AFII fioo komɛi ni eho nɛ lɛ, kulɛ Roald kɛ eŋa Elsebeth ni amɛmiihe amɛná afii 50 lɛ yɛ Bergen, ni ji Norway maŋtiase wulu ko lɛ mli. Amɛkɛ amɛbiyoo ni atsɛɔ lɛ Isabel kɛ amɛbinuu ni atsɛɔ lɛ Fabian lɛ fɛɛ kɛ ekãa sɔmɔ yɛ asafo ni no mli lɛ amɛyɔɔ mli lɛ mli. Roald sɔmɔ akɛ asafoŋ onukpa, ni Elsebeth hu sɔmɔ akɛ gbɛgbalɔ, ni nakai beaŋ nɔŋŋ lɛ Isabel kɛ Fabian ji shiɛlɔi ni bɔɔ mɔdɛŋ.

Shi yɛ September 2009 lɛ, weku muu lɛ fɛɛ kpɛ mli akɛ amɛbaafee nɔ ko—amɛkɛ otsi baayashiɛ yɛ he ko ni etse ehe banee. No hewɔ lɛ, Roald kɛ Elsebeth kɛ Fabian, ni no mli lɛ eye afii 18 lɛ, fã gbɛ kɛtee Nordkyn, ni ji maŋ ko ni yɔɔ Finnmark, yɛ Arctic Circle lɛ yiteŋgbɛ lɛ. Amɛkɛ nyɛmimɛi krokomɛi ni eba Kjøllefjord, ni ji akrowa ko ni yɔɔ jɛmɛ lɛ fee ekome kɛshiɛ. Roald kɛɛ akɛ: “Yɛ nakai otsi lɛ shishijee mli lɛ, miná miishɛɛ waa akɛ minyɛ mito gbɛjianɔ ni baaha mikɛ mihe awo nifeemɔ krɛdɛɛ nɛɛ mli otsi muu fɛɛ.” Shi nɔ ko ba nakai otsi lɛ nɔŋŋ, ni efite Roald miishɛɛ lɛ trukaa. Mɛni ba?

Roald kɛɛ akɛ: “Trukaa lɛ, Mario ni eji gbɛgbalɔ yɛ Finnmark lɛ bi kɛji wɔbaasumɔ ni wɔfã kɛya Lakselv ni wɔyaye wɔbua asafo ko ni shiɛlɔi 23 yɔɔ mli lɛ.” Sane nɛɛ hɔ Roald atrɔma fioo. Etsɔɔ mli akɛ: “Mikɛ Elsebeth esusu sɔɔmɔ ni wɔbaayasɔmɔ yɛ he ko ni hiamɔ lɛ da waa yɛ lɛ he moŋ—shi wɔbaafee nakai sɛɛ mli beni gbekɛbii lɛ edara ni amɛshi shĩa.” Fɛɛ sɛɛ lɛ, yɛ gbii fioo ni Roald kɛshiɛ yɛ maŋ nɛɛ mli lɛ amli lɛ, ena akɛ mɛi babaoo miisumɔ ni amɛkase Yehowa he nii. Yelikɛbuamɔ he miihia amɛ bianɛ—jeee sɛɛ mli. Ekɛɛ akɛ: “Mijwɛŋ sanebimɔ lɛ he waa, ni ehaaa manyɛ mawɔ gbii pii.” Sɛɛ mli lɛ, Mario kɛ Roald kɛ eweku lɛ fã gbɛ aaafee kilomitai 240 kɛtee Lakselv, ni yɔɔ Kjøllefjord wuoyigbɛ lɛ. Eetao ni amɛ diɛŋtsɛ amɛyana asafo bibioo ni yɔɔ jɛmɛ lɛ.

Beni amɛshɛ Lakselv lɛ, Andreas, ni ji asafoŋ onukpai enyɔ ni yɔɔ jɛmɛ lɛ ateŋ mɔ kome lɛ kɛ amɛ yashara shi yɛ jɛmɛ, ni etsɔɔ amɛ Maŋtsɛyeli Asa lɛ. Asafoŋbii lɛ nya amɛhe waa, ni amɛkɛɛ Roald kɛ Elsebeth akɛ, kɛ́ amɛweku lɛ baye amɛbua amɛ kɛtsu Maŋtsɛyeli nitsumɔ lɛ, amɛbaanya he waa. Andreas ŋmɔ fioo, ni ekɛɛ amɛ akɛ eyabi nitsumɔ eha Roald kɛ Fabian momo! Mɛni Roald kɛ eweku lɛ baafee?

