Ohiɛ Ahi Juromɔ Nɔ̃ Lɛ Nɔ
Ohiɛ Ahi Juromɔ Nɔ̃ Lɛ Nɔ
“Miitiu oti lɛ kɛyashɛ juromɔ nɔ̃ lɛ he.”—FILIP. 3:14.
1. Mɛɛ juromɔ nɔ̃ awo he shi aha bɔfo Paulo?
BƆFO Paulo ni atsɛɔ lɛ hu akɛ Saulo ni jɛ Tarso lɛ jɛ weku ko ni abuɔ waa mli. Gamaliel ni ji Mla tsɔɔlɔ ní ehe gbɛi waa lɛ ji mɔ ni tsɔse lɛ yɛ amɛtsɛmɛi ajamɔ lɛ naa. (Bɔf. 22:3) Kulɛ Paulo baaná nitsumɔ ni bulɛ yɔɔ he yɛ nakai beaŋ etsu; ni kɛlɛ ekpoo ejamɔ lɛ ni ebatsɔ Kristofonyo. Agbɛnɛ lɛ ekwɛ naanɔ wala he juromɔ nɔ̃ ni awo he shi—akɛ ebaatsɔ maŋtsɛ kɛ osɔfo ni baaná naanɔ shihilɛ ni gbele bɛ mli yɛ Nyɔŋmɔ ŋwɛi Maŋtsɛyeli lɛ mli—lɛ gbɛ. Nakai Maŋtsɛyeli lɛ baaye shikpɔŋ ni baatsɔ paradeiso lɛ nɔ.—Mat. 6:10; Kpoj. 7:4; 20:6.
2, 3. Te Paulo bu wala ni ebaaná yɛ ŋwɛi lɛ he juromɔ nɔ̃ lɛ eha tɛŋŋ?
2 Paulo wie bɔ ni ebuɔ nakai juromɔ nɔ̃ lɛ waa lɛ he akɛ: “Nii ni ji sɛɛnamɔ ha mi sá lɛ, mibu nomɛi laajemɔ nii yɛ Kristo hewɔ. Shi lɛɛlɛŋ akɛ mibuɔ fɛɛ laajemɔ nii yɛ Kristo Yesu, mi-Nuŋtsɔ lɛ, he nilee ni fe fɛɛ lɛ hewɔ, lɛ ehewɔ ni nii fɛɛ ebɔ mi, ni mibuɔ amɛ akɛ tumu nɔ nii.” (Filip. 3:7, 8) Eyɛ mli akɛ mɛi babaoo buɔ hegbɛ, ninámɔ, nitsumɔ, kɛ gbɛihemɔ akɛ nibii ni he hiaa waa moŋ, shi Paulo bu nomɛi akɛ tumu nɔ nii beni ebale anɔkwale ni kɔɔ yiŋtoo ni Yehowa yɔɔ kɛha adesai lɛ he lɛ.
3 Kɛjɛ nakai beaŋ kɛyaa lɛ, Yehowa kɛ Kristo he nilee ni he yɔɔ sɛɛnamɔ waa lɛ batsɔ nɔ ni he hiaa waa kɛha Paulo. Yesu sɔle yɛ nakai nilee lɛ he eha Nyɔŋmɔ akɛ: “Enɛ ji naanɔ wala lɛ, ákɛ amɛle bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ.” (Yoh. 17:3) Paulo wiemɔi ni yɔɔ Filipibii 3:14 lɛ haa wɔnaa faŋŋ akɛ eshwe naanɔ wala waa. Ekɛɛ akɛ: “Miitiu oti lɛ kɛyashɛ Nyɔŋmɔ tsɛ́mɔ ni jɛ ŋwɛi yɛ Kristo Yesu mli lɛ he juromɔ nɔ̃ lɛ he.” Hɛɛ, Paulo ha ehiɛ hi naanɔ wala ni ebaaná yɛ ŋwɛi akɛ mɔ ni baafata he kɛye nɔ yɛ Nyɔŋmɔ Maŋtsɛyeli lɛ mli lɛ he juromɔ nɔ̃ lɛ nɔ.
