Kpojiemɔ Wolo lɛ Mli Saji Otii—II
Yehowa Wiemɔ lɛ Hiɛ Kã
Kpojiemɔ Wolo lɛ Mli Saji Otii—II
MƐNI kã mɛi ni jáa Yehowa Nyɔŋmɔ kɛ mɛi ni jáaa lɛ lɛ ahiɛ? Mɛni baaba Satan kɛ edaimonioi lɛ anɔ wɔsɛɛ? Mɛɛ jɔɔmɔi mɛi ni boɔ Nyɔŋmɔ toi lɛ baaná yɛ Kristo Afii Akpe Nɔyeli lɛ mli? Abaana sanebimɔi nɛɛ kɛ ekrokomɛi hu ni he hiaa lɛ ahetoo yɛ Kpojiemɔ 13:1–22:21 lɛ. * Ninaai 16 ni ajie atsɔɔ bɔfo Yohane yɛ klɛŋklɛŋ afii 100 Ŋ.B. naagbee gbɛ lɛ ateŋ 9 jeɔ kpo yɛ yitsei nɛɛ amli.
Yohane ŋma akɛ: “Ajɔɔ mɔ ni kaneɔ lɛ kɛ mɛi ni nuɔ gbalɛ wiemɔi lɛ, kɛ mɛi ni ŋɔɔ nibii ni aŋma yɛ mli lɛ amɛtoɔ lɛ.” (Kpoj. 1:3; 22:7) Kɛ́ wɔkane Kpojiemɔ wolo lɛ ní wɔkɛ nibii ni wɔkaseɔ kɛjɛɔ mli lɛ tsu nii lɛ, ebaanyɛ ewo wɔ hewalɛ ni wɔjá Nyɔŋmɔ, eha hemɔkɛyeli ni wɔyɔɔ yɛ Nyɔŋmɔ kɛ e-Bi Yesu Kristo mli lɛ mli awa, ni wɔbaaná wɔsɛɛ be he hiɛnɔkamɔ ni yɔɔ miishɛɛ. *—Heb. 4:12.
AFƆSE NYƆŊMƆ MLIFU TƆI KPAWO LƐ ASHWIE SHIKPƆŊ LƐ NƆ
Kpojiemɔ 11:18 lɛ kɛɛ akɛ: “Jeŋmaji lɛ amli efu, ni [Nyɔŋmɔ] mlifu eshɛ kɛ be . . . ni abaafite mɛi ni fiteɔ shikpɔŋ lɛ.” Bɔni afee ni ana nɔ hewɔ ni Nyɔŋmɔ mlifu te shi lɛ, ninaa ni ji kpaanyɔ lɛ wie ‘kooloo ko ni yɔɔ akolontoi nyɔŋma kɛ yitsei kpawo’ lɛ nitsumɔi ahe.—Kpoj. 13:1.
Yohane na “toobi lɛ damɔ Zion gɔŋ lɛ nɔ, ni mɛi akpei oha-kɛ-nyɔŋmai-ejwɛ-kɛ-ejwɛ” fata ehe yɛ ninaa ni ji nɛɛhu lɛ mli. “Ahé” amɛ “kɛjɛ gbɔmɛi ateŋ.” (Kpoj. 14:1, 4) No sɛɛ lɛ, aha bɔfoi jaje adafitswai srɔtoi kɛnyiɛ sɛɛ. Yɛ ninaa ni tsa nɔ kɛba lɛ mli lɛ, Yohane na “bɔfoi kpawo ni hiɛ haomɔi kpawo.” Eyɛ faŋŋ akɛ Yehowa diɛŋtsɛ fã bɔfoi nɛɛ koni amɛfɔse “Nyɔŋmɔ mlifu tɔi kpawo lɛ” amɛshwie nibii srɔtoi ni feɔ Satan je lɛ anɔ. Nyɔŋmɔ kojomɔ lɛ he adafitswaa kɛ kɔkɔbɔi ji nɔ ni yɔɔ tɔi lɛ amli. (Kpoj. 15:1; 16:1) Ninaai enyɔ nɛɛ haa wɔleɔ kojomɔi krokomɛi ni Maŋtsɛyeli lɛ kɛbaaba ní kɛ kpoo ni ji etɛ lɛ kɛ tɛtrɛmaŋtrɛ ni ji kpawo lɛ kpãmɔ lɛ yɔɔ tsakpaa lɛ ahe saji fitsofitso.—Kpoj. 11:14, 15.