Nɔ ni Fabian wie klɛŋklɛŋ ji: “Mibɛ he miishɛɛ akɛ mafã kɛba biɛ.” Ewa kɛha lɛ akɛ ebaashi enanemɛi ni ekɛ amɛ je nɔ kɛjɛ egbekɛbiiashi, ni ekɛ amɛ ehi asafo kome mli lɛ kɛya maŋ bibioo nɛɛ mli. Kɛfata he lɛ, egbeko ilɛtrishɛŋ nitsumɔ ni ekaseɔ lɛ naa. Shi beni atswa Isabel (ni no mli lɛ eye afii 21 lɛ) ni abi lɛ akɛ ebaasumɔ ni efã lo lɛ, ekɛɛ akɛ: “No ji nɔ ko ni daa nɛɛ mishweɔ akɛ mafee!” Ni ekɛɛ akɛ: “Beni misusu he saŋŋ lɛ, mibi mihe akɛ, ‘Ani nilee yɛ mli akɛ mafee nakai? Ani mashwe minanemɛi lɛ? Aloo esa akɛ miya nɔ mihi misafo ni miyɔɔ miishɛɛ yɛ mli lɛ mli kɛkɛ?’” Mɛni Elsebeth hu kɛɛ yɛ ninefɔɔ lɛ he? Ekɛɛ akɛ: “Minu he akɛ Yehowa eha wɔweku lɛ nitsumɔ, shi no mli lɛ, miisusu wɔshĩa ni wɔsaa lɛ ehee, kɛ nibii ni wɔkɛwo mli afii 25 ni eho nɛ lɛ ahe.”

Beni otsi krɛdɛɛ lɛ ba naagbee lɛ, Roald kɛ eweku lɛ ku amɛsɛɛ kɛtee Bergen, shi amɛtee nɔ amɛsusu amɛnyɛmimɛi Kristofoi ni yɔɔ Lakselv, ni kɛ Bergen jɛkɛmɔ aaafee kilomitai 2,100 lɛ ahe. Elsabeth kɛɛ akɛ: “Misɔle shii abɔ miha Yehowa, ni mitee nɔ mikɛ nanemɛi hei ni wɔyaná lɛ shara, wɔgbaa niiashikpamɔi srɔtoi, ni wɔkɛ mfonirii majeɔ wɔhe.” Roald kɛɛ akɛ: “Esa akɛ maná be ni mikɛkpɛ miyiŋ jogbaŋŋ yɛ fã ni wɔbaafã lɛ he. Agbɛnɛ hu, te wɔɔfee tɛŋŋ wɔkwɛ wɔhe lɛ? Misɔle miha Yehowa shii abɔ, mikɛ miweku lɛ susu he, ni mikɛ nyɛmimɛi ni yɔɔ niiashikpamɔ lɛ hu gba he sane.” Fabian kɛɛ akɛ: “Babaoo ni misusuɔ sane lɛ he lɛ, babaoo ni minaa akɛ mibɛ nɔ ko tsɔ ni madamɔ nɔ makɛɛ akɛ wɔkaya. Mitee nɔ misɔle shii abɔ miha Yehowa, ni shwelɛ ni miyɔɔ akɛ maya lɛ mli bawa.” Ni Isabel hu? Bɔni afee ni esaa ehe kɛha gbɛfaa lɛ, ebɔi gbɛgbamɔ nitsumɔ lɛ yɛ he ni amɛyɔɔ lɛ. Beni etsu gbɛgbamɔ nitsumɔ lɛ nyɔji ekpaa, ni ekɛ be babaoo efee aŋkro Biblia nikasemɔ sɛɛ lɛ, shwelɛ ni eyɔɔ kɛha ninefɔɔ lɛ mli bawa.

Beni shwelɛ ni weku lɛ yɔɔ akɛ amɛyasɔmɔ yɛ he ko ni shiɛlɔi ahe miihia waa yɛ lɛ mli bawa lɛ, amɛfee nibii ni baaha amɛshɛ nakai oti lɛ he. No mli lɛ, Roald miitsu nitsumɔ ko ni awoɔ lɛ nyɔmɔ waa, shi ebi ni aha lɛ nitsumɔ mli hejɔɔmɔ afi ni awooo lɛ nyɔmɔ. Shi enitsumɔtsɛ lɛ bi ni efee lɛ akɛ, kɛ́ etsu nii otsii enyɔ lɛ, kɛkɛ lɛ etee hejɔɔmɔ otsii ekpaa. Roald kɛɛ akɛ: “Agbɔ minyɔmɔwoo nɔ kwraa, shi eye ebua mi.”

