Aasha Kristofoi Amli Tamɔ Ashaa Ŋmaa Mli

BENI eshwɛ fioo ni abaagbe Yesu lɛ, ebɔ ekaselɔi lɛ kɔkɔ akɛ: “Naa, satan etao nyɛhe gbɛ, koni esha nyɛmli taakɛ ŋmãa.” (Luka 22:31) Te ewiemɔ nɛɛ shishi?

Be ni Yesu yɔɔ shikpɔŋ lɛ nɔ lɛ, ŋmaakũu heɔ be babaoo ni ebiɔ mɔdɛŋbɔɔ. Klɛŋklɛŋ lɛ, nikpalɔi lɛ buaa ŋmaa shabii lɛ anaa. No sɛɛ lɛ, amɛgbeeɔ ŋmaa shabii lɛ yɛ shikpɔŋ ni wa nɔ loo amɛkɛ ŋmaa gbeemɔ shwiilii ni kooloi gbalaa tsɔɔ ŋmaa shabii lɛ anɔ koni ekumɔ amɛ dukuduku. Nakai feemɔ haa ŋmaa lɛ jeɔ ŋmaa shabii kɛ ehe totoi lɛ amli. No sɛɛ lɛ, okwaafoi lɛ fɔ̃ɔ ŋmaa shabii kɛ ehe totoi lɛ fɛɛ ni efutu lɛ amɛwoɔ kɔɔyɔɔ mli. Niyenii loo ŋmaa wui muji lɛ baashwie shi yɛ ŋmaagbeemɔhe lɛ ni kɔɔyɔɔ looɔ tutuu lɛ kɛyaa. Naagbee kwraa lɛ, ashaa ŋmaa lɛ mli koni ajie nibii ni esaaa lɛ yɛ mli.

Taakɛ Yesu kɛɛ lɛ Satan tutua ekaselɔi ni hi shi yɛ klɛŋklɛŋ afii 100 lɛ mli lɛ, ni etutuaa wɔ hu ŋmɛnɛ. (Efe. 6:11) Eji anɔkwale akɛ jeee Satan ji mɔ ni kɛ naagbai fɛɛ ni wɔkɛkpeɔ lɛ baa wɔnɔ tɛɛ. (Jaj. 9:11) Shi, Satan etswa efai shi akɛ ebaafee nɔ fɛɛ nɔ ni eeenyɛ koni wɔkaye Nyɔŋmɔ anɔkwa. Akɛ nɔkwɛmɔnɔ lɛ, ekolɛ ebaaka wɔ koni wɔkɛ heloonaa nibii ataomɔ aye klɛŋklɛŋ gbɛhe, wɔkɛ wɔhe awo hiɛtserɛjiemɔ ni baaye wɔ awui mli, loo wɔkɛ wɔhe awo bɔlɛnamɔ mli jeŋba shara mli. Agbɛnɛ hu, ekolɛ ebaaha nanemɛi skulbii loo nitsulɔi kɛ wɔwekumɛi ni jeee Odasefoi lɛ ana wɔnɔ hewalɛ koni wɔŋɔ skulyaa mli hegbɛi kɛ nitsumɔ mli hegbɛi fɛɛ ni je lɛ haa wɔnáa lɛ. Kɛfata he hu lɛ, ekolɛ Satan baabɔ mɔdɛŋ ni wɔkaye Nyɔŋmɔ anɔkwa kɛtsɔ yiwaa ni ekɛaaba wɔnɔ tɛɛ lɛ nɔ. Ŋwanejee ko bɛ he akɛ Satan tsɔɔ gbɛ̀i krokomɛi babaoo anɔ ni eshaa wɔmli yɛ mfonirifeemɔŋ.

Te wɔɔfee tɛŋŋ ni wɔtsĩ wɔhenyɛlɔ ni he wa waa nɛɛ gbɛ? Wɔnyɛŋ wɔwu wɔshi lɛ yɛ wɔhewalɛ naa. Satan he wa fe wɔ; shi wɔle akɛ Yehowa yɛ hewalɛ kwraa fe Satan. Kɛ́ wɔkɛ wɔhe fɔ Yehowa nɔ kwraa, wɔkɛ hiɛdɔɔ sɔle koni eha wɔ nilee kɛ ekãa koni wɔnyɛ wɔfi shi, ni wɔkɛ egbɛtsɔɔmɔ tsuɔ nii yɛ wɔshihilɛ fɛɛ mli lɛ, ebaawo wɔ hewalɛ koni wɔnyɛ wɔkpee Satan tutuamɔi lɛ anaa.—Lala 25:4, 5.

Kɛ́ aaka wɔ lɛ, esa akɛ wɔnyɛ ‘wɔkpa ekpakpa kɛ efɔŋ mli’ koni Satan ŋaatsɔɔi lɛ akanyɛ wɔ edu. (Heb. 5:13, 14) Yehowa baanyɛ aye abua wɔ koni wɔnyɛ wɔkpá ekpakpa kɛ efɔŋ mli. No sɛɛ lɛ, esa akɛ wɔfee nɔ ni ja be fɛɛ be ekɔɔɔ he eko shihilɛ ni wɔkɛbaakpe. Kɛ́ wɔkɛ Yehowa gbɛtsɔɔmɔ tsu nii lɛ, ebaafi ekãa mli ni wɔjɛ kɛtswa wɔfai shi akɛ wɔbaafee nɔ ni ja lɛ sɛɛ, ni ekwaŋ wɔ kɔkɔɔkɔ.—Efe. 6:10.

Ekolɛ Satan baabɔ mɔdɛŋ ni esha wɔmli tamɔ ashaa ŋmaa mli lɛ. Shi yɛ Yehowa hewalɛ naa lɛ wɔbaanyɛ wɔtsĩ lɛ gbɛ ni wɔdamɔ shi shiŋŋ yɛ hemɔkɛyeli lɛ mli. (1 Pet. 5:9) Hɛɛ Yehowa Wiemɔ lɛ haa wɔ nɔmimaa akɛ: “Nyɛtea shi nyɛwoa abonsam, ni eeejo nyɛnaa foi.”—Yak. 4:7.