛbii ni darako anɔ hewalɛ. Shi ani enyɛɔ enáa gbekɛbii anɔ hewalɛ afii babaoo? Datrɛfonyo Naoki Kataoka ní tsɔɔ gbekɛbii ahelai anaa tsabaa yɛ Kawasaki Medical College ni yɔɔ Kurashiki yɛ Japan lɛ kpa gbekɛbii babaoo ni feɔ diŋŋ waa, ní ewa akɛ aaana yɛ amɛhiɛ kɛji amɛyɛ miishɛɛ loo amɛmli efũ lɛ ashi ekwɛ. Eyɔse akɛ, amɛteŋ mɔ fɛɛ mɔ kwɛ tɛlivishiŋ loo vidio bei saŋŋ. Gbekɛbii nɛɛ ateŋ mɔ kome ni eye afii enyɔ lɛ nyɛɛɛ ekɛ mɔ agba sane, ni wiemɔi enyɔoo ko pɛ jɛɔ enaa. Beni eye afi lɛ, daa gbi lɛ, ekwɛɔ vidio kɛjɛ leebi kɛyashiɔ gbɛkɛ. Yɛ ŋaa ni datrɛfonyo lɛ wo gbekɛ nuu nɛɛ mami hewɔ lɛ, eha ebi lɛ kpa vidio lɛ kwɛmɔ, ni ekɛ lɛ bɔi sanegbaa kɛtsɔ shwɛmɔ nɔ, ni no feemɔ sɛɛ dani fiofio lɛ, ebinuu lɛ naa bɔi tsemɔ. Hɛɛ, esa akɛ fɔlɔi kɛ amɛbii agba sane.

Yehowa Nyɔŋmɔ ni ji weku gbɛjianɔtoo lɛ Shishitolɔ lɛ ma sɛɛnamɔ ni yɔɔ sanegbaa ni hi fe fɛɛ ni akɛ bii aaaná lɛ nɔ mi. Blema beebe ni ekɛɛ ewebii lɛ akɛ: “Ojwɛŋ [Nyɔŋmɔ wiemɔ lɛ] nɔ otsɔɔ obii, ni owie he, beni ota shi yɛ oshĩa lɛ kɛ beni onyiɛ gbɛ teŋ kɛ beni okã shi kɛ beni ote shi.” (5 Mose 6:7) Fɔlɔi, nyɛkadia akɛ, wiemɔ kɛ nɔkwɛmɔnɔ kpakpa ni mɔ feɔ ji gbɛ ni hi fe fɛɛ ni atsɔɔ nɔ atsɔɔ gbekɛbii “gbɛ ni sa” akɛ amɛtsɔ nɔ, ni tɛlivishiŋ nyɛŋ enɛ he nii atsu.—Abɛi 22:6.