Sanebimɔi ni Jɛ Kanelɔi Adɛŋ

Biblia lɛ ewieee nɔ ko yɛ dãa kɛ glase ni awoɔ nɔ kɛyaa ŋwɛi kɛbaa jɔɔmɔ ahaa mɔ ko dani anuɔ lɛ he, ni mɛni hewɔ mɔ Yehowa Odasefoi kɛ amɛhe wooo nifeemɔ ni tamɔ nakai mli lɛ?

Wein (loo dãa kroko ni naa wa) ní kɛ́ abaanu lɛ awoɔ kɛ glase lɛ nɔ kɛyaa ŋwɛi kɛbaa jɔɔmɔ ahaa mɔ ko lɛ ji nifeemɔ ko ni jɛ blema tɔ̃ɔ, ni ehé shi yɛ hei babaoo eyɛ mli akɛ srɔtofeemɔ baanyɛ ahi bɔ ni afeɔ lɛ ahaa yɛ maŋ fɛɛ maŋ mli lɛ mli. Be komɛi lɛ, mɛi ni kɛ amɛhe woɔ nifeemɔ nɛɛ mli lɛ kɛ amɛdãa kɛ glasei lɛ anaa shilɛɔ amɛhe. Mɔ ni teɔ shi akɛ aba jɔɔmɔ aha amɛnaanyo lɛ woɔ edãa kɛ glase lɛ nɔ kɛyaa ŋwɛi ni ebiɔ koni aha amɛnaanyo lɛ aná miishɛɛ, gbɔmɔtso hewalɛnamɔ kpakpa, wala sɛɛkɛlɛ, kɛ nibii krokomɛi ni tamɔ nakai. No sɛɛ lɛ, mɛi krokomɛi ni yɔɔ nifeemɔ lɛ shishi lɛ yeɔ amɛgbee kɛfiɔ jɔɔmɔ ni abaa lɛ sɛɛ aloo amɛwoɔ amɛdãa kɛ glasei lɛ anɔ kɛyaa ŋwɛi dani amɛnuɔ. Mɛi babaoo nuɔ he akɛ naagba ko bɛ nifeemɔ nɛɛ he, ni ákɛ mɔ kɛtsɔɔ akɛ ehiɛ egbele. Kɛlɛ, Yehowa Odasefoi kɛ amɛhe wooo nifeemɔ ni tamɔ nɛkɛ mli yɛ yiŋtoi kpakpai komɛi ahewɔ.

Jeee miishɛɛ kɛ gbɔmɔtsoŋ hewalɛnamɔ kpakpa ní Kristofoi sumɔɔɔ ni mɛi aná hewɔ amɛkɛ amɛhe wooo nifeemɔ nɛɛ mli lɛ. Beni nɔyeli kuu ni hi shi yɛ klɛŋklɛŋ afii 100 lɛ mli lɛ ŋma wolo eyaha asafoi ni yɔɔ no beaŋ lɛ, amɛkɛ wiemɔ ko tsu nii ni abaanyɛ atsɔɔ shishi akɛ “nyɛhia shi jogbaŋŋ,” “omanye abla nyɛ,” loo “ahi aha nyɛ.” (Bɔfoi lɛ Asaji 15:29) Anɔkwafoi komɛi ni jáa Nyɔŋmɔ kɛɛ maŋtsɛmɛi komɛi akɛ: “Minuŋtsɔ . . . yi aná wala kɛya naanɔ” kɛ “Maŋtsɛ yi aná wala kɛya naanɔ!”—1 Maŋtsɛmɛi 1:31; Nehemia 2:3.

Shi, mɛni kɛ nifeemɔ ni ji dãa kɛ glase ni awoɔ nɔ kɛyaa ŋwɛi kɛbaa jɔɔmɔ ahaa mɔ dani anuɔ lɛ ba? Blɔfo Buu-Mɔɔ ni ji January 1, 1968 lɛ tsɛ́ Ɛnsaiklopidia ko (The Encyclopædia Britannica (1910), Kpo 13, baafa 121 lɛ) mli sane ko yisɛɛ akɛ: “Eeenyɛ efee akɛ dãa ni blemabii ni jáa wɔji lɛ nuɔ ákɛ afɔleshãa amɛhaa amɛwɔji kɛ mɛi ni egboi lɛ ni kɛ dãa ni anuɔ kɛbaa ‘gbɔmɔtsoŋ hewalɛnamɔ kpakpa’ ahaa mɛi lɛ ba. Kɛ́ Helabii kɛ Romabii baaye nii lɛ, amɛyeɔ ŋkpai amɛhaa amɛnyɔŋmɔi lɛ, ni kɛ́ amɛmiiye gbijurɔ ni amɛŋmɛ amɛkpɔlɔ wuji lɛ, amɛnuɔ dãa kɛbaa jɔɔmɔ yɛ amɛnyɔŋmɔi lɛ kɛ mɛi ni egboi lɛ adɛŋ.” Ɛnsaiklopidia lɛ kɛfata he akɛ: “Be fɛɛ be kɛ́ aanu dãa ákɛ afɔleshãa aaha nyɔŋmɔi kɛ mɛi ni egboi lɛ, anuɔ eko hu kɛbaa gbɔmɔtsoŋ hewalɛnamɔ kpakpa ahaa mɛi ni yɔɔ wala mli lɛ.”

