Yehowa Tsulɔ Lɛ—“Apila Lɛ Yɛ Wɔnɔtɔ̃mɔi Lɛ Ahewɔ”
Yehowa Tsulɔ Lɛ—“Apila Lɛ Yɛ Wɔnɔtɔ̃mɔi Lɛ Ahewɔ”
“Apila lɛ yɛ wɔnɔtɔ̃mɔi lɛ ahewɔ, ni atswia lɛ nii yɛ wɔnishaianii lɛ ahewɔ . . . ni ehe faji lɛ akɛtsáa wɔ.”—YES. 53:5.
1. Mɛni esa akɛ wɔha ehi wɔjwɛŋmɔŋ kɛ́ wɔmiiye Kaimɔ lɛ, ni mɛɛ gbalɛ baaye abua wɔ koni wɔfee nakai?
WƆYEƆ Kaimɔ lɛ kɛkaiɔ Kristo gbele lɛ, kɛ nɔ fɛɛ nɔ ni egbele lɛ kɛ eshitee lɛ etsu lɛ. Kaimɔ lɛ haa ehiɔ wɔjwɛŋmɔŋ akɛ abu Yehowa bem akɛ jeŋ muu fɛɛ Maŋtsɛ, atse egbɛi lɛ he, ni eyiŋtoo ni adesai ayiwalaheremɔ fata he lɛ eba mli. Gbalɛ ni yɔɔ Yesaia 53:3-12 lɛ gbálaa Kristo afɔleshaa lɛ kɛ nɔ ni efɔleshaa lɛ etsu lɛ mli jogbaŋŋ fe Biblia mli gbalɛi krokomɛi fɛɛ. Yesaia gba akɛ Tsulɔ lɛ baana amanehulu, ni ewie Kristo gbele lɛ he saji fitsofitso, kɛ jɔɔmɔi ni egbele lɛ baaha enyɛmimɛi ni afɔ amɛ mu lɛ kɛ “tooi krokomɛi” lɛ aná hu he sane.—Yoh. 10:16.
2. Mɛni nɔ mi Yesaia gbalɛ lɛ maa, ni te ebaaná wɔnɔ hewalɛ eha tɛŋŋ?
2 Aaafee afii 700 dani afɔ́ Yesu yɛ shikpɔŋ lɛ nɔ lɛ, Yehowa kɛ mumɔ tsirɛ Yesaia ni egba akɛ E-Tsulɔ ni ehala lɛ lɛ baaye anɔkwa yɛ kaa ni naa wa waa fe fɛɛ lɛ po mli. Enɛ maa nɔ mi akɛ Yehowa yɛ hekɛnɔfɔɔ kwraa akɛ e-Bi lɛ baaye lɛ anɔkwa. Beni wɔpɛiɔ gbalɛ nɛɛ mli lɛ, wɔtsuiiaŋ baayi obɔ kɛ hiɛsɔɔ, ni wɔhemɔkɛyeli lɛ mli baawa.
“Agbe Ehe Guɔ” ni ‘Abuuu Lɛ Ahaaa Nɔ Ko’