Abaahi Shi yɛ Shikpɔŋ lɛ nɔ Kɛya Naanɔ
4, 5. Mɛɛ juromɔ nɔ̃ awo he shi aha mɛi akpekpei abɔ ni feɔ Nyɔŋmɔ suɔmɔnaa nii ŋmɛnɛ lɛ?
4 Naanɔ wala yɛ Nyɔŋmɔ jeŋ hee lɛ mli ji juromɔ nɔ̃ ni esa akɛ mɛi ni feɔ Nyɔŋmɔ suɔmɔnaa nii lɛ ateŋ mɛi babaoo atiu. (Lala 37:11, 29) Yesu ma nɔ mi akɛ hiɛnɔkamɔ nɛɛ baaba mli anɔkwale. Ekɛɛ akɛ: “Ajɔɔ mɛi ni he jɔ lɛ; shi amɛaaye shikpɔŋ lɛ nɔ.” (Mat. 5:5) Yesu diɛŋtsɛ ji mɔ titri ni baaye shikpɔŋ lɛ nɔ taakɛ Lala 2:8 lɛ etsɔɔ lɛ, ni mɛi 144,000 baafata ehe kɛye nɔ yɛ ŋwɛi. (Dan. 7:13, 14, 22, 27) Tooi krokomɛi ni baahi shikpɔŋ lɛ nɔ lɛ ‘baaŋɔ’ Maŋtsɛyeli lɛ ‘ni asaa ato amɛ’ yɛ shikpɔŋ lɛ nɔ “kɛjɛ jeŋ shishijee lɛ.” (Mat. 25:34, 46) Ni wɔyɛ nɔmimaa akɛ shiwoo nɛɛ baaba mli ejaakɛ Nyɔŋmɔ, mɔ ni wo shi lɛ “maleee.” (Tito 1:2) Wɔbaanyɛ wɔná hekɛnɔfɔɔ yɛ Nyɔŋmɔ shiwoi amli tamɔ Yoshua. Ekɛɛ Israelbii lɛ akɛ: “Nibii kpakpai fɛɛ ni Yehowa, nyɛ-Nyɔŋmɔ lɛ, wie yɛ nyɛhewɔ lɛ, emli ekome folo ekaaa shi, fɛɛ eba mli eha nyɛ, emli ekome folo ekaaa shi.”—Yosh. 23:14.
5 Nyɔŋmɔ jeŋ hee lɛ mli shihilɛ ejeŋ mɔ tsine taakɛ eji ŋmɛnɛ lɛ. Ebaafee srɔto kwraa: tawuu, awuiyeli, ohia, jalɛsane ni ayeee, hela, kɛ gbele ehiŋ mli. Nakai beaŋ lɛ mɛi baaná gbɔmɔtsoŋ hewalɛ ni eye emuu, ni amɛbaahi shikpɔŋ ni afee lɛ paradeiso lɛ nɔ. Shihilɛ nɛɛ baafee nɔ ni yɔɔ miishɛɛ waa ní haa mɔ tsui nyɔɔ emli waa fe bɔ ni wɔkpaa gbɛ. Yɛ anɔkwale mli lɛ, abaaná miishɛɛ yɛ shihilɛ mli daa gbi. Mɛɛ juromɔ nɔ̃ ni nɔ bɛ po nɛ!
6, 7. (a) Te Yesu fee nibii ni wɔbaanyɛ wɔkpa gbɛ akɛ ebaaya nɔ yɛ Nyɔŋmɔ jeŋ hee lɛ mli lɛ he nɔkwɛmɔnɔ eha tɛŋŋ? (b) Mɛɛ gbɛ nɔ gbohii lɛ po baaje shihilɛ shishi ekoŋŋ?
