Okɛ Hiɛdɔɔ kɛ Miishɛɛ Atsu Nyɔŋmɔ Sɔɔmɔ Nitsumɔ Lɛ

YEHOWA miisumɔ ni oná miishɛɛ. (Lala 100:2) Ákɛ Yehowa tsulɔ lɛ, ekolɛ obɛ dekã kwraa. Ekolɛ beni ojɔɔ owala nɔ oha Nyɔŋmɔ lɛ, no mli lɛ oyɛ dekã bɔ ni sa, shi amrɔ nɛɛ nitsumɔi kɛ sɔ̃i ni jwere onɔ akɛ Kristofonyo lɛ baanyɛ aha onu he akɛ obɛ dekã kwraa. Kɛ́ onyɛɛɛ otsu nibii ni okɛma ohiɛ akɛ obaatsu lɛ, ekolɛ ebaagba onaa. Mɛɛ gbɛ nɔ oootsɔ oŋmɛ pɛpɛɛpɛ, ni oya nɔ ‘onya Yehowa he’?—Neh. 8:10.

Oyɛ jaramɔ beaŋ, ni okɛ nɔnyɛɛi babaoo kpeɔ, no hewɔ lɛ eebi ni oto ogbɛjianɔ jogbaŋŋ. Enɛ hewɔ lɛ, bɔfo Paulo ŋaawoo ni jɛ mumɔŋ nɛɛ sa jogbaŋŋ akɛ: “Nyɛkwɛa bɔ ni nyɛaafee ní nyɛkɛ hiɛtɛjemɔ anyiɛ, jeee tamɔ mɛi ni leee nii, shi moŋ tamɔ nilelɔi, mɛi ni tsuɔ amɛdekã he nii, ejaakɛ gbii nɛɛ gbii fɔ̃ji ni.”—Efe. 5:15, 16.

Yɛ nɛkɛ ŋaawoo ni nilee yɔɔ mli nɛɛ naa lɛ, mɛɛ gbɛ nɔ oootsɔ okɛ otii ni obaanyɛ oshɛ he amamɔ ohiɛ ni oŋmɛ pɛpɛɛpɛ yɛ aŋkro nikasemɔ, weku kwɛmɔ, shiɛmɔ nitsumɔ, heloonaa nitsumɔ, kɛ nibii krokomɛi ni he hiaa lɛ amli?

Ani okaiɔ miishɛɛ ni oná beni ojɔɔ ohe nɔ oha Nyɔŋmɔ ni abaptisi bo lɛ? Yehowa kɛ eyiŋtoi ahe nilee ni oná lɛ ha oná miishɛɛ. Ekolɛ okɛ nyɔji babaoo kase nii waa dani obanu Yehowa nilee lɛ shishi, ni oná miishɛɛ. Ekã shi faŋŋ akɛ, omɔdɛŋbɔɔ lɛ efeee efolo. Nakai nikasemɔ lɛ etsake oshihilɛ.

Kɛ́ obaaya nɔ oná miishɛɛ lɛ, esa akɛ oya nɔ okɛ mumɔŋ niyenii alɛ ohe. Kɛ́ ewa kɛha bo akɛ obaaná be kɛkane Biblia lɛ ni okase lɛ, too obe he gbɛjianɔ ekoŋŋ. Kɛ́ okɛ minitii fioo po kase nii daa gbi ni ojwɛŋ nɔ lɛ, ebaaha obɛŋkɛ Yehowa kpaakpa, ni ekã shi faŋŋ akɛ, no baaha oná miishɛɛ.

Nyɔŋmɔ tsuji ateŋ mɛi babaoo nyɛɔ amɛkɛ be ni amɛkɛtsuɔ nibii komɛi ni he ehiaaa tsɔ lɛ eko tsuɔ nibii ni he hiaa waa lɛ ahe nii. Bi ohe akɛ, ‘Be enyiɛ mikɛkaneɔ je lɛŋ woji loo adafitswaa woji, mikɛkwɛɔ TV, mikɛboɔ lalai atoi, loo mikɛjieɔ mihiɛtserɛ?’ Kɛ́ mɔ ko efeee nibii nɛɛ kɛtekeee nɔ lɛ, amɛbaanyɛ amɛha ená miishɛɛ. (1 Tim. 4:8) Kɛ́ oyɔse akɛ onyɛɛɛ okɛ obe atsu  nii jogbaŋŋ lɛ, tsakemɔ bɔ ni oto obe he gbɛjianɔ lɛ mli.