Ŋmalɛ Naa Sanebimɔi ni Aha Hetoo:
13:8—Mɛni ji ‘Toobi lɛ wala wolo lɛ’? Eji okadifeemɔŋ wolo ní mɛi ni kɛ Yesu Kristo baaye nɔ yɛ ŋwɛi Maŋtsɛyeli lɛ mli lɛ pɛ agbɛi yɔɔ mli. Kristofoi ni yɔɔ ŋwɛi hiɛnɔkamɔ ni afɔ amɛ mu ni yɔɔ shikpɔŋ lɛ nɔ lolo lɛ agbɛi hu fata he.
13:11-13—Mɛɛ gbɛ nɔ kooloo awuiyelɔ aklontoi enyɔtsɛ lɛ feɔ enii tamɔ drako, ni ehaa la jɛɔ ŋwɛi baa shikpɔŋ? Anɔkwale ni eji akɛ kooloo awuiyelɔ ni yɔɔ aklontoi enyɔ lɛ ní damɔ shi kɛha Anglo-Amerika Jeŋ Hewalɛ lɛ wieɔ tamɔ drako lɛ tsɔɔ akɛ etsɔɔ yiwalɛ kɛ hegbeyeiwoo nɔ enyɛɔ mɛi anɔ koni amɛkpɛlɛ enɔyeli gbɛjianɔtoo lɛ nɔ. La ni ehaa ejɛɔ ŋwɛi lɛ tsɔɔ akɛ kooloo nɛɛ kwaa efeɔ enii tamɔ gbalɔ, kɛtsɔ etsitsi ni eshiɔ akɛ lɛ eha nibii fɔji ni tee nɔ yɛ jeŋ tai enyɔ ni awu yɛ afi 1900 afii lɛ amli lɛ asɛɛ fo, ni eye Komunist nɔyeli nɔ kunim lɛ nɔ.
16:17—Mɛɛ “kɔɔyɔɔ” mli afɔse tɔ ni ji kpawo lɛ mli nii lɛ awo lɛ? “Kɔɔyɔɔ” lɛ damɔ shi kɛha susumɔi ni tamɔ Satan nɔ̃, “mumɔ [ni ji susumɔ] ni tsuɔ nii ŋmɛnɛŋmɛnɛ yɛ toigbele bii amli lɛ.” Mɛi fɛɛ ni kɛ amɛhe edɔmɔ Satan nibii agbɛjianɔtoo fɔŋ lɛ muɔ nɛkɛ kɔɔyɔɔ kɛ emli ebɔɔ nɛɛ amɛwoɔ amɛmli.—Efe. 2:2.
Nibii ni Wɔkaseɔ Kɛjɛɔ Mli:
13:1-4, 18. “Kooloo [awuiyelɔ] ko” ní edamɔ shi kɛha adesai anɔyelii lɛ fã ‘kpo kɛjɛ ŋshɔ’ ni ji adesai babaoo ni yɔɔ hamahama “lɛ mli.” (Yes. 17:12, 13; Dan. 7:2-8, 17) Satan ji mɔ ni bɔ kooloo nɛɛ, asaŋ lɛ nɔŋŋ ehaa lɛ hewalɛ, ni kooloo lɛ yɛ yibɔ okadi 666, ní tsɔɔ akɛ eshɛɛɛ emuuyeli he kwraa. Kɛ́ wɔnu nɔ ni kooloo lɛ ji lɛ shishi lɛ, ebaaye ebua wɔ koni wɔkanyiɛ esɛɛ ni wɔkajá lɛ hu taakɛ mɛi babaoo jáa lɛ ní amɛnyiɛɔ esɛɛ lɛ.—Yoh. 12:31; 15:19.
13:16, 17. Ekɔɔɔ he eko jaramɔ shihilɛ ni ekolɛ wɔkɛbaakpe yɛ wɔdaa gbi shihilɛ mli, tamɔ ‘kɛ́ wɔmii he nii loo wɔmiihɔɔ nii’ lɛ, esaaa akɛ wɔŋmɛɛɔ wɔhe wɔhaa kooloo lɛ ni ekudɔɔ wɔ. Kɛ́ wɔha akɛ ‘kooloo lɛ okadi lɛ’ kadi ‘wɔninejurɔ aloo wɔhiɛŋtsei anɔ’ lɛ, belɛ wɔmiiŋmɛ gbɛ koni kooloo lɛ akɔdɔ wɔnifeemɔi kɛ wɔsusumɔi.