6 Beni Yesu yɔɔ shikpɔŋ lɛ nɔ lɛ, Nyɔŋmɔ mumɔ krɔŋkrɔŋ lɛ ha ená hewalɛ ni ekɛfee nibii ni yɔɔ naakpɛɛ ní ebaatsu yɛ shikpɔŋ muu lɛ fɛɛ nɔ yɛ jeŋ hee lɛ mli lɛ he nɔkwɛmɔnɔ. Ákɛ nɔkwɛmɔnɔ lɛ, Yesu kɛɛ nuu ko ni ekumɔ afii 38 lɛ akɛ ete shi ni enyiɛ. Biblia lɛ tsɔɔ akɛ nuu lɛ fee nakai. (Nyɛkanea Yohane 5:5-9.) Yɛ be kroko mli lɛ, Yesu na “nuu ko ni eshwila kɛjɛ efɔmɔ mli,” ni etsa lɛ. Sɛɛ mli lɛ, abi nuu ni eshwila lɛ Mɔ ni tsa lɛ lɛ he sane, ni eto he akɛ: “Kɛjɛ be ni abɔ ade nɛɛ anuko akɛ mɔ ko égbele mɔ ni afɔ lɛ shwilafo hiŋmɛii dã. Kɛji mɔ nɛ jɛɛɛ Nyɔŋmɔ ŋɔɔ kulɛ, enyɛŋ nɔ ko efee.” (Yoh. 9:1, 6, 7, 32, 33) Yesu nyɛ efee enɛɛmɛi fɛɛ ejaakɛ Nyɔŋmɔ ha lɛ hewalɛ. He fɛɛ he ni Yesu tee lɛ, “etsá mɛi ni tsámɔ ehia amɛ lɛ.”—Luka 9:11.
7 Jeee akpakei kɛ mɛi ni he yeɔ lɛ pɛ kɛkɛ Yesu nyɛ etsá, shi moŋ enyɛ etee gbohii ashi hu. Ákɛ nɔkwɛmɔnɔ lɛ, beni gbekɛ yoo ko ni eye afii 12 lɛ gbo lɛ, efɔlɔi ye awerɛho waa diɛŋtsɛ. Shi Yesu kɛɛ: “Gbekɛ yoo, miikɛɛo akɛ: Tee shi!” Ni gbekɛ lɛ te shi! Ani obaanyɛ ofee bɔ ni fɔlɔi lɛ kɛ mɛi ni yɔɔ jɛmɛ lɛ baafee amɛnii amɛha lɛ he mfoniri yɛ ojwɛŋmɔ mli? (Nyɛkanea Marko 5:38-42.) Akɛni “gbohiiashitee baaba, ni jalɔi kɛ mɛi ni ejaaa fɛɛ baate shi” hewɔ lɛ, mɛi ‘anaa baakpɛ amɛhe naakpa’ kɛ́ atee mɛi akpekpe toi akpei abɔ ashi yɛ Nyɔŋmɔ jeŋ hee lɛ mli lɛ. (Bɔf. 24:15; Yoh. 5:28, 29) Mɛnɛɛmɛi baaje shihilɛ shishi ekoŋŋ, ni abaaha amɛná hiɛnɔkamɔ akɛ kɛjɛ nakai beaŋ kɛyaa lɛ amɛbaanyɛ amɛhi shi kɛya naanɔ.
8, 9. (a) Yɛ Kristo Afii Akpe Nɔyeli lɛ mli lɛ, mɛni abaafee yɛ esha ni aná kɛjɛ Adam ŋɔɔ akɛ gboshinii lɛ he? (b) Mɛni naa abaakojo gbohii lɛ yɛ?
8 Mɛi ni abaatee amɛshi lɛ baaná hegbɛ akɛ amɛaahi shi kɛya naanɔ. Jeee eshai ni amɛfee dani amɛgboi lɛ anɔ abaadamɔ akojo amɛ. (Rom. 6:7) Yɛ Kristo Afii Akpe Nɔyeli lɛ mli lɛ, abaatsɔ kpɔ̃mɔ afɔleshaa lɛ nɔ aha Maŋtsɛyeli lɛ shishibii ní feɔ toiboo lɛ aye emuu fiofio, ni yɛ naagbee lɛ amɛbaaye amɛhe kwrakwra kɛjɛ nibii fɛɛ ni ejɛ Adam eshafeemɔ lɛ mli kɛba lɛ ahe. (Rom. 8:21) Yehowa ‘aaami gbele kɛaatee naanɔ; ni Nuŋtsɔ Yehowa aaatsumɔ hiɛaŋ fɛɛ yaafonui.’ (Yes. 25:8) Nyɔŋmɔ Wiemɔ lɛ kɛɔ hu akɛ ‘abaagbele woji anaa,’ ni tsɔɔ akɛ mɛi ni baahi shi yɛ nakai beaŋ lɛ anine baashɛ saji heei anɔ. (Kpoj. 20:12) Be mli ni shikpɔŋ lɛ tsɔɔ paradeiso lɛ, ‘shikpɔŋ lɛ nɔ bii lɛ baakase jalɛ.’—Yes. 26:9.
