BENI Jeŋ Ta I lɛ je shishi yɛ afi 1914 lɛ, ana yɛ je lɛŋ fɛɛ akɛ Biblia Kaselɔi lɛ kɛ amɛhe wooo maŋkwramɔŋ saji amli. (Yes. 2:2-4; Yoh. 18:36; Efe. 6:12) Te Nyɔŋmɔ tsuji ni yɔɔ Britain lɛ fee amɛnii amɛha tɛŋŋ?

Yɛ afi 1916 lɛ, awo mla ko yɛ Britain ni tsɔɔ akɛ, esa akɛ oshijafoi ni eye kɛjɛ afii 18 kɛyashi afii 40 lɛ kɛ amɛhe awo asraafoi anitsumɔ mli. Mla lɛ ŋmɛ gbɛ koni mɛi ni yɛ “amɛjamɔ loo amɛhenilee” hewɔ lɛ amɛsumɔŋ ni amɛkɛ amɛhe awo mli lɛ aye amɛhe. Nɔyeli lɛ to saneyelihei ni amɛkwɛ akɛ namɛi esa akɛ aha amɛye amɛhe kɛ he ni esa akɛ aŋmɛ amɛgbɛ kɛyashi.

Yɛ be fioo ko mli lɛ, awo Biblia Kaselɔi 40 tsuŋ, ni akɛ amɛteŋ mɛi 8 tee ta lɛ naa yɛ France. Enɛ tsirɛ nyɛmimɛi ni yɔɔ Britain lɛ ni amɛŋma wolo amɛyaha Maŋsɔɔlɔ Nukpa Herbert Asquith kɛtsɔɔ akɛ amɛkpɛlɛɛɛ tsuŋ ni awo amɛnyɛmimɛi lɛ nɔ, ni amɛŋma faikpamɔ wolo ko amɛfata he, ni mɛi 5,500 kɛ amɛwaonaa gbɛi wo shishi.

Wɔnine shɛ amɛniɛbɔɔ ko nɔ ákɛ akɛ mɛi kpaanyɔ ni akɛtee France lɛ miiya koni ayagbe amɛ akɛni amɛkpɛlɛɛɛ asraafoi anitsumɔ lɛ nɔ lɛ hewɔ. Shi beni ato nyɛmimɛi lɛ anaa ni abaatswara amɛ tũ lɛ, atsake yiŋkpɛɛ lɛ akɛ abaayawo amɛ tsuŋ afii nyɔŋma moŋ. Akɛ amɛ ku sɛɛ kɛtee England ni ayawo amɛ tsuŋ yɛ jɛi.

Beni ta lɛ yaa nɔ lɛ, afã koni hii ni ebote gbalashihilɛ mli hu kɛ amɛhe awo ta lɛ mli. Be ko lɛ, aye sane ko yɛ Manchester, yɛ England, ni mɔ ni asãmã lɛ ji Henry Hudson, ni eji datrɛfonyo kɛ Biblia Kaselɔ. Yɛ August 3, 1916 lɛ, saneyelihe lɛ bua akɛ eekpoo asraafoi anitsumɔ lɛ, kɛkɛ ni agbe lɛ shika gbele, ni akɛ lɛ yaha asraafoi lɛ. Yɛ nakai be lɛ mli nɔŋŋ lɛ, aye nyɛmi kroko hu sane yɛ Edinburgh, yɛ Scotland. Atsɛɔ lɛ James Frederick Scott, ni eji gbɛgbalɔ ko ni eye afii 25, ni ana akɛ eyeɔ bem. Kojolɔ lɛ saa tsɛ sane lɛ sɛɛ, shi sɛɛ mli lɛ eŋmɛɛ he koni eyaye nyɛmi kroko sane yɛ London. Mɔ ni sane ni ayaye nɛɛ ji nyɛmi nuu ko ni atsɛɔ lɛ Herbert Kipps, ni akɛɛ eyeɔ fɔ, agbe lɛ shika gbele, ni akɛ lɛ yaha asraafoi lɛ.

Beni shɛɔ September 1916 lɛ, nyɛmimɛi hii 264 ebi ni ajie amɛ kɛjɛ asraafoi anitsumɔ lɛ mli. Akpɛlɛ nɔ aha amɛteŋ mɛi 5, aha amɛyi 154 yatsu nitsumɔ ni wa, aha mɛi 23 yatsu asraafoi anitsumɔ ni biii ni amɛkɛ amɛhe awo ta mli, akɛ mɛi 82 yaha asraafoi lɛ, ni awo mɛi komɛi hu tsuŋ akɛni amɛtsuuu nɔ ni akɛɛ amɛfee lɛ hewɔ. Maŋbii lɛ te shi amɛwo bɔ ni akɛ hii nɛɛ ye aha lɛ, no hewɔ lɛ nɔyeli lɛ jie amɛ kɛjɛ asraafoi atsuŋwoohe lɛ kɛtee nsarai ni ahaa maŋbii tsuɔ nii yɛ mli lɛ amli.

 Aha Edgar Clay kɛ Pryce Hughes yafata mɛi komɛi ahe kɛtswa kpoku kɛtsi nu naa yɛ Wales. Ni akɛ Herbert Senior, ni ji mɛi kpaanyɔ ni akɛ amɛ jɛ France kɛba lɛ ateŋ mɔ kome lɛ tee Wakefield Tsuŋwoohe ni yɔɔ Yorkshire lɛ. Mɛi krokomɛi hu tsu nii dɛŋdɛŋ yɛ Dartmoor Tsuŋwoohe lɛ, ni amɛbafee mɛi ni fa fe fɛɛ ni ekpɛlɛɛɛ asraafoi anitsumɔ nɔ. Sɛɛ mli lɛ, Pryce Hughes yasɔmɔ akɛ Britain nitsumɔhe nine lɛ nɔkwɛlɔ.

Awa Frank Platt, ni eji Biblia Kaselɔ ko ni kpɛlɛ akɛ ebaatsu asraafoi anitsumɔ ni biii ni akɛ he awo ta mli lɛ yi waa be kplaŋŋ beni akɛɛ ekɛ ehe awo ta lɛ mli ni ekpɛlɛɛɛ lɛ. Asraafoi lɛ wa Atkinson Padgett, ni kase anɔkwale lɛ beni ekɛ ehe wo asraafoi anitsumɔ lɛ mli etsɛɛɛ lɛ hu yi waa, akɛni ekɛɛ ekɛ ehe wooo ta lɛ mli lɛ hewɔ.

Eyɛ mli akɛ ekolɛ nyɛmimɛi ni hi shi aaafee afii 100 ni eho nɛ lɛ nuuu nɔ hewɔ ni esaaa akɛ Kristofoi kɛ amɛhe woɔ maŋkwramɔŋ saji amli lɛ shishi jogbaŋŋ moŋ, shi amɛbɔ mɔdɛŋ akɛ amɛbaasa Yehowa Nyɔŋmɔ hiɛ. Mɛi ni atsĩ amɛ tã yɛ amaniɛbɔɔ nɛɛ mli lɛ kɛ amɛhe wooo maŋkwramɔŋ saji amli, ni enɛ ji nɔkwɛmɔnɔ kpakpa, titri lɛ yɛ “kaa ŋmɛlɛtswaa” mli. (Kpoj. 3:10)—Ajie kɛjɛ wɔnitoohe lɛ yɛ Britain.