14:6, 7. Shɛɛ sane ni ŋwɛi bɔfo lɛ jajeɔ lɛ haa wɔnaa akɛ esa akɛ wɔkɛ hiɛdɔɔ ashiɛ Nyɔŋmɔ Maŋtsɛyeli ni ato ama shi lɛ he sanekpakpa lɛ. Esa akɛ wɔye wɔbua mɛi ni wɔkɛkaseɔ Biblia lɛ koni amɛná Nyɔŋmɔ gbeyeishemɔ su ní amɛwo Yehowa hiɛ nyam.
14:14-20. Kɛ́ agbe “shikpɔŋ lɛ nɔ nikpamɔ” lɛ, ni ji mɛi ni abaahere amɛyiwala lɛ anaabuamɔ lɛ naa lɛ, abaaŋɔ “shikpɔŋ lɛ nɔ wein yibii” lɛ ‘awo Nyɔŋmɔ mlila lɛ weinŋaanɔ kpeteŋkpele lɛ mli.’ No mli lɛ abaakpãta wein yibii lɛ, ni ji maŋtsɛyeli gbɛjianɔtoo ní anaa ní Satan kɛyeɔ adesai anɔ kɛ emli “shabii” ni ji yibii gbohii ni jɛɔ mli kɛbaa lɛ hiɛ kɛya naanɔ. Esa akɛ wɔtswa wɔfai shi akɛ wɔhaŋ shikpɔŋ lɛ nɔ wein yibii lɛ aná wɔ nɔ hewalɛ.
16:13-16. “Mumɔi [ni he tseee]” lɛ damɔ shi kɛha saji ni daimonioi lɛ kɛtsuɔ nii koni amɛkɛkudɔ shikpɔŋ lɛ nɔ maŋtsɛmɛi lɛ bɔni afee ni amɛkabo shɛɛ saji ni yɔɔ Nyɔŋmɔ mlifu tɔi kpawo ni afɔse ashwie shi lɛ mli lɛ atoi, ní agbɛnɛ hu amɛkɛha maŋtsɛmɛi lɛ ate shi amɛwo Yehowa.—Mat. 24:42, 44.
16:21. Beni je nɛɛ naagbee lɛ bɛŋkɛɔ lɛ, ekolɛ akɛ wiemɔi ni naa wawai baafata Yehowa kojomɔi ni ajajeɔ ashiɔ Satan jeŋ fɔŋ lɛ he, ni eeenyɛ efee ákɛ akɛ nyɔŋmɔŋtɛi lɛ fee Nyɔŋmɔ kojomɔi lɛ ahe mfoniri. Fɛɛ sɛɛ lɛ, adesai ateŋ mɛi babaoo baaya nɔ amɛwie musubɔɔ wiemɔi amɛshi Nyɔŋmɔ.
MAŊTSƐ KUNIMYELƆ LƐ MIIYE NƆ
“Babilon Kpeteŋkpele lɛ,” ni ji apasa jamɔi fɛɛ ni yɔɔ je lɛŋ lɛ ji Satan jeŋ fɔŋ lɛ fã ko ni anyaŋeɔ. Atsɛ́ lɛ yɛ ninaa ni ji 11 lɛ mli akɛ “ajwamaŋ kpeteŋkpele”—yoo ajwamaŋ—ni ‘eta kooloo ni tsuɔ tamɔ muneele nɔ.’ Kooloo ni eta nɔ lɛ “akolontoi nyɔŋma” lɛ baakpãta ehiɛ kwraa. (Kpoj. 17:1, 3, 5, 16) Akɛ yoo ajwamaŋ lɛ to “maŋ kpeteŋkpele” he yɛ ninaa ni nyiɛ sɛɛ lɛ mli, ni afã Nyɔŋmɔ webii lɛ ni ‘amɛje emli’ oya. Mɛi babaoo baaye maŋ kpeteŋkpele lɛ hiɛkpatamɔ lɛ he awerɛho. Shi “Toobi lɛ yookpeemɔ lɛ” baaha aná miishɛɛ yɛ ŋwɛi. (Kpoj. 18:4, 9, 10, 15-19; 19:7) Yɛ ninaa ni ji 13 lɛ mli lɛ, ana “okpɔŋɔ yɛŋ” ko nɔtalɔ ní egbá ta ewo jeŋmaji lɛ. Ekpãta Satan jeŋ fɔŋ lɛ hiɛ.—Kpoj. 19:11-16.
