Anɔkwa Ni Oyeɔ Lɛ Haa Yehowa Tsui Nyɔɔ Emli
Anɔkwa Ni Oyeɔ Lɛ Haa Yehowa Tsui Nyɔɔ Emli
“Mibi, feemɔ ohe nilelɔ, ní oha mitsui anyɔ mimli, ní maná hetoo maha mɔ ni bɔɔ mi ahora lɛ.”—ABƐI 27:11.
1, 2. (a) Mɛɛ naafolɔmɔ wiemɔi Hiob wolo lɛ tsɔɔ akɛ Satan wie? (b) Mɛni tsɔɔ akɛ Satan etee nɔ ebɔ Yehowa ahora yɛ Hiob gbii lɛ asɛɛ?
YEHOWA ŋmɛ gbɛ ni Satan ka E-tsulɔ anɔkwafo Hiob anɔkwayeli lɛ. No hewɔ lɛ, Hiob kooloi kɛ ebii gboi, ni eye hela ni naa wa. Beni Satan folɔɔ Hiob naa yɛ enɔkwayeli lɛ he lɛ, jeee Hiob pɛ kɛkɛ sane yɔɔ ejwɛŋmɔ mli. Satan kɛɛ akɛ: “Akɛ hewolo haa yɛ hewolo najiaŋ, ni nɔ fɛɛ nɔ ní mɔ ko yɔɔ lɛ eŋɔhaa yɛ ewala hewɔ!” Naafolɔmɔ nɛɛ tee sane ko ni kɔɔ Hiob kɛ adesai krokomɛi ni hiɔ shi yɛ Hiob gbele sɛɛ lɛ hu ahe.—Hiob 2:4.
2 Aaafee afii 600 yɛ Hiob kaai lɛ asɛɛ lɛ, akɛ mumɔ krɔŋkrɔŋ lɛ tsirɛ Salomo ni eŋma akɛ: “Mibi, feemɔ ohe nilelɔ, ní oha mitsui anyɔ mimli, ní maná hetoo maha mɔ ni bɔɔ mi ahora lɛ.” (Abɛi 27:11) Ekã shi faŋŋ akɛ, no mli lɛ Satan miiya nɔ eefolɔ Yehowa naa. Kɛfata he lɛ, ninaa ni akɛha bɔfo Yohane lɛ tsɔɔ akɛ, beni ato Nyɔŋmɔ Maŋtsɛyeli lɛ ama shi yɛ afi 1914 lɛ, ni ashwie Satan kɛjɛ ŋwɛi lɛ sɛɛ lɛ, ana akɛ eefolɔ Nyɔŋmɔ tsuji lɛ anaa lolo. Ŋmɛnɛ, ni je lɛ ebote enibii agbɛjianɔtoo fɔŋ nɛɛ naagbee mli vii po lɛ, Satan miiya nɔ eeeka anɔkwa ni Nyɔŋmɔ tsuji yeɔ lɛ!—Kpoj. 12:10.
3. Mɛɛ nibii ni he hiaa wɔbaanyɛ wɔkase kɛjɛ Hiob wolo lɛ mli?
3 Agbɛnɛ, susumɔ nibii etɛ ni he hiaa ni wɔkaseɔ kɛjɛɔ Hiob wolo lɛ mli lɛ ahe okwɛ. Klɛŋklɛŋ lɛ, Hiob kaai lɛ haa wɔnaa mɔ tuuntu ni ji adesai ahenyɛlɔ kɛ mɔ ni hɔ shiteekɛwoo ni Nyɔŋmɔ webii kɛkpeɔ lɛ sɛɛ. Nakai henyɛlɔ lɛ ji Satan Abonsam. Nɔ ni ji enyɔ lɛ, ekɔɔɔ he eko kaai ni wɔkɛ baakpe lɛ, kɛ́ wɔha wekukpãa kpakpa kã wɔkɛ Nyɔŋmɔ teŋ lɛ no baaye abua wɔ ni wɔya nɔ wɔye anɔkwa. Nɔ ni ji etɛ lɛ, kɛ aaka wɔ yɛ gbɛ ko nɔ lɛ, Nyɔŋmɔ yeɔ ebuaa wɔ taakɛ eye ebua Hiob lɛ. Ŋmɛnɛ, Yehowa feɔ nakai kɛtsɔ e-Wiemɔ lɛ, egbɛjianɔtoo lɛ, kɛ emumɔ krɔŋkrɔŋ lɛ nɔ.
