Gbɛfãa yɛ Ŋshɔ Wulu ko Hiɛ ní Alaajeee

ŊSHƆKPƆI wuji kɛ ŋshɔkpɔi bibii ni fa fe 1,200 ji nɔ ni feɔ Marshall Islands lɛ, ni ŋshɔkpɔi nɛɛ ateŋ babaoo nɔ kwɔ fioo pɛ fe ŋshɔ hiɛ kwɔlɛ. Kɛ́ aje wuo kɛtee ŋshɔ lɛ hiɛ fioo pɛ lɛ, anaaa ŋshɔkpɔi nɛɛ dɔŋŋ. Ni kɛlɛ, Marshallbii ni hi shi yɛ blema, ní kɛ lɛji fãa gbɛ yɛ ŋshɔ hiɛ lɛ nyɛɔ amɛfãa gbɛ kɛjɛɔ ŋshɔkpɔ bibioo nɔ kɛyaa ŋshɔkpɔ bibioo kroko nɔ, ni amɛnyɛɔ amɛfãa gbɛ aaafee kilomitai 2,000,000 kɛyaa kɛbaa yɛ Pacific Ŋshɔ lɛ hiɛ ní amɛlaajeee. Mɛɛ gbɛ nɔ amɛtsɔ amɛfee enɛ? Amɛkɛ “shikpɔŋ he mfonirii” ni bɛ haŋtsii, ni akɛ bɔlɔwui fee, ní ja kɛmɔ shi lɛ tsuɔ nii kɛha gbɛtsɔɔmɔ.

Marshallbii lɛ kpa shi amɛna akɛ, kɛ́ eshwɛ aaafee kilomitai 30 ní amɛbaanina ŋshɔkpɔ ko lɛ, ŋshɔkei lɛ kuɔ yɛ gbɛ̀i pɔtɛɛi komɛi anɔ. Enɛ hewɔ lɛ ehe bahia ni amɛkase ŋshɔkei henɔi babaoo ahe nii, ni bɔlɔwui ni akɛfee shikpɔŋ he mfoniri lɛ yeɔ ebuaa amɛ ni amɛkaiɔ ŋshɔkei nɛɛ. Te shikpɔŋ he mfonirii nɛɛ tamɔ ha tɛŋŋ? Taakɛ onaa yɛ mfoniri lɛ mli lɛ, afimɔɔ tso ko ni tamɔ tɛŋ lɛ shishi fãji loo bɔlɔwui amli, ni akɛ eko beleɔ ekroko mli, ni enɛɛmɛi damɔɔ shi kɛhaa ŋshɔkei henɔi srɔtoi. Afimɔɔ teremai bibii kɛkpɛtɛɔ nɔ kɛkadiɔ hei pɔtɛɛi ni ŋshɔkpɔi yɔɔ lɛ.

Ahaaa mɛi ale shikpɔŋ he mfoniri ni akɛ bɔlɔwui fee ní akɛfãa gbɛ lɛ he sane ko kwraa afii babaoo, mɛi ni ahaa amɛleɔ enɛ he sane pɛ ji aŋkroaŋkroi komɛi ni ahala. Te oblanyo ko ní ji lɛlɛ kudɔlɔ lɛ aaafee tɛŋŋ akase shikpɔŋ he mfoniri nɛɛ kɛ nitsumɔ? Kɛtsɔ tsɔsemɔ kɛ ekɛ nitsumɔ nɔ pɛ. Lɛlɛ kudɔlɔ ko ni yɔɔ niiashikpamɔ lɛ tsɔɔ lɛlɛ kudɔlɔ ni ji oblanyo lɛ nii yɛ teemɔŋ, ekolɛ kɛtsɔ gbɛ ni ekɛ lɛ fãa kɛyaa ŋshɔkpɔi ni bɛŋkɛ lɛ anɔ lɛ nɔ. Kɛ́ nikaselɔ lɛ kpa ŋshɔkei henɔi srɔtoi lɛ ashi lɛ, enáa hekɛnɔfɔɔ yɛ shikpɔŋ he mfoniri nɛɛ kɛ nitsumɔ mli. Yɛ naagbee lɛ, ekome too ebaanyɛ ekɛ lɛlɛ afã gbɛ yɛ ŋshɔ lɛ hiɛ.

Nakai nɔŋŋ hu Nyɔŋmɔ Wiemɔ ni ji Biblia lɛ baanyɛ afee nɔ ni tsɔɔ wɔ gbɛ yɛ wala gbɛ lɛ nɔ. Shishijee lɛ, ekolɛ mɔ ko baaye abua wɔ koni wɔnu Ŋmalɛi lɛ amli shishijee tsɔɔmɔi lɛ ashishi. No sɛɛ lɛ, beni wɔyaa nɔ wɔkaseɔ Nyɔŋmɔ Wiemɔ lɛ ní wɔkɛ emli shishitoo mlai lɛ tsuɔ nii lɛ, wɔnáa hekɛnɔfɔɔ yɛ nɔ ni ekɛɔ lɛ mli. Akɛɛ Yoshua ni ji Israelbii lɛ ahiɛnyiɛlɔ lɛ akɛ eya nɔ ekane Nyɔŋmɔ Wiemɔ lɛ, koni ‘efee tamɔ bɔ ni aŋma yɛ mli lɛ pɛpɛɛpɛ.’ Nyɔŋmɔ kɛɛ Yoshua akɛ: “No aaaha ofee nɔbatsɛ kɛ hiɛshikalɔ.” (Yoshua 1:8) Hɛɛ, Biblia lɛ baanyɛ atsɔɔ wɔ gbɛ kpakpa ni baaha wɔye omanye yɛ shihilɛ mli.

[He ni Mfoniri ni yɔɔ baafa 32 lɛ Jɛ]

© Greg Vaughn