Ani nifeemɔ nɛɛ sa? Wolo ko (International Handbook on Alcohol and Culture) ni je kpo yɛ afi 1995 lɛ wie akɛ: “Eeenyɛ efee akɛ blema kusum ko ni kɛ́ aafee lɛ akɛ nibii komɛi tamɔ lá loo wein ni abuɔ akɛ amɛyɛ krɔŋkrɔŋ yeɔ ŋkpai ahaa nyɔŋmɔi lɛ kɛbaa amɛdɛŋ jɔɔmɔ lɛ ni kɛ [dãa kɛ glase ni awoɔ nɔ kɛyaa ŋwɛi kɛbaa jɔɔmɔ ahaa mɔ lɛ] ba. Yɛ ŋkpaiyeli lɛ mli lɛ, abiɔ ‘wala sɛɛkɛlɛ’ loo ‘gbɔmɔtsoŋ hewalɛnamɔ kpakpa!’”

Yɛ anɔkwale mli lɛ, kɛ́ akɛ nɔ ko he mfoniri ni atɛ̃ŋ loo agbɔ tsu nii yɛ blema apasa jamɔ mli aloo nifeemɔ ko ni mɛi kɛ amɛhe woɔ mli lɛ je blema apasa jamɔ nifeemɔi lɛ eko lɛ, no etsɔɔɔ doo akɛ esaaa akɛ Nyɔŋmɔ jálɔ anɔkwafo héɔ nibii ni tamɔ nakai loo ekɛ ehe woɔ nifeemɔi ni tamɔ nakai amli. Susumɔ kpɔbii kokrobii ni ji tso yibii ko ni tamɔ gowa lɛ he okwɛ. Biblia ɛnsaiklopidia ko wie he akɛ: “Etamɔ nɔ ni akɛ kpɔbii kokrobii lɛ tsu nii yɛ wɔŋjamɔ mli kɛdamɔ shi aha krɔŋkrɔŋfeemɔ.” Kɛlɛ, Nyɔŋmɔ ha akɛ mama fee kpɔbii kokrobii awo osɔfonukpa lɛ atade lɛ naamuu lɛ naa kɛkpe, ni akɛ akɔɔble fee eko kɛwula Salomo sɔlemɔtsu lɛ akɔɔble akulashiŋi lɛ. (2 Mose 28:33; 2 Maŋtsɛmɛi 25:17) Kɛfata he lɛ, be ko ni eho lɛ, no mli lɛ abuɔ yookpeemɔ ga akɛ ekɛ jamɔ yɛ nɔ ko feemɔ. Kɛlɛ, mɛi babaoo yɛ ŋmɛnɛ ni amɛleee enɛ, ni kɛha amɛ lɛ, kɛ́ mɔ ko wo yookpeemɔ ga lɛ, no tsɔɔ kɛkɛ akɛ ebote gbalashihilɛ mli.

Ni dãa ni akɛtsuɔ nii yɛ jamɔŋ nifeemɔi amli lɛ hu? Ákɛ nɔkwɛmɔnɔ lɛ, be ko lɛ, Baal jálɔi komɛi  ni yɔɔ Shekem lɛ ‘tee amɛnyɔŋmɔ lɛ we lɛ, ni amɛyeyee nii ni amɛnunuu dãai, ni amɛlomɔ Abimelek’ ni ji Gideon binuu lɛ. (Kojolɔi 9:22-28) Ani osusuɔ akɛ mɔ ko ni kɛ anɔkwayeli jáa Yehowa kɛ ehe baawo nakai dãanumɔ lɛ mli kɛlomɔ Abimelek? Beni Amos wieɔ be ko ni Israelbii babaoo tse Yehowa hiɛ atũa lɛ he lɛ, ekɛɛ akɛ: “Amɛkamɔɔ awaba atadei anɔ yɛ afɔleshãa latɛ fɛɛ afɔleshãa latɛ masɛi, ni mɛi ní abu amɛ fɔ́ lɛ awein amɛnuɔ yɛ amɛnyɔŋmɔi lɛ awe lɛ!” (Amos 2:8) Kɛ́ wein lɛ, ŋkpai akɛye jio, nu anu jio, ani osusuɔ akɛ Nyɔŋmɔ jálɔi anɔkwafoi kɛ amɛhe baawo nifeemɔ ni tamɔ nakai mli? (Yeremia 7:18) Ani Nyɔŋmɔ jálɔ anɔkwafo baawo dãa kɛ glase nɔ kɛya ŋwɛi kɛlomɔ mɔ ko aloo kɛba jɔɔmɔ eha lɛ?