Ha Mɔ Tuuntu ni Ji Henyɛlɔ lɛ Ahi Ojwɛŋmɔ Mli
4. Namɔ esa akɛ ashwa yɛ nibii ni yaa nɔ yɛ je lɛ mli ŋmɛnɛ lɛ he?
4 Mɛi babaoo heee yeee akɛ Satan yɛ shihilɛ mli. Eyɛ mli akɛ nibii ni yaa nɔ yɛ je lɛ mli lɛ haoɔ amɛ moŋ, shi amɛyooo mɔ tuuntu ni hɔ sɛɛ—Satan Abonsam. Eji anɔkwale akɛ haomɔi pii ni baa adesai anɔ lɛ jɛ amɛdiɛŋtsɛ. Wɔ klɛŋklɛŋ fɔlɔi Adam kɛ Hawa hala akɛ amɛbaatsi amɛhe kɛjɛ amɛ Bɔlɔ lɛ he. Kɛjɛ no sɛɛ kɛbaa nɛɛ, adesai efee amɛnii yɛ gbɛ ni nilee bɛ mli nɔ. Abonsam ji mɔ ni laka Hawa ni etse atua eshi Nyɔŋmɔ. Lɛ ji mɔ ni eto gbɛjianɔ ni ekɛyeɔ adesai ni yeee emuu ni gboiɔ nɛɛ anɔ yɛ je lɛŋ. Akɛni Satan ji “je nɛŋ nyɔŋmɔ” hewɔ lɛ, adesai jieɔ esui titrii lɛ akpo—henɔwomɔ, bei, awuŋayeli, hiɛjoomɔ, lakamɔ, kɛ atuatsemɔ. (2 Kor. 4:4; 1 Tim. 2:14; 3:6; nyɛkanea Yakobo 3:14, 15.) Sui ni tamɔ nɛkɛ ewo maŋkwramɔŋ gbɛjianɔtoo kɛ jamɔ mli béi, nyɛɛ, juu kɛ fɔ̃, sakasakafeemɔ, ni enɛ fata nibii ní haa adesai naa nɔ̃ lɛ he.
5. Mɛni wɔsumɔɔ ni wɔkɛ nilee kpele ni akɛ duro wɔ lɛ afee?
5 Wɔ ákɛ Yehowa tsuji lɛ, aduro wɔ kɛ nilee kpele! Hɛɛ, wɔ le mɔ ni esa akɛ ashwa yɛ je lɛŋ shihilɛ ni yaa nɔ efiteɔ lɛ he. Aso esaaa akɛ enɛ atsirɛ wɔ ni wɔkɛ wɔhe awo shiɛmɔ nitsumɔ lɛ mli, ni wɔha mɛi ale mɔ tuuntu ni kɛ naagbai nɛɛ baa lɛ? Ani wɔbɛ he miishɛɛ akɛ wɔɔfi Yehowa Nyɔŋmɔ sɛɛ, ni wɔha mɛi krokomɛi ale bɔ ni ekɛ Satan kɛ adesai apiŋmɔi fɛɛ baaba naagbee lɛ?
6, 7. (a) Namɔ ji mɔ ni hɔ yi ni awaa anɔkwa tsuji lɛ sɛɛ? (b) Te wɔɔfee tɛŋŋ wɔkase Elihu ni hi shi yɛ blema lɛ nɔkwɛmɔnɔ lɛ?