Elsebeth kɛɛ akɛ: “Miwu kɛɛ miyatao tsu yɛ Lakselv koni wɔkɛ wɔshĩa ni yɔɔ Bergen lɛ ahai. Ehe be waa, shi wɔye omanye kɛ̃.” Ekɛfata he akɛ: “Be ko sɛɛ lɛ, gbekɛbii lɛ ná be fã nitsumɔ ko, ni amɛye amɛbua wɔ kɛha weku lɛ kwɛmɔ yɛ niyenii kɛ tsɔnewomɔ gbɛfaŋ.”

Isabel kɛɛ akɛ: “Akɛni maŋ ni wɔfã kɛtee mli lɛ edaaa hewɔ lɛ, naagba ni fe fɛɛ ni miná ji nitsumɔ ni baaye abua mi ni matsu gbɛgbamɔ nitsumɔ lɛ. Bei komɛi lɛ, minuɔ he akɛ minaŋ eko.” Fɛɛ sɛɛ lɛ, Isabel tsu be fã nitsumɔi srɔtoi nɛɛhu ni enine shɛ  nɔ yɛ klɛŋklɛŋ afi lɛ mli lɛ fiofio, ni no ha enyɛ ehé ehewɔŋ nibii. Ni Fabian hu? Ewie akɛ: “Bɔni afee ni magbe ilɛtrishɛŋ nitsumɔ ni mikaseɔ lɛ naa lɛ, ehe bahia ni mikɛ mɔ ko ayatsu nii fioo. Mifee nakai yɛ Lakselv. Sɛɛ mli beni miŋma mikaa lɛ mita lɛ, miná be fã nitsumɔ akɛ ilɛtrishɛŋ.”

Nyɛmi ko hu ni atsɛɔ lɛ Marelius kɛ eŋa Kesia miisumɔ ni amɛyasɔmɔ yɛ he ko ni shiɛlɔi ahe hiaa waa yɛ. Marelius, ni amrɔ nɛɛ eye afii 29 lɛ kɛɛ akɛ: “Kpokpaa wulu nɔ kpee shishi wiemɔi kɛ saji ni abibiɔ mɛi ní kɔɔ gbɛgbamɔ nitsumɔ lɛ he lɛ tsirɛ mi ni mina akɛ esa akɛ malɛɛ misɔɔmɔ lɛ mli.” Shi yɛ Kesia, ni amrɔ nɛɛ eye afii 26 lɛ gbɛfaŋ lɛ, ewa kɛha lɛ akɛ eeeshi eweku lɛ ni eyasɔmɔ yɛ he kroko. Ekɛɛ akɛ: “Misumɔɔɔ akɛ mishiɔ misuɔlɔi ní miyahiɔ he ko shɔŋŋ.” Kɛfata he lɛ, Marelius kɛ ebe fɛɛ tsuɔ nii bɔni afee ni enyɛ ewo tsu ni amɛyahe lɛ he nyɔmɔ. Ekɛɛ akɛ: “Yɛ sɔlemɔ babaoo kɛ Yehowa yelikɛbuamɔ naa lɛ, wɔnyɛ wɔtee.” Klɛŋklɛŋ lɛ, amɛkɛ be babaoo kase Biblia lɛ. No sɛɛ lɛ, amɛhɔɔ amɛshĩa lɛ, amɛkpá amɛnitsumɔ lɛ, ni yɛ August 2011 lɛ, amɛfã kɛtee Norway kooyigbɛ maŋ ko ni atsɛɔ lɛ Alta lɛ mli. Bɔni afee ni amɛnyɛ amɛkwɛ amɛhe beni amɛyɔɔ jɛmɛ lɛ, Marelius tsu nii akɛ shika he akɔntaabulɔ, ni Kesia hu tsu nii yɛ shwapo ko mli.