9 Abaakojo mɛi ni abaatee amɛ shi lɛ yɛ nibii ni amɛbaafee lɛ anaa, shi jeee yɛ esha ni amɛná akɛ gboshinii kɛjɛ Adam ŋɔɔ lɛ naa. Kpojiemɔ 20:12 lɛ kɛɔ akɛ: “Akojo gbohii lɛ yɛ nibii ni aŋma yɛ woji lɛ amli lɛ anaa, bɔ ni sa amɛnitsumɔi lɛ,” ni ji nibii ni amɛfee yɛ amɛshitee lɛ sɛɛ lɛ. Kwɛ bɔ ni enɛ tsɔɔ faŋŋ akɛ Yehowa yeɔ jalɛsane, enaa mɔbɔ, ni eyɛ suɔmɔ! Kɛfata he lɛ, “akaiŋ tsutsu nii” ni ji hejaramɔi ni amɛná yɛ jeŋ fɔŋ nɛɛ mli “lɛ dɔŋŋ, ni asaŋ ebaŋ jwɛŋmɔ mli dɔŋŋ.” (Yes. 65:17) Saji heei ni yɔɔ miishɛɛ ni amɛnine baashɛ nɔ, kɛ nibii kpakpai ni amɛbaaná yɛ shihilɛ mli lɛ haŋ tsutsu nibii gbohii lɛ ahao amɛ dɔŋŋ. Amɛhiɛ baakpa nakai tsutsu nibii lɛ anɔ. (Kpoj. 21:4) Nakai nɔŋŋ ebaaba lɛ yɛ “asafo babaoo” ni baafo Harmagedon lɛ agbɛfaŋ.—Kpoj. 7:9, 10, 14.
10. (a) Te shihilɛ yɛ Nyɔŋmɔ jeŋ hee lɛ mli lɛ baaji eha tɛŋŋ? (b) Mɛni obaanyɛ ofee koni ohiɛ ahi juromɔ nɔ̃ lɛ nɔ?
10 Hela mɔŋ mɛi ni baahi shi yɛ Nyɔŋmɔ jeŋ hee lɛ mli lɛ dɔŋŋ, ni asaŋ amɛgboiŋ hu. “Maŋbii lɛ ateŋ mɔ ko ekɛɛŋ akɛ: [Mihe miiye]!” (Yes. 33:24) Mɛi ni baahi shikpɔŋ hee lɛ nɔ lɛ baate shi daa leebi kɛ gbɔmɔtsoŋ hewalɛ kpakpa ni hi kɛwula shi, ni amɛkɛ miishɛɛ baakpa nibii ni haa mɔ tsui nyɔɔ emli gbɛ. Amɛbaakpa gbɛ daa gbi akɛ amɛbaatsu nitsumɔi ni baaha amɛtsui anyɔ amɛmli ní amɛkɛ mɛi krokomɛi ni susuɔ amɛhe lɛ abɔ. Lɛɛlɛŋ, shihilɛ ni tamɔ nɛkɛ lɛ ji juromɔ nɔ̃ ni yɔɔ miishɛɛ! Wɔmiiwo bo hewalɛ ni okane Yesaia 33:24 kɛ 35:5-7 lɛ ni ojwɛŋ nɔ. Feemɔ shihilɛ lɛ he mfoniri yɛ ojwɛŋmɔŋ ni oŋɔ lɛ akɛ oyɛ jɛmɛ. No baaye abua bo ni ohiɛ ahi juromɔ nɔ̃ lɛ nɔ.