6 Satan ji mɔ ni eha haomɔi efa babaoo yɛ je lɛŋ lɛ, ni lɛ nɔŋŋ ji mɔ ni hɔ shiteekɛwoo ni Nyɔŋmɔ webii kɛkpeɔ lɛ sɛɛ. Etswa efai shi akɛ ebaaka wɔ. Yesu Kristo kɛɛ bɔfo Petro akɛ: “Simon, Simon, naa, Satan etao nyɛhe gbɛ, koni esha nyɛmli taakɛ ŋmãa.” (Luka 22:31) Yɛ nakai gbɛ nɔ nɔŋŋ lɛ, wɔteŋ mɔ fɛɛ mɔ ni baanyiɛ Yesu nanemaahei lɛ asɛɛ lɛ kɛ kaai baakpe yɛ gbɛ ko nɔ. Petro kɛ Abonsam to “jata ni hũuɔ eetao mɔ ni eeemi” lɛ he. Ni Paulo kɛɛ akɛ: “Mɛi fɛɛ hu ni taoɔ akɛ amɛaahi shi yɛ Nyɔŋmɔjamɔ naa yɛ Kristo Yesu mli lɛ, aaawa amɛyi.”—1 Pet. 5:8; 2 Tim. 3:12.
7 Te wɔɔfee tɛŋŋ wɔtsɔɔ akɛ wɔhiɛ kpako mɔ tuuntu ni ji henyɛlɔ lɛ nɔ beni haomɔ ko ebanina wɔnaanyo Kristofonyo ko lɛ? Yɛ nɔ najiaŋ ni wɔɔtsi wɔhe kɛjɛ nyɛmi ni miina nɔ̃ lɛ he lɛ, esa akɛ wɔfee wɔnii tamɔ Elihu ni hi shi yɛ blema ni kɛ Hiob wie akɛ naanyo kpakpa lɛ fee lɛ. Wɔyeɔ wɔbuaa wɔnyɛmi lɛ bɔni afee ni enyɛ eye wɔhenyɛlɔ ni ji Satan lɛ nɔ kunim. (Abɛi 3:27; 1 Tes. 5:25) Oti ni ma wɔhiɛ ji ni wɔye wɔbua wɔnyɛmi lɛ yɛ gbɛ fɛɛ gbɛ nɔ, koni enyɛ eya nɔ eye anɔkwa, ni eha Yehowa tsui anya.
8. Mɛni hewɔ Satan nyɛɛɛ atsĩ Hiob naa ni ekawo Yehowa hiɛ nyam lɛ?
8 Hiob kooloi lɛ ji nɔ̃ klɛŋklɛŋ ni Satan kpata hiɛ. Kooloi nɛɛ ajara wa waa kɛha lɛ, ni eeenyɛ efee akɛ no mli enaa edaaŋ ŋmaa kɛjɛɔ. Hiob kɛ kooloi nɛɛ hu shãa afɔle. Kɛ́ Hiob tsuu ebii lɛ ahe etã lɛ, “eteɔ shi leebi maŋkpa ni eyashãa shãa afɔlei ehaa amɛ fɛɛ yɛ amɛyibɔ lɛ naa; ejaakɛ Hiob kɛɔ akɛ: Benɛ mibihii lɛ efee esha ko, ni amɛkwa Nyɔŋmɔ yɛ amɛtsuiaŋ! Nakai Hiob feɔ daa nɛɛ.” (Hiob 1:4, 5) No hewɔ lɛ, Hiob kɛ kooloi lɛ shãa afɔle ehaa Yehowa daa. Beni ekaai lɛ je shishi lɛ, ehiii lɛ afɔleshaa ko dɔŋŋ. Hiob bɛ ‘nɔ ko ni jara wa’ ni ekɛ aaawo Yehowa hiɛ nyam. (Abɛi 3:9) Shi ebaanyɛ ekɛ enaabu awo Yehowa hiɛ nyam ni efee nakai hu!
Ha Wekukpaa ni Kã Okɛ Yehowa Teŋ lɛ Mli Awa
9. Mɛni ji nɔ ni he hiaa fe fɛɛ yɛ wɔshihilɛ mli?
9 Kɛ́ wɔji niiatsɛmɛi jio, ohiafoi jio, oblahii loo oblayei jio, wɔgbɔlɔ jio, wɔyɛ gbɔmɔtsoŋ hewalɛ lɛ jio, wɔhe miiye jio lɛ, wɔbaanyɛ wɔha wɔkɛ Yehowa teŋ wekukpaa lɛ afee gbagbalii. Ekɔɔɔ he eko nɔ̃ kaai ni wɔkɛ baakpe lɛ, wekukpaa ni yɔɔ gbagbalii ní baahi wɔkɛ Nyɔŋmɔ teŋ lɛ baaye abua wɔ ni wɔya nɔ wɔye anɔkwa ni wɔha Yehowa tsui anyɔ emli. Aŋkroaŋkroi komɛi po ni yɔɔ nilee fioo ko pɛ yɛ anɔkwale lɛ he lɛ enyɛ efee ekãa, ni amɛtee nɔ amɛye anɔkwa.