3. Mɛni hewɔ kulɛ esa akɛ Yudafoi lɛ ahere Yesu hiɛmɛɛ lɛ, shi te amɛhere lɛ amɛha tɛŋŋ?
3 Nyɛkanea Yesaia 53:3. Eji afɔleshaa kpele akɛ Nyɔŋmɔ Bi koome lɛ aaashi sɔɔmɔ ni esɔmɔɔ yɛ e-Tsɛ lɛ masɛi kɛ miishɛɛ lɛ koni eba shikpɔŋ lɛ nɔ ní ekɛ ewala abashã afɔle kɛkpɔ̃ adesai kɛjɛ esha kɛ gbele mli! (Filip. 2:5-8) Ekɛ ewala shã afɔle koni adesai aná eshaifaa diɛŋtsɛ, ni afɔlei ni Mose Mla lɛ bi ní akɛ kooloi ashã lɛ fee enɛ he mfoniri kɛkɛ. (Heb. 10:1-4) Aso esaaa akɛ kulɛ, kɛ hooo lɛ Yudafoi ní miimɛ shiwoo Mesia lɛ hereɔ lɛ hiɛmɛɛ ní amɛwoɔ lɛ? (Yoh. 6:14) Yɛ no najiaŋ lɛ, Yudafoi lɛ ‘gbe’ Kristo ‘he guɔ,’ ni ‘amɛbuuu lɛ amɛhaaa nɔ ko,’ taakɛ Yesaia gba lɛ. Bɔfo Yohane ŋma akɛ: “Lɛ diɛŋtsɛ emɛi aŋɔɔ eba, ni mɛi ni ji lɛ diɛŋtsɛ emɛi lɛ hereee lɛ.” (Yoh. 1:11) Bɔfo Petro kɛɛ Yudafoi lɛ akɛ: “Wɔtsɛmɛi a-Nyɔŋmɔ lɛ ewo etsulɔ Yesu hiɛ nyam; mɔ ni nyɛjie nyɛha ni nyɛkwa lɛ yɛ Pontio Pilato hiɛ, beni lɛ lɛ ekpɛ mli akɛ eeeŋmɛɛ ehe lɛ. Shi nyɛ lɛ, nyɛkwa mɔ krɔŋkrɔŋ kɛ jalɔ lɛ.”—Bɔf. 3:13, 14.
4. Mɛɛ gbɛ nɔ Yesu tsɔ ele hela?
4 Yesaia gba hu akɛ Yesu ‘baale hela.’ Beni Yesu tsuɔ esɔɔmɔ nitsumɔ lɛ, ekã shi faŋŋ akɛ etɔ lɛ yɛ bei komɛi amli, shi nɔ ko bɛ ni tsɔɔ akɛ hela mɔ lɛ. (Yoh. 4:6) Shi Yesu ná ele helai ni mɛi ni eshiɛ etsɔɔ amɛ lɛ yeyeɔ lɛ. Emusuŋ tsɔ lɛ yɛ amɛhewɔ, ni etsá mɛi babaoo. (Mar. 1:32-34) Yesu kɛ nakai feemɔ ha gbalɛ nɛɛ ba mli akɛ: “Lɛɛlɛŋ, wɔhelai lɛ, lɛ etere, ni wɔhejaramɔi lɛ, lɛ ehole.”—Yes. 53:4a; Mat. 8:16, 17.
Tamɔ Nɔ ni “Nyɔŋmɔ Piŋ Lɛ”
5. Te Yudafoi lɛ ateŋ mɛi pii bu Yesu gbele lɛ amɛha tɛŋŋ, ni mɛni hewɔ enɛ ha enu piŋmɔ lɛ he waa lɛ?
5 Nyɛkanea Yesaia 53:4b. Yesu yinɔbii lɛ ateŋ mɛi pii nuuu nɔ hewɔ ni ena amanehulu ní egbo lɛ shishi. Amɛsusu akɛ Nyɔŋmɔ miigbala etoi, oookɛɛ ekɛ hela gbonyo ko miipiŋ lɛ. (Mat. 27:38-44) Yudafoi lɛ folɔ Yesu naa akɛ ebɔ musu. (Mar. 14:61-64; Yoh. 10:33) Yɛ anɔkwale mli lɛ, Yesu jeee eshafeelɔ ni asaŋ ejeee musubɔlɔ. Shi akɛni eji Yehowa Tsulɔ, ni esumɔɔ e-Tsɛ lɛ naakpa hewɔ lɛ, enaa ní afolɔ akɛ ebɔ musu, ni esa gbele lɛ ha enu piŋmɔ lɛ he waa. Ni kɛlɛ, eyɛ he miishɛɛ akɛ eeefee Yehowa suɔmɔnaa nii.—Mat. 26:39.
6, 7. Mɛɛ gbɛ nɔ Yehowa ‘tswa’ e-Tsulɔ ni yeɔ anɔkwa lɛ “nɔ̃,” ni mɛni hewɔ enɛ ‘sa’ Nyɔŋmɔ “hiɛ” lɛ?
6 Efeee wɔ naakpɛɛ akɛ Yesaia gbalɛ lɛ kɛɛ akɛ mɛi komɛi baakɛɛ akɛ ‘Nyɔŋmɔ miipiŋ’ Kristo, shi ekolɛ wɔnaa baakpɛ wɔhe waa akɛ gbalɛ lɛ kɛɛ akɛ: “Esa Yehowa hiɛ akɛ eeetswa lɛ nɔ̃.” (Yes. 53:10) Akɛni Yehowa ekɛɛ momo akɛ: “Naa, mitsulɔ . . . mɔ ni mihala ní mináa ehe tsui lɛ” hewɔ lɛ, te aaafee tɛŋŋ ni ‘eeesa’ Yehowa “hiɛ akɛ eeetswa lɛ nɔ̃” lɛ? (Yes. 42:1) Mɛɛ gbɛ nɔ abaanyɛ akɛɛ akɛ enɛ ha Yehowa tsui nyɔ emli lɛ?