Knut kɛ eŋa Lisbeth ni amɛ fɛɛ amɛye aaafee afii 35 lɛ, nya saji ni jeɔ kpo yɛ Yearbook lɛ mli ni kɔɔ mɛi ni yasɔmɔɔ yɛ he ni Maŋtsɛyeli shiɛlɔi ahe hiaa waa yɛ lɛ ahe waa. Lisbeth kɛɛ akɛ: “Niiashikpamɔi nɛɛ ha wɔbɔi sɔɔmɔ ni wɔbaayasɔmɔ yɛ maŋ kroko nɔ lɛ he susumɔ, shi mishashao shi fioo ejaakɛ misusu akɛ mɔ ko tamɔ mi nyɛŋ atsu nitsumɔ nɛɛ.” Fɛɛ sɛɛ lɛ, amɛbɔ mɔdɛŋ akɛ amɛbaashɛ oti nɛɛ he. Knut wie akɛ: “Wɔhɔ̃ɔ wɔshĩa lɛ, ni bɔni afee ni wɔto shika lɛ, wɔyahi mimami masɛi. Sɛɛ mli lɛ, bɔni afee ni wɔna bɔ ni nibii baaya lɛ aha kɛ́ wɔyasɔmɔ yɛ maŋ kroko nɔ lɛ, wɔshi kɛtee asafo ko ni awieɔ Blɔfo yɛ mli lɛ mli yɛ Bergen, ni wɔyahi Lisbeth mami masɛi.” Etsɛɛɛ ni Knut kɛ Lisbeth nu he akɛ amɛfee klalo agbɛnɛ akɛ amɛbaayasɔmɔ yɛ maŋ kroko nɔ—amɛtee Uganda. Daa afi lɛ, amɛkuɔ amɛsɛɛ kɛyaa Norway ni amɛyatsuɔ nii nyɔji enyɔ. Enɛ haa amɛnáa shika ni fa bɔ ni amɛbaanyɛ amɛkɛkwɛ amɛhe yɛ afi lɛ mli, koni amɛkɛ amɛbe fɛɛ ashiɛ yɛ Uganda.

Te nibii anaa yakpa ha mɛi ni kɛ amɛhe shã afɔle nɛɛ tɛŋŋ? Roald kɛɛ akɛ: “Wɔnáa be babaoo wɔhaa wɔhe akɛ weku yɛ biɛ fe beni wɔyɔɔ Bergen lɛ. Wɔweku lɛ efee ekome waa. Eŋɔɔ wɔnaa waa akɛ wekukpaa ni yɔɔ wɔbii lɛ kɛ Yehowa teŋ lɛ mli ewa.” Ekɛfata he akɛ: “Agbɛnɛ hu, wɔsusuuu heloonaa nibii ahe pii dɔŋŋ. Asomoaŋ amɛhe ehiaaa tamɔ bɔ ni wɔsusu lɛ.”

 Elsebeth na akɛ esa akɛ ekase wiemɔ kroko. Mɛni hewɔ? Ejaakɛ akrowa ko ni atsɛɔ lɛ Karasjok, ni yɔɔ Sami lɛ fata Lakselv Asafo lɛ shikpɔŋkuku lɛ he—ni mɛi ni yɔɔ jɛmɛ lɛ ji mɛi ni jɛ Norway, Sweden, Finland, kɛ Russia kooyigbɛ maji lɛ amli. No hewɔ lɛ, bɔni afee ni Elsebeth anyɛ ashiɛ eha mɛi nɛɛ, ekase Sami wiemɔ lɛ. Amrɔ nɛɛ, enyɛɔ ekɛ mɛi gbaa sane bɔ ni sa yɛ nakai wiemɔ lɛ mli. Ani eyɛ miishɛɛ yɛ shikpɔŋkuku hee nɛɛ mli? Ekɛ miishɛɛ kɛɛ akɛ: “Mikɛ mɛi ekpaa sɔŋŋ miikase Biblia lɛ. Nɛgbɛ ekoŋŋ misumɔɔ ni mahi fe biɛ!”