10, 11. (a) Te wɔnyɛmi yoo lɛ eko fee enii yɛ anɔkwayeli he kaa ni ekɛkpe lɛ he eha tɛŋŋ? (b) Mɛɛ hetoo nyɛmi yoo lɛ nifeemɔ lɛ ha Satan?
10 Ákɛ nɔkwɛmɔnɔ lɛ, susumɔ Nyɛmiyoo Valentina Garnovskaya, ni fata Odasefoi babaoo ni yɔɔ Russia ni tee nɔ ye anɔkwa yɛ kaai ni mli wawai amli tamɔ anɔkwafo Hiob fee lɛ he okwɛ. Yɛ afi 1945 beni eye aaafee afii 20 lɛ, nyɛmi nuu ko ye lɛ odase. Eku esɛɛ ekɛ lɛ bagba Biblia mli sane shii enyɔ, shi no sɛɛ lɛ Valentina enaaa lɛ dɔŋŋ. Eyɛ mli akɛ Valentina enaaa lɛ dɔŋŋ moŋ, shi ebɔi shiɛmɔ kɛ ekutsoŋbii lɛ hamɔ. Enɛ hewɔ lɛ, amɔ lɛ ni awo lɛ tsuŋ afii kpaanyɔ. Aŋmɛɛ ehe yɛ afi 1953 lɛ, ni ebɔi shiɛmɔ amrɔ nɔŋŋ. Amɔ lɛ ekoŋŋ ni awo lɛ tsuŋ afii nyɔŋma. Beni eye afii babaoo yɛ jɛmɛ lɛ, ajie lɛ kɛtee tsuŋwoohe kroko. Nyɛmimɛi yei komɛi ni yɔɔ nakai tsuŋwoohe lɛ yɛ Biblia. Gbi ko lɛ, nyɛmi yoo ko kɛ Biblia lɛ tsɔɔ Valentina. Emii shɛ ehe naakpa! Kpaako Valentina naa Biblia lɛ ekoŋŋ, kɛjɛ beni nyɛminuu lɛ ye lɛ odase yɛ afi 1945 lɛ!
11 Yɛ afi 1967 lɛ, aŋmɛɛ Valentina he ni agbɛnɛ enyɛ ekɛ nu mli baptisimɔ ma ehe nɔ ni ejɔɔ eha Yehowa lɛ nɔ mi. Ekɛ heyeli ni ená lɛ shiɛ kɛ ekãa kɛyashi afi 1969. Shi yɛ nakai afi lɛ mli lɛ amɔ lɛ ekoŋŋ, ni agbɛnɛ lɛ awo lɛ tsuŋ afii etɛ. Fɛɛ sɛɛ lɛ, Valentina kpaaa shiɛmɔ. Beni egbo yɛ afi 2001 lɛ, no mli lɛ eye ebua mɛi 44 ni amɛbale anɔkwale. Eye afii 21 yɛ tsuŋwoohei srɔtoi amli. Ená he miishɛɛ akɛ ekɛ nɔ fɛɛ nɔ ni eyɔɔ ní eheyeli po fata he lɛ baashã afɔle, bɔni afee ni eya nɔ eye anɔkwa. Beni eshwɛ fioo ni Valentina baagbo lɛ, ekɛɛ akɛ: “Mibɛ mi diɛŋtsɛ mishihilɛhe. Nibii fɛɛ ni miyɔɔ lɛ yɛ baagi kome pɛ mli, shi miyɛ miishɛɛ ni mitsui nyɔɔ mimli akɛ miisɔmɔ Yehowa.” Valentina nifeemɔ lɛ ha ana akɛ nɔ ni Satan wie akɛ adesai nyɛŋ aye Nyɔŋmɔ anɔkwa kɛ́ amɛkɛ kaai kpe lɛ ji amale! (Hiob 1:9-11) Wɔbaanyɛ wɔná nɔmimaa akɛ eha Yehowa tsui nyɔ emli, ni akɛ Yehowa kɛ miishɛɛ miimɛ be ni ebaatee Valentina kɛ anɔkwafoi krokomɛi fɛɛ ni egboi lɛ ashi kɛba wala mli ekoŋŋ lɛ.—Hiob 14:15.