7 Kɛ́ wɔɔnu gbalɛ lɛ fã nɛɛ shishi lɛ, esa akɛ wɔkai akɛ beni Satan tswa Yehowa nɔyeli lɛ mpoa lɛ, etsɔɔ akɛ Nyɔŋmɔ tsuji ni yɔɔ ŋwɛi kɛ shikpɔŋ lɛ nɔ lɛ fɛɛ yeŋ Nyɔŋmɔ anɔkwa. (Hiob 1:9-11; 2:3-5) Akɛni Yesu ye anɔkwa kɛtee gbele mli hewɔ lɛ, eha Satan mpoatswaa lɛ hetoo yɛ gbɛ ni yeɔ emuu nɔ. No hewɔ lɛ, eyɛ mli akɛ Yehowa ŋmɛ gbɛ ni Kristo henyɛlɔi lɛ gbe Kristo moŋ, shi ekã shi faŋŋ akɛ Yehowa piŋ beni ena ni aagbe e-Tsulɔ ni ehala lɛ lɛ. Ni kɛlɛ, Yehowa tsui nyɔ emli waa beni ena akɛ e-Bi lɛ eye anɔkwa kɛwula shi lɛ. (Abɛi 27:11) Kɛfata he lɛ, le ni Yehowa le akɛ adesai ni baatsake amɛtsui lɛ baaná e-Bi lɛ gbele lɛ he sɛɛ lɛ ha ená miishɛɛ naakpa.—Luka 15:7.
“Apila Lɛ yɛ Wɔnɔtɔ̃mɔi lɛ Ahewɔ”
8, 9. (a) Mɛɛ gbɛ nɔ “apila” Yesu “yɛ wɔnɔtɔ̃mɔi lɛ ahewɔ”? (b) Te Petro ma enɛ nɔ mi eha tɛŋŋ?
8 Nyɛkanea Yesaia 53:6. Adesai eshafeelɔi miitsomlo tamɔ tooi ni elaaje kɛmiitao kpɔ̃mɔ kɛjɛ hela kɛ gbele ní amɛná kɛjɛ Adam ŋɔɔ lɛ mli. (1 Pet. 2:25) Akɛni Adam shwiei lɛ yeee emuu hewɔ lɛ, amɛteŋ mɔ ko nyɛŋ awo nɔ ni Adam laaje lɛ he nyɔmɔ. (Lala 49:8) Shi akɛni Yehowa yɛ suɔmɔ kpele hewɔ lɛ, ‘eha wɔ fɛɛ wɔnɔ̃sha lɛ bakã’ esuɔmɔ Bi kɛ e-Tsulɔ ni ehala lɛ lɛ ‘nɔ.’ Kristo tere wɔhe eshai lɛ yɛ sɛŋmɔtso lɛ nɔ, ni egbo yɛ wɔnajiaŋ, ejaakɛ ekpɛlɛ ni “apila lɛ yɛ wɔnɔtɔ̃mɔi lɛ ahewɔ, ni atswia lɛ nii yɛ wɔnishaianii lɛ ahewɔ.”
9 Bɔfo Petro ŋma akɛ: ‘Enɛ nɔŋŋ hewɔ atsɛ́ nyɛ, ejaakɛ Kristo hu na amanehulu eha nyɛ ni ekɛto okadi efɔ̃ shi eha nyɛ, koni nyɛnyiɛ enanemaahei lɛ asɛɛ. Mɔ ni lɛ diɛŋtsɛ etere wɔhe eshai lɛ yɛ egbɔmɔtso lɛ mli kɛtee sɛŋmɔtso lɛ nɔ, koni wɔgboi wɔha esha ní wɔhiɛ akãmɔ aha jalɛ.’ No sɛɛ lɛ, Petro tsɛ́ Yesaia gbalɛ lɛ yisɛɛ kɛfata he akɛ: “Mɔ he faji ní aŋɔtsá nyɛ lɛ.” (1 Pet. 2:21, 24; Yes. 53:5) Enɛ gbele gbɛ koni akpãta eshafeelɔi kɛ Nyɔŋmɔ teŋ, taakɛ Petro kɛɛ kɛshi sɛɛ lɛ, akɛ: “Kristo hu na amanehulu yɛ eshai ahewɔ shikome, lɛ jalɔ lɛ yɛ mɛi ni ejaaa lɛ anajiaŋ, koni ekɛ wɔ aya Nyɔŋmɔ ŋɔɔ.”—1 Pet. 3:18.