Mɛi Komɛi Haaa Amɛhiɛ Ahi Juromɔ Nɔ̃ lɛ Nɔ
11. Tsɔɔmɔ bɔ ni Salomo je enɔyeli lɛ shishi jogbaŋŋ eha.
11 Akɛni wɔná wɔle juromɔ nɔ̃ ni kã wɔhiɛ lɛ, esa akɛ wɔbɔ mɔdɛŋ waa ni wɔha wɔhiɛ ahi nɔ daa, kɛ́ jeee nakai lɛ wɔhiɛ baanyɛ aje nɔ. Ákɛ nɔkwɛmɔnɔ lɛ, beni Salomo batsɔ maŋtsɛ yɛ blema Israel lɛ, ekɛ heshibaa sɔle ebi koni Nyɔŋmɔ aduro lɛ niiashishinumɔ kɛ sɛɛyoomɔ bɔni afee ni enyɛ ekojo Nyɔŋmɔ webii lɛ jogbaŋŋ. (Nyɛkanea 1 Maŋtsɛmɛi 3:6-12.) Biblia lɛ tsɔɔ akɛ, no hewɔ lɛ “Nyɔŋmɔ hã Salomo nilee kɛ niiashishinumɔ babaoo diɛŋtsɛ.” Yɛ anɔkwale mli lɛ, “Salomo nilee fe bokagbɛbii lɛ fɛɛ anilee kɛ Mizraim nilee fɛɛ.”—1 Maŋ. 5:9-12.
12. Mɛɛ kɔkɔ Yehowa bɔ mɛi ni batsɔmɔ maŋtsɛmɛi yɛ Israel lɛ?
12 Shi Yehowa etsɔ hiɛ ebɔ kɔkɔ akɛ mɔ fɛɛ mɔ ni baatsɔ maŋtsɛ lɛ ‘akahi okpɔŋɔi pii’ ni asaŋ “ekaŋɔ yei pii, ni etsui miikpale.” (5 Mose 17:14-17) Kɛ́ maŋtsɛ ko ŋɔ okpɔŋɔi pii lɛ, no baatsɔɔ akɛ ekɛ ehe efɔ̃ɔɔ Yehowa nɔ ákɛ maŋ lɛ Hebulɔ, shi moŋ ekɛ ehe fɔ̃ɔ asraafoi anɔ koni amɛbu maŋ lɛ he. Ni yei pii ni eeeŋɔ lɛ baafee oshara ejaakɛ amɛteŋ mɛi komɛi baanyɛ ajɛ maji ni bɛŋkɛ amɛ ni jáa wɔŋ lɛ amli, ni nakai yei lɛ baanyɛ aha etsui akpale kɛjɛ Yehowa anɔkwa jamɔ lɛ he.
13. Te fee tɛŋŋ ni Salomo hiɛ je nɔ ni atuu awo edɛŋ lɛ nɔ lɛ?
13 Salomo booo nakai kɔkɔbɔi lɛ atoi. Yɛ no najiaŋ lɛ efee nɔ pɛ ni Yehowa kɛɛ akɛ maŋtsɛmɛi akafee lɛ. Ebua okpɔŋɔi kɛ okpɔŋɔiatsɛmɛi akpei abɔ anaa. (1 Maŋ. 5:6) Asaŋ eŋɔ yei 700 kɛ hemɛi 300, ni amɛteŋ mɛi babaoo jɛ maji ni bɛŋkɛ ní jáa wɔŋ lɛ amli. Mɛnɛɛmɛi “dɔ etsui kɛyanyiɛ nyɔŋmɔi krokomɛi asɛɛ; ni etsui yeee emuu yɛ Yehowa . . . hiɛ.” Salomo yanyiɛ eŋamɛi ni jɛ jeŋmaji ni jáa wɔŋ lɛ amli lɛ asɛɛ, ni amɛha ekɛ ehe yawo apasa jamɔ ni yɔɔ nyaŋemɔ mli. Enɛ hewɔ lɛ, Yehowa kɛɛ Salomo akɛ “shɔ̃ kɛ̃ mashɔ̃ maŋtsɛyeli lɛ yɛ odɛŋ.”—1 Maŋ. 11:1-6, 11.