Wu ko ni atsɛɔ lɛ Adam, ni yɔɔ bii etɛ ni eji asafoŋ onukpa lɛ tsɔɔ nɔ ni yeɔ ebuaa lɛ. Ekɛɛ akɛ: “Mibɔɔ mɔdɛŋ akɛ maha mishihilɛ afee mlɛo. Mikɛ nibii ní heɔ mɔ be ejieee mihiɛtserɛ, ni asaŋ miheee nibii ní haŋ maná dekã. Jeee akɛ mináaa mihewɔ miishɛɛ—shi moŋ misumɔɔ kɛkɛ akɛ mikɛ nibii ni amɛfeemɔ waaa ajie mihiɛtserɛ.”

Kɛ́ ojwɛŋ nibii kpakpai ni ejɛ oyiŋkpɛi amli kɛba lɛ anɔ lɛ, ebaanyɛ eha oná miishɛɛ waa, ni ebaaye ebua bo koni okafee yeyeeye yɛ shihilɛ mli. Ákɛ nɔkwɛmɔnɔ lɛ, Mariusz ni eji asafoŋ onukpa ni yɔɔ bii etɛ lɛ kɛɛ akɛ: “Beni mibɔi Biblia lɛ kasemɔ lɛ, miná jwɛŋmɔ kpakpa yɛ shihilɛ he. Mikã he mikɛ naagbai kpeɔ yɛ be kɛ beaŋ, ni Yehowa pɛ le naagbai nɛɛ ateŋ babaoo. Shi yɛ eyelikɛbuamɔ naa lɛ, mikɛ miishɛɛ miikpa wɔsɛɛ be gbɛ.”

Taakɛ ebalɛ yɛ Mariusz gbɛfaŋ lɛ, kɛ́ oyɛ jwɛŋmɔ kpakpa yɛ shihilɛ he lɛ, no etsɔɔɔ akɛ ofeŋ yeyeeye kwraa. Shi ebaanyɛ eye ebua bo ni oná miishɛɛ, ní otsu naagbai ni okɛkpeɔ yɛ shihilɛ mli lɛ ahe nii jogbaŋŋ. Biblia lɛ kɛɔ akɛ: “Nɔnalɔ gbii fɛɛ lɛ, gbii fɔji sɔŋŋ ni; shi mɔ ni tsui enyɔ emli lɛ, daa nɛɛ eeye gbi jurɔ.” (Abɛi 15:15) Agbɛnɛ hu, jwɛŋmɔ suɔmɔ ni Nyɔŋmɔ ejie lɛ kpo etsɔɔ bo lɛ nɔ. Niianɔjwɛŋmɔ ni tamɔ nɛkɛ lɛ baanyɛ aha suɔmɔ ni oyɔɔ kɛha Nyɔŋmɔ lɛ mli awa, ni ebaaha oná miishɛɛ waa yɛ esɔɔmɔ lɛ mli.—Mat. 22:37.

Kɛ́ weku ko kɛ Yehowa suɔmɔnaa nifeemɔ ye klɛŋklɛŋ gbɛhe lɛ, ehaa amɛnáa miishɛɛ waa. Kɛ́ amɛjie Kristofoi asui akpo lɛ, ehaŋ amɛfɔ saji anaataamɔ, shi moŋ ebaaha wekukpãa kpakpa ahi amɛteŋ, ni amɛkɛ miishɛɛ baagba sane waa. Enɛ baaha toiŋjɔlɛ ahi shĩa lɛ be fɛɛ be, ni weku muu lɛ fɛɛ baafee ekome.—Lala 133:1.

Kɛ́ weku lɛ fee ekome kɛjá Nyɔŋmɔ lɛ, ehaa amɛtsui nyɔɔ amɛ mli naakpa. Mariusz tsɔɔ mli akɛ: “Mikɛ be ni wɔkɛfeɔ ekome kɛfeɔ nii lɛ shwɛɛɛ kwraa. Miŋa yeɔ ebuaa mi waa diɛŋtsɛ. Kɛ́ miiya shiɛmɔ jio, miyatsu nii yɛ he ni abaafee kpeei wuji yɛ jio, loo miyaha maŋshiɛmɔ yɛ asafoi krokomɛi amli jio lɛ, ekɛ mi nɔŋŋ, ja nɔ ko tsĩ enaa. Enɛ woɔ mi hewalɛ waa.”