“Tamɔ Too Gwantɛŋ Bi ní Akɛ Lɛ Yaa Ayagbe Lɛ”
10. (a) Te Yohane Baptisilɔ lɛ wie Yesu he eha tɛŋŋ? (b) Mɛni hewɔ wiemɔi ni Yohane kɛtsu nii lɛ sa jogbaŋŋ lɛ?
10 Nyɛkanea Yesaia 53:7, 8. Beni Yohane Baptisilɔ lɛ na Yesu ni eeba eŋɔɔ lɛ, ebo akɛ: “Naa, Nyɔŋmɔ toobi lɛ ni wóɔ je lɛ he esha lɛ kɛyaa lɛ!” (Yoh. 1:29) Akɛni Yohane tsɛ́ Yesu akɛ Toobi hewɔ lɛ, ekolɛ no mli lɛ Yesaia wiemɔi nɛɛ yɛ ejwɛŋmɔŋ akɛ: ‘Eba ehe shi tamɔ too gwantɛŋ bi ní akɛ lɛ yaa ayagbe lɛ.’ (Yes. 53:7) Yesaia gba akɛ: “Eŋɔ esusuma ewo gbele mli.” (Yes. 53:12) Nɔ ni sa kadimɔ waa ji akɛ, gbi gbɛkɛ ni Yesu to egbele lɛ Kaimɔ lɛ shishi lɛ, eŋɔ kpulu kɛ wein eha ebɔfoi anɔkwafoi 11 lɛ, ni ekɛɛ: “Enɛ ji milá ni ji kpaŋmɔ hee lɛ nɔ̃ lɛ, ní afɔse ashwie shi yɛ mɛi pii ahewɔ ha eshaifaa lɛ.”—Mat. 26:28.
11, 12. (a) Mɛɛ gbɛ nɔ Isak tsuiŋ ni ejɛ ekpɛlɛ koni akɛ lɛ ashã afɔle lɛ fee Kristo afɔleshaa lɛ he mfoniri? (b) Mɛni esa akɛ wɔha ehi wɔjwɛŋmɔŋ yɛ Yehowa ni ji Abraham Kpeteŋkpele lɛ he beni wɔyeɔ Kaimɔ lɛ?
11 Taakɛ Isak ni hi shi yɛ blema lɛ fee lɛ, Yesu hu ná he miishɛɛ ákɛ akɛ lɛ ashã afɔle yɛ Yehowa afɔleshaalatɛ, ni damɔ shi kɛha nɔ ni Yehowa sumɔɔ ni Yesu afee lɛ nɔ. (1 Mose 22:1, 2, 9-13; Heb. 10:5-10) Eyɛ mli akɛ Isak jɛ etsuiŋ ekpɛlɛ koni akɛ lɛ ashã afɔle moŋ, shi Abraham ji mɔ ni ka akɛ ekɛ lɛ aaashã afɔle lɛ. (Heb. 11:17) Yɛ nakai gbɛ nɔ nɔŋŋ lɛ, Yesu jɛ etsuiŋ ekpɛlɛ koni agbe lɛ, shi Yehowa ji Mɔ ni to kpɔmɔnɔ lɛ he gbɛjianɔ. Nyɔŋmɔ jie suɔmɔ kpele kpo etsɔɔ adesai kɛtsɔ e-Bi lɛ ni ekɛshã afɔle lɛ nɔ.
