“Ani Ole Nyɔŋmɔ Gbɛi?”

SANEBIMƆ nɛɛ mɔ yoo ko ni yɔɔ Central Asia wuoyi-anaigbɛ lɛ tsui. Awake! wolo tɛtrɛɛ ni fata wolo tɛtrɛɛ ni okaneɔ nɛɛ he lɛ mli nɔ ni je kpo yɛ January 22, afi 2004 lɛ saneyitso ji nakai sanebimɔ lɛ. Yoo lɛ ŋma mɛi ni fee wolo lɛ akɛ: “Mikane nyɛwolo lɛ, ni kɛjɛ no sɛɛ lɛ mikaneɔ eko fɛɛ eko ni baa lɛ, ni enɛ eye ebua mi ni mibaa mijeŋ jogbaŋŋ. Amrɔ nɛɛ mihiɛɛɛ jwɛŋmɔ gbonyo yɛ shihilɛ he, shi moŋ daa mináa jwɛŋmɔ kpakpa yɛ shihilɛ he. Migbaa mɔ fɛɛ mɔ wɔ-Nyɔŋmɔ lɛ he saji, ni mihaa mɛi leɔ toiŋjɔlɛ ni nilee ni tamɔ nɛkɛ haa mɔ náa.”

Mɛi yɛ hei babaoo ní miikase Nyɔŋmɔ gbɛi ni ji Yehowa lɛ he nii, ni yɛ anɔkwale mli lɛ, enɛ eshɛ “shikpɔŋ lɛ naagbeehei lɛ.” (Bɔfoi lɛ Asaji 1:8) Ákɛ nɔkwɛmɔnɔ lɛ, bɔ ni aŋmaa gbɛi nɛɛ yɛ Turkmen wiemɔ mli ji Yehowa, ni eyɛ Ŋmalɛ Krɔŋkrɔŋ ni atsɔɔ shishi kɛtee Turkmen wiemɔ mli lɛ mli. Lala 8:1 lɛ kɛɔ yɛ amɛ-Biblia lɛ mli akɛ: “Yehowa, wɔ-Nuŋtsɔ, kwɛ bɔ ni ogbɛi lɛ je agbo yɛ shikpɔŋ lɛ nɔ fɛɛ!”

Bɔni afee ni yoo lɛ ale Yehowa Nyɔŋmɔ he saji babaoo lɛ, ebi koni aha lɛ wolo bibioo ni hiɛ baafai 32 ni ji The Divine Name That Will Endure Forever. Kɛ́ bo hu ootao ole Yehowa Nyɔŋmɔ he nii babaoo lɛ, no lɛ bi Yehowa Odasefoi lɛ ateŋ mɔ ko ni ebaha bo wolo ni ji Mɛni Biblia lɛ Tsɔɔ Diɛŋtsɛ? lɛ eko.