Naakpɛɛ sane ji akɛ, bei komɛi lɛ, Yehowa jálɔi holeɔ amɛniji anɔ kɛyaa ŋwɛi kɛbaa omanye. Amɛholeɔ amɛniji anɔ amɛtsɔɔ anɔkwa Nyɔŋmɔ lɛ. Biblia lɛ kɛɔ akɛ: “Salomo ho edamɔ Yehowa afɔleshãa latɛ lɛ hiɛ . . . ni egbɛ enijiaŋ kɛtee ŋwɛi, ni ekɛɛ: Yehowa, Israel Nyɔŋmɔ! Nyɔŋmɔ ko nyɔŋmɔ ko bɛ . . . ni tamɔ bo . . . ni onu yɛ ŋwɛi ni ji oshihilɛhe lɛ, ni kɛ́ onu lɛ oŋɔ fa!” (1 Maŋtsɛmɛi 8:22, 23, 30) Nakai nɔŋŋ “Ezra jie Yehowa . . . yi; ni maŋ muu lɛ fɛɛ here nɔ akɛ: Amen, amen! ni amɛhole amɛniji anɔ, ni amɛmamɔ amɛyitsei ashi, ni . . . amɛjá Yehowa.” (Nehemia 8:6; 1 Timoteo 2:8) Eyɛ faŋŋ akɛ, nakai anɔkwafoi lɛ holeee amɛniji anɔ amɛtsɔɔɔ ŋwɛi kɛmiiba jɔɔmɔ kɛmiijɛ shade wɔŋ ko ŋɔɔ.—Yesaia 65:11.

Ŋmɛnɛ lɛ, ekolɛ mɛi ni woɔ dãa kɛ glase nɔ kɛyaa ŋwɛi dani amɛnuɔ lɛ ateŋ mɛi babaoo nuŋ he akɛ amɛkɛ nakai feemɔ miibi ni nyɔŋmɔ ko awo mɔ ko nyɔmɔ loo ejɔɔ lɛ, ni kɛlɛ kɛ́ obi amɛ nɔ̃ hewɔ ni amɛwoɔ dãa kɛ glase nɔ kɛyaa ŋwɛi dani amɛnuɔ lɛ, amɛnáaa naajiemɔ ko. Kɛlɛ, anɔkwale ni eji akɛ mɛi nɛɛ susuuu amɛnifeemɔ lɛ he jogbaŋŋ lɛ etsɔɔɔ akɛ esa akɛ anɔkwa Kristofoi kɛ amɛhe awo nɔ ni amɛfeɔ lɛ mli.

Nifeemɔi krokomɛi yɛ ni mɛi babaoo kɛ amɛhe woɔ mli, shi jeŋ fɛɛ le akɛ Yehowa Odasefoi kɛ amɛhe wooo mli. Ákɛ nɔkwɛmɔnɔ lɛ, mɛi babaoo ŋaa maŋ okadi nibii loo aflaŋaai ní amɛsusuuu akɛ nakai ni amɛfeɔ lɛ tsɔɔ akɛ amɛmiijá nakai nibii lɛ. Eyɛ mli akɛ anɔkwa Kristofoi kɛ amɛhe wooo nifeemɔi ni tamɔ nakai amli moŋ, shi amɛtsĩii mɔ ko naa akɛ ekɛ ehe akawo mli. Akɛni Odasefoi le be ni akɛhe woɔ nifeemɔ ni tamɔ nakai mli hewɔ lɛ, amɛteŋ mɛi babaoo kɛ hiɛshikamɔ tsuɔ nii ni amɛtsɔɔɔ he ni afeɔ yɛ lɛ kwraa kɛhooo bɔni afee amɛkagba mɔ ko naa. Sane lɛ ji akɛ, amɛtswa amɛfai shi akɛ amɛkɛ amɛhe woŋ maŋ hedɔɔ nifeemɔ ko ní teɔ shi woɔ Biblia lɛ mli. (2 Mose 20:4, 5; 1 Yohane 5:21) Ŋmɛnɛ lɛ, ekolɛ mɛi babaoo ebuŋ dãa kɛ glase ni awoɔ nɔ kɛyaa ŋwɛi kɛbaa jɔɔmɔ ahaa mɔ ko lɛ akɛ ekɛ jamɔ yɛ nɔ ko feemɔ. Kɛlɛ, yiŋtoi kpakpai ahewɔ Kristofoi kɛ amɛhe wooo nifeemɔ nɛɛ ni jɛ apasa jamɔ mli lɛ mli, ni amrɔ nɛɛ po lɛ, abaanyɛ abu nifeemɔ nɛɛ akɛ akɛbaa jɔɔmɔ kɛjɛɔ ‘ŋwɛi’ tamɔ abiɔ mɔ ko ni nɔ kwɔ fe adesai dɛŋ yelikɛbuamɔ lɛ.—2 Mose 23:2.