12 Yesu diɛŋtsɛ kɛɛ akɛ: “Nɛkɛ Nyɔŋmɔ sumɔ je lɛ, akɛ eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ená naanɔ wala.” (Yoh. 3:16) Bɔfo Paulo ŋma akɛ: “Nyɔŋmɔ jieɔ lɛ diɛŋtsɛ esuɔmɔ ní ekɛsumɔ wɔ lɛ shi etsɔ̃ɔ, akɛ be mli ni wɔji eshafeelɔi lɛ beebe ni Kristo bagbo yɛ wɔnajiaŋ.” (Rom. 5:8) No hewɔ lɛ, beni wɔkaiɔ Kristo gbele lɛ kɛwoɔ ehiɛ nyam lɛ, esa akɛ wɔha ehi wɔjwɛŋmɔŋ akɛ, Yehowa, ni ji Abraham Kpeteŋkpele lɛ ji mɔ ni to afɔleshaa lɛ he gbɛjianɔ. Wɔyeɔ Kaimɔ lɛ kɛjieɔ Yehowa yi.
Tsulɔ lɛ Aaaná “Jalɛ Aha Mɛi Pii”
13, 14. Mɛɛ gbɛ nɔ Yehowa Tsulɔ lɛ ená ‘jalɛ eha mɛi pii’?
13 Nyɛkanea Yesaia 53:11, 12. Yehowa wie e-Tsulɔ ni ehala lɛ lɛ he akɛ: “Mitsulɔ jalɔ lɛ aaaná jalɛ aha mɛi pii.” Yɛ mɛɛ gbɛ nɔ? Wiemɔi ni yɔɔ kuku 12 lɛ naagbee gbɛ lɛ yeɔ kɛbuaa wɔ ni wɔnaa hetoo lɛ. “Ni [Tsulɔ lɛ] damɔ mli eha nɔtɔ̃lɔi.” Afɔ́ɔ Adam shwiei lɛ fɛɛ akɛ eshafeelɔi loo “nɔtɔ̃lɔi,” ni no hewɔ lɛ, amɛnáa “esha dɛŋ nyɔmɔwoo” ni ji gbele. (Rom. 5:12; 6:23) Esa akɛ akpãta Yehowa kɛ adesai eshafeelɔi ateŋ. Yesaia gbalɛ wolo lɛ yitso 53 lɛ gbálaa bɔ ni Yesu “damɔ mli eha” adesai eshafeelɔi lɛ mli jogbaŋŋ akɛ: “Agbala etoi, ní wɔná hejɔlɛ, ni ehe faji lɛ akɛtsáa wɔ.”—Yes. 53:5.
14 Akɛni Kristo tere wɔhe eshai lɛ, ni egbo yɛ wɔnajiaŋ hewɔ lɛ, ená ‘jalɛ eha mɛi pii.’ Paulo ŋma akɛ: “Esa (Nyɔŋmɔ) hiɛ akɛ obɔyimɔ lɛ fɛɛ ahi [Kristo] mli; ni etsɔ lɛ nɔŋŋ enɔ ekpata ekɛ nibii fɛɛ teŋ kwraa, nii ni yɔɔ shikpɔŋ nɔ kɛ nii ni yɔɔ ŋwɛi lɛ, akɛni lɛ diɛŋtsɛ etsɔ esɛŋmɔtso lá lɛ nɔ eha hejɔlɛ ba lɛ.”—Kol. 1:19, 20.
15. (a) Namɛi ji “nii ni yɔɔ ŋwɛi lɛ” ni Paulo tsĩ tã lɛ? (b) Namɛi pɛ yɔɔ hegbɛ akɛ amɛyeɔ Kaimɔ lɛ okadi nibii lɛ eko, ni mɛni hewɔ?