12. Mɛɛ gbɛfaŋnɔ suɔmɔ naa yɛ wɔkɛ Yehowa teŋ wekukpãa lɛ mli?
12 Wɔkɛ Yehowa teŋ naanyobɔɔ lɛ damɔ suɔmɔ ni wɔyɔɔ kɛha lɛ lɛ nɔ. Wɔyɛ Nyɔŋmɔ sui lɛ ahe miishɛɛ, ni wɔfeɔ nɔ fɛɛ nɔ ni wɔɔnyɛ ni wɔhi shi yɛ gbɛ ni kɛ eyiŋtoi kpãa gbee lɛ nɔ. Wɔsumɔɔ Yehowa kɛ wɔtsui fɛɛ, ni jeee nɔ ni wɔbaaná yɛ edɛŋ lɛ hewɔ wɔfeɔ nakai, ni wɔkɛtsɔɔ akɛ Abonsam naafolɔmɔi lɛ ji amale. Suɔmɔ nɛɛ woɔ wɔ hewalɛ ni wɔyaa nɔ wɔyeɔ anɔkwa yɛ kaa mli. Ni Yehowa ‘aaabaa emɛi krɔŋkrɔŋi lɛ agbɛ̀i lɛ ayi.’—Abɛi 2:8; Lala 97:10.
13. Te Yehowa buɔ nɔ ni wɔfeɔ wɔhaa lɛ lɛ ehaa tɛŋŋ?
13 Kɛ́ wɔnuɔ he akɛ wɔnyɛɛɛ babaoo wɔfee po lɛ, suɔmɔ baatsirɛ wɔ ni wɔwo Yehowa gbɛi lɛ hiɛ nyam. Enaa jwɛŋmɔ kpakpa ni wɔhiɛ lɛ, ni ebuuu wɔ fɔ́ kɛ́ wɔnyɛɛɛ wɔfee nibii fɛɛ ni wɔshweɔ akɛ wɔfee lɛ. Jeee nɔ ni wɔfeɔ lɛ pɛ he hiaa, shi nɔ̃ hewɔ ni wɔfeɔ nakai lɛ hu he miihia. Eyɛ mli akɛ Hiob ye awerɛho ni eŋmɛ etsui shi babaoo moŋ, shi ewie suɔmɔ ni eyɔɔ kɛha Yehowa gbɛ̀i lɛ ahe etsɔɔ mɛi ni folɔɔ enaa lɛ. (Nyɛkanea Hiob 10:12; 28:28.) Nyɔŋmɔ kɛɛ yɛ Hiob wolo lɛ naagbee yitso lɛ mli akɛ, emli ewo Elifaz, Bildad, kɛ Zofar la, akɛni amɛwie nibii ni ejaaa lɛ hewɔ. Nakai beaŋ nɔŋŋ lɛ, Yehowa tsɔɔ akɛ ekpɛlɛɔ Hiob nɔ kɛtsɔ tsɛmɔ ni etsɛ lɛ “mitsulɔ” shii ejwɛ sɔŋŋ kɛ fa ni efa lɛ ni esha afɔle kɛkpa fai eha nɔtɔlɔi lɛ. (Hiob 42:7-9) Eba akɛ wɔ hu wɔɔfee wɔnii yɛ gbɛ ni Yehowa aaakpɛlɛ wɔ nɔ lɛ nɔ.
