Hewalɛwoo ‘Ni Jɛ Abifabii Anaa’

Yɛ December 2009 lɛ, Russia Saneyelihe Wulu lɛ ye Yehowa Odasefoi lɛ asane ko ní ha agu nitsumɔ lɛ yɛ Taganrog, yɛ Russia, ni akɛ nine fɔ̃ Maŋtsɛyeli Asa lɛ nɔ, ni akɛɛ wɔwoji 34 wieɔ amɛshiɔ nɔyeli lɛ. Akɛ nɛkɛ yiŋkpɛɛ nɛɛ wo Yehowa Odasefoi lɛ a-Wɛb saiti lɛ nɔ, ni akɛ Yehowa Odasefoi ni yiŋkpɛɛ nɛɛ kɔɔ amɛhe, ni gbekɛbii hu fata he lɛ afoniri hu wo nɔ.

Nyɔji fioo komɛi asɛɛ lɛ, Odasefoi aweku ko ni yɔɔ Queensland yɛ Australia, ni na Kɔɔtu lɛ yiŋkpɛɛ lɛ he amaniɛbɔɔ lɛ, kɛ adeka ko maje Yehowa Odasefoi a-Nitsumɔhe Nine ni yɔɔ Russia lɛ, ni amɛŋma wolo kɛfata he akɛ: “Suɔmɔ Nyɛmimɛi, Hemɔkɛyeli ni nyɛmimɛi ni yɔɔ Russia lɛ jieɔ lɛ kpo, kɛ jaramɔ shihilɛi ni amɛkɛkpeɔ lɛ ta wɔbinuu Cody kɛ wɔbiyoo Larissa tsuiŋ waa. Amɛkɛ woji nɛɛ kɛ nikeenii fioo nɛɛ miimaje gbekɛbii ni yɔɔ Taganrog lɛ, koni amɛle akɛ gbekɛbii komɛi hu yɛ maŋsɛɛ shɔŋŋ ni miisɔmɔ Yehowa yɛ anɔkwayeli mli ni susuɔ amɛhe waa. Amɛkɛ amɛsuɔmɔ ŋamɔ hu miimaje amɛ.”

Beni gbekɛbii ni yɔɔ Taganrog lɛ anine shɛ nikeenii nɛɛ anɔ lɛ, amɛŋmala woji ni atɛŋ mfonirii yɛ mli ni amɛkɛda weku ni yɔɔ Australia lɛ shi. Hewalɛwoo wiemɔi ‘ni jɛ abifabii anaa’ nɛɛ ta Odasefonyo ko ni sɔmɔɔ yɛ Russia nitsumɔhe nine lɛ tsuiŋ, ni eŋma Cody kɛ Larissa akɛ: “Eyɛ dɔlɛ waa akɛ abaagbala gbekɛbii kɛ onukpai fɛɛ atoi yɛ nɔ ko ni amɛfeko he. Wɔnyɛmimɛi ni yɔɔ Taganrog lɛ efeko efɔŋ ko, shi ahe amɛ-Maŋtsɛyeli Asa lɛ yɛ amɛdɛŋ. Sane nɛɛ dɔ amɛ waa. Kɛ́ amɛná amɛle akɛ mɔ ko ni jɛ maŋ kroko nɔ lɛ susuɔ amɛhe lɛ, ebaawo amɛ hewalɛ waa. Nyɛyiwaladɔŋŋ kɛ ejurɔ ni nyɛfee nɛɛ!”—Lala 8:3.

Wɔji nyɛmimɛi ni efee ekome yɛ jeŋ fɛɛ lɛɛlɛŋ, ni suɔmɔ ni wɔyɔɔ kɛha wɔhe lɛ haa wɔnyɛɔ wɔdamɔɔ naagbai ni wɔkɛkpeɔ lɛ anaa. Beni saneyelihei nɛɛ yaa nɔ amɛkwɛɔ kɛji Yehowa Odasefoi awoji lɛ woɔ mɛi hewalɛ ni amɛjie hetsɛ̃ kpo lɛ mli lɛ, wɔbii lɛ hu miijie suɔmɔ kpo amɛmiitsɔɔ amɛhe, ekɔɔɔ he eko maŋ nɔ ni amɛjɛ loo amɛhewolonɔ su, ni amɛhaa Yesu wiemɔi ni nyiɛ sɛɛ nɛɛ baa mli anɔkwale akɛ: “Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.”—Yoh. 13:35.

[Mfoniri ni yɔɔ baafa 32]

Gbekɛbii ni yɔɔ Australia

[Mfoniri ni yɔɔ baafa 32]

Gbekɛbii ni yɔɔ Russia ni nine shɛ nikeenii ni gbekɛbii ni yɔɔ Australia lɛ kɛmaje lɛ nɔ lɛ