Ni “blema onufu lɛ ni ji Abonsam kɛ Satan lɛ” hu? Mɛɛ be ‘abaaŋɔ lɛ awo la kɛ swɔɔ kpaakpo’ lɛ mli? Enɛ fata nibii ni ajie amɛ kpo yɛ ninaa ni ji 14 lɛ mli lɛ ahe. (Kpoj. 20:2, 10) Naagbee ninaai enyɔ lɛ haa anaa bɔ ni shihilɛ baaji yɛ Afii Akpe Nɔyeli be lɛ mli. Beni “kpojiemɔ” lɛ baa naagbee lɛ, Yohane na ‘wala nu faa miiho kɛmiitsɔ blohu lɛ teŋ,’ ni akɛ miishɛɛ fɔ̃ nine atsɛ́ ‘mɔ fɛɛ mɔ ni kumai yeɔ’ lɛ lɛ.—Kpoj. 1:1; 22:1, 2, 17.
Ŋmalɛ Naa Sanebimɔi ni Aha Hetoo:
17:16; 18:9, 10—Mɛni hewɔ “shikpɔŋ lɛ nɔ maŋtsɛmɛi lɛ” wo yara yɛ nɔ ni amɛ diɛŋtsɛ amɛkpãta hiɛ lɛ he lɛ? Ehe sɛɛ ni amɛnáa lɛ hewɔ amɛwo yara lɛ. Kɛ́ shikpɔŋ lɛ nɔ maŋtsɛmɛi lɛ kpãta Babilon Kpeteŋkpele lɛ hiɛ amɛtã lɛ, amɛbaayɔse akɛ asomoaŋ ehe yɛ sɛɛnamɔ kɛha amɛ. Babilon Kpeteŋkpele lɛ ha ana maŋtsɛmɛi lɛ ayiwalɛ nifeemɔi lɛ akɛ tɔmɔ bɛ he. Babilon Kpeteŋkpele lɛ ye kɛbua nɔyelɔi lɛ hu ni amɛná oblahii pii kɛwu tai. Kɛfata he lɛ, eye ebua koni nɔyelɔi lɛ aya nɔ akudɔ mɛi.
19:12—Te fee tɛŋŋ ni Yesu pɛ ji mɔ ni le egbɛi ní atsĩii tã lɛ? Gbɛi nɛɛ damɔ shi kɛha gbɛhe kɛ hegbɛi ní Yesu nine shɛ nɔ yɛ Nuŋtsɔ lɛ gbi lɛ mli lɛ, ni atsĩ ekomɛi atã yɛ Yesaia 9:5 lɛ. Mɔ ko mɔ ko leee gbɛi nɛɛ akɛ ja lɛ pɛ kɛkɛ, ni tsɔɔ akɛ hegbɛ ni akɛha lɛ lɛ yɛ srɔto kwraa ni ákɛ lɛ ekomɛ pɛ enuɔ bɔ ni nakai hegbɛ lɛ ji ha tuuntu lɛ shishi. Shi Yesu haa kuu ni damɔ shi kɛha eyemforo lɛ náa hegbɛi nɛɛ amli gbɛfaŋnɔ, ni tsɔɔ akɛ ‘eŋmaa egbɛi hee nɛɛ yɛ amɛ nɔ.’—Kpoj. 3:12.
19:14—Namɛi baata okpɔŋɔi anɔ kɛfata Yesu he yɛ Harmagedon lɛ? “Tai ní yɔɔ ŋwɛi” ní baafata Yesu he kɛwu Nyɔŋmɔ ta lɛ ji ŋwɛi bɔfoi kɛ mɛi ni afɔ amɛ mu lɛ ateŋ mɛi ni nine eshɛ amɛŋwɛi nyɔmɔwoo lɛ nɔ lɛ.—Mat. 25:31, 32; Kpoj. 2:26, 27.