Yehowa Yeɔ Ebuaa Etsuji Anɔkwafoi Lɛ
14. Mɛɛ gbɛ nɔ Yehowa tsɔ eye ebua Hiob ni ejaje esusumɔi?
14 Eyɛ mli akɛ Hiob yeee emuu moŋ, shi etee nɔ eye anɔkwa. Bei komɛi lɛ kɛ́ shihilɛ lɛ ha ehao waa lɛ, esusuɔ nii ahe yɛ gbɛ ni ejaaa nɔ. Ákɛ nɔkwɛmɔnɔ lɛ, ekɛɛ Yehowa akɛ: “Mibolɔɔ mitsɛ́ɔo, shi ohereee mi nɔ . . . okɛ onineshiwalɛ lɛ miiwa mi yi.” Kɛfata he lɛ, Hiob bu ehe bem beni ekɛɛ akɛ: “Mijeee mɔ fɔŋ” ni “yiwalɛ ko bɛ midɛŋ, ni mifaikpamɔ hu yɛ krɔŋŋ” lɛ. (Hiob 10:7; 16:17; 30:20, 21) Shi Yehowa jɛ mlihilɛ mli eye ebua Hiob kɛtsɔ saji srɔtoi ni ebi lɛ nɔ koni ekasusu ehe tuutu. Sanebimɔi nɛɛ hu ye ebua Hiob ni ena faŋŋ akɛ Nyɔŋmɔ nɔ kwɔ kwraa fe adesai. Hiob kpɛlɛ gbɛtsɔɔmɔ lɛ nɔ ni ejaje esusumɔi lɛ.—Nyɛkanea Hiob 40:8; 42:2, 6.
15, 16. Mɛɛ gbɛ̀i anɔ Yehowa tsɔɔ eyeɔ ebuaa etsuji ŋmɛnɛ?
15 Ŋmɛnɛ hu Yehowa jɛɔ mlihilɛ mli ekɛ gbɛtsɔɔmɔ kɛ ŋaawoo haa etsuji. Kɛfata he lɛ, wɔnáa nibii krokomɛi hu ahe sɛɛ. Ákɛ nɔkwɛmɔnɔ lɛ, Yesu Kristo kɛ ewala sha afɔle akɛ kpɔmɔnɔ ni enɛ haa anáa eshaifaa. Yɛ nakai afɔleshaa lɛ hewɔ lɛ, wɔbaanyɛ wɔná wɔkɛ Nyɔŋmɔ teŋ wekukpaa ni yɔɔ gbagbalii yɛ emuu ni wɔyeee lɛ fɛɛ sɛɛ. (Yak. 4:8; 1 Yoh. 2:1) Wɔsɔleɔ hu koni Nyɔŋmɔ mumɔ krɔŋkrɔŋ lɛ aye abua wɔ ní ewaje wɔ beni wɔkɛ kaai kpeɔ lɛ. Kɛfata he lɛ, wɔyɛ Biblia tso muu lɛ fɛɛ, ni kɛ́ wɔkane ni wɔjwɛŋ emli wiemɔi lɛ anɔ lɛ, ehaa wɔsaa wɔhe wɔtoɔ kaai ni wɔkɛbaakpe yɛ wɔhemɔkɛyeli lɛ he lɛ. Kɛ́ wɔkaseɔ nii lɛ ebaaye ebua wɔ ni wɔnu saji ni kɔɔ mɔ ni sa akɛ eyeɔ jeŋ muu lɛ fɛɛ nɔ lɛ kɛ anɔkwa ni wɔɔye lɛ he lɛ shishi.
16 Kɛfata he lɛ, wɔnáa jeŋ muu fɛɛ nyɛmimɛi akuu ní wɔfata he ní Yehowa kɛ mumɔŋ niyenii haa amɛ kɛtsɔ “tsulɔ anɔkwafo kɛ nilelɔ” lɛ nɔ lɛ he sɛɛ. (Mat. 24:45-47) Atsɔɔ kpeei srɔtoi ni afeɔ yɛ Yehowa Odasefoi asafoi ni miihe ashɛ 100,000 lɛ eko fɛɛ eko nɔ atsɔɔ wɔ nii, ni akɛwajeɔ wɔ koni wɔnyɛ wɔdamɔ wɔhemɔkɛyeli lɛ he kaai ni wɔbaanyɛ wɔkɛkpe lɛ anaa. Odasefonyo ko ni yɔɔ Germany ni eye afii 15 ní atsɛɔ lɛ Sheila lɛ niiashikpamɔ lɛ feɔ enɛ he nɔkwɛmɔnɔ.