15 “Nii ni yɔɔ ŋwɛi lɛ” ní atsɔ Kristo lá ní efɔse eshwie shi lɛ nɔ akpãta amɛ kɛ Yehowa teŋ lɛ ji Kristofoi ni afɔ amɛ mu ní atsɛ́ amɛ koni amɛkɛ Kristo aye maŋtsɛ yɛ ŋwɛi lɛ. ‘Abu’ Kristofoi ni “ena ŋwɛi tsɛmɔ lɛ eko” lɛ “wala bem.” (Heb. 3:1; Rom. 5:1, 18) Enɛ hewɔ lɛ, Yehowa eŋɔ amɛ akɛ emumɔŋ bii. Mumɔ krɔŋkrɔŋ lɛ yeɔ amɛ odase akɛ amɛji “Kristo nanemɛi niyelɔi” ní atsɛ́ amɛ koni amɛtsɔmɔ maŋtsɛmɛi kɛ osɔfoi yɛ ŋwɛi Maŋtsɛyeli lɛŋ. (Rom. 8:15-17; Kpoj. 5:9, 10) Amɛbatsɔmɔɔ mumɔŋ Israel ni ji “Nyɔŋmɔ Israel lɛ” mli bii, ni aŋɔɔ amɛ awoɔ “kpaŋmɔ hee” lɛ mli. (Yer. 31:31-34; Gal. 6:16) Akɛni amɛji kpaŋmɔ hee lɛ mli bii hewɔ lɛ, amɛyɛ hegbɛ akɛ amɛyeɔ Kaimɔ lɛ okadi nibii lɛ ní wein tsuru ni yɔɔ kpulu lɛ mli lɛ fata he lɛ eko. Yesu wie wein tsuru ni yɔɔ kpulu lɛ mli lɛ he akɛ: “Nɛkɛ kpulu nɛɛ ji kpaŋmɔ hee lɛ yɛ milá ni aŋɔshwie shi aha nyɛ lɛ mli.”—Luka 22:20.
16. Mɛni ji “nii ni yɔɔ shikpɔŋ nɔ” lɛ, ni mɛɛ gbɛ nɔ anáa jalɛ ahaa amɛ yɛ Yehowa hiɛ?
16 “Nii ni yɔɔ shikpɔŋ nɔ” lɛ ji Kristo tooi krokomɛi ni yɔɔ hiɛnɔkamɔ akɛ amɛbaahi shi kɛya naanɔ yɛ shikpɔŋ lɛ nɔ lɛ. Amɛ hu Yehowa Tsulɔ ni ehala lɛ lɛ ená jalɛ eha amɛ yɛ Yehowa hiɛ. Akɛni amɛyɛ hemɔkɛyeli yɛ Kristo kpɔ̃mɔ afɔleshaa lɛ mli, ni no eha “amɛfɔ́ amɛtadei lɛ ahe, ni amɛha eyɛ futaa yɛ toobi lɛ lá lɛ mli” hewɔ lɛ, Yehowa buɔ amɛ jalɔi akɛ enanemɛi, shi jeee emumɔŋ bii, ni eha amɛná hiɛnɔkamɔ ni yɔɔ miishɛɛ akɛ amɛbaafo “amanehulu kpeteŋkpele lɛ.” (Kpoj. 7:9, 10, 14; Yak. 2:23) Akɛni tooi krokomɛi nɛɛ bɛ kpaŋmɔ hee lɛ mli, ni no hewɔ lɛ amɛbɛ hiɛnɔkamɔ akɛ amɛbaahi shi yɛ ŋwɛi hewɔ lɛ, amɛyeee Kaimɔ lɛ okadi nibii lɛ eko, shi amɛyaa jɛmɛ ni amɛkɛ bulɛ kwɛɔ nifeemɔ ni yaa nɔ lɛ.
Shidaa Aha Yehowa kɛ E-Tsulɔ ní Enáa Ehe Tsui Lɛ!
17. Mɛɛ gbɛ nɔ Yesaia wolo lɛ mli gbalɛi ni kɔɔ Tsulɔ lɛ he ní wɔsusu he lɛ esaa wɔjwɛŋmɔi kɛha Kaimɔ lɛ?
17 Yesaia wolo lɛ mli gbalɛi ni kɔɔ Tsulɔ lɛ he, ni wɔsusu he lɛ esaa wɔjwɛŋmɔi jogbaŋŋ kɛha Kristo gbele lɛ Kaimɔ lɛ. Eye ebua wɔ koni “wɔkwɛ [wɔ]hemɔkɛyeli shishijelɔ kɛ naagbelɔ” lɛ. (Heb. 12:2) Wɔkase akɛ Nyɔŋmɔ Bi lɛ tseee atua. Ákɛ mɔ ni tamɔɔɔ Satan lɛ, ená he miishɛɛ akɛ eeeha Yehowa atsɔɔ lɛ nii, ni ekpɛlɛɔ enɔ akɛ lɛ ji Nuŋtsɔ Maŋtsɛ. Wɔna akɛ beni Yesu tsuɔ esɔɔmɔ nitsumɔ lɛ yɛ shikpɔŋ lɛ nɔ lɛ, ejie musuŋtsɔlɛ kpo etsɔɔ mɛi ni eshiɛ etsɔɔ amɛ lɛ, ni etsa amɛteŋ mɛi babaoo yɛ gbɔmɔtsoŋ kɛ mumɔŋ fɛɛ. Ekɛ enɛ feemɔ tsɔɔ nɔ ni ebaafee be mli ni eyeɔ nɔ akɛ Maŋtsɛ ni ji Mesia lɛ yɛ jeŋ hee lɛ mli lɛ, beni “ekɛ kojomɔ aaama shi yɛ shikpɔŋ lɛ nɔ” lɛ. (Yes. 42:4) Ekãa ni ekɛshiɛ Maŋtsɛyeli lɛ ákɛ “jeŋmaji lɛ ala” lɛ haa esɛɛnyiɛlɔi lɛ naa akɛ, esa akɛ amɛkɛ ekãa ashiɛ sanekpakpa lɛ yɛ shikpɔŋ lɛ nɔ fɛɛ.—Yes. 42:6.