Ŋmalɛ lɛ fãa Kristofoi akɛ amɛha amɛwekui lɛ amɛheloonaa hiamɔ nii. (1 Tim. 5:8) Shi kɛ́ onitsumɔ haa etɔɔ bo fe nine ni ehaaa oná dekã hu lɛ, no haŋ oná miishɛɛ yɛ Nyɔŋmɔ sɔɔmɔ mli. Sɔlemɔ oha Yehowa yɛ sane nɛɛ he. (Lala 55:23) Mɛi komɛi taoɔ nitsumɔ kroko bɔni afee ni amɛnyɛ amɛkɛ Nyɔŋmɔ Maŋtsɛyeli lɛ aye klɛŋklɛŋ gbɛhe. Esaaa akɛ Kristofonyo ko haa shika ni enáa kɛjɛɔ nitsumɔ ko ni haaa ená dekã lɛ mli lɛ tsiɔ lɛ gbɛ koni ekatsu Nyɔŋmɔjamɔ he nibii ni he hiaa titri lɛ ahe nii.—Abɛi 22:3.

Kɛ́ oŋmala nibii ni hi kɛ nibii ni ehiii yɛ nitsumɔ ni otsuɔ amrɔ nɛɛ he, loo ofee nakai yɛ nitsumɔ ni obaasumɔ ni otsu lɛ he lɛ oshwie shi lɛ, ebaanyɛ eye ebua bo waa. Eji anɔkwale akɛ, ehi akɛ oná nitsumɔ ni ehe nyɔmɔwoo hi ní baaha otsui anyɔ omli. Shi ani nitsumɔ ni otsuɔ amrɔ nɛɛ haa onáa be kɛtswaa oweku lɛ omaa shi yɛ mumɔŋ? Susumɔ nibii nɛɛ fɛɛ ahe jogbaŋŋ, ní okpɛ yiŋ ni baaha okɛ Yehowa sɔɔmɔ lɛ aye klɛŋklɛŋ gbɛhe.

Kɛ́ onitsumɔ haaa oya hiɛ yɛ mumɔŋ lɛ, esa akɛ ofee tsakemɔ. Kristofoi babaoo efee tsakemɔi ni he hiaa waa yɛ amɛshihilɛ mli bɔni afee ni amɛná be babaoo kɛjá Nyɔŋmɔ. Nyɛminuu ko ni yɔɔ Poland lɛ kɛɛ akɛ: “Akɛni minitsumɔ lɛ haa mifɔɔ gbɛfãa waa hewɔ lɛ, eshɛ he ko ni minyɛɛɛ nɔ ko mafee yɛ he dɔŋŋ, fe akɛ makpa nitsumɔ lɛ. Mináaa be mihaaa mumɔŋ nibii kɛ miweku lɛ.” Amrɔ nɛɛ eetsu nitsumɔ ni haa enáa dekã, ní haaa etɔ lɛ tsɔ̃.

Ye Obua Mɛi Krokomɛi Koni Oná Miishɛɛ

Yesu kɛɛ akɛ “nɔhamɔ mli yɛ [miishɛɛ] fe hemɔ.” (Bɔf. 20:35) Kristofoi baanyɛ amɛfee enɛ yɛ gbɛ̀i babaoo anɔ. Bei komɛi lɛ, kɛ́ mɔ ko tsu teokrase nifeemɔ ko he nii jogbaŋŋ, ni ofee ohiɛ ŋmɔlɔŋmɔlɔ, ota edɛŋ, loo ojɛ otsuiŋ oha lɛ aekoo lɛ, no kɛkɛ po baaha okɛ lɛ fɛɛ aná miishɛɛ.