17. Tsɔɔmɔ bɔ ni nilee yɔɔ mli akɛ akɛhe aaakpɛtɛ gbɛtsɔɔmɔi ni Yehowa asafo lɛ kɛhaa ŋmɛnɛ lɛ he kpaakpa.
17 Gbi ko lɛ, Sheila klasbii lɛ kpɛ amɛyiŋ akɛ amɛbaaka bɔ ni akɛ mumɔi atsɛmɔ tao ko ni atsɛɔ lɛ Ouija board lɛ tsuɔ nii ahaa lɛ amɛkwɛ beni tsɔɔlɔ ko bɛ amɛklas lɛ. Sheila shi klas lɛ amrɔ nɔŋŋ, ni nɔ ni enu sɛɛ mli lɛ ha ená miishɛɛ akɛ efee nakai. Beni amɛkɛ tao lɛ tsuɔ nii lɛ, klasbii lɛ ekomɛi nu mumɔi fɔji lɛ ahe ni amɛkɛ tsuifaa wó tsɛ́tsɛ́. Shi, mɛni ye ebua Sheila ni eshi tsu lɛ mli amrɔ nɔŋŋ lɛ? Sheila tsɔɔ mli akɛ: “No mli lɛ wɔkase osharai ni yɔɔ Ouija board lɛ kɛnitsumɔ he yɛ Maŋtsɛyeli Asa lɛ nɔ etsɛko. No hewɔ lɛ, mile nɔ ni esa akɛ mafee. Miisumɔ ni maha Yehowa aná miishɛɛ taakɛ Biblia lɛ kɛɔ yɛ Abɛi 27: 11 lɛ.” Ehi jogbaŋŋ akɛ Sheila tee kpee nakai gbi lɛ, ni ebo saji atoi jogbaŋŋ!
18. Mɛni otswa ofai shi akɛ obaafee?
18 Esa akɛ wɔteŋ mɔ fɛɛ mɔ atswa efai shi akɛ ekɛ gbɛtsɔɔmɔ ni Nyɔŋmɔ asafo lɛ kɛhaa wɔ lɛ baatsu nii jogbaŋŋ. Kɛ́ wɔyaa kpee, wɔkaneɔ Biblia lɛ, wɔkaseɔ Biblia kasemɔ woji, wɔsɔleɔ, ni wɔkɛ Kristofoi ni edara yɛ mumɔŋ bɔɔ, ni wɔfeɔ enɛɛmɛi daa lɛ, wɔnine baashɛ gbɛtsɔɔmɔ kɛ yelikɛbuamɔ ni he hiaa wɔ lɛ nɔ. Yehowa miisumɔ ni wɔye omanye, ni eyɛ hekɛnɔfɔɔ akɛ wɔbaaya nɔ wɔye anɔkwa. Eji hegbɛ kpele ni wɔná akɛ wɔɔwo Yehowa gbɛi lɛ hiɛ nyam, ni wɔya nɔ wɔye anɔkwa, ni wɔha Yehowa tsui anyɔ emli!
Ani Okaiɔ?
• Mɛɛ haomɔi kɛ kaai Satan kɛbaa?
• Mɛni ji nɔ ni he hiaa fe fɛɛ yɛ wɔshihilɛ mli?
• Mɛni nɔ wɔkɛ Yehowa teŋ naanyobɔɔ lɛ damɔ?
• Mɛni ji gbɛ̀i komɛi anɔ ni Yehowa tsɔɔ eyeɔ ebuaa wɔ ŋmɛnɛ?
[Nikasemɔ lɛ he Sanebimɔi]
[Mfoniri ni yɔɔ baafa 8]
Ani oshweɔ akɛ oooha mɛi anine ashɛ nilee ni jara wa ni onine eshɛ nɔ lɛ nɔ?
[Mfoniri ni yɔɔ baafa 9]
Wɔbaanyɛ wɔye wɔbua wɔnyɛmimɛi Kristofoi lɛ ni amɛya nɔ amɛye anɔkwa
[Mfoniri ni yɔɔ baafa 10]
Valentina ná he miishɛɛ akɛ ekɛ nɔ fɛɛ nɔ ni eyɔɔ lɛ baashã afɔle, bɔni afee ni eya nɔ eye anɔkwa