20:11-15—Namɛi agbɛi aŋmalaa awoɔ “wala wolo lɛ” mli lɛ? Wolo nɛɛ mli mɛi fɛɛ ni baaná naanɔ wala lɛ agbɛi yɔɔ—Kristofoi ni afɔ amɛ mu lɛ, asafo babaoo lɛ mli bii lɛ, kɛ Nyɔŋmɔ tsuji anɔkwafoi ni abaatee amɛ shi yɛ ‘jalɔi ashitee’ lɛ mli lɛ. (Bɔf. 24:15; Kpoj. 2:10; 7:9) Ja mɛi ni abaatee amɛ shi yɛ ‘mɛi ni ejaaa lɛ ashitee lɛ’ mli lɛ hi shi yɛ “nibii ni aŋma yɛ woji lɛ amli lɛ,” ni ji gbɛtsɔɔmɔi ni akɛbaaha yɛ Afii Akpe Nɔyeli lɛ mli lɛ anaa dani abaaŋmala amɛgbɛi awo “wala wolo lɛ” mli. Ni kɛlɛ, jeee blɛgi ni anyɛɛɛ atsumɔ akɛŋmaa gbɛi lɛ awoɔ wolo lɛ mli lɛ. Mɛi ni afɔ amɛ mu lɛ agbɛi bafeɔ nɔ ni anyɛŋ agbe kɛ́ amɛye anɔkwa kɛtee gbele mli. (Kpoj. 3:5) Abaaŋmala mɛi ni baahi shikpɔŋ lɛ nɔ lɛ agbɛi yɛ wala wolo lɛ mli kɛya naanɔ kɛ́ amɛye naagbee kaa ni akɛaaba yɛ afii akpe lɛ naagbee lɛ nɔ kunim lɛ.—Kpoj. 20:7, 8.
Nibii ni Wɔkaseɔ Kɛjɛɔ Mli:
17:3, 5, 7, 16. “Nilee ni jɛ ŋwɛi lɛ” yeɔ ebuaa wɔ ni wɔnuɔ “yoo lɛ kɛ kooloo [ni tsuɔ tamɔ muneele] ní eta nɔ . . . lɛ ahe teemɔŋ sane lɛ” shishi. (Yak. 3:17) Nɛkɛ okadifeemɔŋ kooloo nɛɛ jie ehe kpo akɛ Jeŋmaji Akpaŋmɔ lɛ, ni sɛɛ mli lɛ eje kpo ekoŋŋ akɛ Jeŋmaji Ekomefeemɔ lɛ. Aso esaaa akɛ teemɔŋ sane nɛɛ ni agbele naa atsɔɔ wɔ lɛ tsirɛɔ wɔ koni wɔkɛ ekãa ashiɛ Nyɔŋmɔ Maŋtsɛyeli lɛ he sanekpakpa lɛ ní wɔjaje Yehowa kojomɔ gbi lɛ wɔtsɔɔ?
21:1-6. Wɔbaanyɛ wɔná nɔmimaa diɛŋtsɛ akɛ jɔɔmɔi fɛɛ ni agba akɛ abaaná beni Maŋtsɛyeli lɛ yeɔ nɔ lɛ baaba mli. Mɛni hewɔ? Ejaakɛ awie jɔɔmɔi nɛɛ ahe akɛ: “Agbe naa.”
22:1, 17. “Wala nu faa” lɛ damɔ shi kɛha gbɛjianɔi ni Yehowa eto koni ekɛha adesai aye amɛhe kɛjɛ esha kɛ gbele mli lɛ. Nu nɛɛ saŋŋ yɛ amrɔ nɛɛ. Nyɛhaa wɔkɛ hiɛsɔɔ akpɛlɛa ninefɔ̃ɔ akɛ ‘wɔbayɛ wala nu lɛ yaka’ lɛ nɔ, ni wɔkɛ miishɛɛ afɔ̃ nine wɔtsɛ mɛi krokomɛi hu!
[Shishigbɛ niŋmai]
^ kk. 1 Kɛ́ ootao Kpojiemɔ 1:1–12:17 lɛ mligbalamɔ lɛ, kwɛmɔ “Kpojiemɔ Wolo lɛ Mli Saji Otii—I” ni je kpo yɛ January 15, 2009 Buu-Muu lɛ mli lɛ mli.
^ kk. 2 Kɛ́ ootao ona bɔ ni agbála Kpojiemɔ wolo lɛ kuku fɛɛ kuku mli aha lɛ, no lɛ kwɛmɔ Kpojiemɔ—Enaagbee Kwraa lɛ Ebɛŋkɛ! wolo lɛ mli.
[Mfoniri ni yɔɔ baafa 5]
Adesai ni baafee toiboo lɛ anine baashɛ jɔɔmɔi babaoo anɔ beni Maŋtsɛyeli lɛ yeɔ nɔ lɛ!