Fabian, ni amrɔ nɛɛ eesɔmɔ akɛ gbɛgbalɔ kɛ asafoŋ sɔɔlɔ hu lɛ kɛɛ akɛ, lɛ kɛ Isabel ye amɛbua gbekɛbii etɛ komɛi ní yelikɛbuamɔ he miihia amɛ, ni yɔɔ amɛsafo hee lɛ mli lɛ ni amɛkɛ amɛhe wo asafoŋ nifeemɔi amli waa. Amrɔ nɛɛ mɛi etɛ lɛ fɛɛ kɛ ekãa miishiɛ. Abaptisi amɛteŋ mɛi enyɔ, ni amɛkɛ amɛhe wo gbɛgbalɔi awamɔ nitsumɔ lɛ mli yɛ March 2012. Gbekɛbii nɛɛ ateŋ mɔ kome ni kulɛ eeba shi yɛ mumɔŋ lɛ da Fabian kɛ Isabel shi akɛ amɛye amɛbua lɛ ‘ni efee ekãa ekoŋŋ.’ Fabian kɛɛ akɛ: “Beni ekɛɛ mi nakai lɛ, eta mitsuiŋ waa. Kɛ́ oye obua mɔ ko lɛ, onáa miishɛɛ waa!” Isabel kɛɛ akɛ: “Nitsumɔ nɛɛ eha ‘misa minaa mikwɛ, ni mina akɛ Yehowa hi.’” (Lala 34:9) Ekɛfata he akɛ: “Nɔ ni fe fɛɛ lɛ, sɔɔmɔ nitsumɔ lɛ ŋɔɔ waa yɛ biɛ!”

Amrɔ nɛɛ Marelius kɛ Kesia shihilɛ efee mlɛo, shi amɛyɛ miishɛɛ waa. Asafo ni yɔɔ Alta ní amɛshi kɛtee mli lɛ yɛ shiɛlɔi 41 bianɛ. Marelius kɛɛ akɛ: “Kɛ́ misusu wɔtsutsu shihilɛ lɛ he lɛ, minaa akɛ wɔshihilɛ etsake waa. Wɔdaa Yehowa shi akɛ wɔmiisɔmɔ lɛ akɛ gbɛgbalɔi yɛ biɛ. Nɔ ko bɛ ni haa mɔ mii shɛɔ ehe fe enɛ.” Kesia kɛfata he akɛ: “Mikase bɔ ni akɛ he fɔ̃ɔ Yehowa nɔ kwraa, ni ekwɛ wɔ jogbaŋŋ. Mina hu akɛ kɛ́ miyahi he ko ni kɛ miwekumɛi ateŋ jɛkɛ lɛ, ehaa mihiɛ sɔɔ be ni mikɛ amɛ yɔɔ he kome lɛ waa. Mishwako mihe kɔkɔɔkɔ yɛ wɔyiŋkpɛɛ lɛ he.”

Ni te nibii yaa nɔ kɛhaa Knut kɛ Lisbeth hu tɛŋŋ yɛ Uganda? Knut kɛɛ akɛ: “Ehe be dani wɔnyɛ wɔtsake wɔhe wɔwo jɛmɛ shihilɛ lɛ mli. Yɛ be kɛ beaŋ lɛ, wɔnáa nu, kane, kɛ musuŋ naagbai, shi wɔnyɛɔ wɔkɛ mɛi babaoo kaseɔ Biblia lɛ bɔ ni wɔsumɔɔ!” Lisbeth kɛɛ akɛ: ‘Shikpɔŋkukuji komɛi yɛ ni kɛ he ni wɔyɔɔ lɛ jɛkɛɛɛ ni ashiɛko sanekpakpa lɛ yɛ jɛmɛ dã. Fɛɛ sɛɛ lɛ, kɛ́ wɔtee jɛmɛ lɛ, wɔnaa mɛi ni kaneɔ Biblia lɛ, ni amɛbiɔ ni wɔtsɔɔ amɛ nii. Eyɛ miishɛɛ waa akɛ aaatsɔɔ humii ni tamɔ nɛkɛ lɛ Biblia mli anɔkwale lɛ!’

Kwɛ bɔ ni wɔ-Hiɛnyiɛlɔ, Kristo Yesu baaná miishɛɛ waa eha kɛ́ ena bɔ ni atsuɔ shiɛmɔ nitsumɔ ni eje shishi lɛ kɛ ekãa yɛ shikpɔŋ lɛ nɔ hei babaoo lɛ! Hɛɛ, Nyɔŋmɔ webii lɛ fɛɛ yɛ he miishɛɛ akɛ amɛaajɛ amɛsuɔmɔ mli amɛtsu Yesu fãmɔ akɛ “nyɛyaa ni nyɛyafea jeŋmaji fɛɛ mikaselɔi” lɛ he nii.—Mat. 28:19, 20.