Ani Wɔbaanyɛ Wɔle Nyɔŋmɔ?

“SHI ENƐ JI NAANƆ WALA LƐ, ÁKƐ AMƐLE . . . ANƆKWA NYƆŊMƆ KOME LƐ.”—YOHANE 17:3.

BƆFO Paulo wie akɛ: “Oo, bɔ ni Nyɔŋmɔ nifalɛ kɛ ŋaa kɛ nilee mli kwɔ ha nɛ!” Ekɛfata he akɛ: “Ekojomɔi lɛ anyɛɛɛ shishi ana, ni egbɛ̀i lɛ hu anyɛɛɛ sɛɛ mo aja!” (Romabii 11:33) Ani esa akɛ wiemɔ nɛɛ aha wɔmu sane naa akɛ adesai nyɛŋ anu Nyɔŋmɔ he nilee kɛ ŋaalee lɛ shishi, ni tsɔɔ akɛ wɔnyɛŋ wɔle lɛ ni wɔnyɛŋ wɔle eyiŋtoi lɛ hu?

Mɛi ni kpɛlɛɔ jamɔŋ susumɔ ni ale lɛ akɛ via negativa lɛ nɔ lɛ baakɛɛ bo akɛ hɛɛ. Beni wolo ni ji The Encyclopedia of Religion lɛ wieɔ susumɔ nɛɛ he lɛ, ekɛɛ akɛ: “Nyɔŋmɔ he nilee yaa shɔŋŋ kwraa fe nibii fɛɛ ni abaanyɛ akase yɛ ehe. . . . Anyɛŋ awo Nyɔŋmɔ gbɛi aloo atsɔɔ bɔ ni eyɔɔ ha. Mɔdɛŋ ni aaabɔ akɛ awo Nyɔŋmɔ gbɛi loo atsɔɔ bɔ ni eyɔɔ ha lɛ baatsɔɔ akɛ aaaba lɛ shi . . . ejaakɛ lɛ ji ofe ni enɔ kwɔ fe nɔ fɛɛ nɔ. . . . Anyɛŋ akase ehe nii ejaakɛ enɔ kwɔ fe bɔ ni aaanyɛ ehe nii akase.” *

Newsweek wolo tɛtrɛɛ lɛ tsɔɔ mli akɛ, mɛi ni yɔɔ hei ní jeee mɔ he sane ko ji Nyɔŋmɔjamɔ lɛ ateŋ mɛi babaoo ekpɛlɛ “susumɔ hee ko nɔ,” ni no haa amɛheɔ amɛyeɔ akɛ “anɔkwale koome pɛ yɔɔ, ni no ji akɛ anɔkwale ko bɛ he ko he ko.”

Fɛɛ sɛɛ lɛ, mɛi babaoo yɛ ni náaa saji ni amɛbiɔ yɛ yiŋtoo hewɔ ni ayɔɔ wala mli lɛ ahetoo. Mɛi nɛɛ naa naagbai ni kumɔɔ mɔ tsui ní ohia, hela, kɛ awuiyeli kɛbaa mɛi anɔ lɛ. Yɛ amɛ gbɛfaŋ lɛ, bɔ ni nɔ fɛɛ nɔ nyɛɔ ebaa mɔ nɔ yɛ shihilɛ mli lɛ yɛ nijiaŋwujee diɛŋtsɛ. Ekolɛ, amɛbaasumɔ ni amɛná sanebimɔi nɛɛ ahetoo, shi kɛji ebaaalɛ nakai lɛ, no baanyɛ aha amɛmu sane naa akɛ abɛ nakai saji lɛ ahetoo. Nɔ ni ejɛ mli kɛba ji akɛ, amɛteŋ mɛi babaoo ni kã he amɛheɔ amɛyeɔ akɛ Nyɔŋmɔ yɛ lɛ etsi amɛhe kɛjɛ Nyɔŋmɔjamɔ asafoi ahe, ni amɛ diɛŋtsɛ amɛfeɔ nibii ni amɛsusuɔ akɛ no baaha amɛbɛŋkɛ lɛ.

Nɔ ni Biblia lɛ Kɛɔ yɛ Sane Nɛɛ He

Esa akɛ mɛi ni heɔ Biblia lɛ amɛyeɔ ni amɛkpɛlɛɔ Yesu Kristo nɔ ákɛ Nyɔŋmɔ Naawielɔ lɛ aná he miishɛɛ akɛ amɛaale nɔ ni Biblia lɛ kɛɔ yɛ sane nɛɛ he. Ekolɛ, obaakai akɛ be ko lɛ,  Yesu wie gbɛ̀i enyɔ komɛi ni ji “gbɛ tɛtɛrɛɛ . . . ni kɛ mɔ yaa hiɛkpatamɔ mli” kɛ “gbɛ ni etsa . . . ni kɛ mɔ yaa wala mli” lɛ ahe. Beni etsɔɔ bɔ ni aaafee ayɔse mɛi ni nyiɛ gbɛ̀i srɔtoi nɛɛ anɔ lɛ, ekɛɛ akɛ: “Amɛyibii lɛ nyɛkɛaale amɛ.” Mɛɛ yibii? Beni Yesu feɔ lɛ faŋŋ akɛ enɛ kɔɔɔ nibii ni jɛɔ amɛnaa lɛ ahe, shi moŋ ekɔɔ amɛnifeemɔi ahe lɛ, ekɛɛ akɛ: “Jeee mɔ fɛɛ mɔ ni kɛɔ mi akɛ: Nuŋtsɔ, Nuŋtsɔ! lɛ, aaabote ŋwɛi maŋtsɛyeli lɛ mli; shi moŋ mɔ ni feɔ mitsɛ ni yɔɔ ŋwɛi lɛ suɔmɔnaa nii lɛ.” Ní wɔɔkɛɛ akɛ wɔheɔ Nyɔŋmɔ nɔ wɔyeɔ lɛ kɛkɛ faaa. Esa akɛ wɔfee Nyɔŋmɔ suɔmɔnaa nii. Taakɛ eji lɛ, klɛŋklɛŋ lɛ, esa akɛ wɔle nɔ ni Nyɔŋmɔ suɔmɔnaa nii ji.—Mateo 7:13-23.

Yesu fee lɛ faŋŋ akɛ adesai baanyɛ aná Nyɔŋmɔ he nilee. Ewie akɛ: “Shi enɛ ji naanɔ wala lɛ, ákɛ amɛle bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ.” (Yohane 17:3) Eyɛ faŋŋ akɛ, kɛ́ wɔkɛ hiɛdɔɔ tao ŋaalee kɛ nilee ni Nyɔŋmɔ haa nɛɛ lɛ, no lɛ wɔbaaná eko. Ni sɛɛnamɔ yɛ he diɛŋtsɛ akɛ wɔɔtao nilee nɛɛ ejaakɛ Nyɔŋmɔ baaduro mɛi fɛɛ ni feɔ nakai lɛ naanɔ wala.

[Shishigbɛ niŋmaa]

[Mfoniri ni yɔɔ baafa 4]

Yesu kɛɛ gbɛ fintɔŋŋ kɛ mɔ yaa wala mli