18. Mɛni hewɔ Yesaia gbalɛ lɛ haa wɔjɛɔ wɔtsuiiaŋ wɔdaa Yehowa kɛ e-Tsulɔ ni yeɔ anɔkwa lɛ shi lɛ?
18 Yesaia gbalɛ lɛ haa wɔnuɔ bɔ ni Yehowa kɛ nɔ ko kpele shã afɔle beni etsu esuɔmɔ Bi lɛ kɛba shikpɔŋ lɛ nɔ koni ebana nɔ, ní egbo yɛ wɔhewɔ lɛ shishi jogbaŋŋ. Anɔkwa ni Yesu ye kɛwula shi kɛtee gbele mli tɔŋŋ lɛ ji nɔ ni sa Yehowa hiɛ lɛ, shi jeee amanehulu ni e-Bi lɛ na lɛ. Esa akɛ wɔ hu wɔmii ashɛ wɔhe taakɛ Yehowa mii shɛ ehe lɛ, ejaakɛ wɔyɔseɔ nibii fɛɛ ni Yesu fee kɛtsɔɔ akɛ Yehowa ji mɔ sa akɛ eyeɔ jeŋ muu lɛ fɛɛ nɔ kɛtsɔ Yehowa gbɛi lɛ he ní etsé, kɛ odaseyeli ni ekɛha kɛtsɔɔ akɛ Satan ji amalelɔ lɛ nɔ. Kɛfata he lɛ, Kristo tere wɔhe eshai lɛ ni egbo yɛ wɔhewɔ. Etsɔ enɛ feemɔ nɔ eha abu enyɛmimɛi ni afɔ amɛ mu ni ji asafoku bibioo lɛ kɛ tooi krokomɛi lɛ jalɔi yɛ Yehowa hiɛ. Be mli ni wɔbuaa wɔhe naa kɛyeɔ Kaimɔ lɛ, nyɛhaa wɔjɛa wɔtsuiiaŋ wɔdaa Yehowa kɛ e-Tsulɔ ni yeɔ anɔkwa lɛ shi.
Emlitĩi
• Mɛɛ gbɛ nɔ “esa” Yehowa “hiɛ” akɛ ‘atswa’ e-Bi lɛ “nɔ̃”?
• Mɛɛ gbɛ nɔ “apila” Yesu “yɛ wɔnɔtɔ̃mɔi lɛ ahewɔ”?
• Mɛɛ gbɛ nɔ Tsulɔ lɛ ‘ná jalɛ eha mɛi pii’?
• Mɛɛ gbɛ nɔ gbalɛi ni kɔɔ Tsulɔ lɛ he ní wɔsusu he lɛ esaa ojwɛŋmɔ kɛ otsui kɛha Kaimɔ lɛ?
[Nikasemɔ lɛ he Sanebimɔi]
[Mfoniri ni yɔɔ baafa 26]
‘Agbe ehe guɔ po, ni wɔbuuu lɛ wɔhaaa nɔ ko’
[Mfoniri ni yɔɔ baafa 28]
“Eŋɔ esusuma ewo gbele mli”
[Mfoniri ni yɔɔ baafa 29]
“Tooi krokomɛi” lɛ yaa Kaimɔ lɛ shishi ni amɛkɛ bulɛ kwɛɔ nifeemɔ ni yaa nɔ lɛ