14. Mɛni jɛ toi ni Salomo kɛ Israel maŋ lɛ gbo lɛ mli kɛba?
14 Salomo haaa ehiɛ ahi hegbɛ kpele ni ená akɛ edamɔ anɔkwa Nyɔŋmɔ lɛ najiaŋ lɛ nɔ. Ekɛ ehe wo apasa jamɔ mli vii. Sɛɛ mli lɛ, maŋ muu lɛ fɛɛ batsɔmɔ hemɔkɛyeli kwalɔi, ni no ha akpãta maŋ lɛ hiɛ yɛ afi 607 D.Ŋ.B. Eyɛ mli akɛ Yudafoi lɛ saa amɛto anɔkwa jamɔ shishi ekoŋŋ moŋ, shi afii ohai komɛi asɛɛ lɛ, Yesu kɛɛ amɛ akɛ: “Abaashɔ̃ Nyɔŋmɔ maŋtsɛyeli lɛ yɛ nyɛdɛŋ, ni aaaŋɔha jeŋmaŋ ko ní woɔ yibii.” Nakai pɛpɛɛpɛ ebalɛ. Yesu jaje akɛ: “Naa, aaashi nyɛwe lɛ amaŋfɔ aha nyɛ!” (Mat. 21:43; 23:37, 38) Akɛni maŋ lɛ yeee anɔkwa hewɔ lɛ, hegbɛ kpele ni amɛná akɛ amɛaadamɔ anɔkwa Nyɔŋmɔ lɛ najiaŋ lɛ ŋmɛɛ amɛ. Yɛ afi 70 Ŋ.B. lɛ, Roma asraafoi lɛ kpãta Yerusalem kɛ sɔlemɔtsu lɛ hiɛ, ni Yudafoi ni shwɛ lɛ ateŋ mɛi babaoo batsɔmɔ nyɔji.
15. Tsɔɔmɔ mɛi komɛi ni haaa amɛhiɛ ahi nibii ni he hiaa diɛŋtsɛ lɛ anɔ.
15 Yesu bɔfoi 12 lɛ ateŋ mɔ kome ji Yuda Iskariot. Yuda bo Yesu nitsɔɔmɔi ni nɔ bɛ lɛ atoi, ni ena naakpɛɛ nibii ni Nyɔŋmɔ mumɔ krɔŋkrɔŋ lɛ ha Yesu fee lɛ hu. Ni kɛlɛ, Yuda eyabuuu etsui he. Atuu fotro ni Yesu kɛ bɔfoi 12 lɛ eto lɛ awo edɛŋ. Shi “julɔ ji lɛ, ni lɛ etoɔ fotro lɛ, ni ejuɔ nɔ ni akɛwoɔ mli lɛ.” (Yoh. 12:6, Ga Biblia hee lɛ) Hiɛjoomɔ ni ená lɛ mli bawa aahu akɛ ekɛ osɔfonukpai osatofoi lɛ kpaŋ, ni etsɔɔ Yesu sɛɛ gbɛ ehe jwiɛtɛi kukuji 30. (Mat. 26:14-16) Mɔ kroko hu ni je eŋɛlɛ nɔ ji Dema ní kulɛ eji bɔfo Paulo naanyo lɛ. Dema eyabuuu etsui he. Paulo kɛɛ akɛ: “Dema esumɔ amrɔmrɔ je nɛŋ hewɔ lɛ, eshi mi.”—2 Tim. 4:10; nyɛkanea Abɛi 4:23.
Nɔ ni Wɔteŋ Mɔ Fɛɛ Mɔ Kaseɔ Kɛjɛɔ Mli
16, 17. (a) Te shiteekɛwoo ni wɔkɛkpeɔ lɛ naa wa ha tɛŋŋ? (b) Mɛni baanyɛ aye abua wɔ ni wɔdamɔ nibii fɛɛ ni Satan kɛbaatutua wɔ lɛ anaa?
16 Ákɛ Nyɔŋmɔ tsuji lɛ, esa akɛ wɔ fɛɛ wɔkɛ hiɛdɔɔ asusu nɔkwɛmɔnii ni yɔɔ Biblia lɛ mli lɛ he, ejaakɛ ekɛɔ wɔ akɛ: “Afee amɛ enɛɛmɛi fɛɛ ni akɛto okadi aha wɔ, ni aŋma ni aŋɔbɔ wɔ kɔkɔ, wɔ mɛi ni je lɛ naagbee lɛ enina wɔ lɛ.” (1 Kor. 10:11) Amrɔ nɛɛ wɔyɛ nibii agbɛjianɔtoo fɔŋ nɛɛ naagbee gbii lɛ amli.—2 Tim. 3:1, 13.