Bɔfo Paulo wo Kristofoi hewalɛ akɛ: “Nyɛshɛjea mɛi ni tsui fãa lɛ amii; nyɛherea mɛi ni feɔ gbedee lɛ.” (1 Tes. 5:14) Mɛi ni tsui fãa loo  amɛhao lɛ baanyɛ anu he akɛ amɛ diɛŋtsɛ amɛnyɛŋ amɛdamɔ naagbai ni amɛkɛkpeɔ lɛ anaa. Ani obaanyɛ oye obua mɛi nɛɛ? Kɛ́ ona akɛ nyɛmi ko ni yɔɔ asafo lɛ mli lɛ náaa miishɛɛ yɛ Yehowa sɔɔmɔ lɛ mli lɛ, bɔɔ mɔdɛŋ ni owo lɛ hewalɛ. Nakai ni ooofee lɛ baawo bo hu hewalɛ. Naagbai komɛi yɛ ní adesa ko nyɛŋ atsu he nii. Ni kɛlɛ, obaanyɛ ojɛ otsuiŋ oshɛje onyɛmi lɛ mii, ní owo lɛ hewalɛ koni ekɛ ehe afɔ̃ Yehowa, mɔ ni yeɔ ebuaa wɔ daa lɛ nɔ. Mɛi ni kɛ amɛhe fɔ̃ɔ Yehowa nɔ lɛ wuŋ bɔ kɔkɔɔkɔ.—Lala 27:10; Yes. 59:1.

Nɔ̃ kroko ni obaanyɛ ofee kɛye obua mɔ ni náaa miishɛɛ yɛ Yehowa sɔɔmɔ lɛ mli lɛ ji, ní okɛ lɛ aya shiɛmɔ. Beni Yesu tsu kaselɔi 70 lɛ, etsu amɛ “enyɔnyɔ.” (Luka 10:1) Ekã shi faŋŋ akɛ okpɛlɛɔ nɔ akɛ Yesu fee nakai koni kaselɔi lɛ anyɛ awowoo amɛhe hewalɛ, aloo jeee nakai? Kɛ́ mɔ ko náaa miishɛɛ yɛ Yehowa sɔɔmɔ lɛ mli lɛ, ani bo hu obaanyɛ okɛ lɛ aya shiɛmɔ ni oye obua lɛ koni ená miishɛɛ ekoŋŋ?

Ŋmɛnɛ lɛ, nibii kpakpai babaoo yɛ ni baanyɛ aha wɔhao. Kɛlɛ, Paulo woɔ wɔ hewalɛ akɛ: “Nyɛmii ashɛa yɛ Nuŋtsɔ lɛ mli daa! misaa miikɛɛ: Nyɛmii ashɛa!” (Fili. 4:4) Akɛni osumɔɔ Nyɔŋmɔ, oboɔ lɛ toi, ni okɛ ekãa kɛ hiɛmiamɔ tsuɔ nitsumɔ ni ekɛwo odɛŋ lɛ hewɔ lɛ, sɛɛnamɔ yɛ oshihilɛ he. Enɛ haa onáa miishɛɛ. Nɔ ni fe fɛɛ lɛ, Yehowa yeɔ ebuaa bo koni otsu naagbai ni okɛkpeɔ lɛ ahe nii.—Rom. 2:6, 7.

Akɛni wɔyɛ hemɔkɛyeli ni mli wa hewɔ lɛ, wɔnaa faŋŋ akɛ jeŋ hee ni Yehowa ewo he shi lɛ ebɛŋkɛ kpaakpa. Jeŋ hee lɛ kɛ jɔɔmɔi babaoo baaba, ni ebaaha aná miishɛɛ naakpa! (Lala 37:34) No hewɔ lɛ, nyɛhaa wɔmli afilia wɔ, ní wɔhiɛ akakpa nɔ akɛ Yehowa miijɔɔ wɔ waa amrɔ nɛɛ po. Enɛ hewɔ lɛ, wɔbaanyɛ ‘wɔsɔmɔ Yehowa kɛ miishɛɛ.’—Lala 100:2.

[Nitɛŋmɔ ni akɛmiitsɔɔ nɔ ko mli ni yɔɔ baafa 8]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

Kɛji obaaya nɔ oná miishɛɛ lɛ, esa akɛ oto obe he gbɛjianɔ jogbaŋŋ

HIƐTSERƐJIEMƆ kɛ SHWƐMƆ

SHĨA kɛ WEKU KWƐMƆ

NITSUMƆ

KRISTOFOI AKPEEI

AŊKRO NIKASEMƆ

SHIƐMƆ NITSUMƆ LƐ

[Mfonirii ni yɔɔ baafa 10]

Ani obaanyɛ oye obua mɛi krokomɛi ni amɛná miishɛɛ ekoŋŋ?