17 Satan Abonsam ni ji “je nɛŋ nyɔŋmɔ lɛ” le akɛ “be fioo kɛkɛ eyɔɔ.” (2 Kor. 4:4; Kpoj. 12:12) Ebaafee nɔ fɛɛ nɔ ni eeenyɛ koni ekɛlaka Yehowa tsuji lɛ ní amɛku Kristofoi ashishitoo mlai amli. Satan ji mɔ ni kudɔɔ je nɛɛ kɛ emli gbɛ̀i ni atsɔɔ nɔ agbɛɔ saji ashwãa lɛ. Shi kɛlɛ, Yehowa haa ewebii lɛ “hewalɛ ní fá kɛteke nɔ.” (2 Kor. 4:7) Wɔbaanyɛ wɔkɛ wɔhe afɔ̃ nɛkɛ hewalɛ ni jɛ Nyɔŋmɔ ŋɔɔ nɛɛ nɔ koni eye ebua wɔ ni wɔdamɔ nibii fɛɛ ni Satan kɛbaatutua wɔ lɛ anaa. No hewɔ lɛ, aawo wɔ hewalɛ ni wɔsɔle daa ni wɔná nɔmimaa akɛ Yehowa ‘baaŋɔ mumɔ krɔŋkrɔŋ eha mɛi ni biɔ lɛ lɛ.’—Luka 11:13.
18. Te esa akɛ wɔbu amrɔmrɔ jeŋ nɛɛ wɔha tɛŋŋ?
18 Le ni wɔle akɛ etsɛŋ ni abaakpãta Satan gbɛjianɔtoo muu lɛ fɛɛ hiɛ, ni abaabaa anɔkwa Kristofoi ayi lɛ hu woɔ wɔ hewalɛ. “Je lɛ hoɔ eyaa kɛ emli sɛɛdii nii lɛ; shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.” (1 Yoh. 2:17) Enɛ hewɔ lɛ, ebaafee nɔ ni nilee bɛ mli kwraa akɛ Nyɔŋmɔ tsulɔ ko baasusu akɛ nɔ ko yɛ amrɔmrɔ nibii agbɛjianɔtoo nɛɛ mli ni jara wa fe wekukpaa ni kã ekɛ Yehowa teŋ lɛ! Jeŋ ni Satan kudɔɔ lɛ nɛɛ tamɔ meele ni miishiu. Yehowa eto Kristofoi asafo lɛ eha etsuji anɔkwafoi lɛ koni ekɛhere amɛyiwala tamɔ bɔ ni akɛ “lɛlɛ” yahereɔ mɛi ayiwala kɛjɛɔ meele ni miishiu mli lɛ. Beni etsuji anɔkwafoi lɛ bɛŋkɛɔ jeŋ hee lɛ, amɛbaanyɛ amɛná nɔmimaa yɛ shiwoo nɛɛ mli akɛ: “Efɔŋfeelɔi lɛ, aaafolɔ amɛ ashwie; shi mɛi ni kwɛɔ Yehowa gbɛ lɛ, shikpɔŋ lɛ aaatsɔ̃ amɛnɔ̃.” (Lala 37:9) No hewɔ lɛ, ha ohiɛ ahi juromɔ nɔ̃ ni nɔ bɛ nɛɛ nɔ!
Ani Okaiɔ?
• Te Paulo bu juromɔ nɔ̃ ni awo lɛ shi akɛ enine baashɛ nɔ lɛ eha tɛŋŋ?
• Mɛni nɔ abaadamɔ akojo mɛi ni baahi shikpɔŋ lɛ nɔ kɛya naanɔ lɛ?
• Mɛɛ nilee gbɛ esa akɛ okɔ bianɛ?
[Nikasemɔ lɛ he Sanebimɔi]
[Mfoniri ni yɔɔ baafa 12, 13]
Kɛ́ ookane Biblia lɛ, ani ofeɔ he mfoniri yɛ ojwɛŋmɔ mli akɛ onine eshɛ juromɔ nɔ̃ lɛ nɔ?